An Kariribukan sa Pulitika Kautuban kan Propesiya sa Bibliya

An mga tawo ngunyan dai nagkakauruyon pag-abot sa mga isyu sa pulitika. Dai sinda nag-uuyon sa mga ley na nakakaapektar sa pang-aroaldaw nindang buhay asin ipinipirit ninda an saindang mga opinyon mapadapit diyan. Sa gobyerno, an mga lehislador saka an ibang mga opisyal, sa parati, nagkokorontrahan asin habong magpahunod. Dahil diyan, nagkakaigwa nin kariribukan sa pulitika asin nasasakitan an gobyerno na mamahala.

Pero, interesante nanggad an nangyayaring kariribukan sa pulitika sa Estados Unidos asin Britania (na sa parati inaapod man na United Kingdom). Taano? Huling ihinula kan Bibliya na magkakaigwa nin kariribukan sa duwang nasyon na ini asin sa panahon na iyan, mahiro an gobyerno nin Diyos sa langit tanganing lubos na baguhon an kamugtakan sa daga.

Kariribukan sa pulitika sa “huring kabtang kan mga aldaw”

Igwa nin interesanteng propesiya sa Bibliya na nakarekord sa libro nin Daniel. Sa propesiyang ini, ihinayag nin Diyos “kun ano an mangyayari sa huring kabtang kan mga aldaw,” na nanunungod sa panahon na magkakaigwa nin dakulang pagbabago sa kasaysayan nin tawo.—Daniel 2:28.

An propesiyang ini sa Bibliya itinao nin Diyos sa hadi kan Babilonya paagi sa sarong pangaturugan. Sa pangaturugan na iyan, nakahiling an hadi nin sarong dakulaon na imahen na gibo sa manlain-lain na metal. Dai nahaloy, ipinaliwanag ni propeta Daniel na puon sa payo sagkod sa bitis, an imahen nagrerepresentar sa mga pambilog na kinaban na kapangyarihan na malataw dangan mabagsak sa bilog na kasaysayan nin tawo.a Sa kahuri-hurihi, biyong narunot an imahen kan tamaan ini nin sarong gapo na nagrerepresentar sa sarong Kahadian, o sarong gobyerno, na inestablisar nin Diyos.—Daniel 2:36-45.

Uyon sa propesiyang ini, sasalidahan kan gobyerno nin Diyos an gabos na gobyerno nin tawo. An Kahadian na ini iyo mismo an itinukdo ni Jesus na ipamibi kan saiyang mga parasunod kan sabihon niyang: “Dumatong lugod an Kahadian mo.”—Mateo 6:10.

Pero sain sa propesiyang ini kan Bibliya sinabi na magkakaigwa nin kariribukan sa pulitika? Mangnuhon na an mga bitis kan imahen “may mga parteng lansang asin su iba pang mga parte dalipay.” (Daniel 2:33) Ibang-iba an pagkagibo kaiyan ta an ibang parte kan imahen gibo sa saro sanang klase nin metal. Ipinapahiling kaiyan na magkakaigwa nin sarong pambilog na kinaban na kapangyarihan na napapalain sa iba. Paano? Sinasabi kan propesiya ni Daniel:

Uyon sa propesiya, an pambilog na kinaban na kapangyarihan na irinerepresentar kan mga bitis magkakaigwa nin kariribukan sa pulitika. An kusog kaiyan papaluyahon kan mga tawong sakop man sana kaiyan.

Nauutob na ngunyan an propesiya ni Daniel

An mga bitis kan imahen nagrerepresentar sa nangingibabaw na pambilog na kinaban na kapangyarihan ngunyan, an alyansa kan Estados Unidos asin Britania. Paano iyan pinapatunayan kan mga pangyayari ngunyan?

An mga bitis kan imahen pinagsalak na lansang asin dalipay, sarong kumbinasyon na talagang maluya. (Daniel 2:42) Sa ngunyan, minaluya an kapangyarihan kan Estados Unidos asin Britania huling nagkakabaranga an mga tawong nasasakupan kaiyan. Halimbawa, nagkokorontrahan an mga grupo na nakaistar mismo sa mga nasyon na iyan. Saro pa, may kadahasan sindang nagpoprotesta para ipakipaglaban an mga deretso ninda. An mga pinili nindang opisyal sa parati dai nagkakauruyon sa pagresolber sa manlain-lain na isyu. Huling may pagkabaranga an mga tawong nasasakupan ninda, sa parati dai kayang iimplementar kan duwang gobyernong ini an mga palisiya kaini.

Aramon ta pa an kahulugan kan nagkapirang detalye kan hula ni Daniel asin kun paano nauutob an mga iyan ngunyan:

Propesiya: “An kahadian mababanga, pero medyo magkakaigwa man iyan nin tagas nin lansang.”—Daniel 2:41.

Kahulugan: Dawa may pagkabaranga sa laog kan gobyerno kan Estados Unidos saka Britania, napapagdanay kan mga ini na makusog an saindang puwersa militar. Huli kaiyan, kaya nindang gumibo nin mga bagay na nakakaapektar sa bilog na kinaban. Kaya may awtoridad sinda na kasingtagas nin lansang.

Kautuban

Sa listahan kan mga ginastos kan mga nasyon para sa militar kan 2023, mahihiling na mas dakula an pinagsarong gastos kan Estados Unidos saka kan United Kingdom kumpara sa ginastos kan suminunod na 12 nasyon sa listahan.—Stockholm International Peace Research Institute.

“An relasyon kan Estados Unidos asin United Kingdom para protektaran saka idepensa an saindang nasyon . . . iyo an nagin pinakamakusog na pag-ibanan nin duwang nasyon na naggagamit nin pinakabagong teknolohiya asin mga ideya . . . Nagtitinabangan kami, nagkakasaro kami, magkasurog kami.”—Strategic Command, U.K. Ministry of Defence, Abril 2024.

Propesiya: “Asin kun paanong may mga parteng lansang asin may mga parteng dalipay su mga muro sa bitis, an kahadian man magkakaigwa nin parteng makusog asin nin parteng maluya.”—Daniel 2:42.

Kahulugan: Dawa may makusog na puwersa militar an Estados Unidos asin Britania, dai ninda nagigibo an gabos na gusto nindang gibuhon huli sa sistema kan gobyerno ninda. Pag dai inuyunan kan kadaklan an saindang mga plano, nasasakitan sinda na isagibo an mga iyan.

Kautuban

“Uyon sa mga eksperto sa pulitika, nasasakitan an Estados Unidos na gibuhon an mga pighihingako kaining gibuhon para sa gabos na iba pang nasyon huli kan pagkabaranga sa gobyerno kan Amerika, halimbawa kun manungod sa seguridad asin negosyo.”—“The Wall Street Journal.”

“Huli sa mga problema sa pulitika sa Britania na dai pa kasuarin man nangyari, nababanga an atensiyon kan mga pulitiko. Bilang resulta, dai nagigibo kan mga nagseserbi sa gobyerno an kinakaipuhan na mga pagbabago para tabangan an mga tawong nasasakupan ninda.”—Institute for Government.

Propesiya: “An mga iyan [an kahadian] masasalakan nin mga tawo; pero an mga ini dai madukot sa kada saro.”—Daniel 2:43, nota sa ibaba.

Kahulugan: Sa demokratikong mga nasyon, may impluwensiya sa mga nangyayari sa gobyerno an ordinaryong mga tawo. Pero dahil sa impluwensiyang iyan, dai lubos na napapauyunan an mga opisyal o an mga botante.

Kautuban

“Sa ngunyan, kadaklan sa mga Amerikano negatibong marhay an paghiling sa pulitika asin sa mga pulitiko.”—Pew Research Center.

“Mas nagluya pa ngunyan an pagtitiwala kan mga Britano sa sistema kan gobyerno asin sa mga pulitiko kumpara kan nakaaging 50 taon.”—“National Centre for Social Research.”

Kun paano mauutob an propesiya ni Daniel sa maabot na panahon

Uyon sa propesiya ni Daniel, an alyansa kan Estados Unidos saka Britania iyo an nangingibabaw na pambilog na kinaban na kapangyarihan sa panahon na sasalidahan kan Kahadian nin Diyos an gabos na gobyerno.—Daniel 2:44.

Sa sarong propesiya manungod sa panahon man sanang iyan na mababasa sa libro nin Kapahayagan, ihinula kan Bibliya na titiripunon “an mga hadi sa bilog na daga” para makipaglaban sa Diyos na Jehovab sa giyera nin Armagedon, an “giyera kan dakulang aldaw kan Diyos na Makakamhan sa Gabos.” (Kapahayagan 16:14, 16; 19:19-21) Sa giyerang ini, lalaglagon ni Jehova an gabos na gobyerno nin tawo. Bilang resulta, mayo na nin matatadang ano man na kabtang kan pambilog na kinaban na kapangyarihan na irinerepresentar kan imahen sa propesiya ni Daniel.

Para sa dagdag na impormasyon, hilingon an artikulong “Ano an Ralaban nin Armagedon?”

Paano ka makikinabang sa propesiya ni Daniel manungod sa kariribukan sa pulitika?

Eksaktong ihinula kan Bibliya an nangyayari ngunyan na kariribukan sa pulitika sa Estados Unidos asin Britania. An pakaaram mo manungod diyan makakapabago kan pagmansay mo sa mga nangyayari ngunyan.

• Masasabutan mo kun taano ta gusto ni Jesus na an saiyang mga parasunod magin neutral sa pulitika kan kinaban na ini. (Juan 17:16) Asin dahil si Jesus an pinili nin Diyos na magin tagapamahala kan saiyang Kahadian, mas masasabutan mo man kun taano ta sinabi niya: “An sakuyang Kahadian bakong kabtang kan kinaban na ini.”—Juan 18:36.

• Mapapakusog ka kan paglaom na madali nang baguhon kan Kahadian nin Diyos an gabos na bagay. Matao iyan nin mga bendisyon na ipinanuga nin Diyos sa katawuhan.—Kapahayagan 21:3, 4.

• Makakapagtiwala ka na magigin marahay an kamugtakan sa maabot, huling sigurado ka na an iriwal kan mga nasyon dai masagkod sa biyong pagkaraot kan daga.—Salmo 37:11, 29.

Ipinapahiling kan propesiya ni Daniel na an alyansa kan Estados Unidos saka Britania, na irinerepresentar kan mga bitis kan imahen, iyo na an pangultimong pambilog na kinaban na kapangyarihan nin tawo na mamamahala sa katawuhan. Sasalidahan iyan nin sarong perpektong gobyerno na mamamahala hali sa langit—an Kahadian nin Diyos!

Para sa dagdag na impormasyon manungod sa kun ano an gigibuhon kan Kahadian nin Diyos sa katawuhan, hilingon an video na Ano an Kahadian nin Diyos?