Siisay Man Nanggad an mga Ministro nin Dios?
“SA PANGULTIMONG oras na ini sinasadol mi an satong mga soldados na Katoliko na otobon an saindang obligasyon sa pagkuyog sa Fuehrer [si Hitler].”—An mga obispong Katoliko sa Alemania, na kinotar sa The New York Times, Setyembre 25, 1939.
“Aram mo, padre, sa samong eroplano an saro sa mga kaiba mi Katoliko, asin binibendisyonan mo sia bago kami humale pasiring sa pagbomba sa Alemania. Ngonyan, an iyo man sanang relihiyon na Katoliko sa Alemania binibendisyonan man an sarong Katolikong tripulante sa sarong eroplanong Aleman na minadigdi asin linalaglag an satong mga siudad. Kaya an hapot ko, ‘Siisay an kinakampihan nin Dios?’” Iyan an sabi nin sarong opisyal na Britanong piloto, si David Walker, sa pakikipag-olay sa sarong pading Katoliko kaidtong Guerra Mundial II.
Al kontraryo, an rinibong Saksi ni Jehova dakol na taon an inubos sa makatatakot na mga kampo de konsentrasyon na Nazi huli sa pagsayuma na sumaludo sa pagsabi nin heil Hitler o makilaban sa saiyang mga hukbo. Sa mga nasyon na Alyado, an dakol na Saksi nabilanggo huli sa pagsayumang magserbisyo sa militar.
Sairisay an tunay na mga ministro nin Dios, asin anong mga kahagadan an kaipuhan na maotob ninda?
Pagtubod sa Biblia
An tunay na ministro nin Dios siyempre kaipuhan na may marigon na pagtubod sa Biblia. Maninigo na sia may igo man na kaaraman dian tanganing ikatokdo iyan sa iba. Alagad an dakol sa klero nin Kakristianohan dai nakaootob sa pundamental na mga kahagadan na ini. An sarong doktor sa South Africa nagsabi na an mga ministro kan Iglesya Anglicano, na dati niang kinabibilangan, “bihirang gamiton” an Biblia, asin an mga sermon garo baga personal na opinyon kan pastor. Nagreklamo man sia manongod sa mga miembro kan klero, arog baga ni Arsobispo Tutu sa Cape Town, huli sa pakikilabot sa politika.
Al kontraryo, an maimbod na mga lingkod ni Jehova marigon na nagtutubod sa Biblia asin dakol na oras an inuubos sa pag-adal dian asin pagpaliwanag kaiyan sa iba. An saindang interes sa Biblia asin an saindang pagkamoot dian hararomon kaya sinda guminibo nin siniyasat na gayo asin eksakto nanggad na traduksion sa Ingles na inaapod New World Translation of the Holy Scriptures, basado sa masasarigan na mga manuskrito kan Biblia na Hebreo, Aramaiko, asin Griego. An Bibliang ini sa Reference Edition kaiyan may rinibong nota sa ibaba asin cross-reference tanganing matabangan an nagbabasa na orog na masabotan an Biblia asin ikapaliwanag ninda iyan sa iba. Dugang pa, an pambihirang traduksion na ini kan Biblia isinalin, sa kabilogan o parte sana, sa 10 ibang tataramon, asin manampulong milyon na kopya an ikinawaras sa bilog na kinaban.
An Tunay na mga Ministro Asin an Moralidad
An Biblia makosog na kinokondenar an gabos na klase nin seksuwal na kasalan—kaiba an pagsambay, pakikisaro, homoseksuwalidad, asin pakikidorog sa hayop. (Levitico 20:10-15; Roma 1:26, 27; Galacia 5:19) An tunay na mga ministrong Kristiano bilog na pusong nagsusuportar sa moral na mga pamantayan nin Dios. Iyo, isinasaboot na gayo nin mga Saksi ni Jehova an pagboot nin Dios. Saindang itinitiwalag an mga daing pagsolsol na nakakaginibo kan mga kasalan na iyan, mantang sinda nagpapaheling nin pagkaherak sa mga tunay na pinagsosolsolan an inmoral na mga gibo asin linilinigan an saindang buhay.—1 Corinto 5:11-13; 2 Corinto 2:5-8.
Sa South Africa, an Anglicanong Dekano sa Cape Town nabareta na nagsabi: “An nagkapirang mga relasyon nin magkasekso mas marahay kisa mga bakong magkasekso asin huli sa kuwalidad nin pagkamoot, segurado ko na orog nindang pinaoogma an Dios.” An kabaliktaran an totoo. Ikinababalde nin Dios an siring na mga relasyon.—1 Corinto 6:9, 10.
An Tunay na mga Ministro Nagtotokdo nin Tunay na mga Doktrina
An tunay na mga ministro nagtotokdo nin mga doktrina na marigon na napapasikad sa Tataramon nin Dios. An falsong mga ministro nagtotokdo nin mga doktrina na mayo nin suportasyon o pasisikadan sa Biblia. Helinga, halimbawa, an doktrina nin Trinidad. Arog kan sabi kan The Encyclopaedia Britannica (15th Edition): “An terminong Trinidad o an mismong doktrina dai minalataw’ sa Bagong Tipan, ni intension man ni Jesus asin kan saiyang mga parasunod na kontrahon an Shema sa Daan na Tipan: ‘Dangoga, 0 Israel: An Kagurangnan na satuyang Dios sarong Kagurangnan’ (Deut. 6:4).” An Trinidad dai nagin opisyal na katokdoan kan iglesya sagkod kan ikaapat na siglo C.E. An totoo, sa sarong kabtang huli sa dangog asin impluwensia kan emperador nin Roma na si Constantino na an falsong doktrinang iyan nagpoon na mabilog sa Konsilyo nin Nicaea kan 325 C.E.
An katokdoan nin Trinidad nagin dahelan na an dakol na miembro kan iglesya, na sadiosan na mga naghahanap nin katotoohan, nawaran nin pagsarig sa saindang mga ministro. Totoo ini sa sarong hoben na babae sa South Africa na dai makatubod na an saiyang relihiyon, an Dutch Reformed Church, nagtotokdo nin siring kamakariribong na paniniwala na arog kan Trinidad sagkod na iatubang saiya kan saro sa mga Saksi ni Jehova an dokumentadong pruweba na ini totoo man nanggad! An sarong maedad nang retiradong abogado, na taga-South Africa man, nagdemitir sa saiyang iglesya huli ta an nagkapirang permanente nang mga doktrina na itinotokdo sa mga iglesya biyong sala asin nakadadaya.”
An saro pang falsong katokdoan kan Kakristianohan iyo an impiernong may kalayo. Minsan ngani dai nang gayo ihinuhulit o tinutubod arog kan dati, iyan pa man giraray an opisyal na katokdoan nin kadaklan na iglesya. An mga ini naghihingako na pagkagadan an hawak nagagadan pero an kalag, huling inmortal, nagpapadagos na mabuhay, asin an mga nagin maraot an pamumuhay pinasasakitan sa naglalaad na kalayo sagkod lamang. Naniniwala daw kamo dian? Mas mahalaga, totoo daw iyan? Bako sono sa Biblia, na nagsasabi: “An kalag na nagkakasala—iyan mismo magagadan.” (Ezequiel 18:4, 20) Dugang pa, an pinasabngan na si apostol Pablo nagsurat: “An ibinabayad nin kasalan kagadanan”—bakong impiernong may kalayo!—Roma 6:23.
Siyasaton niato ngonyan kun anong mga pamantayan an dapat na maabot nin tunay na mga ministrong Kristiano.
Makakasuratan na mga Kahagadan sa Tunay na mga Ministro
An termino sa Bicol na “ministro” traduksion kan termino sa Griego na “di·aʹko·nos,” na dai maseguro an ginikanan. Iyan apod sa saro na nag-ootob sa mga pagboot nin iba, partikularmente an sarong kagurangnan. Kaya, an termino sa Biblia espesipikong nanonongod sa sarong lingkod. An paggamit kan termino sa Biblia nagpaparisa nin saro na dai minaontok sa mapakumbabang pagtao nin lubos na paglilingkod para sa iba. Idinoon ni Jesus an pangangaipo nin siring na mapakumbabang paglilingkod, arog kan ipinaheheling kan minasunod na halimbawa.
Sarong aldaw, dai mahaloy bago magadan si Jesus sa hariging pasakitan, an ina ni Santiago asin Juan nagdolok sa saiya asin nagsabi: “Ipagboot mo na an duwa kong aki tumukaw, an saro sa saimong too asin an saro sa saimong wala, sa saimong kahadean.” Ikinaanggot ini kan ibang disipulo. Dangan si Jesus maboot na nagtokdo sa sainda nin sarong mahalagang leksion. Tinipon nia sinda asin nagsabi: “An siisay man na boot na magin dakula sa saindo kaipuhan na iyo an mani paralingkod sa saindo, asin an siisay man na boot mangenot sa saindo kaipuhan na iyo an mani oripon nindo.”—Mateo 20:20, 21, 24-27.
Sa saro sa saiyang nakatala, nakakapakosog na mga pahayag sa publiko, pinatanidan ni Jesus an mga nagdadangog manongod sa mga eskriba asin Fariseo. Isinabi man nia an nagkapira sa hayag na mga sala kan falso, parasagin-sagin na mga ministrong ini. Inapod nia sindang mapalangkaw nanggad asin depisil manigoan patin perming gusto nin kabantugan.—Mateo 23:1-7.
Ngonyan, an dakol na klerigo, nangorogna an mga padi kan Iglesya Katolika asin, sa nagkapirang kaso, an mga Anglicano, naghahagad na sinda apodon na “Padre.” Halimbawa, an sarong padi kan Iglesya nin Inglaterra sa Mozambique, kan hapoton kaidtong mga pirang taon na an nakaagi kan saro sa mga Saksi ni Jehova kun taano ta ginagamit nia an titulong “Padre,” nagsimbag: “Ipinag-oorgolyo ko iyan!” Asin, siyempre, bantog nanggad na an papa sa Roma naoogmang apodon na “Santo Papa”—sa ibong kan instruksion ni Jesus sa saiyang mga disipulo na “dai nindo pag-apodon an siisay man sa ibabaw kan daga na saindong ama, ta sasaro sana an saindong Ama, asin sia yaon sa langit.” Idinugang ni Jesus an pundamental na prinsipyong ini: “An siisay man na ilinalangkaw an sadiri ibababa.”—Mateo 23:9-12, The Jerusalem Bible.
Maninigo daw na Iordenar an mga Babae?
Sa bago pa sanang mga panahon, nagdakol an mga babae na inordenar bilang miembro kan klero. Alagad ta pinagbotan ni Pablo si Timoteo: “Dai ako minatogot na an babae magtokdo, o magkapot nin autoridad sa lalaki.” (1 Timoteo 2:12) Minsan siring, dai ini nangangahulogan na an Kristiana dai puwedeng magtokdo sa saiyang mga aki o magtokdo sa publiko, pero sia dai maninigong magtokdo sa kongregasyon.
Kun siring, an mga babae daw noarin man dai maninigong magtaram sa Kristianong pagtiripon? An mga Saksi ni Jehova pinag-aadalan an magasin na ini, An Torrengbantayan, sa saro sa saindang semanal na mga pagtiripon, na ginagamit an mga artikulo na may mga hapot sa mga parapo. An ministro na nangengenot sa pag-adal, na perming sarong tugang na lalaki, inaapodan an mga miembro kan kongregasyon, pati an mga tugang na babae, na simbagon an mga hapot na ini. Pero an mga babaeng ini dai nagtotokdo. Ipinahahayag sana ninda sa sadiri nindang tataramon an mga punto sa artikulo. Minsan an mga aki dinadagka na makikabtang sa pagsimbag, asin parate na an saindang komento, na halipot sana asin simple, eksakto nanggad.
Isinabi man ini ni Pablo manongod sa mga babae: “Kun siring, kun may boot sindang maaraman, hapoton ninda an saindang agom na lalaki sa harong, huli ta makasosopog sa sarong babae na magtaram sa kongregasyon.” (1 Corinto 14:35) Ini nangangahulogan na kun an mga tugang na babae dai nasasabotan an o nariribok an isip sa mga kapahayagan na binasa o ikinomento sa oras kan mga pagtiripon, dai sinda maninigong magpalataw nin mga punto sa pakikidiskutir sa atubangan kan kongregasyon. Imbes, maninigo nindang hagadon sa saindang agom na linawon an mga bagay kun sinda nasa harong na.
Minsan siring, may mga okasyon na an mga Kristiana puwedeng maghulit sa mga lalaki. An mga Saksi ni Jehova inuubos an dakol na oras sa paghuhulit kan maogmang bareta kan Kahadean sa pagharongharong. Kun an sarong parahulit na babae makanompong nin lalaki, dapat daw na sia humagad nin dispensasyon asin humale na sana? Dai nanggad. Sa kasong ini, sia dai naghuhulit sa kongregasyon kundi sa saro na tibaad daing pagtubod. Siring man, an sarong babaeng ministro puwedeng makipag-adal kan Biblia sa sarong pamilyang bakong Kristiano dawa kun yaon an ama.
Si Jesu-Cristo—Sarong Bantog na Halimbawa
Si Jesus sarong bantog na halimbawa na marahay na pagmaigotan niatong arogon! Sia an pinakamarahay na paratokdo, pinakamatibay na parahulit, pinakamahigos na trabahador, asin pinakamamomoton na parahatol na nabuhay sa ibabaw kan daga. An pagsunod sa saiyang mga gira dakulaon na pribilehiyo. Pinagmamaigotan daw nindong gibohon iyan?
An minilyon na Saksi ni Jehova ginigibo an bilog nindang makakaya na arogon sia, minsan ngani bakong sangkap. An saiyang mga paagi laen na gayo sa paagi nin kadaklan na klerigo ngonyan. Dai sia nagbagting nin kampana asin hinalat an mga tawo na dumolok sa saiya, minsan ngani dakol an nagdorolok sa sadiri nindang kabotan. Imbes, dinumanan nia an mga tawo asin tinokdoan sinda sa saindang harong, sa mga lugar na pampubliko, sa mga bukid, asin sa baybayon kan Dagat nin Galilea. Kun beses nagpapahayag sia sa mga grupo na minaabot sa rinibo, arog kan ipinaheheling kan ilustrasyon sa ibaba.—Mateo 9:35; 13:36; Lucas 8:1.
Pagtabang sa mga Dukha, Naghehelang, Asin Gurang Na
Pirang arog kaini an yaon ngonyan? Ginatos na milyon. Asin marikas na nagdadakol an kabilangan mantang marikas na naggagrabe an mga kamugtakan sa kinaban asin an presenteng palakaw nin mga bagay nagdadangadang sa biyong katapusan kaiyan sa ralaban nin Armagedon. (Kapahayagan 16:16) An natural na mga kalamidad, gutom, asin epidemya nakadudugang sa danyos asin kasakitan. An enot na mga Kristiano kinaipuhan man na umatubang sa siring na mga problema. Kaidtong mga 46 C.E., kan si Claudio emperador sa Roma, nagkaigwa nin lakop na gutom. Kaya, ano an ginibo kan mga disipulo? Sinda “naggarayak, an lambang saro siring sa saiyang makakayanan, na magpadara nin ayuda sa mga tugang na nag-eerok sa Judea.”—Gibo 11:27-30.
Sa modernong mga panahon, an mga Saksi ni Jehova parateng nagpapadara nin abundang ayuda sa mga nagsasakit o nagkakaipo. Kasuarin pa sana, kan an Mozambique laglagon nin guerra sibil—na nagbunga nin grabeng mga kakulangan sa kakanon, gubing, bolong, asin iba pang pundamental na mga pangangaipo—an mga Saksi ni Jehova sa haraning South Africa tuminabang sa saindang mga tugang na nasasakitan. An dakol na kakanon, gubing, asin iba pang bagay tinipon asin ipinadara sa Maputo, an kabeserang siudad, sakay sa darakulang trak.
Pag-otob sa Hula kan Biblia
Iyo, an tunay na mga ministro nin Dios ngonyan igwa kan makangangalas na pribilehiyo na makikabtang sa kaotoban kan mga hula kan Biblia. Paano? Sa makasaysayan na okasyon kan hapoton kan mga disipulo si Jesus: “Noarin mangyayari an mga bagay na ini, asin ano an magigin tanda kan saimong presensia asin kan pagtatapos kan palakaw nin mga bagay?” sia nagsimbag na sa panahon nin mga guerra mundial, gutom, linog, asin katampalasanan, “an maogmang baretang ini kan kahadean ihuhulit sa bilog na ineerokan na daga.” (Mateo 24:3, 14) Si Pablo nagtao kan halimbawa sa gabos na tunay na ministro paagi sa paghuhulit “sa harong-harong.”—Gibo 20:20.
An mga Saksi ni Jehova midbid sa bilog na kinaban para sa saindang kaigotan sa paghuhulit na ini. Tibaad may beses na sinda nagsongko sa saindong harong. Nagdangog na daw kamo sa sainda? Kun dai pa, taano ta dai iyan gibohon sa sunod na pagsongko ninda? Tibaad mapangalas kamo sa marahayon na paagi!
[Picture Credit Line sa pahina 4]
Basado sa retrato kan U.S. Army