An Pambukas na mga Tataramon Iyo an Puwedeng Magdeterminar kan Mangyayari
1 Sinabi na an pinakaimportante sa pagharongharong iyo an enot na 30 segundos kan satong presentasyon. Iyo, an satong pambukas na mga tataramon an magdedeterminar kun baga kita dadangogon o dai. Sa pahina 9 kan librong Reasoning, nagsasambit iyan nin duwang mahalagang bagay na kaipuhan niatong isaisip kun ipinamimidbid an satong sadiri. Ini iyo an: (1) An mensahe na ipinagboboot na darahon niato iyo “an maogmang baretang ini kan Kahadean,” na nangangahulogan na maninigo kitang perming magmaigot na tabangan an mga tawo na maheling an pangangaipo para sa Kahadean asin magin andam na konsideraron iyan. (2) An tunay na pagmakolog sa kapakanan kan mga tawo tatabangan kitang aboton an puso. Ikapaheheling ini paagi sa mainit na huyom asin makikatood na paagi, gikan sa boot na paghinanyog kun sinda nagtataram, asin paagi sa satong paggamit nin mga hapot tanganing mapukaw an interes asin maponan an pag-orolay.
2 Ginagamit na daw nindo an iba sa mga introduksion na isinuherir sa librong Reasoning o nasa bagong mga luwas kan An Satong Ministeryo sa Kahadean? Dakol na mga payunir an nagbabareta nin mas dakulang kapangganahan sa saindang paglilingkod sa harong-harong paagi sa paggamit sa pambukas na mga tataramon na ini na termino-por-termino arog kan mababasa. Nadiskobre man nin iba na paagi sana sa kadikit na panahon na pag-andam para sa ministeryo sa langtad, nakagibo sinda nin pambukas na mga tataramon sa saindang sadiring pananaram pero basado sa mga tataramon sa inimprentang mga suhestion.
3 Sarong bagay an sinisierto, asin iyan iyo na kun aram nindo nin marhay an pambukas na mga tataramon bago dumolok sa siisay man na dara an mensahe kan Kahadean, makamamate kamo na mas komportable asin mas kompiado. Ipaheheling kan saindong mga tataramon an saindong odok sa boot na pagmawot na ihiras an maogmang bareta. An saindong pagigin andam nin marhay gigibohon an saindong ministeryo na mas nakaoogma huli ta makukua nindo an mas marahay na mga bunga. An pinakaimportante iyo na ginigibo niato an satong atang nin paglilingkod sa pinakamarahay na ikatatao niato.—Heb. 13:15; 1 Ped. 2:5.
4 Kaya tawan nin panahon an pag-andam. Konsideraron an klase nin mga tawo na posible nindong makaolay sa saindong lokal na teritoryo. Ano an saindang mga kahaditan asin problema? Anong mga kamugtakan sa presente an nakaaapektar sa saindang buhay? Pakahorophorop sa mga simbag sa mga hapot na ini, helingon an pambukas na mga tataramon na isinuherir sa pahina 9-15 kan librong Reasoning o pumili nin saro o labi pang pambukas na mga tataramon sa An Satong Ministeryo sa Kahadean. Dai mag-alangan na liwaton o bagohon an eksaktong mga tataramon tanganing magin kamong komportable dian. An sunod na lakdang iyo na kumua nin iba pang parahayag tanganing tabangan kamo sa pag-ensayo sa saindong pambukas na mga tataramon. Tibaad mapakokosog kaini an iba na paoswagon man an saindang pambukas na mga tataramon. Maski paano, sierto na makadadagka kamo sa lambang saro asin mapakokosog an lambang saro sa marahay na mga gibo.
5 Babalosan an panahon asin kosog na ginamit nindo sa pag-andam kan saindong mga pag-aatubang sa langtad. Tibaad bendisyonan kamo na magkaigwa nin mas epektibong pakikihiras sa nakaoogmang gibohon na pagtitipon ngonyan.