Magin Arogan sa Marahay na mga Gibo
1. Taano ta kaipuhan niato na nangorognang magin mapagrisa sa satong gawe-gawe sa pandistritong kombension?
1 Kun kita nagtitiripon sa pandistritong mga kombension na dakula an kabilangan, nangorognang naririparo kan mga nagmamasid an paagi nin paggawe niato asin kun paano niato tinatratar an iba. Kun siring, an lambang saro sa sato nagkakaipo na magtao nin espesyal na atension sa konseho kan Biblia: “Magin marahay an kaisipan, na sa gabos na bagay ipinapaheling mo na ika arogan nin marahay na mga gibo.” (Tito 2:6, 7) Tibaad kaipuhan nin dagdag na paghihingoa na ‘magrisa, bakong sa personal na interes sa sadiri sana niatong mga bagay-bagay, kundi siring man sa personal na interes sa mga bagay-bagay kan iba.’ (Fil. 2:4) Estudyaran niato an nagkapirang kabtang na puede niatong iaplikar ini sa satong nagdadangadang na “Pamurawayon an Dios” na Pandistritong Kombension.
2. Ano an maninigo niatong girumdomon may koneksion sa mga areglo sa pagkakan?
2 Mga Areglo sa Pagkakan: Nagpapaheling kita nin marahay na mga gibo kun mabalon kita nin simple sanang pangudtohan asin dai kita makadidisturbo sa mga nasa kaharaning tukawan kun kita nangungudto. Nagpapaheling nin konsiderasyon kun lilikayan niato na maula an tubig o juice mientras na nagkakakan asin, kun mangyari nanggad ini na dai man tinutuyo, maninigo niatong linigan iyan tolos-tolos. Bago humale sa pinagtiriponan kan kombension, maninigo niatong seguradohon na mayo nin nawalat na basura sa o harani sa satong tukawan, sa siring binabayaan an tiriponan na malinig siring kan pag-abot niato kan aga.
3. Paano kita ‘makagigibo kan marahay sa gabos’ paagi sa pakikikooperar sa mga attendant?
3 Paradahan Asin mga Attendant: Kun may lunadan kamo, lubos na makikooperar sa mga attendant sa paradahan, na sinusunod an mga instruksion ninda kun saen maparada, minsan ngani bako ining kombenyenteng marhay para sa saindo. Sunodon an instruksion kan mga attendant kun dapit sa tukawan, na ginigirumdom na may mga tukawan na parateng nakatagama para sa mga may edad na asin maluya an hawak. Siring man, kun makua nin ano man na bagong mga ilinuwas, likayan an pagdalidali bago pa ngani matapos an sesyon tangani sanang maenot sa linya, kundi mapasensiang maghalat na matapos an sesyon dangan sunodon an mga instruksion kan tsirman kan sesyon asin kan mga attendant. Sa mga paaging ini kita ‘naggigibo kan marahay sa gabos.’—Gal. 6:10.
4, 5. Paano makapagtatao an mga aki nin kaomawan ki Jehova, asin ano an paninimbagan nin mga magurang?
4 Mga Magurang Asin Aki: Sa kinaban na kadakol kan hoben na maraot an ugale, napapalaen nanggad an satong mga aki, asin ini nagtataong kaomawan ki Jehova asin sa saiyang organisasyon. Minsan siring, kun beses nagkakaproblema kun bakong tama an pag-asikaso sa mga aki. (Tal. 29:15) Dai maninigong pabayaan nin mga magurang an saindang mga aki na daing kaiba durante kan mga intermisyon.
5 Bago kan kombension nanompongan nin nagkapirang magurang na nakakatabang an pagrepaso sa saindang mga aki kan klase nin gawe-gawe na linalaoman sa mga ini. (Efe. 6:4) Tinatabangan ninda an mga aki na masabotan na an tunay na Kristianong pagkamoot “dai minagawe nin bakong disente” o “naghahanap kan saiyang sadiring kapakanan.” (1 Cor. 13:5) An pandistritong kombension sarong panahon na itinagama tangani na tokdoan ni Jehova, asin makapaheheling nin paggalang sa areglong ini an mga aki sagkod an mga nasa edad na paagi sa saindang gawe-gawe sa lugar kan kombension sagkod sa iba pang lugar.—Isa. 54:13.
6. Ano an puedeng magin epekto sa iba kan satong marahay na gawe-gawe?
6 An satong marahay na gawe-gawe dakula an magigibo tangani na makontra an salang mga pagsabot asin maakit an mga tawo sa tunay na pagsamba. (Mat. 5:16; 1 Ped. 2:12) Gabos logod na makaolay niato sa satong pandistritong kombension mag-ako nin paborableng patotoo paagi sa satong paggawe asin kun paano niato sinda tinatratar. Paagi kaini ‘ipaheheling niato na kita arogan nin marahay na mga gibo’ asin pamumurawayon niato si Jehova.—Tito 2:7.
[Kahon sa pahina 4]
Magin Makonsiderasyon sa Iba
▪ Linigan an saindong tukawan bago maghale
▪ Magin mapasensia kun nagkukua nin bagong mga ilinuwas
▪ Makikooperar sa mga attendant
▪ Asikasohon nin tama an saindong mga aki