Mga Hapot Hale sa mga Parabasa

Paano an mga pakinabang sa panhalangkaw na saserdoteng mga paglilingkod ni Cristo Jesus, na sinambit sa Hebreo 4:​15, 16, minaaplikar sa “ibang karnero” ngonyan?

Minsan an papel ni Jesus bilang Halangkaw na Saserdote igwang pangenot na kahulogan para sa mga makakaibahan nia sa langit, an mga Kristiano na may daganon na paglaom nakikinabang dawa ngonyan sa makasaserdoteng mga paglilingkod ni Jesus.

Magpoon ki Adan, an mga tawo nagabatan na sa kasalan. Nagsasakit kita huli sa minanang pagkabakong sangkap, siring kan mga Israelita. Nagpatabang sinda sa surunodan na halangkaw na mga saserdote asin katabang na mga saserdote, na nagdolot nin mga atang para sa sadiri nindang mga kasalan siring man para sa mga kasalan kan banwaan. Pag-abot nin panahon, si Jesus linahidan bilang sarong saserdote “sono sa orden ni Melquisedec.” Pagkatapos siang buhayon liwat, tuminindog si Jesus sa atubangan ni Jehova tanganing ipresentar an halaga kan saiyang sangkap na tawong atang.​—Salmo 110:​1, 4.

Ano an kahulogan kaini sa sato ngonyan? Sa saiyang surat sa mga Hebreo, ipinaliwanag ni Pablo an paglilingkod ni Jesus bilang Halangkaw na Saserdote. Sa Hebreo 5:1, mababasa niato: “An lambang halangkaw na saserdote na kinua sa tahaw nin mga tawo ninombrahan para sa mga tawo manongod sa mga bagay na mapadapit sa Dios, tangani siang makadolot nin mga regalo asin atang para sa mga kasalan.” Dangan, sa mga bersikulo 5 asin 6, ipinaheling ni Pablo na si Jesus nagin halangkaw na saserdote, na puwedeng gumiya pasiring sa mga pakinabang para sa sato.

Paano daw? Si Pablo nagsurat: “Minsan ngani sia Aki, sia nakanood nin pagkuyog hale sa mga bagay na saiyang tinios; asin pakatapos na sia ginibong sangkap nagtao sia nin daing sagkod na kaligtasan sa gabos na nagkukuyog sa saiya.” (Hebreo 5:8, 9) Sa enot, an bersikulong iyan tibaad magpaisip sato kun paano kita makabebenepisyo sa bagong kinaban, kun noarin idtong mga maimbod sa Dios asin ki Jesus hahalean na kan saindang makasalan na kamugtakan asin magkakamit nin buhay na daing katapusan. Ini balidong paglaom, basado sa nakatutubos na halaga kan atang ni Jesus asin sa saiyang paglilingkod bilang Halangkaw na Saserdote.

Alagad sa katunayan makabebenepisyo na kita ngonyan sa saiyang papel o paglilingkod bilang Halangkaw na Saserdote. Mangnoha an Hebreo 4:​15, 16: “An satong halangkaw na saserdote, bakong saro na dai makakapakidamay sa satong mga kaluyahan, kundi saro na nabalo sa gabos na bagay arog sa sato, alagad dai nin kasalan. Kita, kun siring, dumolok na may katalingkasan sa pagtaram sa trono nin dai na kutana maninigong kabootan, tanganing kita magkamit nin pagkaherak asin makakua nin dai na kutana maninigong kabootan na makatatabang sa igong panahon.” Noarin an magigin “tamang panahon”? Kun noarin kaipuhan niato an pagkaherak asin an dai na kutana maninigong kabootan. Kita gabos, huli sa satong dai pagkasangkap, dapat na makamate kan pangangaipong ini ngonyan.

An Hebreo 4:​15, 16 nagdodoon na si Jesus​—na ngonyan saro nang saserdote sa langit—​nagin sarong tawo man, kaya puwede siang magin madinamayon. Kiisay? Sa satuya. Noarin? Ngonyan. Kan sia tawo pa, nakaeksperyensia si Jesus nin mga kagabatan asin kagipitan na ordinaryo na sa mga tawo. Kun beses, si Jesus nagugutom asin napapaha. Asin dawa sangkap, sia napagal. Dapat na magpakosog iyan sa sato. Taano? Huling nakaeksperyensia si Jesus nin natural na kapagalan, naaaraman nia an parateng namamatean niato. Girumdomon man na kinaipuhan ni Jesus na magpasensia sa pag-iriwal kan saiyang mga apostol huli sa pangimon. (Marcos 9:33-37; Lucas 22:24) Iyo, nakamate sia nin mga pagkadisganar. Bako daw na iyan maninigong magtao sato nin kompiansa na nasasabotan nia kun kita nadidisganar, nanluluya an boot? Iyo nanggad.

Kun nanluluya an saindong boot, ano an magigibo nindo? Nagtaram daw si Pablo na maghalat sana kamo sagkod na, sa bagong kinaban, an saindong Halangkaw na Saserdote, si Jesus, tabangan kamo na magin sangkap sa isip asin hawak? Dai. Si Pablo nagsabi: ‘Kita makamit nin pagkaherak asin makakukua nin dai na kutana maninigong kabootan na makatatabang sa igong panahon,’ asin kabale dian an presente. Dugang pa, kan si Jesus tawo pa, sia nakaeksperyensia nin mga kasakitan asin kadepisilan, na “nabalo sa gabos na bagay arog sa sato.” Kaya kun napaaatubang kita sa siring na mga bagay, sia andam na tumabang sato, basado sa pakasabot nia sa naeeksperyensiahan niato. Bako daw na napapaharani kamo kaiyan sa saiya?

Ngonyan mangnoha an bersikulo 16. Si Pablo nagsasabi na kita​—asin kaiba digdi kapwa an mga linahidan asin idtong ibang karnero—​makadodolok sa Dios na igwang katalingkasan sa pagtaram. (Juan 10:16) Dai boot sabihon kan apostol na makasasabi kita sa pamibi nin maski ano na sanang booton niato, dawa anggot, daing galang na mga bagay. Imbes, basado sa atang ni Jesus asin sa papel nia bilang Halangkaw na Saserdote, makadodolok kita sa Dios sa ibong kan satong pagigin mga parakasala.

An saro pang paagi na makikinabang kita minsan ngonyan sa mga paglilingkod kan satong Halangkaw na Saserdote, si Jesu-Cristo, may koneksion sa satuyang mga kasalan, o mga sala. Dai ta nanggad linalaoman na sa presenteng sistema ikaaaplikar sato ni Jesus an lubos na merito kan saiyang atang. Dawa gibohon nia iyan, dai man giraray kita magkakaigwa nin buhay na daing katapusan. Nagigirumdoman nindo an insidente na irinekord sa Lucas 5:​18-26, manongod sa paralisadong lalaki na an higdaan itinonton paagi sa sarong labot sa atop? Sinabihan sia ni Jesus: “Lalaki, an saimong mga kasalan ipinatawad na sa saimo.” Iyan dai nangahulogan nin espisipikong mga kasalan na nagin dahelan kan paralisis. Nangahulogan idto kan mga kasalan kan lalaki sa kabilogan, asin puwedeng kalabot dian an saiyang minanang pagkabakong sangkap, na nagbubunga nin mga helang.

Basado sa atang na idodolot nia, madadara ni Jesus an mga kasalan kan lalaki, kun paanong an kanding para ki Azazel dinadara an mga kasalan nin Israel sa Aldaw nin Pagtubos. (Levitico 16:​7-10) Alagad, an paralisadong lalaki tawo pa. Magkakasala sia liwat, asin pag-abot nin panahon sia nagadan, na dapat sa mga parakasala. (Roma 5:12; 6:23) An sinabi ni Jesus dai nangahulogan na an lalaki nagkamit nin daing sagkod na buhay ora mismo. Alagad an lalaki nabendisyonan nin sarong sokol nin kapatawadan sa panahon na idto.

Ngonyan isipa an satuyang situwasyon. Bilang mga bakong sangkap, nagkakasala kita aroaldaw. (Santiago 3:2) Ano an magigibo ta mapadapit kaiyan? Bueno, sa langit igwa kita nin maheherakon na Halangkaw na Saserdote na paagi sa saiya kita makadodolok ki Jehova sa pamibi. Iyo, arog kan isinurat ni Pablo, kita gabos puwedeng “dumolok na may katalingkasan sa pagtaram sa trono [nin Dios] nin dai na kutana maninigong kabootan, tanganing kita magkamit nin pagkaherak asin makakua nin dai na kutana maninigong kabootan na makatatabang sa igong panahon.” Kun siring, an gabos ngonyan na kabale sa ibang karnero nagkakamit nanggad nin makangangalas na mga benepisyo, kaiba an malinaw na konsensia, gikan sa panhalangkaw na saserdoteng mga paglilingkod ni Cristo.

An gabos na Kristianong may daganon na paglaom makalalaom sa mas dakulang mga benepisyo sa nagdadangadang na bagong kinaban. Sa panahon na iyan lubos na iaaplikar kan satong langitnon na Halangkaw na Saserdote an merito kan saiyang atang, na minagiya pasiring sa kompletong kapatawadan nin kasalan. Mapaabot man sia nin mas dakulang mga benepisyo paagi sa pag-ataman sa pisikal asin espirituwal na salud kan mga tawo. Asin pahihiwason na marhay ni Jesus an pagtotokdo sa banwaan nin Dios sa daga, mantang an pagtotokdo kan Pagboot sarong dakulang paninimbagan kan mga saserdote sa Israel. (Levitico 10:​8-11; Deuteronomio 24:8; 33:​8, 10) Kun siring, mantang nakikinabang kita sa makasaserdoteng mga paglilingkod ni Jesus ngonyan, kadakol pa kan naghahalat sa satuya!