An Buhay na Kontrolado nin Superstisyon
NASABATAN nindo an sarong tawo mantang pahale kamo sa harong. Nasingkog an moro kan saindong bitis sa sarong dakulang gapo. An sarong klase nin gamgam naghuni sa banggi. Igwa kamo nin paorootrong pangatorogan. Ini simple, dai nakakadanyar na mga pangyayari para sa dakol. Alagad para sa nagkapirang tawo sa Solnopan na Aprika, an mga ini puedeng mansayon na mga senyal, signos, o mensahe hale sa kinaban nin mga espiritu. Iniisip na may mangyayari magsalang prosperidad o kalamidad, depende sa senyal asin sa interpretasyon kaiyan.
Siempre, pinaniniwalaan man an mga superstisyon sa luwas nin Aprika. Sa ibong kan pamumuhay nin dakol na taon sa sarong sosyedad na opisyal na tinutubod an ateismo, makangangalas na dakol na tawo sa Tsina asin sa mga republika kan dating Unyon Sobyet an naniniwala pa man giraray sa mga superstisyon. Sa kinaban sa Solnopan, dakol an nagkokonsulta sa saindang horoskopo, kinatatakotan nin grabe an Biernes na ika-13 aldaw kan bulan, asin linilikayan an itom na mga ikos. Minamansay kan nagkapirang taga Harayong Amihanan an mga liwanag sa amihanan bilang signos nin guerra asin peste. Sa India, ikinaoolakit an AIDS kan mga tsuper sa trak na naniniwala na kaipuhan nindang makidorog tanganing magdanay na presko an hawak sa maharasahas na mga aldaw. Sa Hapon, naniniwala an mga trabahador sa tunel na may maraot na mangyayari kun maglaog an sarong babae sa tunel bago iyan matapos. Nagdadakol man an nagtutubod sa superstisyon sa propesyonal na isport. An sarong parakawat nin volleyball iinatribwir ngani an sunod-sunod na panggagana sa saiyang pagsulot nin itom na medyas imbes na puti. An lista daing katapusan.
Kumusta man kamo? Posible daw na kamo may sarong sekreto, dai ikapaliwanag na takot? Naaapektaran daw kamo nin sarong “paniniwala, sarong klase nin paniniwala, o kostumbre na garo baga mayo nin rasonableng paliwanag”? An saindong simbag an maghahayag, huli ta iyan an itinataong kahulogan kan sarong reperensia sa terminong “superstisyon.”
An sarong tawo na nagtotogot na maapektaran nin superstisyon an saiyang mga desisyon asin pan-aroaldaw na rutina nagtotogot na sia dominaron nin sarong bagay na dai man talaga nia nasasabotan. Madonong daw ini? Maninigo daw na magpakontrol kita sa siring na malibog asin posibleng maraot na impluwensia? An superstisyon daw sadit sanang kaluyahan o nakahahadit na peligro?