Hapot
◼ Anong prosedimiento an maninigong sunodon kun iinaatubang an mga resolusyon sa kongregasyon?
Hinahagad an resolusyon kun kaipuhan na gibohon an sarong desisyon dapit sa importanteng mga bagay siring baga kan pagbakal nin lote, pagbago o pagtogdok nin Kingdom Hall, pagpadara nin espesyal na mga kontribusyon sa Sosyedad, o pag-asikaso sa mga gastos kan paraataman sa sirkito. Parateng pinakamarahay na iatubang an resolusyon para sa pag-aprobar sa kada panahon na gagastohon an mga pondo kan kongregasyon.
Puwedeng gibohon an eksepsion sa mga kamugtakan na kalabot an espesyal na mga pangangaipo may koneksion sa importanteng mga proyekto o aktibidad. Halimbawa, puwedeng gumibo nin resolusyon nin sarong beses an kongregasyon na magkontribuwir nin espisipikong kantidad kada bulan sa Sosyedad para sa pambilog na kinaban na gibohon o para sa pondo sa Kingdom Hall. Siring man, an normal na mga gastos sa pagpadalagan kan Kingdom Hall, arog baga kan koryente asin mga suplay sa paglinig, dai nagkakaipo nin resolusyon.
Kun may pangangaipo, maninigong pag-olayan nin marhay kan grupo nin kamagurangan an bagay. Kun an kadaklan minaoyon na gibohon an sarong bagay, an saro sa mga magurang, puwedeng miembro kan Komite sa Paglilingkod kan Kongregasyon, maninigong mag-andam nin nasusurat na resolusyon para iatubang sa Pagtiripon sa Paglilingkod.
An magurang na nag-aakto bilang tsirman maninigong ipaliwanag sa halipot pero malinaw an pangangaipo asin kun ano an irinirekomendar kan grupo nin kamagurangan tanganing asikasohon iyan. Dangan tatawan nin oportunidad an kongregasyon na maghapot nin konektadong mga hapot. Kun komplikado an bagay, tibaad pinakamarahay na idigson an pagboto sagkod sa masunod na Pagtiripon sa Paglilingkod tanganing matawan an gabos nin panahon na maghorophorop dapit dian. An aktuwal na boto kukuanon paagi sa pag-itaas nin kamot kan mga miembro kan kongregasyon.
An pagboto sa resolusyon limitado sa nagdusay asin bautisadong mga miembro kan kongregasyon. Bakong angay para sa mga bisita hale sa ibang kongregasyon na magpartisipar.
Pakaaprobar sa resolusyon, maninigo iyan na petsahan, pirmahan, asin ibugtak sa file kan kongregasyon.