Pilion an Angay na mga Puntong Ipakikipag-olay

¹ Ano an magigibo niato tanganing dagkahon an mga tawo na regular na basahon an Torrengbantayan asin Awake!? Kita nagkakaipo na magkaigwa nin interesanteng mga puntong ipakikipag-olay kun irinirekomendar an mga magasin sa iba. Kun pamilyar na kitang marhay sa mga tawo sa satong teritoryo asin nasa isip sinda kun binabasa niato an mga magasin, puwede tang hanapon an mga puntong ipakikipag-olay tanganing makua an saindang interes.

² Sa ibang mga lugar an mga tawo tibaad may pararehong pinaghalean, na pinagigin medyo pasil na tandaan an punto na pagkakainteresan kan kagabsan. Alagad sa ibang lugar, tibaad makanompong kita nin mga tawo na may laen-laen na pinaghalean. Kun igwa kita sa isip nin nagkapirang puntong ipakikipag-olay, may makukua kitang saro na pinakaangay sa kada tawo na satong manonompongan. Halimbawa, sa kada isyu kan Awake! igwang artikulo na espisipikong isinurat para sa mga hobenes. An mga lalaki parateng nagugustohan an “Watching the World,” o siyentipikong mga artikulo, mantang an mga agom na babae nagugustohan an mga artikulo dapit sa pamilya. Magin mapagmansay kun nagpipili nin mga puntong ipakikipag-olay.

³ Dai tolos igilid an daan na mga isyu nin magasin kun naresibi na an mga bago. An sarong tugang parateng iinaatubang an tolo sagkod apat na isyu kan An Torrengbantayan o Awake! sa kagharong asin pinapipili sia kan gusto niang basahon.

⁴ An dakol, minsan ngani nagkakainteres sa katotoohan, dai pa nag-oswag pasiring sa pag-ako nin pag-adal sa Biblia. Alagad an saindang interes puwedeng makultibar kun an saro regular na nagdadalaw na dara an kada bagong isyu kan mga magasin. Iyo, an maimbod na paghahatod nin mga magasin sa sarong ruta sa magasin nakatabang na pahiroon an mga tawo sa katapustapusi na umoyon na magkaigwa nin regular na pag-adal sa Biblia.

⁵ Paagi sa perming paggamit nin angay na puntong ipakikipag-olay, puwede niatong mamotibar an iba na basahon an mga magasin asin tibaad mapapoon sinda sa dalan pasiring sa buhay. (Mat. 7:14) Kun maingat niatong tinatawan nin pagkonsiderar an importanteng bagay na ini, makasisierto kita sa bendisyon ni Jehova.