An mga Balos sa Pagtao nin Onra sa May Edad Nang mga Magurang

AN TUNAY na mga nagsasamba sa Dios iginagalang, tinatawan nin onra, asin inaataman an saindang may edad nang mga magurang huli ta namomotan ninda sinda. Kabtang iyan kan saindang pagsamba. An Biblia nagsasabi: “Pabayaan nguna [an mga aki o makoapo] na makanood na maggibo nin diosnon na debosyon sa saindang kairiba sa harong asin padagos na magtao nin nanonongod na balos sa saindang mga magurang asin apoon, huli ta ini makawiwili sa pagheling nin Dios.” (1 Timoteo 5:4) Baga man kita hoben o gurang, angay na kita magtao nin “nanonongod na balos” sa satong mga magurang asin apoon. Sa paaging ini nagpapaheling kita nin apresasyon sa saindang pagkamoot, sa saindang kahigosan, asin sa saindang pag-ataman sa sato sa laog nin kadakol na taon. Tara, utang niato sa satong mga magurang an sato mismong buhay!

Mangnoha na an pagtao nin nanonongod na balos sa mga magurang asin apoon “makawiwili sa pagheling nin Dios.” Konektado iyan sa satong “diosnon na debosyon.” Sa siring, paagi sa pag-otob sa hatol na ini, kita nag-aako nin balos, sa pakaaram na ginigibo niato an nakapaoogma sa Dios. Iyan nagtatao sa sato nin kagayagayahan.

May kagayagayahan sa pagtao sa iba, nangorogna kun kita nagtatao sa mga buka an palad na nagtao sa sato. (Gibo 20:35) Kun siring, kanigoan an balos sa paghiro kaoyon kan prinsipyo sa Biblia: “Tawe nin dahelan na mag-ogma an saimong ama asin an saimong ina, pagayagayaha sia na nangaki sa saimo”!​—Talinhaga 23:​25, The New English Bible.

Paano niato ikatatao an nanonongod na balos sa satong mga magurang asin apoon? Sa tolong paagi: sa materyal, emosyonal, asin espirituwal. An kada saro nagtatao nin mga balos.

Pagtao sa Materyal

Aram kan mga naglilingkod sa Dios na importante an pagsustento sa materyal sa haraning mga miembro nin pamilya. Si apostol Pablo nagsadol: “Kun an siisay man dai nagsusustento sa mga sadiri nia, asin orog na sa kairiba nia sa harong, sia nagpainda kan pagtubod asin orog pa karaot sa tawong dai nin pagtubod.”​—1 Timoteo 5:8.

Si Tunji asin Joy taga-Solnopan na Aprika. Minsan ngani tikapo sa pinansial, inagda ninda an may edad nang mga magurang ni Joy na bumalyo sa sainda. An ama maluya an salud asin sa kahurihurihi nagadan. Nagigirumdoman ni Tunji: “Kan magadan si Tatay, kinugos ni Nanay an sakong agom asin sinabi: ‘Ginibo mo an gabos na posibleng gibohon nin tawo. Dai ka nanggad makamate nin ano man na pagkakulpable sa pagkagadan ni Tatay.’ Minsan ngani hinihidaw mi si Tatay, aram mi na binakal mi an pinakamarahay na bolong para sa saiya asin permi kaming naghingoa na ipamate sa saiya na sia gustong makaibaiba asin kaipuhan; ginibo mi an samong pinakamakakaya na otobon an samuyang paninimbagan na tao nin Dios. Yaon an satispaksion na iyan.”

Siempre, bakong gabos nasa kamugtakan na makatabang sa iba sa materyal. Sabi nin sarong lalaki na taga-Nigeria: “Kun dai kaya nin saro na sustentohan an saiyang sadiri, paano pa nia masusustentohan an iba?” Sa dakol na kadagaan an situwasyon tibaad grumabe pa ngani sa maabot na mga taon. Sono sa sarong prediksion kan Naciones Unidas, sa dai mahahaloy an kabanga kan populasyon sa parte nin Aprika sa timog kan Sahara mamumuhay sa biyong kadukhaan.

Kun yaon kamo sa dukhang kamugtakan sa ekonomiya, puede kamong maranga kan tunay na estorya nin sarong dukhang balo. Kan si Jesus uya digdi sa daga, namasdan nia an sarong balo na nagbugtak nin kadikit na donasyon sa kaha sa templo. An itinao sana nia “duwang saradit na sinsilyo na kadikiton an halaga.” Pero, sa pakaaram sa saiyang situwasyon, si Jesus nagsabi: “Sa katotoohan sinasabi ko sa saindo, An balong ini, minsan ngani dukha, nagbugtak nin labi kisa sainda gabos. Huli ta sinda gabos nagbugtak nin mga dolot gikan sa saindang kalabihan, alagad an babaeng ini nagbugtak gikan sa saiyang kadaihan kan gabos niang pagbuhay.”​—Lucas 21:​1-4.

Kaagid kaiyan, kun ginigibo ta an satong pinakamakakaya sa pag-asikaso sa satong mga magurang o apoon sa materyal, minsan pa kadikit iyan, minamasdan asin inaapresyar iyan ni Jehova. Dai nia kita linalaoman na gibohon an labi sa kaya niato. Posible na siring man kaiyan an magigin saboot kan satong mga magurang o apoon.

Pagtao sa Emosyonal

An kalabot sa pagsustento sa satong mga magurang asin apoon bako sanang pag-asikaso sa saindang materyal na mga pangangaipo. Kita gabos may emosyonal na mga pangangaipo. An gabos, kabale an mga gurang, igwa nin pagmawot na kamotan, na makamateng kinakaipuhan asin gustong makaibaiba, saka magin mahalagang miembro kan pamilya.

Si Mary, na taga-Kenya, inataman an saiyang may edad nang panugangan na babae sa laog nin tolong taon. Si Mary nagsasabi: “Apuera sa pagtao kan saiyang materyal na mga pangangaipo, permi niamo siang kinakaolay. Si Nanay dai nang gayo nin nagigibo sa harong, alagad nag-oolay kami asin nagin dayupot na magkatood. Kun beses nag-oolay kami manongod sa Dios, kun beses manongod sa mga tagaduman sa dati ming iniistaran. Minsan ngani sia labi nang 90 anyos, makosogon an saiyang memorya. Saiyang nagigirumdoman asin iiniestorya an manongod sa buhay kan sia aki pa, kan mga panahon bago 1914.”

Sinabi pa ni Mary: “Bakong pasil an pag-ataman sa gurang, alagad an pakiibaiba nia sa samo nagtao nin mayaman na mga balos. Igwa kami nin katoninongan asin pagkaoroyon sa pamilya. An pagtao ko sa saiya nakaanimar nin espiritu nin pagtao sa ibang miembro kan pamilya. Orog akong iginagalang kan sakong agom. Asin kun may nadadangog si Nanay na nagtataram nin makolog sa sako, tolos-tolos siang nagtataram tanganing surogon ako. Mayong makataram nin makolog sa sako kun yaon sia!”

Pagtao sa Espirituwal

Kun paanong an pagtao sa materyal asin emosyonal nagtatao nin mga balos sa saro na nagtatao, siring man kaiyan sa espirituwal na mga bagay. Si apostol Pablo nagsurat sa Kristianong kongregasyon sa Roma: “Ako nagmamawot na maheling kamo, tanganing makawaras ako sa saindo nin espirituwal na mga balaog tanganing kamo maparigon; o, mas marahay pa, tanganing magkaigwa nin pagriribayan nin pagparigon sa boot dian sa saindo, an lambang saro huli sa pagtubod nin iba, an saindo asin an sako man.”​—Roma 1:​11, 12.

Sa kaagid na paagi, pag-abot sa pagtao sa espirituwal sa mga may edad nang naglilingkod sa Dios, parateng nagkakaigwa nin pagparinigonan nin boot. Si Osondu, na taga-Nigeria, nagsasaysay: “An pinakainteresante para sa sako manongod sa sakong mga apoon iyo an oportunidad na itinatao ninda sa sako na magkaigwa nin kadikit na ideya sa nakaagi. An sakong lolo, na an kaogmahan maheheling sa saiyang mga mata, nag-eestorya kan teritoryong hinulitan nia bilang bilog na panahon na ministro kan mga taon nin 1950 asin 1960. Ikinokomparar nia an presenteng estruktura kan kongregasyon sa kamugtakan kan sia magin Saksi. An mga eksperyensiang ini nakatatabang sa sako sa sakong paglilingkod bilang payunir.”

An iba sa Kristianong kongregasyon makatatabang man sa pagtao sa mga gurang. Si Tunji, na nasambitan kasubago, nagpaliwanag kan nangyari sa saiyang kongregasyon: “An sarong hoben pang payunir na tugang na lalaki na inasignaran na magpahayag sa publiko dinara an outline ki Tatay tanganing prepararon ninda iyan na duwa. An nangengenot sa Pag-adal sa Torrengbantayan nagduman man asin nagsabi ki Tatay: ‘Eksperyensiado po kamo. Ano an masasabi nindo tanganing makatabang sa sako na umoswag?’ Natawan ni Tatay nin praktikal na sadol an magurang na idto sa kongregasyon. An ngaran ni Tatay nagkapirang beses na nasasambitan kan mga tugang sa mga pamibi sa kongregasyon. An gabos na ini nagpamate sa saiya na sia gustong makaibaiba.”

An Marahay na Gawe-Gawe Irinarani an mga Tawo sa Dios

Kun beses, mantang kita nagpapaheling nin onra asin pagkamoot sa satong mga magurang asin apoon, irinarani niato an mga tawo sa Dios. Si apostol Pedro nagsurat: “Papagdanayon na marahay an saindong ugale sa tahaw nin mga nasyon, tanganing, sa mga bagay na ipinagtataram ninda kontra sa saindo na garo baga kamo naggibo nin maraot, tibaad huli sa saindong marahay na mga gibo na saindang naheheling pamurawayon ninda an Dios.”​—1 Pedro 2:12.

Si Andrew, sarong Kristianong magurang sa kongregasyon sa Solnopan na Aprika, duwang beses na nagbibiahe nin 95 kilometros kada semana tanganing atamanon an saiyang naghehelang na ama, na mayo sa pagtubod. Sia nagsasaysay: “Kan ako magin saro sa Mga Saksi ni Jehova, kontrang marhay an sakong ama. Alagad kan mamasdan nia kun paano ko sia inaataman mantang sia naghehelang, pigparasadol nia an sakong ngohod na mga tugang na lalaki asin babae, ‘Dapat kamong umayon sa relihion kan tugang nindo!’ Nakamotibar iyan sa sainda, asin ngonyan an siyam na aki kan sakong ama gabos na Saksi ni Jehova.”

An pagtao nin onra asin pag-ataman sa satong may edad nang mga magurang puedeng magin angat, nangorogna sa masakit na mga panahon sa ekonomiya. Alagad mantang pinagmamaigotan nin mga Kristiano na gibohon ini, sinda nag-aani nin dakol na balos. Orog sa gabos, naeeksperyensiahan ninda an kagayagayahan sa pagtao, kaiba an satispaksion sa pakaaram na napaoogma ninda si Jehova Dios, na iyo mismo an “Ama kan gabos na tawo.”​—Efeso 4:6.

[Kahon sa pahina 6]

Diosnon na Sadol sa mga Nag-aako nin Pag-ataman Asin sa mga Nagtatao Kaiyan

Magin Nakaparirigon sa Boot: “An lambang saro sa sato magpaogma sa saiyang kataed sa karahayan para sa pagpakosog sa saiya.” —Roma 15:2.

Magin Marigon: “Dai kita mag-ontok sa paggibo nin karahayan, huli ta sa kapanahonan kita mag-aani kun kita dai mapagal.”​—Galacia 6:9.

Magin Mapakumbaba: ‘Dai maggibo nin ano man huli sa iriwal o huli sa kapalangkawan, kundi sa kababaan nin pag-isip isipon na an iba mas halangkaw kisa saindo.’​—Filipos 2:3.

Magin Paragibo nin Marahay: “An lam- bang saro maghanap, bakong kan saiyang karahayan, kundi kan sa iba.” —1 Corinto 10:24.

Magin Makatanosan: “Ipaaram nindo sa gabos na tawo an saindong pagkamakatanosan.”​—Filipos 4:5.

Magin Madinamayon: “Magin maboot sa lambang saro, madinamayon sa mamomoton na paagi, na sueltong nagpapatarawadtawad.”​—Efeso 4:32.

[Retrato sa pahina 7]

An hoben pang mga magurang sa kongregasyon makikinabang sa eksperyensia kan mga may edad na