Mga Ilustrasyon Hale sa Pamilyar na mga Situwasyon

SIEMPRE, importante na an ano man na ilustrasyon na gamiton nindo tama sa materyales na tinotokar nindo. Minsan siring, tangani na iyan magin pinakaepektibo, importante man na iyan tama sa mga nagdadangog sa saindo.

Paano daw puedeng makaimpluwensia an klase nin mga nagdadangog sa pagpili nindo nin mga ilustrasyon para sa pagpahayag sa sarong grupo? Ano an ginibo ni Jesu-Cristo? Baga man mga kadaklan o mga disipulo nia an kaolay nia, dai kinua ni Jesus an mga halimbawa nia sa pamumuhay na sa luwas sana nin Israel makukua. An siring na mga halimbawa magigin bago kutana sa mga nagdadangog sa saiya. Halimbawa, dai nasambitan ni Jesus an buhay kan mga nasa palasyo nin Egipto o an relihiosong mga kaugalean sa India. Pero, an mga ilustrasyon nia kinua sa mga aktibidad na lakop sa mga tawo sa gabos na nasyon. Nagtaram sia manongod sa pagsursi, pagnegosyo, pagkawara nin sarong bagay na mahal na marhay, asin pag-atender sa mga punsion sa kasal. Nasabotan nia kun paano an reaksion nin mga tawo sa irarom nin laen-laen na kamugtakan, asin ginamit nia ini. (Mar. 2:21; Luc. 14:7-11; 15:8, 9; 19:15-23) Mantang an pampublikong paghuhulit nia partikularmenteng para sa mga taga Israel, an mga ilustrasyon ni Jesus pinakaparateng nakakaunabi sa mga bagay asin aktibidad na kabtang kan buhay ninda sa aroaldaw. Sa siring, nasambitan nia an mga bagay na arog kan pag-oma, an paghimate nin mga karnero sa saindang pastor, asin an paggamit nin anit nin hayop sa pagsaray nin arak. (Mar. 2:22; 4:2-9; Juan 10:1-5) Inapod man nia an atension sa pamilyar na mga halimbawa sa kasaysayan​—an paglalang sa enot na mag-agom na tawo, an Baha kan aldaw ni Noe, an paglaglag sa Sodoma asin Gomorra, an pagkagadan kan agom ni Lot, sa pagsambit sa nagkapira. (Mat. 10:15; 19:4-6; 24:37-39; Luc. 17:32) Ano maingat man nindong kinokonsiderar an mga aktibidad na lakop sa mga nagdadangog sa saindo asin an kulturang hinalean ninda kun nagpipili kamo nin ilustrasyon?

Ano kun an kaolay nindo, bakong dakulang grupo, kundi saro sana o tibaad pira sana? Hingoahon na pumili nin ilustrasyon na espesyalmenteng angay sa sadit na grupong iyan nin mga nagdadangog. Kan si Jesus magpatotoo sa sarong Samaritana sa may bubon harani sa Sicar, sia nagtaram manongod sa “tubig na buhay,” ‘dai na nanggayod pagkapaha,’ asin “burabod nin tubig na nagbuburokbusok tanganing magtao nin buhay na daing katapusan”​—na gabos pananaram na may piguratibong kahulogan na direktamenteng konektado sa ginigibo kan babaeng idto. (Juan 4:7-15) Asin kan kaolay nia an mga lalaking naghuhugas kan saindang mga hikot, an pinili niang pananaram na may piguratibong kahulogan may labot sa paninira. (Luc. 5:2-11) Arin man sa mga pangyayaring ini, puede kutana na an nasambitan nia pag-oma, ta sinda nag-iistar sa agrikultural na lugar, alagad mas epektibo nanggad na sambiton an personal nindang aktibidad mantang nagtatao sia nin ilaladawan sa saindang isip! Naghihingoa daw kamong magibo iyan?

Mantang tinawan ni Jesus nin atension an “lagalag na mga karnero kan kamag-anakan nin Israel,” si apostol Pablo isinugo bako sanang sa Israel kundi pati sa Hentil na mga nasyon. (Mat. 15:24; Gibo 9:15) Nagkaepekto daw ini sa paagi nin pagtaram ni Pablo? Iyo. Kan magsurat sa mga Kristiano sa Corinto, nagtaram sia manongod sa mga pareha, nasambitan nia an ugaleng pagkakan sa mga templong may idolo, asin nanabihan nia an mga parada sa kapangganahan, mga bagay na aram kan mga Hentil na idto.​—1 Cor. 8:1-10; 9:24, 25; 2 Cor. 2:14-16.

Arog daw kamo kamaingat ni Jesus asin Pablo sa pagpili nin mga ilustrasyon asin halimbawa na gagamiton sa saindong pagtotokdo? Kinokonsiderar daw nindo an pinaghalean asin pan-aroaldaw na aktibidad kan mga naghihinanyog sa saindo? Siempre, nagkaigwa nin mga pagbago sa kinaban poon kan enot na siglo. Dakol an nakakadalan kan mga bareta sa kinaban paagi sa telebisyon. Parate na pamilyar sa sainda an mga situwasyon sa ibang nasyon. Sa mga lugar na siring an kamugtakan, bako nanggad na sala na gamiton an siring na mga bareta bilang ilustrasyon. Minsan siring, an mga bagay na pinakanakapahihiro sa mga tawo parateng may labot sa personal nindang buhay​—an saindang harong, an saindang pamilya, an saindang trabaho, an kinakakan ninda, an kamugtakan kan panahon sa lugar ninda.

Kun an ilustrasyon nindo dakol na eksplikasyon an kaipuhan, tibaad an sinasabi nindo bakong pamilyar sa mga nagdadangog sa saindo. Madaling matahoban kan siring na ilustrasyon an puntong itinotokdo. Bilang resulta, tibaad magirumdoman kan mga nagdadangog an ilustrasyon nindo alagad an katotoohan sa Kasuratan na hinihingoa nindong ipaabot dai.

Imbes na gumibo nin komplikadong mga pagkokomparar, ginamit ni Jesus an simple, ordinaryong mga bagay. Ginamit nia an saradit na bagay sa pag-eksplikar kan darakulang bagay asin an pasil na mga bagay sa paglinaw kan depisil na mga bagay. Paagi sa pagkonektar kan ordinaryong mga pangyayari sa espirituwal na mga katotoohan, tinabangan ni Jesus an mga tawo na mas madaling masabotan an espirituwal na mga katotoohan na itinotokdo nia asin magirumdoman an mga ini. Abaa karahay na halimbawang aarogon!