Kumusta Man an Saindong mga Paryente?
1 An kadaklan sa sato igwa nin mga paryente na mayo sa katotoohan. Kanigoan an paghimuyawot niato na sinda umiba sa sato sa dalan pasiring sa buhay! Nangorognang totoo ini kun sinda mga miembro kan sato mismong kairiba sa harong. Dawa kun prinobaran na niato sa laog nin dakol na taon na tabangan sinda, dai kita maninigong magkonklusyon na mayo nang paglaom.
2 Kan gibohon ni Jesus an saiyang paghuhulit, “sa katunayan, an saiyang mga tugang dai naggigibo nin pagtubod sa saiya.” (Juan 7:5) Sa sarong panahon, an saiyang mga paryente naghona na sia rungaw. (Mar. 3:21) Pero, si Jesus dai nawaran nin paglaom sa sainda. Pag-abot nin panahon, an saiyang mga tugang nag-ako kan katotoohan. (Gibo 1:14) An saiyang tugang sa ina na si Santiago nagin sarong harigi sa Kristianong kongregasyon. (Gal. 1:18, 19; 2:9) Kaya dai pumondo sa pagmamaigot na paabotan an saindong mga paryente kan maogmang bareta nin Kahadean.
3 Magin Nakarerepresko, Bakong Nakalulunos: Kan si Jesus maghulit sa iba, an mga naghinanyog sa saiya narepreskohan, dai natakot. (Mat. 11:28, 29) Dai nia sinda binigla nin mga katokdoan na dai ninda kayang masabotan. Tangani na marepreskohan nin tubig nin katotoohan an saindong mga paryente, tawan sinda nin padikitdikit, bakong nin sobra kadakol! An sarong nagbibiaheng paraataman nagkomento: “An pinakamarahay na mga resulta nakakamtan kaidtong mga pinupukaw an interes kan saindang mga paryente paagi sa dikit-dikit na paghuhulit.”—1 Cor. 3:1, 2.
4 Dakol na Kristiano an epektibong nakapagpatotoo na sa saindang daing pagtubod na agom paagi sa pagwalat nin literatura na nakabukas sa mga tema na puedeng makakua kan saindang interes. An sarong tugang na babae na ginibo man ini nagkondukta nin pag-adal sa saiyang mga aki na nadadangog kan saiyang agom na lalaki, na nagtatao nin mga paliwanag na pakikinabangon kaini. Kun beses hinahapot nia ini: “Nanodan ko an siring kaini sa sakong pag-adal ngonyan. Ano an paghona mo dapit kaiyan?” Sa katapustapusi an saiyang agom na lalaki nag-ako kan katotoohan.
5 Magin Magalang, Bakong Daing Pasensia: An sarong parahayag nagkomento na “maski an mga paryente igwang diretso sa saindang sadiring mga punto de vista asin opinyon.” Kaya maninigo kitang magpaheling nin paggalang kun itinatao ninda an saindang opinyon o kun espesipiko nindang hinahagad sa sato na dai sinda kaolayon manongod sa katotoohan. (Ecl. 3:7; 1 Ped. 3:15) Paagi sa pagigin mapasensia asin pagigin marahay na mga parahinanyog, makahahanap kita nin angay na mga oportunidad na makapagtao nin dai risang pagpatotoo. An siring na pasensia puedeng magin kapakipakinabang, siring sa nagin situwasyon nin sarong Kristianong agom na lalaki na mapasensiang tinagalan an pagmaltrato kan saiyang daing pagtubod na agom na babae sa laog nin 20 taon. Kan magpoon nang magbago an babae, an lalaki nagsabi: “Kanigoan an pasasalamat ko ki Jehova na tinabangan nia akong kultibaron an bunga kan espiritu na pakatios, huli ta naheheling ko na ngonyan an resulta: An sakong agom na babae nagpoon nang lumakaw sa dana nin buhay!”
6 Kumusta man an saindong mga paryente? Tibaad paagi sa saindong marahay na Kristianong paggawe asin sa saindong mga pamibi sa kapakanan ninda, “puede nindong madara sinda ki Jehova.”—1 Ped. 3:1, 2, nota sa ibaba.