Labanan an Pakamati na Nagsosolo Paagi sa Pakikiamigo—Kun Paano Makakatabang an Bibliya

Kan 2023, an pakikipaglaban sa pakamating nagsosolo nagin priyoridad kan mga eksperto sa salud sa bilog na kinaban. Manggagana daw kita sa laban na iyan?

• “An pakamating nagsosolo asin pagigin napapasuway puwedeng makadanyar na marhay sa satong salud asin kaugmahan,” an sabi ni Dr. Vivek Murthy, sarong surgeon general sa U.S. Pero sinabi niya pa: “May magigibo kita para labanan iyan.” Paano? “Paagi sa paggibo nin saradit na lakdang kada aldaw na makakapakusog sa satong relasyon sa iba.”a

An pakamating nagsosolo bako lang resulta nin pagigin napapasuway sa iba. Puwedeng makamati kaiyan an iba dawa dakul na tawo an nasa palibot ninda. Ano man an dahilan kaya namamatian tang nagsosolo kita, matatabangan kita kan Bibliya. Igwa iyan nin praktikal na mga suhestiyon na makakatabang sa sato na malabanan an pakamating nagsosolo paagi sa pagkaigwa nin mga amigo asin pagpakusog kan relasyon ta sa sainda.

Mga prinsipyo sa Bibliya na makakatabang

Pauswagon an kakayahan sa pakikikomunikar. Kaiba diyan bako lang an pagsabi kan mga namamatian mo kundi pati man an pagigin marahay na paradangog. Mantang mas nagpapahiling ka nin interes sa iba, mas nagkukusog man an relasyon mo sa sainda.

• Prinsipyo sa Bibliya: ‘Tawan nindo nin atensiyon bako sana an sadiri nindong kapakanan, kundi an kapakanan man kan iba.’—Filipos 2:4.

Makipag-amigo sa manlain-lain na klase nin tawo. Makipag-amigo sa mga mas maedad o mas hoben sa saimo o sa mga iba an kultura o nasyonalidad.

• Prinsipyo sa Bibliya: “Buksan . . . nindo nin lubos an saindong mga puso.”—2 Corinto 6:13.

Para sa dagdag na impormasyon sa kun paano kita magkakaigwa nin dayupot na mga pakikiamigo, basahon an artikulong “Sinasapatan ang Ating Masidhing Pagnanais na Makipagkaibigan.”