Tamang Kosog nin Boses

KUN an sarong nagpapahayag sa publiko mayo kan kinakaipuhan na kosog nin boses, tibaad magtungka an nagkapirang nagdadangog. Kun maluwayon an pagtaram nin sarong parahayag sa ministeryo sa langtad, tibaad dai nia makua an atension kan kagharong. Asin sa pagtiripon na bakong igo an kosog nin boses kun nagkokomento an mga nagdadangog, an mga yaon dai mag-aako nin kinakaipuhan na pagparigon sa boot. (Heb. 10:24, 25) Sa ibong na lado, kun kinokosogan nin nagpapahayag an saiyang boses sa salang panahon, tibaad dai mapamugtak an mga nagdadangog—mauyam pa ngani.—Tal. 27:14.

Konsideraron an Nagdadangog sa Saindo. Siisay an kaolay nindo? saro daw na indibiduwal? pamilya? sadit na grupo na nagtitiripon bago an paglilingkod sa langtad? enterong kongregasyon? o dakulang kombension? Risang-risa na an kosog nin boses na tama sa sarong kamugtakan tibaad bakong angay sa iba.

Sa manlaenlaen na okasyon, an mga lingkod nin Dios nagtaram sa dakol na nagdadangog. Sa inagurasyon kan templo sa Jerusalem kan kaaldawan ni Salomon, mayo nin kasangkapan sa pagpakosog kan boses. Kaya nagtindog si Salomon sa halangkaw na plataporma asin binendisyonan an banwaan “sa makosog na tingog.” (1 Ha. 8:55; 2 Cron. 6:13) Pakalihis nin mga siglo, pakabuboan kan banal na espiritu kan Pentecostes 33 C.⁠E., pinagtiriponan nin sarong kaburunyogan—an nagkapira interesado, an iba nagtutuyatuya—an sadit na grupo nin mga Kristiano sa Jerusalem. Nagpaheling nin praktikal na kadonongan, si Pedro “nagtindog . . . asin ilinangkaw an saiyang tingog.” (Gibo 2:14) Ikinatao an mapuersang patotoo.

Paano nindo maaaraman kun baga an ginagamit nindong kosog nin boses tama sa sarong situwasyon? An reaksion kan mga nagdadangog saro sa pinakamarahay na basehan. Kun marisa nindo na an nagkapira nagpupumirit na makadangog, maninigo nindong hingoahon na ibagay an kosog kan saindong boses.

Baga man sarong indibiduwal o grupo an kaolay niato, madonong na konsideraron kun siisay an nagdadangog. Kun an saro maluya an pagdangog, tibaad kaipuhan na ilangkaw nindo an saindong boses. Alagad dai kamo mapapamahal sa mga tawo na tibaad maluya sana an reaksion huli sa halangkaw nang edad paagi sa pagkurahaw. Iyan tibaad ibilang pa ngani na tanda nin pagkadaing modo. Sa nagkapirang kultura, an sobrang kosog nin boses ibinibilang na ebidensia na an saro anggot o daing pasensia.

Konsideraron an mga Ribok na Nakadidisturbo. Kun kamo nasa ministeryo sa langtad, an nanonompongan nindong mga kamugtakan talagang may impluwensia sa kosog nin boses na kaipuhan sa pagpatotoo. Tibaad kakompetensia nindo an ribok nin mga sakayan, mga aking maribok, mga idong nagbabatok, makosog na musika, o maribokon na telebisyon. Sa ibong na lado, sa mga lugar na durukotan an harong, tibaad mapasupog an kagharong kun makosogon an pagtaram nindo kaya nakaaapod na kamo nin atension sa pagtaraed.

An mga tugang na nagpapahayag sa kongregasyon o sa mga kombension kaipuhan man na atubangon an manlaenlaen na kamugtakan. An pagpahayag sa luwas laen na marhay sa pagpahayag sa sarong tiriponan na magayon an akustika. Sa Latin Amerika may duwang misyonero na nagbanga sa pagtao nin pampublikong pahayag sa patyo kan harong nin sarong interesado mantang may nagpapaputok nin kuitis sa haraning plasa asin daing ontok an pagtukturaok nin sarong lalong sa harani!

Sa tahaw nin pahayag, tibaad may mangyari na naghahagad magsalang nin pagpondo nguna sagkod na mawara an ribok o nin pagkosog nin boses. Halimbawa, kun an pagtiripon sa edipisyo na an atop sim, tibaad huli sa biglang pag-oran nin makosog haros imposible nang madangog an nagpapahayag kan mga nagdadangog. Seguradong matao nin kadepisilan an aking naghihibi o an ribok huli sa mga nag-abot nin huri. Adalan na remedyohan an mga disturbo tangani na lubos na makinabang an mga nagdadangog sa saindo sa impormasyon na iinaatubang nindo.

An kasangkapan sa pagpakosog kan boses makatatabang kun igwa, alagad dai kaiyan hinahale an pangangaipo nin mas makosog na boses kan nagpapahayag kun iyan hinahagad kan situwasyon. Sa nagkapirang lugar na parate an pagkawara kan koryente, obligado an mga nagpapahayag na ipadagos an saindang pahayag na mayo nin mikropono.

Konsideraron an Materyales na Pinag-oolayan. May koneksion man sa kaipuhan na kosog nin boses an klase kan materyales sa saindong pahayag. Kun an tema naghahagad nin kosog, dai paluyahon an pag-atubang paagi sa maluwayon na pagtaram. Halimbawa, kun binabasa nindo an mga pagdenunsiar sa Kasuratan, maninigo na mas makosog an boses nindo kisa kun nagbabasa kamo nin hatol manongod sa pagpaheling nin pagkamoot. Ibagay sa materyales an kosog kan saindong boses, alagad mag-ingat na gibohon iyan sa paagi na dai nag-aapod nin atension sa saindo man sana.

Konsideraron an Obheto Nindo. Kun gusto nindong pahiroon an mga nagdadangog sa saindo sa maigot na aktibidad, tibaad kaipuhan na gumamit kamo nin medyo mas makosog na boses. Kun gusto nindong liwaton an kaisipan ninda, dai sinda parayoon paagi sa paggamit nin sobra man kakosog na boses. Kun naghihingoa kamong manranga, parate na mas marahay an boses na mas maluway.

Epektibong Paggamit nin Mas Makosog na Boses. Kun hinihingoa nindong apodon an atension nin saro na sibot, parateng nakatatabang an mas makosog na boses. Aram ini nin mga magurang, kaya ilinalangkaw ninda an saindang boses sa pag-apod sa saindang mga aki kun oras nang an mga ini magpuli hale sa pagkawat. Tibaad kaipuhan man an mas makosog na boses kun pinatutukaw na nin tsirman an mga presente sa sarong pagtiripon kan kongregasyon o asamblea. Mantang nakikakabtang sa ministeryo sa langtad an mga parahayag, tibaad magkurahaw sinda sa pagtaong galang mantang dinodolok ninda an mga nagtatrabaho sa luwas.

Dawa nakua na nindo an atension nin saro, importante na padagos na gumamit nin supisyenteng kosog nin boses. An boses na maluyahon tibaad magtao kan impresyon na an nagpapahayag dai preparado o mayo nin kombiksion.

Kun may kaibang pagboot, an paglangkaw kan boses puedeng makapahiro sa mga tawo. (Gibo 14:9, 10) Siring man, puedeng maolang nin ikinurahaw na pagboot an kapahamakan. Sa Filipos maghuhugot na kutana an bantay sa bilanggoan huli ta paghona nia nakadulag an saiyang mga preso. “Si Pablo nagkurahaw sa makosog na tingog, na an sabi: ‘Dai mo pagkologan an saimong sadiri, huli ta uya kami gabos!’ ” Sa paaging ini naolang an paghuhugot. Dangan nagpatotoo si Pablo asin Silas sa bantay sa bilanggoan asin sa pamilya kaini, na gabos nag-ako kan katotoohan.—Gibo 16:27-33.

Kun Paano Marahay an Kosog kan Saindong Boses. Para sa nagkapira, kaipuhan an ekstrang paghihingoa tanganing makanood kun paano magamit nin tamang kosog nin boses. An saro tibaad magtaram na bakong supisyente an kosog nin boses huli ta maluya an boses nia. Minsan siring, paagi sa paghihingoa, tibaad posible an pagrahay, minsan ngani sia tibaad maluway pa man giraray magtaram. Tawan nin atension an paghangos asin postura. Ensayohon an pagtukaw asin pagtindog nin tanos. Itiso an saindong abaga, asin humangos nin hararom. Seguradohon na pinapano nindo an ibaba kan saindong pulmon. An suplay na ini nin aire, na kontrolado nin tama, iyo an nagpapangyari sa saindo na makontrol an kosog kan saindong boses kun nagtataram.

Para sa iba, an problema iyo na makosogon sindang magtaram. Tibaad nagin ugale ninda iyan huli sa pagtrabaho sa luwas o sa maribok na lugar. Sa ibong na lado, tibaad nagdakula sinda sa lugar na an gabos nagkukurahaw asin lakop an pakitumoy. Bilang resulta, hinohona ninda na an solamenteng paagi na sinda makaiba sa orolay iyo an pagtaram nin mas makosog kisa iba. Mantang gradwal nindang hinihimate an hatol kan Biblia na magsolog sinda kan “mamomoton na mga pagmate nin pagdamay, kabootan, kababaan nin isip, kahoyoan, asin pakatios,” liliwaton ninda an kosog nin boses na ginagamit ninda kun nakikipag-olay sa iba.—Col. 3:12.

An marahay na pag-andam, eksperyensia na gikan sa regular na pakikikabtang sa paglilingkod sa langtad, asin pamimibi ki Jehova matabang sa saindo na magtaram na tama an kosog nin boses. Baga man nagpapahayag sa plataporma o nakikipag-olay sa sarong indibiduwal sa ministeryo sa langtad, hingoahon na isentro an saindong isip sa kun paano matatabangan an kaolay nindo paagi sa pakadangog sa sinasabi nindo.—Tal. 18:21.