Nagigirumdoman daw Nindo?

Ikinaogma daw nindo an pagbasa kan dai pa sana nahahaloy na mga luwas kan An Torrengbantayan? Kun iyo, magigin interesante para sa saindo na girumdomon an minasunod:

◻ Taano ta makakokompiar kita sa pagpili ni Jehova nin mga indibiduwal na magiya sa saiyang banwaan?

Nagpipili si Jehova para sa nagkapirang paninimbagan nin mga indibiduwal na igwa kan mga kualidad na kaipuhan sa paggiya sa saiyang banwaan sa dalan na boot niang lakawan ninda sa sarong partikular na panahon.​—8/15, pahina 14.

◻ Ano an manonodan ta sa eksperyensia ni Jonas?

An saiyang sadiri sana an inisip ni Jonas asin bakong an iba. Makanonood kita ki Jonas paagi sa pagpadanay kan satong sadiri asin kan satong personal na mga saboot na segunda sana.​—8/15, pahina 19.

◻ Sa anong paagi masasabi na “an ngaran ni Jehova makosog na torre”? (Talinhaga 18:10)

An pagpaili sa ngaran nin Dios nangangahulogan nin pagtitiwala mismo ki Jehova. (Salmo 20:​1; 122:4) Iyan nangangahulogan nin pagsuportar sa saiyang soberaniya, pagsorog sa saiyang mga ley saka prinsipyo, pagtubod sa saiyang mga panuga, asin pagtao sa saiya nin dai nababangang debosyon. (Isaias 50:​10; Hebreo 11:6)​—9/1, pahina 10.

◻ Paano an paagi nin pagpatotoo ni Pablo sa atubangan nin mga dignitaryo nagtatao nin halimbawa para sa sato?

Sa pakipag-olay ki Hadeng Agripa, si Pablo naggamit nin paghusgar, na idinodoon an mga punto na pinagkaoyonan ninda ni Agripa. Kaagid kaiyan, maninigo na idoon niato an positibong mga aspekto kan maogmang bareta, na idinodoon an mga paglaom na pareho niato pinaniniwalaan. (1 Corinto 9:22)​—9/1, pahina 31.

◻ Siisay an nakikinabang sa pagpapasensia ni Jehova?

Huli sa pagpapasensia ni Jehova, minilyon pa ngonyan an natatawan kan oportunidad na maligtas sa nagdadangadang na “aldaw ni Jehova.” (2 Pedro 3:​9-​15) An saiyang pagpapasensia minatogot man sa lambang saro sa sato na ‘maghingoa na makamtan an satong kaligtasan na may takot asin pagtakig.’ (Filipos 2:12)​—9/15, pahina 20.

◻ Gurano kahalaga kan traduksion nin Biblia na Septuaginta?

An traduksion na ini nagkaigwa nin prominenteng kabtang sa pagpalakop kan kaaraman manongod ki Jehova Dios asin sa saiyang Kahadean kaiba si Jesu-Cristo bilang Hade. Paagi sa Septuaginta, ikinabugtak an mahalagang pundasyon para sa mga Judio na Griego an tataramon asin mga Hentil kan enot na siglo na umako kan maogmang bareta kan Kahadean.​—9/15, pahina 30.

◻ Ano an itinotokdo sa sato manongod sa Dios kan parabola kan aking gastador?

Enot, na si Jehova “maheherakon asin maugayon, maluway sa pagkaanggot asin mayaman sa mamomoton na kabootan asin katotoohan.” (Exodo 34:6) Ikaduwa, na sia “andam na magpatawad” kun an pagbago sa puso nagtatao nin basehan na magpaheling nin pagkaherak. (Salmo 86:5)​—10/1, pahina 12, 13.

◻ Noarin maootob an matoninong na mga kamugtakan na ipinanuga sa Isaias 65:​21-25?

Bilang nagkakasararong mga parasamba ki Jehova sa espirituwal na paraiso ngonyan, an mga linahidan asin an mga kabilang sa “ibang karnero” naeeksperyensiahan ngonyan an tao nin Dios na katoninongan. (Juan 10:16) Asin an siring na katoninongan makakaabot sagkod sa pisikal na Paraiso, kun ‘an boot nin Dios gibohon na sa bilog na daga, nin siring sa langit.’ Sa panahon na iyan lubos na maootob an mga tataramon ni propeta Isaias. (Mateo 6:10)​—10/15, pahina 24.

◻ Taano an mga Kristiano ta isineselebrar an mga anibersaryo nin kasal alagad an mga kumpleanyo dai?

Bakong negatibo an pagkaatubang kan Biblia sa pag-agom. Biyong pribadong bagay kun baga bobooton nin mga Kristiano na tawan nin atension an saindang anibersaryo nin kasal, na pinepensar an kagayagayahan kan okasyon na iyan asin an saindang desisyon na maghingoa para sa kapangganahan bilang mag-agom. Minsan siring, an yaon sa rekord kan Biblia iyo sana an mga pagselebrar nin kumpleanyo nin mga pagano, asin konektado iyan sa mga karingisan.​—10/15, pahina 30, 31.

◻ Sa ilustrasyon ni Pablo na nasusurat sa 1 Corinto 3:​12, 13, ano an irinerepresentar kan “kalayo,” asin ano an maninigong aramon nin gabos na Kristiano?

May kalayo na inaatubang niato gabos sa buhay​—an mga pagbalo sa satong pagtubod. (Juan 15:​20; Santiago 1:​2, 3) An gabos na tinotokdoan niato kan katotoohan mababalo. Kun maluyang klase an satong pagtokdo, tibaad magkaigwa nin makamomondong mga resulta, siring kan ipinatanid ni Pablo. (1 Corinto 3:15)​—11/1, pahina 11.

◻ Paano si Noe ‘naglakaw sa kaibanan kan tunay na Dios’? (Genesis 6:9)

Si Noe naglakaw sa kaibanan nin Dios sa bagay na ginibo nia an ipinagibo sa saiya nin Dios. Huli sa pagdusay kan saiyang buhay sa paggibo kan kabotan nin Dios, nagkaigwa si Noe nin mamomoton, liputok na relasyon sa Dios.​—11/15, pahina 10.

◻ Anong mga oportunidad an nakabukas para sa sato huli sa satong dai pakaaram kan eksaktong panahon na gigibohon an pamamalos nin Dios sa mga maraot?

Ini nagtatao sa sato kan oportunidad na patunayan na talagang namomotan niato si Jehova asin boot niatong maglakaw sa saiyang mga dalan sagkod lamang. Ipinaheheling man kaiyan na kita maimbod sa Dios asin nagtitiwala sa saiyang paagi nin pag-asikaso sa mga bagay. Apuera dian, ini nakatatabang na kita magdanay na mapagmato asin puka sa espirituwal. (Mateo 24:​42-​44)​—11/15, pahina 18.

◻ Ano an kahulogan kan pagtubod “sa ngaran kan Aki nin Dios”? (1 Juan 5:13)

Ini nangangahulogan nin pagkuyog sa gabos na togon ni Cristo, kaiba an saiyang togon na “magkaminorootmootan.” (Juan 15:​14, 17) An pagkamoot naghihingoang gumibo nin marahay sa iba. Hinahale kaiyan an gabos na rasyal, relihioso, asin sosyal na prehuwisyo.​—12/1, pahina 6, 7.

◻ Taano an Mga Saksi ni Jehova ta ‘ikinaoongis’? (Mateo 10:22)

An Mga Saksi ni Jehova ikinaongis nin bakong makatanosan sa iyo man sanang mga dahelan na an enot na mga Kristiano pinaglamag. Enot, an Mga Saksi ni Jehova isinasagibo an saindang relihiosong mga tinutubod sa mga paagi na minagibo sa sainda na ikinauuyam nin nagkapira. Ikaduwa, sinda nagin punteriya nin mga akusasyon na bakong totoo​—hayag na mga putik asin biribid na mga presentasyon kan saindang mga tinutubod.​—12/1, pahina 14.