Paggibo sa Parateng Nakokobrehan na Teritoryo
1 Naoogma kitang maresibi an mga bareta na dakol na kongregasyon an parateng ginigibo an saindang teritoryo. (Mat. 24:14; 1 Tim. 2:3, 4) Dawa ngani nag-aatubang ini nin angat, iyan puwedeng mapangganahan kun kita andam na marhay na atubangon an manlaenlaen na kamugtakan na minalataw.
2 Epektibong mga Introduksion an Liyabe: Mahalagang marhay na magin andam na gumamit nin saro o labi pang pinag-isipan na gayong mga introduksion. Maninigong kalabot sa mga iyan an direktang mga tataramon na liniliwanag an mahalagang mga dahelan kan parateng pagsongko niato.
3 An librong Reasoning nagtatao nin dakol na marahay na halimbawa nin angay na mga introduksion na magagamit. Tolo an nalilista sa pahina 15 sa irarom kan temang “In Territory Often Worked.” Ensayohon an mga boot nindong gamiton sa saindong teritoryo.
4 An ibang parahayag nakakanompong nin kapangganahan sa paggamit nin mga bareta gikan sa lokal na diaryo tanganing makapoon nin mga pag-orolay sa parateng ginigibong teritoryo. An librong Reasoning nagtatao nin tolong halimbawa kun paano ini magigibo. Konsiderara an ikaduwang introduksion sa irarom kan temang “Crime/Safety” sa pahina 10 asin an enot na duwang introduksion sa irarom kan temang “Current Events” sa pahina 10 asin 11.
5 Mga Introduksion na Inaandam Nindo: Magin suwelto na bumilog asin gumamit nin pambukas na mga komento na iinatubang sa librong Reasoning. Ipahayag ini sa saindong sadiring mga tataramon. Puwede nindong ensayohon iyan kaiba an eksperyensiadong parahayag bago gamiton an mga iyan sa langtad.
6 Halimbawa, puwede nindong sabihon an siring kaini:
◼ “Poon kan nakaagi kong pagdalaw saindo, [sambiton an dai pa sana nahahaloy na pangyayari na pinag-oolayan kan mga tawo sa komunidad.] Huling kita gabos apektado, dakol sa satong kataraed an nagpahayag nin grabeng paghadit. Tibaad pinag-isip-isip na man nindo iyan. [Pumondo nin kadikit tanganing togotan an posibleng pagsimbag.] Huli sa mga kamugtakan ngonyan sa kinaban, dai daw kamo maoyon sa isinurat kan propetang si Jeremias sa kapitulo 10, bersikulo 23?” Pakabasa kan teksto, kuanon an mga komento kan kagharong, dangan buksan an sarong teksto na nagpapaheling kun paano reresolberan ni Jehova an partikular na problema na pinag-oolayan.
7 O puwede nindong sabihon:
◼ “Daing duwa-duwa na narisa nindo sa bareta ngonyan [sambiton an espisipikong pangyayari.] Tibaad maoyon kamo na ini nakakaapektar sa sato gabos. [Pumondo para sa posibleng pagsimbag.] Makakalaom kita sa mga gobyerno na magproponer nin halipot na panahon na remedyo; pero, ipinaheheling kan Biblia kun paano permanenteng mareresolberan an problema.” Buksan an sarong teksto na nagpapaheling kan gigibohon nin Dios.
8 “Taano ta Parate Kamong Nagsosongko?”: An angay na mga simbag sa pagkontrang ini itinatao sa librong Reasoning sa pahina 20 sa irarom kan temang “Why Do You People Call So Often?” Minsan ngani dai hinahapot, makakatao kita nin marahay na patotoo kun tatabangan niatong masabotan kan iba na an tunay na pagkamoot sa Dios asin sa kataed nagmomotibar sa sato na parateng dumalaw sagkod na mapupuwede. An pag-oolay sa mga tataramon ni Jesus sa Juan 21:15-17 puwedeng magin kapakipakinabang sa bagay na ini.
9 Sagkod na sabihon ni Jehova na tama na, padagos na atubangon niato an angat na paggibo sa parateng nakokobrehan na teritoryo. Sa determinasyon na ini, makakasierto kita sa saiyang paggiya, proteksion, asin bendisyon sagkod sa katapusan.—Mat. 28:19, 20.