Magdanay sa Paghuhulit
1 Delikadong mga panahon na ngonyan. Ordinaryo na sana an iriwal sibil, etnikong mga ralaban, natural na mga kalamidad, asin iba pang makatatakot na pangyayari. Ngonyan orog kisa kasuarin man, kaipuhan kan mga pamilya nin tawo an maogmang bareta. Minsan siring, lakop an pagkaindiperente sa espirituwal na mga bagay. Sa nagkapirang lugar, tibaad masakit na manompongan sa harong an mga tawo asin mas masakit pa ngani na makanompong nin mga tawo na maghihinanyog sa sato o na gustong mag-adal kan Biblia. Dawa siring, mahalagang marhay na kita magdanay sa paghuhulit kan maogmang bareta kan naestablisar nang Kahadean nin Dios.—Mat. 24:14.
2 Pagkamoot sa mga Tawo: An satong paghuhulit nagdodoon kan pagkamoot ni Jehova sa mga tawo. “Dai nia mawot na an siisay man malaglag kundi mawot nia na an gabos makapagsolsol.” (2 Ped. 3:9; Ezeq. 33:11) Huli kaini, ipinagboot nia na, arog kan sabi ni Jesus, “sa gabos na nasyon an maogmang bareta kaipuhan na ikahulit nguna.” (Mar. 13:10) Pinapakiolayan nin Dios an mga tawo na dumolok sa saiya tangani na makadulag sa nagdadangadang na paghokom sa kinaban ni Satanas. (Joel 2:28, 29, 32; Sof. 2:2, 3) Dai daw kita nagpapasalamat na tinawan kita ni Jehova kan oportunidad na iyan?—1 Tim. 1:12, 13.
3 An pambilog na kinaban na report nagpapaheling na durante kan 2004 taon nin paglilingkod, may promedyong 6,085,387 pag-adal sa Biblia an ginibo kada bulan, asin may promedyong mga 5,000 na bagong disipulo an nabautismohan kada semana! An nagkapira sa mga bagong nagdusay na ini nanompongan bilang resulta kan bendisyon ni Jehova sa nagdadanay na paghihingoa kan mga parahayag na kaolayon an gabos na tawo sa asignadong mga teritoryo ninda. Kanigoan na kagayagayahan an ibinunga kaiyan sa mga kongregasyon, asin kanigoan na pribilehio na magin kapwa trabahador nin Dios sa nagliligtas-buhay na gibohon na ini!—1 Cor. 3:5, 6, 9.
4 Pag-omaw kan Ngaran nin Dios: Kita nagdadanay sa paghuhulit tanganing omawon si Jehova nin hayagan asin santipikaron an saiyang ngaran sa gabos na tawo. (Heb. 13:15) Dinaya ni Satanas “an bilog na ineerokan na daga” na magtubod na an Dios mayong kapangyarihan na resolberan an mga problema nin katawohan, na sia daing pakiaram sa pagdusa nin mga tawo, o na sia dai talaga nag-eeksister. (Kap. 12:9) Paagi sa satong paghuhulit, idinedepensa niato an katotoohan manongod sa satong kahangahangang langitnon na Ama. Logod na padagos niatong omawon an saiyang ngaran—ngonyan asin sagkod lamang.—Sal. 145:1, 2.