Dai Pagdayaon an Saimong Sadiri Paagi sa Putik na Pangangatanosan

“ANO ining ginibo mo?” Iyan an hapot nin Dios ki Eva pagkatapos na magkakan ini hale sa ipinagbabawal na kahoy. “An halas—dinaya ako kaiyan kaya kuminakan ako,” an simbag nia. (Gen. 3:13) Si Satanas, an tusong halas na nag-impluwensia sa saiya na suwayon an Dios, kan huri inapod na “orihinal na halas, . . . na naglalagalag kan bilog na ineerokan na daga.”—Kap. 12:9.

Si Satanas ipinepresentar kan pagkasaysay sa Genesis bilang tuso asin saro na nag-iimbento nin mga kaputikan na may intension na dayaon an mga dai nagmamaan. Si Eva nagpadara nanggad sa pangloloko nia. Minsan siring, dai niato maninigong isipon na si Satanas sana an makakadaya sa sato. An Biblia nagpapatanid man dapit sa peligro nin ‘pagdaya sa satong sadiri paagi sa putik na pangangatanosan.’—Sant. 1:22.

An ideya na dadayaon niato an satong sadiri garo baga harayo nanggad na mangyari o imposible pa ngani. Minsan siring, an patanid na iyan nin Dios malinaw na itinao na igwa nin katuyohan. Kaya marahay na aramon niato kun paano niato puedeng madaya an satong sadiri asin kun anong klaseng putik na pangangatanosan an makakadaya sa sato. Sarong halimbawa sa Kasuratan an makakatabang sa sato.

Halimbawa nin mga Dinaya an Saindang Sadiri

Kan mga taon nin 537 B.C.E., si Cirong Dakula nin Persia nagpaluwas nin dekreto na an mga Judiong nakadistiero sa Babilonya magbalik sa Jerusalem asin itogdok liwat an templo. (Esd. 1:1, 2) Kan sunod na taon, kaoyon kan katuyohan ni Jehova, ibinugtak kan banwaan an mga pundasyon para sa bagong templo. An mga nagbaralik naggayagaya asin nag-omaw ki Jehova huli sa pagbendisyon nia sa enot na tangga kan importanteng proyektong ini. (Esd. 3:8, 10, 11) Alagad dai nahaloy, nagkaigwa nin pagkontra sa saindang pagtogdok liwat asin an banwaan pinangluyahan nin boot. (Esd. 4:4) Mga 15 taon pagkabalik ninda, ipinagbawal kan mga autoridad nin Persia an gabos na pagtogdok sa Jerusalem. Tanganing ipaotob an pagbabawal, nag-abot sa Jerusalem an mga opisyal nin rehion tanganing ‘papondohon [an mga Judio] paagi sa puersa nin mga armas.’—Esd. 4:21-24.

Mantang napapaatubang sa magabat na olang na ini, dinaya kan mga Judio an saindang sadiri paagi sa putik na pangangatanosan. “Dai pa nag-abot an panahon, an panahon kan harong ni Jehova, tangani na iyan itogdok,” an sabi ninda sa saindang sadiri. (Hag. 1:2) Nagkongklusyon sinda na dai gusto nin Dios na ikatogdok tolos an templo. Imbes na maghanap nin paagi na magibo an saiyang kabotan, binayaan ninda an saindang sagradong asignasyon asin nabangkag sa pagpakarhay kan sadiri nindang mga harong. An propeta nin Dios na si Haggeo deretso sa puntong naghapot sa sainda: “Panahon daw ini na kamo mismo mag-istar sa saindong mga harong na may mga entrepanyo, mantang an harong na ini [templo ni Jehova] raot?”—Hag. 1:4.

May naheheling daw kamong leksion sa halimbawang ini? An salang pagmansay sa iskedyul kan katuyohan nin Dios puedeng magin dahelan na malingawan niato an kahalagahan kan satong espirituwal na mga aktibidad asin malingling kita sa personal na mga intereses. Sa pag-ilustrar, imahinara na may hinahalat kang mga bisita. Huling inaantisipar an pagbisita ninda, tibaad magin sibot-sibot ka mantang inaasikaso an kinakaipuhan na mga gibohon sa harong may koneksion sa pagdagos ninda. Minsan siring, may nagpaisi sa saimo na maaatraso an mga bisita mo. Mapondo ka daw sa pagpreparar?

Pero, girumdomon na tinabangan ni Haggeo asin Zacarias an mga Judio na masabotan na gusto pa man giraray ni Jehova na tolos na ikatogdok liwat an templo. “Magmakosog kamo, kamo gabos sa daga, . . . asin magtrabaho kamo,” an sadol ni Haggeo. (Hag. 2:4) Kaipuhan nindang ipadagos an saindang gibohon, na may kompiansang susuportaran sinda kan espiritu nin Dios. (Zac. 4:6, 7) Makakatabang daw sa sato an halimbawang ini na malikayan an pagkaigwa nin salang mga kongklusyon manongod sa aldaw ni Jehova?—1 Cor. 10:11.

Salidahan an Putik na Pangangatanosan nin Toltol na Pag-iisip

Sa ikaduwang surat ni apostol Pedro, tinawan nia nin atension an iskedyul ni Jehova sa pag-establisar nin “bagong kalangitan asin sarong bagong daga.” (2 Ped. 3:13) Sinabi nia na may nagkapirang paraolog-olog na nagpalataw nin mga pagduda kun baga mainterbenir pa an Dios sa gibo-gibo nin mga tawo. Sinda salang nangatanosan na mayo nin mangyayari, na “an gabos na bagay nagpapadagos na pareho man sana poon kan kapinonan nin paglalang.” (2 Ped. 3:4) Gustong kontrahon ni Pedro an siring na salang pangangatanosan. Sia nagsurat: “Pinupukaw ko an saindong malinaw na abilidad sa pag-iisip paagi sa pagirumdom.” Ipinagirumdom nia sa mga kapwa Kristiano na sala an mga paraolog-olog. An Dios nag-interbenir na kaidto sa gibo-gibo nin mga tawo, na nagpaabot nin kapahapahamak na delubyo sa bilog na kinaban.—2 Ped. 3:1, 5-7.

Si Haggeo nagtao nin kaagid na sadol sa pinangluluyahan nin boot asin inaktibong mga Judio kan 520 B.C.E. Sinadol nia sinda: “Isentro nindo an saindong puso sa saindong mga dalan.” (Hag. 1:5) Tanganing pukawon an saindang kakayahan sa pag-iisip, ipinagirumdom nia sa saiyang mga kapwa parasamba an mga katuyohan asin panuga nin Dios kun dapit sa banwaan Nia. (Hag. 1:8; 2:4, 5) Dai nahaloy pagkatapos kan pagparigon na iyan sa boot, pinonan giraray an pagtogdok—sa ibong kan opisyal na pagbabawal. Sa giraray, prinobaran kan mga kaiwal na olangon an proyekto nin pagtogdok, alagad dai sinda nagin mapanggana. Hinale an pagbabawal, asin sa laog nin limang taon natapos an templo.—Esd. 6:14, 15; Hag. 1:14, 15.

Isentro an Satong Puso sa Satong mga Dalan

Sa heling daw nindo, arog kan mga Judio kan panahon ni Haggeo, puede kitang pangluyahan nin boot kun may mag-abot na mga kadepisilan? Kun mangyari iyan, tibaad masakitan kita na mapagdanay an satong kaigotan sa paghuhulit kan maogmang bareta. Alagad ano an puedeng magpaluya kan satong boot? Bueno, tibaad nasasakitan kita huli sa inhustisya kan sistemang ini nin mga bagay. Isip-isipa si Habacuc, na naghapot: “Sagkod nuarin ako maghahagad nin tabang bago mo dangogon, bago mo kami ililigtas sa kadahasan?” (Hab. 1:2, An Marahay na Bareta Biblia) Huli sa tibaad iniisip nin nagkapira na pag-atraso, puedeng mawara nin sarong Kristiano an saiyang pakamate nin pagkaapurado asin imbes tinatawan nia nin prioridad an komportableng pamumuhay. Naririsa mo daw na nangyayari iyan sa saimo? Kun sunodon niato an pangangatanosan na ini, dinadaya niato an satong sadiri. Mahalagang marhay nanggad na himateon niato an hatol sa Kasuratan na ‘isentro an satong puso sa satong mga dalan’ asin ‘pukawon an satong malinaw na abilidad sa pag-iisip’! Puede niatong hapoton an satong sadiri, ‘Dapat ko daw ipagngalas na mas naghahaloy kisa sa inasahan ko an maraot na sistemang ini nin mga bagay?’

Sarong Peryodo na Ihinula kan Biblia

Pumondo nguna asin isip-isipa an mga tataramon ni Jesus manongod sa pagtatapos kan sistemang ini nin mga bagay. An pagkasaysay ni Marcos sa hula ni Jesus dapit sa huring mga aldaw naghahayag na paorootro kitang sinasadol ni Jesus na magdanay na alisto. (Mar. 13:33-37) Mababasa niato an kaagid na patanid sa makahulang paglaladawan kan dakulang aldaw ni Jehova sa Armagedon. (Kap. 16:14-16) Taano ta paorootro an mga patanid? Kaipuhan an siring na mga pagirumdom kun an mga tawo namemeligrong mawaran kan saindang pakamate nin pagkaapurado bilang resulta nin paghalat sa garo baga pinalawig na peryodo.

Iinilustrar ni Jesus na kaipuhan kitang padagos na magin mapagbantay mantang hinahalat niato an katapusan kan sistema nin mga bagay. Sinambit nia an dapit sa sarong kagharong na hinabonan an harong. Paano nia kutana nalikayan na mahabonan? Paagi sa pagdanay na puka sa bilog na banggi. Tinapos ni Jesus an ilustrasyon na ini paagi sa paghatol sa sato: ‘Magin kamong andam, huli ta sa oras na dai nindo pinaghohona, an Aki nin tawo madatong.’—Mat. 24:43, 44.

Ipinapaheling kan ilustrasyon na iyan an pangangaipo na magin andam na maghalat, dawa sa medyo harohalawig na panahon. Dai nanggad kita maninigong maghadit nin sobra na tibaad mas maghaloy kisa sa inaasahan niato an maraot na sistemang ini. Dai niato maninigong dayaon an satong sadiri paagi sa putik na pangangatanosan na ‘dai pa nag-abot an panahon ni Jehova.’ An siring na kaisipan mapaluya kan satong pagmawot na ihulit an maogmang bareta kan Kahadean.—Roma 12:11.

Haleon an Putik na Pangangatanosan

Kun dapit sa putik na pangangatanosan, an prinsipyo sa Galacia 6:7 minaaplikar: “Dai kamo magpalagalag . . . Ano man an itinatanom nin tawo, ini man an saiyang aanihon.” Kun an sarong lote papabayaan na dai natanoman, iyan madaling tutuboan nin mga doot. Kaagid kaiyan, kun dai niato pupukawon an satong malinaw na abilidad nin pag-iisip, an putik na mga pangangatanosan puedeng makagamot sa satong isip. Halimbawa, tibaad sabihon niato sa satong sadiri, ‘Daing duda na maabot an aldaw ni Jehova—alagad bakong tolos-tolos.’ An siring na pagbago sa mga inaasahan puedeng magresulta sa pagigin bakong maigot sa teokratikong mga aktibidad. Maabot an panahon na mapapabayaan na niato an satong rutina sa espirituwal. Dangan mabibigla kita sa pag-abot kan aldaw ni Jehova.—2 Ped. 3:10.

Minsan siring, dai makakagamot sa satong isip an putik na pangangatanosan kun danay niatong pinapatunayan sa satong sadiri “kun ano an marahay asin inaako patin sangkap na kabotan nin Dios.” (Roma 12:2) An regular na pagbasa sa Tataramon nin Dios an saro sa pinakamakakatabang tanganing magibo ini. Puedeng pakosogon kan Kasuratan an satong kombiksion na si Jehova pirmeng naghihiro sa itinalaan na panahon.—Hab. 2:3.

An satong pag-adal, pamimibi, dayaday na pag-atender sa pagtiripon, asin paghuhulit, pati an mamomoton na mga gibo nin kabootan, makakatabang sa sato na ‘papagdanayon na harani sa isip an presensia kan aldaw ni Jehova.’ (2 Ped. 3:11, 12) Maririsa ni Jehova an dai niato pagbarobago sa paggibo kaiyan. Ini an ipinagirumdom sa sato ni apostol Pablo: “Dai kita mag-ontok sa paggibo nin karahayan, huli ta sa talaan na kapanahonan kita mag-aani kun kita dai mangluya.”—Gal. 6:9.

Bako nanggad ngonyan an panahon na magpadaya kita sa putik na pangangatanosan na isipon na inatraso an pag-abot kan aldaw ni Jehova. Imbes, ini an panahon na parigonon an satong puso, huling harani na an aldaw ni Jehova.

[Ritrato sa pahina 4]

Sinadol ni Haggeo asin Zacarias an mga Judio na magtogdok

[Ritrato sa pahina 5]

Paano kun aram kan kagharong na maabot an parahabon?