Omawon si Jah Paagi sa Pakakua nin mga Suskripsion
1 Kanigoan na kagayagayahan an pagresibi sa kada bagong luwas kan The Watchtower! Iyan nagtatao nin masustansiang espirituwal na kakanon asin hatol, asin nagbabantay sa mga pangyayari sa kinaban mantang inootob kaiyan an hula sa Biblia. Kaya orog niatong nasasabotan an satong mga oportunidad na omawon si Jehova.—Amos 3:7; Heb. 13:15.
2 Sagkod ngonyan sa taon na ini nin paglilingkod, itinampok na kan The Watchtower an mga tema na arog kan “Is the Golden Rule Out-of-Date?” asin “Peace—Will It Come by Disarmament?” Sa laog nin labi nang sanggatos na taon, sinuportaran kan magasin na ini an Kahadean nin Dios bilang an tunay na solusyon sa mga problema nin tawo. Kaiba kan Awake!, pinaisi kan magasin na ini an mga parabasa tanganing maheling na an mga nangyayari sa presente tanda kan “huring mga aldaw.”—2 Tim. 3:1-5.
AN MGA SUSKRIPSION NAGSUSUPLAY NIN ESPIRITUWAL NA KAKANON
3 Ngonyan na Abril asin sa Mayo itatampok niato an mga suskripsion sa arin man sa The Watchtower o Awake! May personal na suskripsion daw an kada miembro kan saindong pamilya? Kun igwa, madali nindong ikarerekomendar na sumuskribe man an iba. Magin entusiastiko kamo sa pag-alok nin suskripsion na arog kun nag-aalok kamo nin mga magasin sa aldaw nin pagmamagasin.
4 Dai nindo husgaran na tolos kun baga an tawo boot na sumuskriber, kundi pahiroon an tawo sa saindong sinsero, entusiastikong pag-aatubang. An sarong tugang na babae nagkaigwa nin mas positibong kaisipan paagi sa paghorophorop sa sarabihon na: “Dai mo mahuhusgaran an libro sa tutob kaiyan.” Nakanood siang orog na umarog ki Jehova, na dai nin pagpalaenlaen. (Gibo 10:34) Inalokan na daw nindo nin suskripsion an saindong mga inaadalan sa Biblia, ruta sa magasin, katrabaho, kataraed, asin paryentes?
5 Parate na sinasabi nin mga kagharong na mayo pa sinda nin kuwarta. Kun iyan mangyari asin kun gusto man an tawo, llenaran na an subscription slip sa enot na pagsongko dangan balikan na sana an kontribusyon. Seguradohon na bumalik sa pinag-olayan na oras.
IMPORMAL NA PAGPATOTOO
6 An impormal na pagpatotoo orog na idinodoon ngonyan. Iyan marahayon na paagi na makaolay an mga mayo sa harong kun kita naghaharongharong. Asin kumusta man an saindong mga katrabaho? Sa sarong bulan nin kampanya sa suskripsion, an sarong tugang nagdesisyon na magpatotoo na may pag-iingat sa saiyang mga katrabaho. Ibinugtak niang pasohan an sampulong suskripsion. Pero, napangalas siang makapagreport nin 68 suskripsion sa bulan na iyan!
7 Sa mga harong na sinayumahan an suskripsion, puwede niatong sabihon an arog kaini: “Minsan habo nindong sumuskriber ngonyan, nagtutubod ako na magugustohan nindo an luwas na ini na pinag-olayan niato. Saindo na ini kaiba an sarong kapadis na magasin sa kontribusyon sanang ₱5.00.”
8 Sinasadol kita kan salmista: “Omawa nindo si Jah, banwaan.” (Sal. 147:1) Gibohon niato ini paagi sa maigot na pag-alok nin suskripsion sa Abril asin Mayo.