Taano ta Dai Magibo kan mga Tawo na Makipagkatuninungan sa Kada Saro?—Ano an Sinasabi kan Bibliya?

Puon pa kaidto, dai talaga naitatao kan mga lider kan mga nasyon asin kan internasyonal na mga organisasyon an katuninungan sa kinaban. Ngunyan, mas dakul an nangyayaring madahas na ralaban puon kan matapos an World War II. Mga duwang bilyon na tawo—na 25 porsiyento kan populasyon sa kinaban—an nakaistar sa mga lugar na may nangyayaring ralaban.

Taano ta dai kayang makamtan kan mga tawo an katuninungan? Ano an sinasabi kan Bibliya?

Tulong rason kun taano ta dai kayang makamtan kan mga tawo an katuninungan

1. 1. An mga tawo igwa nin mga ugali na nagpupugol sa sainda na magibo dawa an pakikipagkatuninungan sa iba. Ihinula kan Bibliya na sa panahon ta ngunyan, “an mga tawo magigin interesado na sana sa sadiri nindang kapakanan, mamumuton sa kuwarta, mahambog, mapalangkaw, . . . bakong maimbod, . . . habo nin ano man na kasunduan, . . . daing pagpupugol sa sadiri, maringis, . . . matagas an payo, orgulyoso.”—2 Timoteo 3:2-4.

2. 2. Dai kaya kan mga tawo, indibidwal man o grupo, na solusyunan an saindang mga problema na mayo an tabang kan saindang Kaglalang, an Diyos na Jehova.a Sinasabi kan Bibliya na “bako para sa tawong naglalakaw dawa an giyahan an sadiring lakad niya.”—Jeremias 10:23.

3. 3. An kinaban nasa impluwensiya nin sarong makapangyarihan asin maraot na tagapamahala, si Satanas na Diyablo, “na nanglalagalag sa bilog na daga.” (Kapahayagan 12:9) Sagkod na “an bilog na kinaban nasa kapangyarihan kan saro na maraot,” dai matatapos an giyera asin ralaban.—1 Juan 5:19.

Siisay an makakatao nin katuninungan?

Sinisigurado sa sato kan Bibliya na magkakaigwa nin katuninungan, bako dahil sa paghihinguwa kan mga tawo, kundi dahil itatao iyan nin Diyos.

• “‘Huli ta aram kong marhay kun ano an gusto kong gibuhon para sa saindo,’ an sabi ni Jehova, ‘an tawan kamo nin katuninungan, asin bakong kapahamakan, tanganing magkaigwa kamo nin magayon na puturo asin paglaom.’”—Jeremias 29:11.

Paano uutubon nin Diyos an panugang iyan? An “Diyos na nagtatao nin katuninungan, rurunuton . . . si Satanas.” (Roma 16:20) Gagamiton nin Diyos an sarong langitnon na gobyerno, na inaapod kan Bibliya na “Kahadian nin Diyos,” para itao an katuninungan sa bilog na kinaban. (Lucas 4:43) Sa pamamahala ni Jesu-Cristo, an Hadi kan Kahadian na iyan, tutukduan an mga tawo kun paano mamumuhay nin matuninong.—Isaias 9:6, 7.

• Para sa dagdag na impormasyon, basahon an artikulong “Ano ang Gagawin ng Kaharian ng Diyos?”