Nakinabang Kita sa “Sa Dios na Dalan nin Buhay” na mga Kombension
1 Mga pirang bulan pa sana an nakaagi, naggigibo kita nin mga plano tangani na makaatender sa 1998-99 “Sa Dios na Dalan nin Buhay” na Pandistritong mga Kombension. Ngonyan iyan nagin nang dai malilingawan na makahulogan na pangyayari sa teokratikong kasaysayan kan organisasyon. Lubos niatong nagustohan an mayaman na espirituwal na kakanon na inako niato sa marahayon na mga pagtiripon na idto.
2 Talagang nakapupukaw sa boot an internasyonal na aspekto kan mga kombension. Baga man an mga misyonero asin ibang delegado hale sa ibang mga nasyon presente o dai sa inatenderan niato, nadangog niato gabos an magayon na mga eksperyensia sa kabtang kan Biernes na hapon na may temang “Paglilingkod sa Langtad nin Pagmimisyonero.” An aroaldaw na “Mga Report Manongod sa Pag-oswag kan Pag-aani” hale sa bilog na kinaban an nakaparirigon na marhay sa boot.
3 Marahayon na Bagong mga Luwas: An huring pahayag kan Biernes sinimbag an ihinapot nin dai mabilang na mga tawo na dai nakaaaram kan katotoohan: “Igwa daw nin Buhay Pagkagadan?” An pinakainteresanteng pahayag na idto natapos paagi sa pagluwas nin sarong bagong brosyur, an Ano an Nangyayari sa Sato kun Kita Magadan? Mantang pinag-aadalan niato iyan sa mga Pag-adal sa Libro kan Kongregasyon ngonyan na bulan asin sa Marso masasabotan niato kun gurano kahalagang marhay kan brosyur na ini sa pagtabang sa mga tawo na masabotan an katotoohan dapit sa kamugtakan kan mga gadan. Rarangahon man kaiyan an mga nagadanan paagi sa paglaom na pagkabuhay liwat.
4 Natapos an programa kan Sabadong hapon paagi sa pahayag na “An Kaglalang—An Saiyang Personalidad Asin an Saiyang mga Dalan.” Sa lohikong paagi giniyahan kita kaiyan sa konklusyon na siertong igwa nin sarong Kaglalang. Tangani na matabangan kita sa pagtabang sa iba na masabotan an katunayan na ini, ilinuwas an librong Is There a Creator Who Cares About You? Minsan ngani dinudugangan kaiyan an satong pagtubod ki Jehova asin an satong pagpapahalaga sa saiyang personalidad asin mga dalan, dinisenyo an libro espesyalmente para sa mga, dawa ngani halangkaw an inadalan sa sekular na mga bagay, tibaad daing pagtubod sa Dios.
5 Sarong Odok sa Pusong Resolusyon: Idinoon kan pangultimong pahayag kan kombension an pangangaipo na kita gabos “Padagos na Lumakaw sa Dalan ni Jehova.” Angay nanggad na ipahayag sa resolusyon an satong indibiduwal na determinasyon na pirmeng susogon, suportaran, asin palakopon an pagigin nangongorog kan dalan nin Dios sa buhay! (Isa. 30:21) Ngonyan dapat kitang magin determinadong mamuhay kaoyon kan mga desisyon na ini. Abaa karahay na espirituwal na pagparigon an inako niato paagi sa pag-atender sa “Sa Dios na Dalan nin Buhay” na Kombension!