Pagpopoon kan Orolay sa Pagbuwelta Nindo
1 Tanganing magin epektibo sa pakikipag-olay sa saro na nagpaheling nin interes, pagmaigotan na dugangan an napag-olayan nindo sa enot na pagsongko. An katuyohan tabangan an tawo na apresyaron an halaga kan mga punto asin babasahon na ikinawalat sa saiya.
2 Tawan nin panahon an pag-andam para sa pagdalaw liwat. Pumili nin nakapupukaw nin interes na mga komento na yaon sa babasahon na itinatampok nindo. Helinga an minasunod na mga tema sa pagdalaw liwat sa mga nawarasan kan librong Worldwide Security:
3 Anong mga kamugtakan sa ngapit an malalaoman niato sa daga tangani na iyan magin nagdadanay na istada nin tawo? An pakikipag-olay na ini basado sa Isaias 11:6-9 asin 65:25, siring sa paliwanag sa librong Worldwide Security sa pahina 172-5.
An pakikipag-olay puwedeng ponan paagi sa pagsabing:
◼ “Kan huri akong dumalaw, napag-olayan niato kun paano katuyohan nin Dios na an daga magdanay sagkod lamang. Pero may iwinalat akong hapot na saindong hohorophoropon: Anong mga kamugtakan an kaipuhan na mangyari duman? Ikinaoogma kong ipaabot sa saindo sa madali an simbag kan Biblia.”
4 An kaipuhan niatong gibohon tanganing magkamit nin buhay sakop kan Kahadean nin Dios. An temang ini ikapaliliwanag paagi sa paggamit kan Juan 17:3 asin Jeremias 31:34, siring sa paliwanag sa librong Worldwide Security sa pahina 119-20.
Sa pagpopoon, puwede nindong sabihon:
◼ “Ikinaogma kong makipag-olay sa saindo manongod sa panuga nin Dios na tapuson an karatan. [Ipakua sa tawo an saiyang librong Worldwide Security.] An hapot na maninigong isipon kan kada saro sato iyo ini, Ano an magigibo niato tanganing makinabang sa pagkaliwat na ini? Helinga an sinabi ni Jesus sa Juan 17:3, siring kan kinotar sa libro nindo sa pahina 120.”
5 Anong mga pangangaipo an mapaninigoan sa Paraisong daga? Puwede nindong gamiton magsalang an Salmo 65:9-13 asin 72:16 o Isaias 11:6-9 asin 65:25. May angay na mga komento sa librong Worldwide Security sa pahina 174-5.
An saindong introduksion puwedeng:
◼ “Kan uya ako digdi kaidtong [sabihon an aldaw], pinag-olayan niato an panuga nin Dios na buhayon an gadan na mga namomotan niato sa sarong Paraisong daga. Ano daw an pira sa mga bendisyon na kakamtan sa panahon na iyan? Sinasabi iyan sato kan libro nindo.” Basahon an saro o duwang teksto sa Biblia asin an komento sa libro, puwedeng an parapo 7-10.
6 Dakol an nagpaheling nin interes sa mensahe kan Kahadean na ihinuhulit niato. Kun siring, dalawon liwat an gabos na nagpaheling nin interes, asin pagmaigotan na itokdo sa sainda an katotoohan.—Mat. 10:11; 28:19, 20; Juan 21:17; Kap. 22:17.