“Magin Mapasensia”
1 Mantang naheheling niato na an katapusan kan daan na palakaw ni Satanas orog na naghaharani kasuarin man, mahalagang marhay na kita “magin mapasensia” mantang naghahalat sa aldaw nin pagliligtas ni Jehova. Nangorogna sa huring kabtang kan panahon na ini, an maraot na mga puersang kaiwal determinadong irayo an satong atension sa pangenot na isyu kan soberaniya ni Jehova asin sinusugotan kita na malingling kan kadakolan nin personal na interes. Paagi kaini, dadayaon kita ni Satanas na umontok o magluwayluway sa paghuhulit kan Kahadean. (Sant. 5:7, 8; Mat. 24:13, 14) Sa anong mga paagi niato ikapaheheling an siring na kinakaipuhan na pagpapasensia?
2 Paagi sa Pagpopogol: Kun kita nakanunupar nin pagkaindiperente o pagtumang sa satong ministeryo, an pagpopogol makatatabang sa sato na maghingoa sa paghuhulit. Kita dai tolos-tolos na matatakot o makokolgan an boot kun an mga tawo na satong nanonompongan pabiglabigla o maisog. (1 Ped. 2:23) An panlaog na kakosogan na ini makaoolang sa sato na magtaram nin negatibo manongod sa mga tawo sa satong teritoryo na nagpapaheling nin pagkaindiperente o pagkaanggot sa satong gibohon, sa pakaaram na an siring na pag-orolay makapanluluya sa boot niato asin sa mga kaiba niato sa ministeryo.
3 Paagi sa Mapasensiang Pagtagal: Puedeng masakitan kita na magpasensia kun pakatapos na makanompong nin marahay na kaolay sa paglilingkod sa langtad, dai na niato giraray nanonompongan sa harong an interesado. Totoo man iyan kun an mga inaadalan niato maluway na umoswag o manindogan para sa katotoohan. Minsan siring, an mapasensiang pagtagal parateng binabalosan nin marahay na mga resulta. (Gal. 6:9) An sarong tugang na babae dakol na beses na dinalaw liwat an sarong hoben na babae bago aktuwal na naponan an pag-adal sa Biblia. Sa enot na limang pagdalaw, an babae sibot sa ibang mga bagay. Sa ikaanom na pagprobar, an tugang na babae narupit sa makosogon na oran, tangani sanang maabotan na mayong katawotawo sa harong. Minsan siring, determinadong tawan an babae nin saro pang oportunidad, nagsongko giraray an tugang na babae asin nanompongan an babae na andam nang mag-adal. Pakatapos kaiyan, padagos na nag-oswag an inaadalan asin sa halipot na panahon nagdusay kan saiyang buhay ki Jehova.
4 Aram niato na dai mahuhuri an aldaw ni Jehova. Kaya kita naghahalat sa pag-otob nia sa mga bagay, sa pakaaram na an pagpapasensia nin Dios magpapaluwas nin mararahay na bunga. (Hab. 2:3; 2 Ped. 3:9-15) Dapat kitang magin mapasensia siring ki Jehova asin dai umontok sa ministeryo. “Paagi sa pagtubod asin pagpapasensia,” maglaom ki Jehova na babalosan kamo huli sa saindong kahigosan.—Heb. 6:10-12.