An Gabos na Klase nin Tawo Maliligtas
1 Kabotan ni Jehova “na an gabos na klase nin tawo makaligtas asin makaabot sa tamang kaaraman kan katotoohan.” (1 Tim. 2:4) Minsan ngani dakula an impluwensia sa mga tawo kan saindang erensia asin palibot, igwa sinda nin libreng kabotan asin puedeng magdesisyon indibiduwalmente kun paano ninda gagamiton an saindang buhay. (Mat. 7:13, 14) Paano kaini naaapektaran an satong pagmansay sa mga tawong hinuhulitan niato?
2 Dai niato maninigong ipamugtak na an interes nin saro sa katotoohan iminamanda kan saiyang pinaghalean na nasyon o kultura o kan posisyon sa sosyedad. Puedeng magin interesante an katotoohan sa mga magsalang may hababa o halangkaw na edukasyon, sa mga politiko, asin sa mga propesyonal, ateista, asin pati sa bantog na mga naggigibo nin karatan. An mga tawo gikan sa gabos na pinaghalean asin kamugtakan sa sosyedad nagbago na kan saindang dating paggawe asin naglalaom na ngonyan sa buhay sa bagong kinaban nin Dios. (Tal. 11:19) Kun siring, dai kita maninigong magduwaduwa na dolokon an mga tawo sa gabos na klase nin pamumuhay na dara an mensahe kan Kahadean.
3 Konsiderara an mga Halimbawang Ini: Plinano nin sarong lalaki na gadanon an saiyang padrasto alagad dai nia ini ginadan. Dai nahaloy nagdesisyon siang maghugot alagad nasudyang gibohon iyan. Pakatapos na sia mabilanggo huli sa paghabon asin pagnegosyo nin droga, nalaglag an saiyang pag-agom. Ngonyan an tawong ini nagkakamit na nin maogmang pag-agom saka nin marahay na relasyon sa saiyang padrasto. Ano an nakatabang nin dakula? Pinag-adalan nia an Biblia kaiba kan mga Saksi ni Jehova asin iinaplikar an saiyang nanodan. Dai sia ibinilang ni Jehova na dai na puedeng kaldahon.
4 An pagigin bantog nin sarong hoben na babae bilang artista sa TV dai saiya nakapagtao nin kaogmahan. Alagad, huling naghanga sa marahay na paggawe sa moral kan mga Saksi, nag-ako sia nin pag-adal sa Biblia, asin dai nahaloy naghuhulit na sia sa iba. Saen man sia magduman sa ministeryo sa harong-harong namimidbid sia, alagad ta ipinaliliwanag nia na boot niang mamidbid bilang saro sa Mga Saksi ni Jehova imbes na bilang sarong artista.
5 Kan ponan nin sarong Saksi an pag-adal sa Biblia sa sarong suskritor nin An Torrengbantayan, naisihan iyan nin sarong kataed asin nag-atender ini sa pag-adal. Namidbid tolos kan kataed an katotoohan na haloy na niang pinagpaparahanap! Kinanselar ninda mag-agom an mandamiento nin diborsio na itinao na sa sainda asin hinusay an saindang pag-agom. Kalabot sia sa astrolohiya asin konektado sa sarong espiritistikong kulto, alagad tolos niang iinapon an mahalon na mga libro asin an gabos na iba pa na yaon sa saiya na may koneksion sa demonismo. Dai nahaloy nagpoon na siang umatender sa mga pagtiripon asin makipag-olay sa mga paryente asin katood manongod sa saiyang bagong manompongan na pagtubod. Ngonyan entusiastiko na siang nagpapatotoo sa iba.
6 Dai niato maninigong husgaran tolos an siisay man. Imbes, ihiras niato an maogmang bareta sa mga tawo sa gabos na lugar. Makasasarig kita na si Jehova, na ‘nagheheling kun ano an puso,’ magigin an “Paraligtas sa gabos na klase nin mga tawo.”—1 Sam. 16:7; 1 Tim. 4:10.