Paggayagaya ki Jehova sa Ibong nin mga Pagbalo
Isinaysay ni George Scipio
Kan Disyembre 1945, nakahigda ako sa sarong kuarto sa hospital, na biyong paralisado apuera kan sakong mga kamot asin bitis. Inisip ko na temporaryo sana an sakong kamugtakan, alagad an iba nagduda na makalalakaw pa giraray ako. Kanigoan na pagbalo idto sa sarong maliksing 17 anyos! Habo kong akoon an sinasabing iyan na mangyayari sa sako. Kadakol akong plano—kabale an pagbiahe pa-Inglaterra kaiba an sakong among sa masunod na taon.
BIKTIMA ako nin epidemya nin polio na luminakop sa samong isla nin St. Helena. Guminadan iyan nin 11 katawo asin kadakol an nabiade. Mantang naghihigda sa kama, kadakol akong panahon na pensaron an sakong halipot na buhay asin an sakong ngapit. Mantang ginigibo ko iyan, nagpoon na marealisar ko na, sa ibong kan sakong helang, may dahelan ako na maggayagaya.
Sarong Simpleng Kapinonan
Kaidtong 1933 kan ako singko anyos, an sakong ama, si Tom, na pulis asin diakono sa Iglesia Baptista, nagkua nin pirang libro sa duwa sa Mga Saksi ni Jehova. Sinda bilog na panahon na mga paraebanghelyo, o payunir, na nagpasyar nin madali sa isla.
An saro sa mga libro inapod na The Harp of God. Ginamit iyan kan sakong ama sa pag-adal sa Biblia kaiba an samong pamilya asin nagkapirang interesado. Hararom na materyal idto, asin kadikit an nasabotan ko dian. Alagad nagigirumdoman ko na minamarkahan ko sa sakong kopya kan Biblia an kada teksto na pinag-oolayan mi. Dai nahaloy narealisar kan sakong ama na an samong pinag-aadalan iyo an katotoohan asin na iyan laen sa ihinuhulit nia sa Iglesia Baptista. Nagpoon siang magsabi kaiyan sa iba asin maghulit sa pulpito na mayo nin Trinidad, mayo nin kalayo sa impierno, asin mayo nin inmortal na kalag. Biyong nakaribok ini sa iglesia.
Sa kahurihurihi, sa paghingoang resolberan an isyu, nagpaapod nin miting sa iglesia. An hapot, “Siisay an para sa Baptista?” Pabor an mayoriya. An sunod na ihinapot, “Siisay an para ki Jehova?” Igwang mga 10 o 12. Sinda pinahale sa iglesia.
Ini an simpleng kapinonan nin sarong bagong relihion sa St. Helena. An sakong ama nakikomunikar sa opisina prinsipal kan Watch Tower Society sa Estados Unidos asin naghagad nin sarong kasangkapan sa transkripsion para sa pagpatanog sa publiko kan nasa plakang mga diskurso sa Biblia. Sinabihan sia na dakulaon an kasangkapan tanganing ikapadara sa St. Helena. Sarong mas sadit na ponograpo an ipinadara, asin kan huri an mga tugang nagpedido nin duwa pa. Naglibot sinda sa isla na naglalakaw asin nagkakabayo sa asno, na dinadara an mensahe sa mga tawo.
Mantang naglalakop an mensahe, iyo man an pagtumang. Sa sakong eskuelahan, an mga aki nagkakanta: “Madia dangoga nindo, madia dangoga nindo, an banda nin ponograpo ni Tommy Scipio!” Makuring pagbalo ini para sa sako, sarong eskuela na gustong maoyonan kan saiyang mga kairiba. Ano an nakatabang sa sako na magtagal?
An samong dakulang pamilya—na may anom na aki—igwa nin regular na pampamilyang pag-adal sa Biblia. Iriba man niamo na binabasa an Biblia kada aga bago mamahaw. Daing duwa-duwa na nagin instrumento ini sa pagtabang sa samong pamilya na padagos na magin fiel sa katotoohan sa nag-aging mga taon. Ako mismo nagkaigwa nin pagkamoot sa Biblia sa amay na edad, asin sa nag-aging mga taon, napagdanay ko an ugale nin regular na pagbasa sa Biblia. (Awit 1:1-3) Kan makatapos ako sa pag-eskuela sa edad na 14, ako marigon na nakatindog sa katotoohan, asin nasa puso ko an takot ki Jehova. Pinangyari ako kaini na maggayagaya ki Jehova sa ibong kan mga pagbalong idto.
Dugang Pang mga Pagbalo Asin Kagayagayahan
Mantang ako naghihigda sa kamang idto na iniisip an enot na mga taon na idto asin an sakong mga linalaoman sa ngapit, aram ko gikan sa sakong pag-adal sa Biblia na an kamatean na ini bakong pagbalo o padusa hale sa Dios. (Santiago 1:12, 13) Minsan siring, makamomondong pagbalo an polio, asin an mga epekto kaiyan magdadanay sa sako sa bilog kong buhay.
Mantang ako nagrarahay, kinaipuhan kong makanood na lumakaw giraray. Dai ko na man nagagamit an nagkapirang kalamnan sa sakong mga takyag. Dai ko mabilang kun pirang beses akong natutumba kada aldaw. Pero, paagi sa odok na pamimibi asin nagpapadagos na paghihingoa, kan 1947, nakalakaw ako sa tabang nin sarong sogkod.
Durante kan panahon na idto namoot ako sa sarong hoben na babae, si Doris, na kapareho ko an relihiosong mga kombiksion. Hoben pa kaming marhay tanganing isipon an pag-agom, alagad namotibar ako na orog pang umoswag sa paglakaw. Binayaan ko man an trabaho ko huli ta dai magkakaigo an sueldo para sa pag-agom, asin nag-establisar ako nin sadiri kong laboratoryo sa ngipon, na nagpunsionar sa suminunod na duwang taon. Nagpakasal kami kan 1950. Kan panahon na idto igo na an naganar ko tanganing makabakal nin sadit na kotse. Ngonyan ikinahahatod ko an mga tugang pasiring sa mga pagtiripon asin sa paglilingkod sa langtad.
Teokratikong mga Pag-oswag sa Isla
Kan 1951 isinugo kan Sosyedad an saindang enot na representante sa samo. Idto si Jacobus van Staden, sarong hoben na lalaki hale sa Aprika del Sur. Kababalyo mi pa sana sa sarong mahiwas na harong, kaya puede niamo siang paistaron sa bilog na sangtaon. Huling sadiri ko an trabaho ko, kadakol kaming panahon na magkaibanan sa paghuhulit, asin nag-ako ako nin dakol na mahalagang marhay na pagsasanay hale sa saiya.
Si Jacobus, o Koos an apod mi, nag-organisar nin regular na mga pagtiripon sa kongregasyon, na maogma ming inatenderan gabos. May problema kami sa lunadan huli ta igwa sana nin duwang sasakyan para sa gabos na interesado. Lubak-lubak asin tukaron an lugar, asin dikit sana an marahay na tinampo kan panahon na idto. Sa siring, medyo masakit na mapaatender an gabos sa mga pagtiripon. An nagkapira nagpopoon na maglakaw nin amay na aga. Pinapalunad ko an tolo sa sakong sadit na kotse asin ilinulusad sinda sa haroharayong distansia sa gilid nin tinampo. Minalusad sinda asin nagpapadagos sa paglakaw. Minabuelta ako, ihinahatod an tolo pa sa haroharayong distansia, ilinulusad sinda, asin minabuelta. Sa kahurihurihi, an gabos nakakaatender sa pagtiripon sa paaging ini. Pakatapos kan pagtiripon, sinusunod mi an iyo man sanang paagi tanganing ihatod an gabos papuli.
Tinokdoan man kami ni Koos kun paano matao nin epektibong mga pag-atubang sa mga pinto. Kadakol kan samong maogmang eksperyensia asin an nagkapira bakong gayong maogma. Alagad an kagayagayahan mi sa ministeryo sa langtad nakalabi sa gabos na pagbalo na ginibo kan mga nagtutumang sa samong paghuhulit. Sarong aga magkaibanan kaming naghuhulit ni Koos. Mantang paparani kami sa sarong pinto, may nadangog kaming boses sa laog. An sarong lalaki makosog na nagbabasa sa Biblia. Nadangog mi nin malinaw an pamilyar na mga tataramon sa Isaias kapitulo 2. Pag-abot nia sa bersikulo 4, nagtoktok kami. Sarong makikatood na gurang na lalaki an nagpadagos sa samo, asin ginamit mi an Isaias 2:4 tanganing ipaliwanag sa saiya an maogmang bareta kan Kahadean nin Dios. Naponan siang adalan sa Biblia minsan ngani sia nag-eerok sa sarong lugar na masakiton maabot. Kinaipuhan kaming magrusog sa sarong bolod, bumalyo sa sarong sapa paagi sa pagtongtong sa mga gapo, tumukad sa saro pang bolod, dangan rumusog pasiring sa saiyang harong. Alagad bawi man iyan. An mahoyong gurang na lalaking ini nag-ako kan katotoohan asin nabautismohan. Tanganing makaduman sa pagtiripon, naglalakaw sia na may duwang sogkod pasiring sa sarong lugar kun saen puede ko siang isakay para sa natatada pang distansia. Kan huri sia nagadan na fiel na Saksi.
An komisyonado kan pulisya kontra sa samong gibohon asin paorootrong naghuma na ipapadeportar si Koos. Sarong beses kada bulan ipinapaapod nia si Koos tanganing usisahon. Orog pa nganing ikinaanggot niang marhay an katunayan na si Koos pirme siang sinisimbag nin direkta hale sa Biblia. Sa kada pangyayari pinatatanidan nia si Koos na umontok na sa paghuhulit, alagad sa kada pangyayari napapatotoohan sia. Padagos niang kinontra an gibohon dawa kan makahale na si Koos sa St. Helena. Dangan an komisyonado, na sarong dakula, makosog na lalaki, biglang naghelang asin nagniwang na marhay. Dai maaraman kan mga doktor kun ano an diperensia nia. Bilang resulta, naghale sia sa isla.
Bautismo Asin Dagos-dagos na Pag-oswag
Pakaagi nin tolong bulan ni Koos sa isla, naisip nia na angay na gumibo nin seremonya sa bautismo. Problema an paghanap nin angay na pool. Nagdesisyon kami na magkalot nin dakulang bobon, sementohon iyan, asin magsakdo nin tubig tanganing panoon iyan. Kan banggi bago an bautismo, uminoran, asin pagkaaga naogma kami na manompongan na nagsosopay na an laog kan bobon.
Kan Domingong aga na idto itinao ni Koos an pahayag sa bautismo. Kan patindogon nia an mga kandidato sa bautismo, 26 kami na nagtindog tanganing simbagon an parate nang mga ihinahapot. Nagkapribilehio kami na magin an enot na mga Saksi na nabautismohan sa isla. Idto an pinakamaogmang aldaw sa buhay ko huli ta kaidto pa pirme na akong naghahadit na tibaad dumatong an Armagedon bago ako mabautismohan.
Pag-abot nin panahon nagkaigwa nin duwang kongregasyon, saro sa Levelwood asin saro sa Jamestown. Kada semana tolo o apat kaming nagbibiahe nin 13 kilometros pasiring sa sarong kongregasyon tanganing konduktahan an Teokratikong Paadalan sa Pagmiministro asin Pagtiripon sa Paglilingkod kun Sabadong banggi. Pakatapos nin pagluwas sa langtad kun Domingong aga, minabuelta kami asin minaatender sa iyo man sanang pagtiripon, siring man sa Pag-adal sa Torrengbantayan, sa samong sadiring kongregasyon sa hapon asin banggi. Kaya pano nin magayagayang teokratikong mga aktibidad an samong katapusan kan semana. Minawot kong maghulit nin bilog na panahon, alagad may pamilya ako na dapat sustentohan. Kaya kan 1952, nagbalik ako sa serbisyo sa gobyerno bilang regular na dentista.
Kan 1955 an nagbibiaheng mga representante kan Sosyedad, an mga paraataman sa sirkito, nagpoon na dumalaw sa isla kada taon, asin nag-istar sinda sa sakong harong sa kabtang kan saindang pagdalaw. Sinda nagin positibong impluwensia sa samong pamilya. Haros kadungan kaiyan, nagkapribilehio man ako na magkaigwa nin kabtang sa pagpasale kan tolong pelikula kan Sosyedad sa bilog na isla.
An Nakapupukaw sa Boot na Kabotan nin Dios na Asamblea
Kan 1958, tanganing makaatender sa Kabotan nin Dios na Internasyonal na Asamblea sa Nueva York, nagdemitir giraray ako sa serbisyo sa gobyerno. Makahulogan sa buhay ko an asambleang idto—sarong oportunidad na nagtao sa sako nin dakol na dahelan na maggayagaya ki Jehova. Huli sa kadaihan nin regular na transportasyon pasiring sa isla, mayo kami duman sa laog nin lima may kabangang bulan. Nagwalong aldaw an asamblea, asin an mga sesyon minapoon nin alas nuebe sa aga sagkod alas nuebe nin banggi. Alagad nungka akong napagal, asin inantisipar ko an lambang aldaw. Nagkapribilehio ako na irepresentar an St. Helena sa laog nin duwang minuto sa programa. Sarong nakanenerbios na marhay na eksperyensia an pagtaram sa atubangan nin dakulang mga kadaklan sa Yankee Stadium asin Polo Grounds.
Pinakosog kan asamblea an sakong desisyon na magpayunir. An pahayag na “Namamahala Na an Kahadean nin Dios—Harani Na daw an Katapusan kan Kinaban?,” nangorognang nakaparirigon sa boot. Pakatapos kan asamblea, nagsongko kami sa opisina prinsipal kan Sosyedad sa Brooklyn asin nagpasyar sa imprentahan. Nag-olay kami ni Tugang na Knorr, an presidente kaidto kan Watch Tower Society, manongod sa pag-oswag kan gibohon sa St. Helena. Sinabi nia na mawot niang songkoon an isla pag-abot nin panahon. Nagdara kami nin mga plaka kan gabos na pahayag patin dakol na pelikula kan asamblea tanganing ihiras sa pamilya asin mga katood.
Nakamit an Pasohan na Bilog na Panahon na Paglilingkod
Pagbalik ko, iinalok giraray sa sako an dati kong trabaho, ta mayo nin dentista sa isla. Minsan siring, ipinaliwanag ko na plano kong lumaog sa bilog na panahon na ministeryo. Pakatapos nin dakol na negosasyon napagkaoyonan na puede akong magtrabaho nin tolong aldaw kada semana, alagad mas halangkaw an sueldo kisa kan ako nagtatrabaho nin anom na aldaw kada semana. Nagin totoo an mga tataramon ni Jesus: “Kun siring, padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.” (Mateo 6:33) An pagbaklay na an mga tabay ko maluya na sa tukaron na mga lugar sa isla bakong pirmeng pasil para sa sako. Dawa siring, nagpayunir ako sa laog nin 14 taon asin natabangan ko an dakol na kapwa ko taga isla na manodan an katotoohan—tunay nanggad na sarong dahelan nin dakulang paggayagaya.
Kan 1961 boot kan gobyerno na ipadara ako sa Islas Fiji para sa duwang taon na libreng kurso nin pagsasanay tanganing ako magin lubos na kualipikadong dentista. Nag-alok pa ngani sinda na paibahon sa sako an sakong pamilya. Nakatetentar na alok ini, alagad pakatapos nin seryosong pag-estudyar sinayumahan ko iyan. Habo kong bayaan an mga tugang sa laog nin siring kahalawig na peryodo nin panahon asin butasan an pribilehio ko na paglilingkod kaiba ninda. An mayor na medikal na opisyal na nag-organisar kan biahe anggot na marhay. Sia nagsabi: “Kun iniisip mo na haranihon na an katapusan, paramientras puede mo pa man giraray na gamiton an kuarta na gaganaron mo.” Alagad nanindogan ako nin marigon.
Kan sumunod na taon naimbitaran ako sa Aprika del Sur na umatender sa Pankahadean na Paadalan sa Pagmiministro, sarong bulan na kurso sa pagsasanay para sa mga paraataman sa kongregasyon. Tinawan kami nin mahalagang marhay na instruksion na nakatabang sa samo na asikasohon nin mas epektibo an samong mga asignasyon sa kongregasyon. Pakatapos kan pag-eskuela, nag-ako ako nin dugang pang pagsasanay paagi sa pag-iba sa sarong nagbibiaheng paraataman. Dangan naglingkod ako kaidto sa duwang kongregasyon sa St. Helena sa laog nin labing sampulong taon bilang kasalihid na paraataman sa sirkito. Pag-abot nin panahon, nagkaigwa na nin iba pang kualipikadong mga tugang, asin turnohan an nagin sistema.
Mientras tanto, nagbalyo kami hale sa Jamestown pasiring sa Levelwood, kun saen mas dakula an pangangaipo, asin duman kami nag-erok sa laog nin sampulong taon. Durante kan panahon na idto, garo ako nagsosolo nin kandila sa mag-ibong na poro—nagpapayunir, nagtatrabaho nin tolong aldaw kada semana sa gobyerno, asin nagmamanehar nin sadit na groseriya. Apuera kaiyan, may mga inaasikaso pa ako sa kongregasyon, asin kaming mag-agom nag-aasikaso nin pamilya na may apat na nagdadakulang aki. Tanganing makaya iyan, binutasan ko an tolong aldaw na trabaho ko, ipinabakal an tindahan, asin dinara an bilog na pamilya sa Cape Town, Aprika del Sur, para sa tolong bulan na bakasyon. Dangan nagbalyo kami sa Isla nin Ascension asin nag-istar duman nin tolong taon. Durante kan panahon na iyan, dakol kaming natabangan na magkaigwa nin tamang kaaraman sa katotoohan sa Biblia.
Pagbalik mi sa St. Helena, nagbalyo giraray kami sa Jamestown. May hinirahay kaming sarong harong na nakatakod sa Kingdom Hall. Tanganing makasustento sa materyal, kami kan aki kong si John naggibo nin sarong van nin sorbetes hale sa sarong trak na Ford, asin nagtinda kami nin sorbetes sa laog kan suminunod na limang taon. Dai nahaloy pakapoon kan negosyo, naaksidente ako sa van. Buminaliktad iyan asin naipit an sakong mga tabay. Bilang resulta, nagadan an mga nerbios sa ibaba kan sakong mga tuhod, asin nagtolong bulan bago ako narahay.
Nagsosopay na mga Balos Kaidto Asin sa Ngapit
Sa nag-aging mga taon, dakol na bendisyon an napasamuya—na dugang pang mga dahelan sa paggayagaya. An saro kaini iyo an samong biahe pasiring sa Aprika del Sur tanganing umatender sa nasyonal na kombension kan 1985 asin dumalaw sa bagong erokan na Bethel, na itinotogdok pa. An saro pa iyo an pagkaigwa nin sadit na kabtang, kaiba an aki kong si John, sa pagtindog nin magayon na Assembly Hall harani sa Jamestown. Naoogma man kami na an tolo sa samong mga aking lalaki naglilingkod bilang kamagurangan, asin an sarong makoapong lalaki naglilingkod sa Bethel sa Aprika del Sur. Asin tunay nanggad na nag-ani kami nin dakulang kagayagayahan asin satispaksion sa pagtabang sa dakol na magkaigwa nin tamang kaaraman sa Biblia.
Limitado an langtad para sa samong ministeryo, na igwa sana nin mga 5,000 katawo. Minsan siring, an paorootrong paghuhulit sa iyo man sanang teritoryo nagbunga nin marahay na mga resulta. Kakadikit sanang tawo an daing modo sa samo. An St. Helena midbid sa pagigin makikatood kaiyan, asin tataratarahon kamo saen man kamo magduman—naglalakaw sa tinampo o nagmamaneho. Naeksperyensiahan ko na mientras na mas midbid mo an mga tawo, mas pasil na maghulit sa sainda. Igwa na kami ngonyan nin 150 parahayag, minsan ngani dakol an nagbalyo sa ibang nasyon.
Ngonyan na nasa edad na an samong mga aki asin nagsuruhay na, kami na sana naman kan agom ko an magkaibanan, pakalihis nin 47 taon nin pag-agoman. An saiyang maimbod na pagkamoot asin suporta sa nag-aging mga taon nakatabang sa sako na magpadagos sa paglilingkod ki Jehova na may kagayagayahan sa ibong nin mga pagbalo. Nagluluya an samong pisikal na kosog, alagad an samong espirituwal na kosog nadadagdagan kada aldaw. (2 Corinto 4:16) Inaantisipar ko, kaiba kan sakong pamilya asin mga katood, an sarong pambihirang ngapit na ako ibabalik sa pisikal na kamugtakan ko na mas mabaskog pa kisa kaidtong ako 17 anyos. An pinakagusto kong kamawotan iyo an pagigin sangkap sa gabos na sentido asin, orog sa gabos, na paglingkodan an satong mamomoton asin mapagmakolog na Dios, si Jehova, asin an saiyang nagrereynar nang Hade, si Jesu-Cristo, sagkod lamang.—Nehemias 8:10.
[Retrato sa pahina 26]
Si George Scipio asin an tolo sa saiyang mga aking lalaki, na naglilingkod bilang mga magurang sa kongregasyon
[Retrato sa pahina 29]
Si George Scipio kaiba an saiyang agom, si Doris