Kaipuhan Mo daw na Pumundo?

Kun naglilingkod sa langtad, nakatudan na nin nagkapirang parahayag na pumundo sa sarong partikular na oras, tibaad sa udto. Siyempre, may mga kamugtakan na tibaad kaipuhan nin nagkapira na pumundo sa pagmiministeryo sa langtad sa sarong partikular na oras. Pero minapundo ka daw sa paghuhulit dahil sana ta minapundo na man an kairiba mo o dahil iyan na an nakatudan na oras nin pagpundo sa paghuhulit sa saindong lugar? Puwede ka daw na magpadagos nin pira pang minuto asin makikabtang sa ibang paagi nin pagpatotoo sa publiko, arog kan pagpatotoo sa tinampo? Puwede ka daw na dumalaw liwat sa saro o duwang interesado pag papuli ka na? Isip-isipa kun gurano kadakula kan magigibo mo kun maabutan mo giraray sa harong an dawa sarong interesado o kun makapasakamot ka nin saro pang padis nin magasin sa nasasabatan mo! Kun dai ta man kaipuhan na pumundo, an pagpadagos nin pira pang minuto sa ministeryo sarong simpleng paagi tanganing madugangan an satong ‘atang nin pag-umaw.’—Heb. 13:15.