“An Saindang Tingog Nakalakop sa Bilog na Daga”
SA SALMO 19, inoomaw ni David an mga kamurawayan kan pisikal na mga linalang nin Dios dangan nagpapahayag nin mainit na pag-apresyar sa mga ley, pagirumdom, pagboot, togon, asin paghokom ni Jehova. Si apostol Pablo nagpaheling man nin pag-apresyar sa mga bagay na ini. Kinotar nia an salmong ini asin ipinaabot an aplikasyon kaiyan sa mahalagang gibohon nin tunay na mga Kristiano. Manongod sa mga ini sia nagsabi: “An saindang tingog nakalakop sa bilog na daga, asin an saindang mga tataramon sagkod sa kaporoporohi kan ineerokan na daga.”—Roma 10:18.
An “mga tataramon”na ini nangangahulogan nin buhay asin kagadanan sa gabos na tawo ngonyan, ta an mga paghokom ni Jehova madali nang gibohon sa maraot na palakaw nin mga bagay digdi sa daga. (Sofonias 2:2, 3; 3:8) An katawohan tunay na kaipuhan na makaaram manongod sa maogmang bareta kan Kahadean ni Jehova. Saen man kamo humeling ngonyan, may pagkabaranga, katampalasanan, krimen, inmoralidad, laglag na mga pamilya. A, iyo, may orolay manongod sa katoninongan, alagad ta an darakulang kapangyarihan padagos na naggigibo nin mga armas na orog pang moderno, mantang padakol nang padakol na nasyon an miembro kannuclear club.’ An mga kamugtakan digdi sa daga malinaw na tamang-tama sa “huring mga aldaw”na sinasabi ni Pablo sa 2 Timoteo 3:1-5.
Siisay an maliligtas sa kariribokan na ini, asin paano? Si Pablo malinaw an simbag, na kinokotar an hula sa Joel 2:32: “An gabos na mag-arang sa ngaran ni Jehova makaliligtas.” (Roma 10:13) Alagad paano an mga tawo digdi sa daga ‘makaaarang sa ngaran ni Jehova’? Tara, an dakol dai ngani nakaaaram na an Jehova ngaran nin Dios! Paano daw matatabangan an mga tawong ini? Si Pablo nagsimbag na kaipuhan na sugoan sinda nin mga parahulit.—Roma 10:14-16.
Marahay sana, isinugo ni Jehova an saiyang mga Saksi na paaramon an mga tawo na an Kahadean nin Dios harani na asin na iyan mangangahulogan nin kaligtasan pasiring sa buhay na daing katapusan para sa mga nakakamidbid sa Dios asin sa saiyang Aki, si Jesu-Cristo. (Isaias 43:10, 12; Lucas 21:25, 26, 31; Juan 17:3) An maogmang baretang ini ipinadadangog “sa bilog na daga.”
Minilyon an nagkukuyog sa paghuhulit na ini, arog kan ipinaheheling kan total na 9,201,071 sa bilog na kinaban na nag-atender sa pagtiripon na naggirumdom sa kagadanan ni Jesus, kan Abril 1, 1988. Kan taon na idto, naabot an kaharohalangkaweng bilang na 3,592,654 mga parabalangibog kan Kahadean sa bilog na kinaban, asin 239,268 bagong ministro an nabautismohan—3.6-porsiento an ilinangkaw sa nakaaging taon. An maimbod na mga misyonero an nagbugtak kan dakol sa pundasyon para sa pag-oswag na ini, arog kan isinasaysay sa hurihan kan magasin na ini. Pero sa nakaaagi pa sanang mga taon, ginatos na ribong lokal na Saksi, an mga ‘nagtubod sa mga bagay na nadangog,’ an nakanood man sa espiritu nin pagpapayunir asin sa aroaldaw ‘nagpapahayag kan maogmang bareta nin marahay na mga bagay.’ May promedyong 455,561 Saksi an nagrereport bilang payunir, na 4.4 porsientong pag-oswag para sa taon. Bilang resulta, 785,521,697 gabos na oras an ginamit sa paghuhulit, na labing doble sa total na oras kaidtong 6 na taon pa sana an nakaagi.
An tsart sa minasunod na apat na pahina kan magasin na ini nagpapaheling nin detalyado kun gurano kahiwas an paghuhulit na iyan. Inaagda mi kamong siyasaton an report na ini sa lakop sa kinaban na aktibidad nin mga Kristiano para sa 1988.
[Tsart sa pahina 4-7]
REPORT KAN 1988 TAON NIN PAGLILINGKOD KAN MGA SAKSI NI JEHOVA SA BILOG NA KINABAN
(Hilingon an bound volume)