Pagmentenar sa Satong mga Kingdom Hall

“Gustuhon ko an Kingdom Hall mi!” an sabi ni Nicole, sarong hoben na sister sa Colombia. “Nakakaibanan ko diyan an sakong espirituwal na pamilya.” Arog man daw kaiyan an namamati mo?

Sa bilog na kinaban, nagtitiripon an mga Saksi ni Jehova sa mga 63,000 na Kingdom Hall. Komportable tang naisasagibo diyan an pagsamba sa Diyos. Pero urog pa diyan an nagigibo kan mga edipisyong iyan. Sinabi ni David, sarong regular payunir sa Colombia: “Mas nagigin kaakit-akit an satong itinutukdo dahil sa satong Kingdom Hall. Dakul na bisita an napapangalas kun paano ta iyan napapagdanay na magayon.” Dai iyan nagkataon sana. Hinihinguwa ta na pirming magin malinig an satong mga Kingdom Hall asin mentenaron iyan. Paano?

Paano Inoorganisar an Pagmentenar?

An mga kongregasyon na naggagamit kan Kingdom Hall iyo an may responsabilidad sa pagmentenar kaiyan. Para magibo iyan, regular na linilinigan kan mga tugang an saindang Kingdom Hall. Ginigibo man ninda an preventive maintenance saka saradit na paghirahay.

Tanganing matabangan an mga kongregasyon sa pagmentenar kan saindang Kingdom Hall, nag-aasignar an Local Design/Construction Department (LDC) nin mga brother para magin mga maintenance trainer. Anom sagkod sampulong Kingdom Hall an nakaasignar sa kada maintenance trainer. Binibisita niya an mga iyan asin sinasanay an mga parahayag sa kongregasyon kun paano ninda aatamanon an saindang Kingdom Hall. Kada tulong taon, ineebalwar niya an lambang edipisyo asin inaaram an mga problema manungod sa kaligtasan o problema sa pagmentenar.

Nagpapasalamat an satong mga tugang sa pagsasanay na itinatao kan mga maintenance trainer. Si Indhumathi, sarong sister sa India, an nagsabi: “Magayunon su training. Nakakaugmang manudan kun paano mapapagdanay na nasa marahay na kondisyon an Kingdom Hall mi.” Si Evans, sarong brother sa Kenya, an nagsabi: “Nanudan mi kun paano kami makakatipid paagi sa pagpakarhay sa saradit na problema bago pa iyan maglala.”

Pagbayad sa mga Gastos

An ginagastos taon-taon sa paggamit asin pagmentenar nin sarong Kingdom Hall puwedeng umabot sa ginatos sagkod rinibong dolyar,a depende sa lokasyon kaiyan, sa kun gurano na iyan kahaloy, asin kun pirang kongregasyon an naggagamit kaiyan. Paano nababayadan an mga gastos na iyan?

An pagmentenar kan mga Kingdom Hall sinusuportaran nin mga donasyon. Si Alexander, sarong brother sa Kazakhstan, nagpaliwanag: “Kinukua sa pondo an pambayad sa Internet, tubig asin kuryente. Diyan man kinukua an pambakal nin mga tisyu, gloves, suplay sa paglinig, saka pintura.” An ibang kontribusyon idinodonar sa pambilog na kinaban na gibuhon para magin pondo sa darakulang mga proyekto nin pagmentenar sa bilog na kinaban.

Darakulang mga Proyekto nin Pagmentenar

Kun an sarong Kingdom Hall may gigibuhon na pagmentenar na gagastusan sa laog nin duwa o tulong bulan, kokonsultahon kan mga elder an LDC maintenance trainer. Kun aprubaran kan LDC an proyekto, sa parati an pondo na gagamiton diyan hali sa mga donasyon sa pambilog na kinaban na gibuhon. Kan 2023 taon nin paglilingkod, 8,793 sa mga proyektong iyan an natapos, na nakagastos nin $76.6 milyon. Uni an duwa sa mga proyektong iyan.

Sa Angola, sarong Kingdom Hall na 15 taon nang nakatugdok an dakulon na nin problema. Kaipuhan nang ribayan an mga linya nin kuryente kaiyan, may mga gatak na an lanob, saka nagsabi an mga pagtaraid na may naglilipwas nang tubig diyan asin nakakaabot na sa mga harong ninda. Nag-organisar an LDC nin sarong proyekto tanganing ayuson an mga problemang iyan. Naggastos nin $9,285 sa proyektong iyan. Nagpasalamat an mga pagtaraid, asin napahanga sinda kun paano natapos an trabaho.

Sa Poland, may nagtuturo na hali sa atop kan sarong Kingdom Hall, asin raot nang marhay an karpet diyan saka dai na iyan puwedeng hirahayon. Sarong proyekto an inaprubaran kan LDC tanganing hirahayon an atop saka ribayan an karpet. Naggastos nin $9,757 sa proyektong iyan. Bilang resulta, dai na kaipuhan kan Kingdom Hall na iyan nin dakulang renovation sa laog nin pirang taon.

Pagmentenar na Nagpapamuraway ki Jehova

An gibuhon na pagmentenar dai sana nakakatipid kan mahalagang mga donasyon kundi nagtatao man iyan nin kaumawan ki Jehova. Si Shaun, sarong brother sa Tonga, nagsabi: “Dahil sa satong gibuhon na pagmentenar, nasasamba ta si Jehova sa sarong malinig, disente, saka maayos na Kingdom Hall na nagpapamidbid na marhay kan saiyang pangaran sa komunidad. Maugma tang iniimbitaran an mga tawo sa satong Kingdom Hall.”

Paano Ka Makakatabang?

Gabos kita puwedeng tumabang sa paglinig asin pagmentenar kan satong lugar nin pagsamba. Si Marino, sarong maintenance trainer sa Australia, nagsabi: “Gabos kita igwa nin kabtang sa magayunon na pribilehiyong atamanon an satong mga Kingdom Hall. Pag ginigibo ta iyan, dakula an nagigibo ta para matipid an idinusay na mga pondo asin para magamit sa kun sain iyan kaipuhan na marhay.”

Si Joel, sarong brother sa India, ikinakaugma an pagmentenar kan Kingdom Hall ninda. Sinabi niya: “Pag nagtatrabaho ako kaiba kan sakong mga tugang, naiimahinar ko an buhay sa bagong kinaban.” Si Nicole, na sinambit kasubago, nagsabi: “Dai pa sana nahahaloy, nagtabang ako sa pag-mop kan salog mantang pinapakarhay kan mga brother an nagtuturo sa banyo. Dawa bako man ako an nag-ayos kan raot sa banyo, nakatabang man ako para mayong maaksidente.”

Kun gusto mong magboluntaryo sa pagmentenar kan Kingdom Hall nindo, makipag-ulay sa mga elder sa kongregasyon nindo. Saro pa, an saimong mga donasyon nakakatabang sa pagmentenar bako lang kan Kingdom Hall nindo pati man kan mga Kingdom Hall sa bilog na kinaban. Puwede kang magdonar paagi sa mga donation box sa saindong Kingdom Hall o paagi sa donate.jw.org. Pinapasalamatan ming marhay an saimong pagigin bukas-palad.