Pag-aatubang kan Maogmang Bareta—Na May Pagmansay
1 An sarong ipinasabong na talinhaga nagsasabi: “An nagbabantay sa pagmansay makakanompong nin karahayan.” (Tal. 19:8) An kadonongan kan mga tataramon na ini parateng napatutunayan na totoo sa satong paghuhulit. Halimbawa, paagi sa paggamit nin pagmansay asin taktika, nahimo nin dakol na parahayag na an mga pagtumang magin mga oportunidad para sa dugang pang pagpatotoo. Paano daw ini magigibo?
PAG-ATUBANG SA MGA PAGTUMANG
2 Sa parate nakakanompong kita nin mga tawong nagsasabi, “Sibot ako.” Talaga daw na sibot an kagharong, o sinasabi nia sana ini tanganing dai makaiba sa halawig na orolay? Kaipuhan an pagmansay. Kun garo baga bako man talaga siang sibot, puwede niatong probaran na mapangganahan an saiyang pagtumang. Puwede niatong sabihon, “Kun siring dai ako maghahaloy.” Dangan, puwede niatong sumaryohon an plinano niatong ipakipag-olay, na ginigirumdom an napagkaoyonon na halipot sana an pakipag-olay. Bilang resulta kan satong pagpaheling nin konsiderasyon asin nakapupukaw nin interes na mga komento, an tawo tibaad magparisa pa ngani nin kamawotan na ipagpadagos an orolay sa mismong oras na iyan.
3 Halimbawa talagang sibot an saindong dinolok. Kun kita mag-iinsister o agresibo, tibaad bakong marahay an impresyon na ikawalat niato. Kun an kagharong lumuwas sa pinto na may kapot na gamit sa pagluto asin may napaparong kitang linuluto, posibleng marhay na sia talagang sibot. Kaya kaipuhan an pagmansay asin marahay na paghusgar. Bakong makonsiderasyon na ipagpadagos an pakikipag-olay sa panahon na iyan. Mas marahay na tawan nin tract an kagharong asin isuherir na kamo mabuwelta na sana. Ini magwawalat nin marahay na impresyon, asin tibaad ikatao an marahay na patotoo kun may dumalaw na Saksi sa masunod.
REAKSION SA DISPOSISYON KAN TAWO
4 Kun beses may nanonompongan kitang mga tawo na pabigla-bigla kun magtaram kun dinadalaw niato sinda. Ano an maninigo niatong gibohon kun ini mangyari? An Talinhaga 17:27 nagsasadol: “An tawong may pakamansay malipot an espiritu.” Kanigoan karahay na hatol! An mahoyong tingog na nagpapahayag nin pagmakolog parateng nagseserbing mapamugtak an boot kan tawo. Dugang pa, kun sia mataktika niatong madadagka na ipahayag an ikinahahadit nia, tibaad mainaan an saiyang garo pakikilaban. Dawa kun tapuson nia an pakikipag-olay, posible na an mahoyo niatong simbag maparahay kan saiyang isip manongod sa gibohon kan mga Saksi ni Jehova. Iyan marahay na gibo. Siyempre, kun an kagharong maanggot, pinakamarahay na humale nin toninong asin tibaad sa ibang panahon probaran na magpatotoo sa saiya.
5 Igwa man nin mga tawo na, minsan ngani nakikidiskutiran, tibaad sinsero. Sa siring na mga kamugtakan, tibaad dakulang pagbalo sa satong pasensia an pagpapadagos na makipag-olay sa sainda. Pero kun kita mapagmansay, dai niato iisipon na an kagharong bakong interesado huli sana ta sia makosog na nagpapahayag nin laen na punto-de-vista. Tibaad boot niatong tumao nin mataktikang mga hapot sa paghihingoa na maaraman kun taano ta siring an saiyang paniniwala dangan ipaheling saiya kun ano an sinasabi kan Biblia manongod dian. (Tal. 20:5) Basado sa saiyang reaksion, makapagdedesisyon kita kun marahay na ipagpadagos an orolay.
6 Aram nin mapagmansay na parahayag na an panahon asin mga kamugtakan parateng nakaliliwat sa kaisipan nin kagharong manongod sa mensahe kan Kahadean. Tibaad laen man an saiyang reaksion sa sunod niatong pagsongko. Dapat na mag-ingat kita na dai isipon na negatibo an magigin simbag huli sa reaksion kan kagharong kaidtong huri niatong pagsongko sa saiya.
7 Bakong pasil an pagdesisyon kun baga maninigo niatong ipagpadagos an orolay. Pero, paagi sa pagkultibar sa abilidad nin pagtotokdo, kita magigin mas epektibo sa pag-aatubang kan maogmang bareta na may pagmansay, mantang naglalaom kita na bebendisyonan ni Jehova an satong mga paghihingoa.—1 Cor. 3:6; Tito 1:9.