An Satong Desisyon—Sundon an Dalan ni Jehova sa Buhay
1 An sarong tampok na kabtang kan “Sa Dios na Dalan nin Buhay” na mga Kombension iyo an resolusyon na inaprobaran sa pantapos na pahayag. Iyan nagpoon sa deklarasyon na: “Kita . . . bilog na pusong minaoyon na an sa Dios na dalan iyo an pinakamarahay na dalan sa buhay.” Girumdomon an nagkapirang importanteng punto kan resolusyon na iyan na dian kita nagsabi, “IYO!”
2 Desisyon niatong magdanay na malinig sa atubangan ni Jehova, na mayong digta kan kinaban. Magpapadagos kitang enoton sa satong buhay an kabotan nin Dios. Ginagamit an saiyang Tataramon, an Biblia, bilang satong giya, dai kita masuway patoo o pawala, sa siring pinatutunayan na an sa Dios na dalan nakalalabi nanggad sa dalan kan kinaban.
3 An kinaban sa pankagabsan binabasangbasang an sa Dios na dalan sa buhay asin inaani ninda an mga epekto. (Jer. 10:23) Kun siring dapat na kita padagos na matokdoan kan satong Kaharohalangkaweng Paratokdo, si Jehova, na nagsasabi: “Iyo ini an dalan. Maglakaw kamo dian, banwaan.” (Isa. 30:21) An dalan ni Jehova sa buhay, na sinasabi sa Kasuratan, nakalalabi sa gabos na bagay. Tangani na masunod an dalan na iyan, kaipuhan na lubos niatong aprobetsaran an gabos na itinotokdo sa sato ni Jehova.
4 An Marahayon na Programa nin Pagtotokdo ni Jehova: Itinotokdo sa sato ni Jehova an tunay na katuyohan nin buhay asin kun paano gagamiton an satong buhay sa pinakakapakipakinabang na paagi. Tinotokdoan nia kita kun paano mapaooswag an kualidad kan satong buhay sa mental, moral, asin espirituwal na paagi. Tinotokdoan nia kita kun paano may katoninongan na mamumuhay kaiba kan satong mga tugang, kan satong pamilya, asin kan satong kapwa. Ginigibo nia ini paagi sa saiyang libro, an Biblia, asin paagi sa saiyang organisasyon.
5 An satong mga pagtiripon sa kongregasyon mahalagang marhay sa bagay na ini. Mantang regular kitang nag-aatender asin nakikikabtang sa gabos na limang pagtiripon, kita nag-aako nin kompletong pagsasanay bilang mga ministro kan maogmang bareta asin nin timbang na marhay na edukasyon sa Kristianong pamumuhay. (2 Tim. 3:16, 17) An satong Kaharohalangkaweng Paratokdo nagtatao pa nin teokratikong edukasyon paagi sa mga asamblea asin kombension. An satong pasohan maninigo na nungkang mapaltahan ni sarong pagtiripon o sarong sesyon kun itinotogot kan satong salud asin mga kamugtakan na kita makaatender.
6 Maigot logod kitang magpadagos na sundon an dalan nin Dios sa buhay sa maabot na mga aldaw, na an gabos para sa kaomawan ni Jehova asin para sa satong daing katapusan na pakinabang!—Isa. 48:17.