Nagkaigwa Sinda nin Pagkapusoan

BAKONG pirmeng pasil na magkaigwa nin pagkapusoan tanganing makapaghulit. Sa katunayan, sinabi ni apostol Pablo na sarong beses, ginibo nia iyan “na may dakulang paglapigot.” (1 Tesalonica 2:2) May pakinabang daw an paghihingoa na ‘maglapigot’ sa paghuhulit? Mayo nin garantiya sa pambihirang mga eksperyensia, alagad an banwaan nin Dios parateng naoogma na sinda nagkaigwa nin pagkapusoan. Estudyare an nagkapirang halimbawa.

Atentong naghinanyog an otso anyos na aking babae na an ngaran Tara mantang sinasabi sa klase kan saindang maestra na durante kan Guerra Mundial II, an Judiong mga preso sa mga kampo de konsentrasyon kinaipuhan na magkaigwa sa gubing ninda nin amarilyong Bitoon ni David bilang tanda. Inisip ni Tara kun baga maninigo siang magtaram. “Namibi ako na buklat an sakong mga mata,” an paggirumdom nia. Dangan iinitaas nia an saiyang kamot asin sinabi na an Mga Saksi ni Jehova yaon man sa mga kampong idto, asin an yaon sa gubing ninda lilang triangulo. An maestra nagkainteres asin nagpasalamat sa saiya. An komento ni Tara nagpangyari nin dugang pang mga pakikipag-olay sa maestra, na sa huri ipinadalan pa ngani sa bilog niang klase an video na Jehovah’s Witnesses Stand Firm Against Nazi Assault.

Sa Guinea, Solnopan na Aprika, an sarong hoben na dai pa bautisadong parahayag na an ngaran Irène gustong umoswag sa saiyang ministeryo. Inenkaminar sia kan misyonerang nakikipag-adal sa saiya sa Biblia na probaran na iwaras an mga magasin na An Torrengbantayan asin Awake! sa mga kaeskuela nia. Nag-alangan si Irène ta habong maghimate kaidto an mga kaklase nia. Minsan siring, napahiro kan pag-enkaminar kan misyonera, nagdesisyon si Irène na enot na dolokon an estudyante na garo baga iyo an pinakakontra. Sa pagngalas ni Irène, naghimate an daragita asin galagang nag-ako kan mga magasin. Uminarog an ibang estudyante. Mas dakol na magasin an ikinawaras ni Irène kan bulan na idto kisa ikinawaras nia sa bilog na limang bulan na nakaagi.

Sa Trinidad nag-alangan na marhay an sarong magurang sa kongregasyon na dumolok sa prinsipala nin sarong eskuelahan tanganing ipaheling sa saiya an nakapagtotokdong halaga kan magasin na Awake! Minsan siring, nagkaigwa sia nin pagkapusoan. Sabi nia: “Namibi ako mantang palaog ako sa solar kan eskuelahan. Dai ako makapaniwala kan marahayon an paheling sako kan prinsipala.” Inako nia an magasin na Awake! na may temang “What Hope for Today’s Youths?” (sa Bicol, “Ano an Paglaom Para sa mga Hoben Ngonyan?”) asin uminoyon pa ngani na gamiton iyan sa pagtotokdo sa klase. Poon kaidto, 40 magasin na an inako nia na manlaenlaen an isyu.

Bilang hoben, si Vaughn pirmeng nadedepisilan sa paghuhulit. “Ninenerbios ako, ginagaranot an palad ko, asin marikason an pagtaram ko—dai ako makapagluwayluway.” Minsan siring, sia nagin bilog na panahon na ministro. Sa ibong kaiyan, dai nagin pirmeng pasil para sa saiya na magtaram. Sarong beses, pakatapos nin nakapanluluya sa boot na aldaw nin paghanap nin trabaho, gusto niang may mapatotoohan sa tren, “tangani na minsan paano may marahay na ibunga an sarong mamondong aldaw.” Alagad ta natakot sia sa garo maimpluwensiang mga negosyante na yaon sa tren sa irarom kan daga. Sa katapustapusi, nagkaigwa sia nin pagkapusoan na kaolayon an may edad nang lalaki na kataed nia. Halawig na orolay an ibinunga. “Marahayon an mga hapot mo dawa hoben ka pa,” sabi kan negosyante, na naghapot, “Ano teologo ka?” Nagsimbag si Vaughn, “Bako po, saro ako sa Mga Saksi ni Jehova.” “A,” naghuyom an lalaki. “Ngonyan nasasabotan ko na.”

An gabos na Saksing ini—asin an iba pang dai mabilang—naoogma na sinda nagkaigwa nin pagkapusoan na maghulit. Iyan man daw an gigibohon nindo?

[Retrato sa pahina 25]

Si Tara

[Retrato sa pahina 25]

Si Vaughn