Magin Bilog na Kalag sa Saindong Paglilingkod
1 Bilang mga disipulo ni Jesus, iinasignar kita na maghulit kan maogmang bareta dapit sa Kahadean nin Dios asin gumibo nin mga disipulo ni Jesu-Cristo. (Mat. 24:14; 28:19, 20) Mayo na nin iba pang gibohon digdi sa daga na nakakaagid sa pagkaapretado o importansia. Kalabot an buhay kan minilyon na tawo. Angay iyan na tawan kan satong pinakamahihingoa. An sadol ni Pablo minaaplikar na marhay: “Ano man an saindong ginigibo, gibohon iyan nin bilog na kalag na siring baga kun para ki Jehova.” (Col. 3:23) An “bilog na kalag” tinatawan nin kahulogan na pagkakaigwa nin “mainit na entusiasmo o debosyon na saro sana an pinupunta.” Bilog na kalag daw kamo sa saindong paglilingkod?
2 Ano an hinahagad sa sato kan pagigin bilog na kalag? Inapod ni Jehova an inaakong paglilingkod bilang tinagba, o ikasampulong kabtang. (Mal. 3:10) Imbes na mag-asignar nin espisipikong kantidad, an ikasampulong kabtang nagrerepresentar sa panahon asin kosog na ginagamit niato sa paglilingkod ki Jehova bilang kapahayagan kan satong pagkamoot para sa saiya asin sa pagmidbid sa satong pagdusay sa saiya. (w92-BI 12/1 p. 21 [w92 12/1 p. 15]) Maninigong ipaheling kan satong aktibidad an rarom kan satong debosyon asin pagkamoot ki Jehova. An saro na bilog an kalag napahihirong maglingkod ki Jehova sa pinakalubos na makakaya sagkod na itinotogot kan saiyang salud asin mga kamugtakan.
3 Inomaw ni Pablo an mga Kristiano na “nagpapagal asin naghihingoa” basado sa paglaom. (1 Tim. 4:10) Binabalosan sinda nin bendisyon ni Jehova, na “nakapayayaman.” (Tal. 10:22) Sa kabaliktaran, an mga nagtatao nin kadikit o sa napipiritan na paagi dai nakakaeksperyensia kan kaogmahan na naggigikan sa pagtatao. (Gibo 20:35) An pagpabaya na itao an satong pinakamakakaya aktuwalmenteng hinahabonan si Jehova kan “ikasampulong kabtang” na para sa saiya.—Mal. 3:8.
4 Pagtao kan Satong Pinakamakakaya: Kun kita nakikikabtang sa paglilingkod sa langtad asin itinatao an satong report, eksakto daw an report? An librong Our Ministry, pahina 104, nagsasabi: “An saindong oras sa paglilingkod sa langtad maninigong pumoon kun ponan na nindo an saindong pagpatotoo asin matapos kun tapuson na nindo an huring pagsongko sa kada panahon nin pagpapatotoo. An oras na ginamit para sa mga pagmeryenda o pagkakan durante kan panahon nin paglilingkod sa langtad dai dapat na ibilang.” An marahay na pagpaplano asin paghihingoa kinakaipuhan tanganing magibo an pinakadakol durante kan panahon na yaon kita sa paglilingkod sa langtad.
5 An pagtao kan satong pinakamakakaya nangangahulogan na gumibo kita kan pinakadakol na makakaya niato kun kita nakikikabtang sa paglilingkod. An saro na bilog an kalag dai tutuyohon na limitaran an saiyang paghuhulit sa paminsanminsan na pagprobar sa impormal na pagpapatotoo imbes na sa pakikikabtang sa pagharongharong. An bilog an kalag, hoben, dai pa bautisadong parahayag dai maluwas sa paglilingkod huli sana sa pamimirit kan saiyang mga magurang, na nagpapaheling nin kadikiton na interes sa pagduman sa mga pinto o sa pakikikabtang sa pagtao nin patotoo.
6 Dinadagka kita ni Pablo na papagdanayon an satong kahigosan tanganing dai magin maluya. (Heb. 6:11, 12) Kanigoan na kagayagayahan na marepaso an satong personal na paglilingkod asin dai makanompong nin dahelan na masopog—huli ta kita nagin bilog na kalag! (2 Tim. 2:15) An satong pinakadakulang kagayagayahan magigin totoo kun maheling na niato sa tahaw kan mga nakaligtas sa dakulang kahorasaan an personal na mga tinabangan niato. Segurado, mayaman na binibendisyonan ni Jehova an mga naglilingkod saiya nin bilog na kalag.