Ginibo Ninda an Kabotan ni Jehova
Si Pedro Naghulit kan Pentecostes
SUABENG klima idto kan aga nin tigsoli kan taon 33 C.E. Pano nin kaogmahan an atmospera! An nagkakariribok na kadaklan nin mga Judio asin proselito nakapano sa mga tinampo kan Jerusalem. Hale sinda sa mga lugar na arog nin Elam, Mesopotamia, Capadocia, Egipto, asin Roma. Abaa kawiliwili na maheling sinda sa saindang propiong gubing asin madangog an saindang laen-laen na tataramon! An iba nagbaklay nin haros duwang ribong kilometro tanganing magin presente sa espesyal na okasyon na ini. Ano idto? An Pentecostes—sarong magayagayang kapiestahan nin mga Judio na nagtatanda kan katapusan kan pag-ani nin sebada.—Levitico 23:15-21.
Nag-uulakbo an aso hale sa mga dolot sa altar kan templo, asin an mga Levita nag-arawit kan Halel (Salmo 113 sagkod 118). Bago mag-alas 9:00 n.a., may nakakukubhan na nangyari. Hale sa langit, nagkaigwa nin “ribok na siring sa hagobohob nin makosog na doros.” Nakapano iyan sa bilog na harong na pinagtitiriponan kan mga 120 disipulo ni Jesu-Cristo. Sabi kan tala sa Kasuratan: “Naheling ninda an mga dila na garo kalayo asin nakawaras, asin may saro na nagtogdon sa lambang saro sa sainda, asin sinda gabos nagkaparano nin banal na espiritu asin nagpoon na magtaram nin manlaenlaen na tataramon, siring sa ipinataram sainda kan espiritu.”—Gibo 2:1-4.
Nadangog kan Lambang Saro an Saiyang Sadiring Tataramon
Dai nahaloy, an dakol na disipulo nagruruluwas sa harong. Makangangalas nanggad, nakatataram sinda sa laen-laen na tataramon kan kadaklan! Imahinara kun gurano kanakabibigla kun an sarong bisita hale sa Persia asin an sarong propiong taga-Egipto madangog na itinataram kan mga taga-Galilea an saindang sadiring tataramon. Siempre, natakot asin napangalas an kadaklan. “Ano an gustong ipakahulogan kan bagay na ini?” an hapot ninda. An iba nagpoon na tuyaon an mga disipulo, na sinasabi: “Pano sinda nin mahamis na arak.”—Gibo 2:12, 13.
Sunod tuminindog si apostol Pedro asin nagtaram sa kadaklan. Ipinaliwanag nia na an milagrosong balaog na ini nin pagtaram sa laen-laen na tataramon kaotoban kan panuga nin Dios paagi ki propeta Joel: “Ibububo ko an sakong espiritu sa gabos na klase nin laman.” (Gibo 2:14-21; Joel 2:28-32) Iyo, ibinubo pa sana nin Dios an saiyang banal na espiritu sa mga disipulo ni Jesus. Malinaw na ebidensia ini na si Jesus binuhay na liwat hale sa mga gadan asin ngonyan yaon na sa langit sa too nin Dios. “Kaya,” sabi ni Pedro, “maaraman logod kan bilog na harong ni Israel na may kasiertohan na ginibo sia nin Dios na magin Kagurangnan asin Cristo, an Jesus na ini na saindong ipinako.”—Gibo 2:22-36.
Ano an nagin reaksion kan mga naghihinanyog? “Sinda nagkarulugad sa puso,” sabi kan tala, “asin nagsarabi sinda ki Pedro asin sa iba pang mga apostol: ‘Mga lalaki, mga tugang, ano an gigibohon mi?’” Si Pedro nagsimbag: “Magsorolsol kamo, asin an lambang saro logod saindo mabautismohan.” Mga 3,000 an naggibo nanggad kaiyan! Pakatapos kaiyan, “sinda nagpadagos sa pagdusay kan saindang sadiri sa katokdoan kan mga apostol.”—Gibo 2:37-42.
Paagi sa pangengenot sa dakulang okasyon na ini, ginamit ni Pedro an enot sa “mga liabe kan kahadean kan kalangitan” na ipinanuga ni Jesus na itatao sa saiya. (Mateo 16:19) An mga liabeng ini nagbukas nin espesyal na mga pribilehio sa laen-laen na grupo nin mga tawo. An enot na liabe pinagin posible para sa mga Judio na magin linahidan nin espiritung mga Kristiano. Kan huri, an ikaduwa asin ikatolong liabe nagtao kan kaparehong oportunidad na ini sa mga Samaritano dangan sa mga Hentil.—Gibo 8:14-17; 10:44-48.
Mga Leksion Para sa Sato
Minsan ngani an kadaklan na ini nin mga Judio asin proselito magkadaramay sa paninimbagan sa pagkagadan kan Aki nin Dios, si Pedro nagtaram sa sainda na may paggalang, na inaapod sindang “mga tugang.” (Gibo 2:29) An saiyang pasohan pahiroon sinda na magsolsol, bakong kondenaron sinda. Kun siring, positibo an saiyang paagi. Iinatubang nia an mga katunayan asin sinuportaran an saiyang mga punto nin mga kotasyon sa Kasuratan.
Marahay na arogon kan mga naghuhulit ngonyan kan maogmang bareta an halimbawa ni Pedro. Maninigo nindang hingoahon na mag-establisar nin puntong mapagkakaoyonan sa mga naghihinanyog sa sainda dangan mataktikang makipagrasonan sa sainda gikan sa Kasuratan. Kun an katotoohan kan Biblia iinaatubang sa positibong paagi, mahimate an mga matanos an puso.—Gibo 13:48.
An kaigotan asin kapusoan ni Pedro kan aldaw nin Pentecostes kabaliktaran na marhay kan saiyang pagpainda ki Jesus mga pitong semana bago kaini. Sa okasyon na idto si Pedro naparalisar nin takot sa tawo. (Mateo 26:69-75) Alagad si Jesus nagngayongayo para ki Pedro. (Lucas 22:31, 32) Daing duwa-duwa, an pagpaheling ni Jesus ki Pedro pakatapos na buhayon liwat nakapakosog sa apostol. (1 Corinto 15:5) Bilang resulta, dai nanluya an pagtubod ni Pedro. Dai nahaloy, sia mapuso nang naghuhulit. Kaya, kaidto, sia naghulit bako sanang kan Pentecostes kundi sa bilog niang buhay.
Ano kun kita nagkasala, arog kan nangyari ki Pedro? Magpaheling kita nin pagsolsol, mamibi para sa kapatawadan, asin humiro na kumua nin espirituwal na tabang. (Santiago 5:14-16) Dangan makaaabante kita na may kompiansa na an satong banal na paglilingkod aakoon kan satong maheherakon na langitnon na Ama, si Jehova.—Exodo 34:6.