Gamiton an Mga Panginot na Manunudan sa Tataramon nin Diyos sa Pagpuon nin Pakikipag-ulay

1. Anong bagong pantabang an inako ta na magagamit sa ministeryo?

¹ Sarong buklet na may titulong Mga Panginot na Manunudan sa Tataramon nin Diyos an ilinuwas sa satong Pangrehiyon na Kumbensiyon kan 2014. Paano ta magagamit an bagong pantabang na ini pag nag-aandam nin presentasyon sa ministeryo? Huling grinupo-grupo kaiyan an mga teksto sigun sa manlain-lain na topiko sa Bibliya, kaagid kan format kan librong Reasoning, makakatabang iyan na marhay sa pagpuon nin pakikipag-ulay.

2. Paano ta magagamit sa ministeryo an buklet na Mga Panginot na Manunudan sa Tataramon nin Diyos?

² Puwede mong gamiton an hapot 8 asin sabihon: “May halipot kaming pagdalaw sa lugar nindo ta dakul kaya an nag-iisip-isip, ‘An Diyos daw an dapat basulon sa pagsakit nin tawo?’ [Sa nagkapirang teritoryo, mas epektibong ipahiling an hapot sa kagharong.] Ano sa paghuna nindo? [Pasimbagon.] May magayon na simbag an Bibliya sa hapot na iyan.” Basahon mismo sa Bibliya an saro o labi pang sitadong teksto asin tukaron iyan. Kun magpahiling nin interes an kagharong, puwedeng ipahiling sa saiya an 20 hapot sa pahina 1 asin papilion siya nin saro na pag-uulayan nindo sa sunod na pagdalaw. O puwede mong ialok an saro sa mga publikasyon ta na ginagamit sa pag-adal sa Bibliya na may dugang pang impormasyon dapit sa temang pinag-ulayan nindo.

3. Paano ta magagamit an buklet na Mga Panginot na Manunudan sa Tataramon nin Diyos sa pagpuon nin pakikipag-ulay sa mga teritoryo na an mga nakaistar bakong Kristiyano?

³ An hapot 4 asin 13 sagkod 17 puwedeng makatabang na marhay sa saimo pag naghuhulit sa mga teritoryo na an mga nakaistar bakong Kristiyano. Halimbawa, puwede mong gamiton an impormasyon sa hapot 17 asin sabihon: “May halipot kaming pagdalaw bilang pagtabang sa mga pamilya. Napapaatubang ngunyan an mga pamilya sa kadakul na problema, bako daw? [Pasimbagon.] Nakatabang na marhay sa dakul na mag-agom an praktikal na sinabi digdi: “An agom na babayi maninigong magkaigwa nin hararom na paggalang sa saiyang agom.” [Dai mo na kaipuhan sabihon na hali ini sa Efeso 5:33. Kun babayi an kaulay mo, puwedeng sambiton an sinabi sa Efeso 5:28.] Sa hiling nindo, makakatabang daw sa mga mag-agom an pagsunod sa sadol na ini?”

4. Ano an puwede mong gibuhon sa katapusan kan pakikipag-ulay mo sa saro na bakong Kristiyano?

⁴ Sa katapusan kan pag-uulay nindo, iareglo na maipadagos an pag-uulay sa ibang pagkakataon. Puwede mong sabihon na pag-uulayan nindo sa sunod an saro sa iba pang teksto sa hapot na pinag-ulayan nindo. Sa tamang panahon, sabihon sa kagharong na an madudunong na sadol na sinabi mo sa saiya hali sa Bibliya. Sigun sa pinag-ulayan nindo asin sa opinyon niya sa Bibliya, ialok an sarong publikasyon na sa hiling mo magugustuhan niya.—Hilingon an insert kan An Satong Ministeryo sa Kahadian na Disyembre 2013.