Pag-aatubang kan Maogmang Bareta—Itinatampok an The Watchtower
1 An kaaraman manongod sa Dios asin sa saiyang Aki, si Jesu-Cristo, mas mahalaga kisa bulawan o pirak. (Tal. 8:10) Taano? Huli ta iyan nagdadara sa buhay na daing katapusan. (Juan 17:3) Minsan siring, an tamang kaaraman dai nakukua na mayo nin personal na paghihingoa. Bakong makangangalas na si Salomon nagsabi: “Kun padagos mong hanapon iyan . . . , sa siring masasabotan mo an pagkatakot ki Jehova, asin makukua mo an mismong kaaraman dapit sa Dios.”—Tal. 1:7; 2:4, 5.
2 An mahahalagang kaaraman manongod ki Jehova minaabot sa sato paagi sa napapanahon na mga artikulo na ipinupublikar sa The Watchtower. Kanigoan kadakulang pribilehiyo niato na ihiras sa iba an mahalagang impormasyon na ini! Sa Abril asin Mayo, itatampok an serye nin mga artikulo manongod sa pagbubuyagyag sa Dakulang Babilonya asin sa paggadan sa saiya.
ANO AN IKATATAMPOK NIATO?
3 An mga luwas sa Abril kan The Watchtower nagsisiyasat kun siisay an Dakulang Babilonya. (Kap. 17:5) Pakapagpamidbid, pukawon an interes kan kagharong sa luwas na Abril 1 sa pagsabi: “Poon kan enot na siglo, an mga tawo naintriga na sa mga bisyon sa libro nin Kapahayagan. An saro sa pinakamisteryoso iyo an patotot na Dakulang Babilonya sa Kapahayagan kapitulo 17 asin 18. Ano daw an isinisimbolo kan Babilonyang ini? Sa tabang kan artikulong ini na ‘A Mystery—Who Is the Harlot Babylon the Great?’ madidiskobre nindo an simbag.” (Sa Torrengbantayan na Abril 1, “Sarong Misteryo—Siisay an Patotot na Dakulang Babilonya?”) Sa dai nguna pagsimbag sa hapot, tibaad makua nindo an atension kan tawo.
4 Sa luwas na Abril 15, an artikulong “Babylon the Great Plays the Harlot” (sa luwas na Mayo 1 kan Torrengbantayan, “An Dakulang Babilonya Nagpapakang Patotot”) nagpapaliwanag kun ano an boot sabihon kan espirituwal na pagpapatotot. An pahayag sa kombension na “Banal na Hustisya” na “An Labi-labi Karaot na Patotot” asin an Resolusyon yaon man. Magpalataw nin nakapagpapaisip na mga hapot na arog kan: Taano an Babilonya ta kinokondenar na gayo sa Biblia? Paano an saiyang kalaglagan nakakaapektar sa satong kapag-arakian asin sa saindong ngapit? Girumdomon na papagdanayon na simple asin diretso sa punto an pag-aatubang, na ginigibo iyan sa laog nin 30 sagkod 60 segundos.
MAGPLANO NIN PATIENOT
5 Marahay na idoon an gabos na limang Sabado bilang aldaw sa pagwaras nin magasin sa laog kan Abril ta yaon sa sato an mahahalagang magasin na ini na iaatubang. Kaipuhan an mahiwas na sirkulasyon kan napapanahon na mga luwas na ini tanganing ikatao an patanid na kaipuhan na madangog nin gabos.—Isa. 61:2; Kap. 18:4, 5.
6 Pinoponan sa Abril an bagong kampanya sa suskripsion sa Watchtower. Bakong arog kan halipot na pag-aatubang na ginagamit niato sa pagwaras nin magasin, bobooton niatong gamiton an Topikong Mapag-oolayan kun nag-aalok kan suskripsion.
7 Lubos daw nindong inaapresyar an daing kaagid na halaga kan The Watchtower? Paagi sa pagwaras kaiyan, pribilehiyo niato na patanidan an mga nasyon manongod sa pagkalaglag kan Dakulang Babilonya.