Kaipuhan Daw na Magin Kabilang Ka sa Sarong Relihiyon?

An simbag kan Bibliya

Iyo, huling gusto nin Diyos na magtiripon an mga tawo para magsamba. An Bibliya nagsasabi: “Isipon ta an kada saro sa katuyuhan na mamotibar an lambang saro na magpahiling nin pagkamuot asin marahay na mga gibo, na dai pinapabayaan an satuyang pagtiripon.”—Hebreo 10:24, 25, nota sa ibaba.

Ipinahiling ni Jesus na an saiyang mga parasunod mabilog nin sarong organisadong grupo kan sabihon niya sa sainda: “Paagi kaini, maaaraman kan gabos na kamo sakuyang mga disipulo—kun igwa kamo nin pagkamuot sa lambang saro.” (Juan 13:35) Para maipahiling an pagkamuot na ini, an mga disipulo ni Cristo kaipuhan na makiasosyar sa mga kapagtubod ninda. Oorganisaron sinda na magin mga kongregasyon na matiripon nin regular para magsamba. (1 Corinto 16:19) Sinda gabos magigin sarong pambilog na kinaban na kasararuan nin magturugang.—1 Pedro 2:17.

Bako sanang pagigin kabilang sa sarong relihiyon an kaipuhan

Dawa ngani ipinapahiling kan Bibliya na dapat na magtiripon an mga tawo para sumamba sa Diyos, mayo iyan itinutukdo na mapapaugma nin saro an Diyos dahil sana ta miyembro siya nin sarong relihiyon. Tanganing uyunan nin Diyos, an relihiyon nin saro dapat na igwa nin epekto sa aroaldaw na buhay niya. Halimbawa, sinasabi kan Bibliya: “An relihiyon na malinig saka daing digta sa paghiling kan satuyang Diyos asin Ama iyo ini: an pag-ataman sa mga ilo saka babaying balo na nagsasakit, asin an pagpadanay sa sadiri na daing digta kan kinaban.”—Santiago 1:27, nota sa ibaba.