An Praktikal na Pamamaagi sa Pag-andam Para sa Paglilingkod sa Langtad
1 Nagduduwaduwa daw kamo kun minsan na makikabtang sa ibang kabtang kan ministeryo sa langtad huli ta dai nindo aram kun ano an sasabihon? Kun iyo, nasisierto mi na aapresyaron nindo an pamamaagi na kinokonsiderar sa An Satong Ministeryo sa Kahadean.
2 Magpoon sa luwas na ini, An Satong Ministeryo sa Kahadean mag-aalok nin mas dakol pa nganing manlaenlaen na suhestion sa pag-atubang kan mensahe kan Kahadean, magsalang sa pagharongharong, sa pagdalaw liwat, o sa pag-adal nin Biblia. Maninigo ining magpahiro sa saindong pag-isip kun anong mga tataramon an boot nindong gamiton sa ministeryo. Kun nag-aandam para sa ministeryo, pilion an presentasyon na angay nanggad sa saindong teritoryo. Dangan, siertohon kun baga gagamiton nindo an mga tataramon na isinuherir sa artikulo o liliwaton nindo an mga tataramon tanganing bumagay sa lokal na mga kamugtakan o sa saindong sadiring personalidad. An saindong presentasyon puwedeng magin orog na sa paaging nakikipag-olay kun ipahayag nindo iyan nin natural sa saindong sadiring tataramon. Boot daw nindong pahiwason an saindong ministeryo sa ibang paagi, tibaad paagi sa pakikabtang sa ibang kabtang sa kaenot-enoteng oportunidad? An detalyadong mga suhestion na iinaalok tibaad iyo mismo an kaipuhan nindo tanganing makapoon.
3 Kun kamo an nangengenot sa saro sa mga pagtiripon bago maglingkod kan kongregasyon, maninigong pamilyar kamong marhay sa materyal na ipinublikar sa An Satong Ministeryo sa Kahadean. Pag-adalan nin marhay an saindong kopya, asin darahon an atension sa mga suhestion na pinakaposibleng magigin epektibo sa lokal na paagi.
4 Kita gabos naoogma sa mga bagay na marahay an pakagibo niato. Linalaom mi na an praktikal na pamamaaging ini makatatabang kapwa sa mga bagohan asin sa mas eksperyensiadong mga parahayag na magin epektibo asin magayagaya sa saindang ministeryo sa Kahadean.