An Saindong Pag-apresyar sa Kagadanan ni Cristo
1 Daing ibang tawong nabuhay kasuarin man na makagigibo kan ginibo ni Jesu-Cristo para sa katawohan. (Mat. 20:28) Paagi sa saiyang buhay asin saiyang kagadanan, igwa kitang oportunidad na mag-ako kan pinakadakulang regalo na puwedeng akoon nin siisay man, an buhay na daing katapusan. Alagad, an kadaklan kulang an pag-apresyar sa ginibo ni Cristo.
2 Isipa kan makaatubang ni Jesus an sampulong dauton. Minsan ngani gabos pinaomayan ni Jesus, saro sana an buminalik ki Jesus tanganing magpasalamat. An siyam? Naghale sinda na dai lamang pinasalamatan an saindang parabiyaya. (Luc. 17:15-17) Kiisay kita nakaaarog? Boot niatong makaarog sa tawong nagpaheling nin tunay na pag-apresyar.
3 Pagpaheling kan Satong Pag-apresyar: Kada taon an Sosyedad nagsusuherir na basahon an espisipikong mga bersikulo sa Biblia durante sa semana nin Memorial. Makukua ini sa satong kalendaryo sa mga petsa nin Abril 1-6 asin sa Mga Paisi kaining An Satong Ministeryo sa Kahadean. Ikapaheheling niato an satong apresasyon paagi sa pagbasa asin paghorophorop sa mga bersikulong ini.
4 An satong paglilingkod sa langtad konektado sa pag-apresyar sa Memorial. Ini sa parate an bulan na rinibo an nakikakabtang sa pag-auxiliary payunir. Kan nakaaging Abril 17,009 an nagpartisipar digdi sa Pilipinas. Magigibo daw nindo an siring ngonyan na Abril? Kun dai kamo makapapayunir, planohon na dugangan an saindong kabtang sa gibohon na paghuhulit sagkod na itinotogot nin mga kamugtakan.
5 Parigonon an Pag-apresyar nin Iba: Kada taon sa Memorial, dakol na interesado an nakiiiba sato. Halimbawa, sa 360,297 nag-atender sa Memorial kan nakaaging taon, labing 245,000 an interesado.
6 Sa paggamit kan inimprentang imbitasyon kan Sosyedad, tabangan an mga interesado na masabotan kun taano an Memorial ta ipinaselebrar, kun siisay an nakikakabtang sa mga emblema, asin kun ano an irinirepresentar kan mga emblema. (1 Cor. 11:23-26) Siring man, ipaliwanag an paglaom kan mga nakikakabtang asin kaidtong mga nagmamasid na dai nakikakabtang. (Juan 10:16; Kap. 14:3, 4) Matatabangan sinda kaini na masabotan na an gabos nagkakaipo na ‘gumibo nin pagtubod’ asin na an pag-atender sana sa Memorial kada taon bakong igo.—Juan 3:16.
7 An Memorial kan kagadanan ni Cristo sarong espesyal na gayong okasyon. Paagi sa marahay na pag-aandam dian, ipinaheheling niato na tunay niatong inaapresyar an gabos na ginibo sa sato ni Jehova asin ni Cristo.