Pabirikon an mga Tawo Hale sa Kadikloman Pasiring sa Liwanag
1 An espirituwal na kadikloman lakop sa daga. (Isa. 60:2) Si Satanas, “an dios kan palakaw na ini nin mga bagay,” pinagdanay an mga tawo sa espirituwal na kadikloman, asin an pagbaba nin moral an nagin resulta.—2 Cor. 4:4.
2 Ngonyan na naliwanagan na kita kan katotoohan, kita daw naheherak arog ki Jesus sa mga tawo? (Mat. 9:36) Kun iyo, aapresyaron niato an pagboot na itinao nia ki Pablo sa ‘pagpabuklat sa mata kan mga tawo asin sa pagpabirik sa sainda hale sa kadikloman pasiring sa liwanag asin hale sa kapangyarihan ni Satanas pasiring sa Dios.’—Gibo 26:16-18.
PALIWANAGAN AN MGA ISIP ASIN PUSO
3 Mantang binubuta ni Satanas an mga puso asin isip nin mga tawo, ano an magigibo niato tanganing matabangan sinda? Kaipuhan niatong aboton an saindang isip asin puso paagi sa Tataramon nin Dios. Ipinamibi ni Pablo na maliwanagan an mga mata kan puso nin mga taga-Efeso. (Efe. 1:17, 18) Mayo nin mas mapuwersa kisa sa Tataramon nin Dios sa pag-abot sa puso. (Heb. 4:12) An pakaaram kaini maninigong magmotibar sato na paoswagon an abilidad sa paggamit kan Biblia kun nakikipag-olay sa iba.
4 Sa bagay na ini marahay na konsideraron an minasunod: Nag-aandam daw kamong marhay para sa paglilingkod sa langtad? Igwa daw kamo nin mga sesyon sa pagpraktis tanganing mag-andam nin mga introduksion na makapupukaw nin interes kan mga kagharong? Saindo daw na pinag-aadalan asin ginagamit an presenteng Topikong Mapag-oolayan? Kamo daw nakikipagrasonan sa Kasuratan sa nakakokombensir na paagi sa mga puwertahan?—Gibo 17:2.
AN LIBRONG SEARCH FOR GOD SARONG PANTABANG
5 An bagong librong, Mankind’s Search for God puwedeng magin dakulang pantabang sa pagpaliwanag sa mga tawo sa espirituwal. Iyan may 16 na kapitulo asin labing 200 na retrato asin ilustrasyon, na nagpapaheling kan kasaysayan kan paghanap nin tawo sa Dios. Iaalok niato iyan sa bulan na ini sa paglilingkod sa langtad.
6 Sa paggamit kan Topikong Mapag-oolayan na “Ngonyan Na an Panahon na Hanapon an Dios,” mapupukaw niato an interes kan mga tawo paagi sa paggamit kan limang hapot na pinalataw sa parapo 28 kan enot na kapitulo. Ipaheling sainda na an libro sinisimbag ini asin an dakol pang ibang hapot manongod sa tamang paagi kan paghanap sa Dios. Tibaad booton man nindo na buklaton an pahina 377 kan libro asin ipaheling an sampulong punto na nagpapamidbid sa tunay na relihiyon.
7 Mantang iinaalok niato an librong Search for God, kaipuhan niatong hanapon an mga oportunidad sa pagpabirik sa mga tawo hale sa kadikloman pasiring sa liwanag. An pakikipag-olay sa Biblia sa mga tawo sa gibohon na pagharongharong makatatabang sato na gibohon ini. Kun marisa niato na interesado sinda sa partikular na punto o kapitulo sa libro, puwede niatong iareglo an pagdalaw liwat tanganing orog pang pag-olayan iyan. Gamiton an pagmansay tanganing mamidbid kun siisay an mga interesado sana sa intelektuwal na pag-orolay asin an tunay na nagmamawot na mamidbid an Dios asin an tamang paagi sa pagsamba saiya.
8 Maigot niatong ilakop an katotoohan na makapatatalingkas sa mga tawo sa Hunyo (Juan 8:32), na ginagamit an librong Search for God bilang instrumento sa pagpabirik sainda hale sa kadikloman pasiring sa liwanag.