Gastos kan Kinaban sa Puwersa Militar Labi Nang $2 Trilyon—Ano an Sinasabi kan Bibliya?

Kan 2022, nairekord an pinakahalangkaw na ginastos para sa puwersa militar kan mga gobyerno sa bilog na kinaban na uminabot nin 2.24 trilyon na dolyar (U.S.), partikularmente na huli sa pag-atake kan Russia sa Ukraine. Sigun sa report kan Stockholm International Peace Research Institute (SIPRI) na ilinuwas kan Abril 2023, durante kan taon 2022:

• An gastos kan Europa sa puwersa militar “luminangkaw nin 13 porsiyento sa taon na iyan, na iyo an pinakadakulang paglangkaw sa laog nin sarong taon sa kabilugan na gastos kan mga nasyon sa Europa puon kan matapos an cold war.”

• “Luminangkaw an gastos [kan Russia] nin mga 9.2 porsiyento, kaya hali sa panglima nagi na sindang pantulo sa pinakadakulang maggasto sa kinaban.”

• An Estados Unidos iyo pa man giraray an nanginginutan sa paggastos nin dakula pag-abot sa puwersa militar, huling “sainda an 39 porsiyento kan gastos sa puwersa militar kan kinaban.”

“An padagos na pagparalangkaw kan gastos sa puwersa militar sa bilog na kinaban kaining mga nakaaging taon senyales na nabubuhay kita sa mas lalong daing kasiguraduhan na kinaban,” an sabi ni Dr. Nan Tian, coauthor kan report kan SIPRI.

Kaidto pa, sinasabi na kan Bibliya an nangyayari ngunyan na grabeng tensiyon sa pag-ultanan kan makapangyarihan na mga nasyon sa kinaban asin sinasabi kaiyan an solamenteng paglaom para makamtan an katuninungan.

Ihinula an paggrabe kan mga ralaban sa militar

• An panahon na kinabubuhayan ta inaapod kan Bibliya na “panahon kan katapusan.”—Daniel 8:19.

• Sinabi sa libro nin Daniel na sa panahon na iyan, igwa nin duwang pambilog na kinaban na kapangyarihan na madinaugan. An duwang iyan ‘matinuklangan,’ o malabanan, sa kada saro para magin pinakamakapangyarihan. Sa pakikilaban ninda, mangangaipo sinda nin dakulang “kayamanan,” o gastos.—Daniel 11:40, 42, 43.

Para sa urog pang impormasyon manungod sa interesanteng propesiyang ini sa Bibliya, hilingon an video na Nautob na Propesiya—Daniel Kapitulo 11.

Kun paano makakamtan an tunay na katuninungan

• Sinasabi kan Bibliya na sasalidahan nin Diyos an mga gobyerno nin tawo. An Diyos “maestablisar nin sarong kahadian na dai nuarin man malalaglag. Asin an kahadian na ini dai itatao sa arin man na ibang banwaan. Rurunuton kaini asin tatapuson an gabos na kahadian na iyan, asin ini sana an magdadanay sagkod lamang.”—Daniel 2:44.

• Dai mahahaloy, gigibuhon kan Diyos na Jehovaa an dai kayang gibuhon kan mga tawo—pangyarihon an tunay asin nagdadanay na katuninungan. Paano? Paagi sa saiyang Kahadian sa langit, hahalion niya an gabos na armas asin tatapuson an kadahasan.—Salmo 46:8, 9.

Para sa urog pang impormasyon manungod sa gigibuhon kan Kahadian nin Diyos, basahon an artikulong “‘Mamamayani ang Kapayapaan’ sa Ilalim ng Kaharian ng Diyos.”