Pagsasanay sa mga Ministro kan Kahadian

1-3. Paano pinahiwas ni Jesus an paghuhulit, asin anong mga hapot an minalataw?

DUWANG taon na naghulit si Jesus sa bilog na Galilea. (Basahon an Mateo 9:35-38.) Dinalaw niya an dakul na siyudad asin banwaan para magtukdo sa mga sinagoga saka maghulit kan maugmang bareta kan Kahadian. Sain man siya maghulit, dakulon nin minadulok sa saiya. ‘Kadakul kan anihon,’ an sabi ni Jesus, kaya mas dakul pang trabahador an kaipuhan.

² Inareglo ni Jesus na pahiwason an paghuhulit. Paano? Paagi sa pagsugo sa 12 apostol na ‘maghulit kan Kahadian nin Diyos.’ (Luc. 9:1, 2) Posibleng may mga hapot sinda dapit sa kun paano iyan gigibuhon. Bago niya sinda isinugo, mamumuton niya sindang tinawan nin sarong bagay na itinao man sa saiya kan langitnon na Ama—an pagsasanay.

³ Nagkapirang hapot ngunyan an minasabong sa isip ta: Anong pagsasanay an itinao ki Jesus kan saiyang Ama? Anong pagsasanay an itinao ni Jesus sa mga apostol? Asin kumusta man ngunyan—sinasanay daw kan Mesiyanikong Hadi an mga parasunod niya sa paggibo kan ministeryo ninda? Kun iyo, paano?

‘Ako Nagtataram Siring sa Pagkatukdo Sako kan Ama’

4. Kasuarin asin sain tinukduan si Jesus kan saiyang Ama?

⁴ Daing pag-alangan na sinabi ni Jesus na tinukduan siya kan saiyang Ama. Durante kan saiyang ministeryo, nagsabi siya: ‘Ako nagtataram kaining mga bagay, siring sa pagkatukdo sako kan Ama.’ (Juan 8:28) Kasuarin asin sain tinukduan si Jesus? Malinaw na nagpuon iyan pagkalalang tulos sa saiya bilang an panganay na Aki nin Diyos. (Col. 1:15) Halawigon nang panahon na kaiba-iba kan Aki an saiyang Ama sa langit, na naghihinanyog asin nagmamasid sa “Kahuruhalangkawing Instruktor.” (Isa. 30:20, NW) Bilang resulta, nagkaigwa an Aki nin daing kaagid na edukasyon dapit sa mga kuwalidad, ginigibo, asin katuyuhan kan saiyang Ama.

5. Anong instruksiyon an itinao kan Ama sa Aki dapit sa ministeryo na gigibuhon niya sa daga?

⁵ Pag-abot nin panahon, tinukduan ni Jehova an saiyang Aki dapit sa ministeryo na gigibuhon niya digdi sa daga. Isip-isipa an sarong hula na naglaladawan dapit sa relasyon kan Kahuruhalangkawing Instruktor asin kan saiyang panganay na Aki. (Basahon an Isaias 50:4, 5.) Pinupukaw ni Jehova an saiyang Aki kada “aga,” an sabi kaiyan. Ipinapahiling kan ilustrasyon an sarong maestro na pinupukaw an estudyante niya sa amay na aga para tukduan. Nagsabi an sarong reperensiya sa Bibliya: ‘Garo dinadara siya ni Jehova sa eskuwelahan siring sa sarong estudyante, na tinutukduan kun ano an ihuhulit asin kun paano mahulit.’ Sa “eskuwelahan” na iyan sa langit, tinukduan ni Jehova an saiyang Aki ‘kun ano an sasabihon asin kun ano an itataram.’ (Juan 12:49) Ininstruksiyunan man kan Ama an Aki kun paano matukdo.a Kan nasa daga pa si Jesus, epektibo niyang ginamit an pagsasanay sa saiya bako sana paagi sa paggibo kan saiyang ministeryo kundi pati man sa pagsasanay sa mga parasunod niya na utubon an ministeryo ninda.

6, 7. (a) Anong pagsasanay an itinao ni Jesus sa mga apostol, asin huli kaiyan nagin andam sindang gibuhon an ano? (b) Sa panahon ta, sinisiyerto ni Jesus na tinatawan nin anong pagsasanay an mga parasunod niya?

⁶ Anong pagsasanay an itinao ni Jesus sa mga apostol, na sinambit sa kapinunan kan kapitulong ini? Sigun sa Mateo kapitulo 10, tinawan niya sinda nin espesipikong instruksiyon para sa ministeryo sa langtad, kaiba na an minasunod: kun sain mahulit (bersikulo 5, 6), kun ano an ipapaabot na mensahe (bersikulo 7), an pangangaipong magtiwala ki Jehova (bersikulo 9, 10), kun paano kakaulayon an mga kagharong (bersikulo 11-13), kun ano an gigibuhon kun dai akuon an mensahe (bersikulo 14, 15), asin kun ano an gigibuhon pag pinersegir (bersikulo 16-23).b Huli sa malinaw na pagsasanay niya sa mga apostol, nagin andam sindang panginutan an paghuhulit kan maugmang bareta kan inot na siglo C.E.

⁷ Kumusta man sa panahon ta? Itinao ni Jesus, an Hadi kan Kahadian nin Diyos, sa mga parasunod niya an pinakamahalagang asignasyon na ihulit ‘ining ebanghelyo nin Kahadian sa bilog na kinaban sa pagpatotoo sa gabos na nasyon.’ (Mat. 24:14) Sinasanay daw kita kan Hadi para utubon an pinakamahalagang gibuhon na ini? Iyo nanggad! Hali sa langit, sinisiyerto kan Hadi na tinatawan nin pagsasanay an mga parasunod niya kun paano mahulit sa luwas kan kongregasyon asin kun paano uutubon an espesyal na mga paninimbagan sa laog kaiyan.

Pagsasanay sa mga Ministro na Magin Ebanghelisador

8, 9. (a) Ano an panginot na katuyuhan kan Teokratikong Paadalan sa Pagmiministro? (b) Paano ka natatabangan kan pagtiripon sa tahaw kan semana na magin mas epektibo sa saimong ministeryo?

⁸ Haloy nang ginagamit kan organisasyon ni Jehova an mga asembleya, kumbensiyon, asin pagtiripon kan kongregasyon—arog kan Pagtiripon sa Paglilingkod—para sanayon sa ministeryo an mga lingkod nin Diyos. Minsan siring, puon kan dekada nin 1940, inareglo kan mga brother na nanginginot sa headquarters an pagsasanay paagi sa lain-lain na paadalan.

⁹ Teokratikong Paadalan sa Pagmiministro. Arog kan naaraman ta sa sinundan na kapitulo, pinunan ini kan 1943. An katuyuhan daw kaini sanayon sana an mga estudyante na magtao nin epektibong mga pahayag sa mga pagtiripon kan kongregasyon? Dai. An panginot na katuyuhan kaiyan iyo na sanayon an mga lingkod nin Diyos na gamiton an kakayahan na magtaram para umawon si Jehova sa ministeryo. (Sal. 150:6) Inaandam kaiyan an gabos na tugang na nakaenrol na magin mas epektibong ministro kan Kahadian. Ngunyan, an pagsasanay na iyan itinatao paagi sa pagtiripon sa tahaw kan semana.

10, 11. Sairisay ngunyan an puwedeng eenrol sa Gilead School, asin ano an katuyuhan kan kurikulum kaiyan?

¹⁰ Watchtower Bible School of Gilead. Pinunan kaidtong Lunes, Pebrero 1, 1943 an inaapod ngunyan na Watchtower Bible School of Gilead. Kaidto, dinisenyo iyan para sanayon sa pagmimisyonero sain man sa kinaban an mga payunir asin iba pang bilog na panahon na mga lingkod. Pero puon Oktubre 2011, an ineenrol diyan iyo an mga yaon na sa sarong klase nin espesyal na bilog na panahon na paglilingkod—espesyal payunir, nagbibiyaheng paraataman saka saindang agom, Bethelite, asin misyonero sa langtad na dai pa nakapag-adal diyan.

¹¹ Ano an katuyuhan kan kurikulum kaiyan? Nagsimbag an sarong haloy nang instruktor: “Tanganing pakusugon an pagtubod kan mga estudyante paagi sa lubos na pag-adal kan Tataramon nin Diyos asin tabangan sindang patalubuon an espirituwal na mga kuwalidad na kaipuhan para mapangganahan an mga kadipisilan sa asignasyon ninda. Siring man, an sarong panginot na katuyuhan kaiyan iyo na itadom sa mga estudyante an mas makusog na pagmawot na makikabtang sa pag-ebanghelyo.”—Efe. 4:11.

12, 13. Ano an epekto kan Gilead School sa paghuhulit sa bilog na kinaban? Magtao nin halimbawa.

¹² Ano an epekto kan Gilead School sa paghuhulit sa bilog na kinaban? Puon 1943, labi nang 8,500 na indibidwal an sinanay diyan,c asin an mga misyonerong iyan nakapaglingkod na sa labing 170 kadagaan sa bilog na kinaban. Epektibong ginagamit kan mga misyonero an pagsasanay sa sainda, na nagtatao nin halimbawa nin kaigutan sa ministeryo asin sinasanay an iba na gibuhon man iyan. Sa dakul na kamugtakan, pinanginginutan kan mga misyonero an gibuhon sa mga lugar na pira sana an mga parahayag kan Kahadian, kun igwa man.

¹³ Isip-isipa an nangyari sa Hapon, kan napundo an organisadong paghuhulit sa publiko kan Giyera Mundiyal II. Kan Agosto 1949, dai pang 10 an parahayag duman. Minsan siring, sa katapusan kan taon na iyan, 13 misyonerong sinanay sa Gilead an nagin sibot sa paghuhulit sa Hapon. Dakul pang misyonero an nag-abot. Kan primero, nagkonsentrar sinda sa darakulang siyudad; pag-abot nin panahon, buminalyo sinda sa ibang mga siyudad. Dinagka nindang marhay an mga tinutukduan ninda asin an iba pa na magpayunir. Nagin mabungang marhay an maigot na paghihinguwa kan mga misyonero. Ngunyan, labi nang 216,000 an parahayag kan Kahadian sa Hapon, asin mga payunir an haros 40 porsiyento sa sainda!d

14. Makusog na patotoo nin ano an teokratikong mga paadalan? (Hilingon man an kahon na “Mga Paadalan na Nagsasanay sa mga Ministro kan Kahadian.”)

¹⁴ Iba pang teokratikong mga paadalan. Tinatabangan kan Paadalan sa Paglilingkod Bilang Payunir, Bible School for Christian Couples, asin Bible School for Single Brothers an mga nakaenrol diyan na mag-uswag sa espirituwal saka may kaigutan na manginot sa pag-ebanghelyo.e An gabos na paadalan na ini makusog na patotoo na lubos na inaandam kan satong Hadi an mga parasunod niya sa pag-utob kan ministeryo ninda.—2 Tim. 4:5.

Pagsasanay sa mga Brother Para Maasikaso an Espesyal na mga Paninimbagan

15. Sa anong paagi gustong arugon si Jesus kan mga lalaking nasa katungdan na may paninimbagan?

¹⁵ Girumduma an hula ni Isaias na nagsasabi na si Jesus tinukduan nin Diyos. Sa “eskuwelahan” sa langit, nakanuod an Aki kan tamang ‘itataram sa napapagal.’ (Isa. 50:4) Inaplikar ni Jesus an instruksiyon na iyan; kan nasa daga pa siya, pinaginhawa niya an mga ‘napapagal asin nagagabatan.’ (Mat. 11:28-30) Bilang pag-arog ki Jesus, gusto kan mga lalaking nasa katungdan na may paninimbagan na magin gikanan nin kaginhawahan para sa mga tugang ninda. Sa katuyuhan na iyan, lain-lain na paadalan an inestablisar para tabangan an kuwalipikadong mga brother na magin mas epektibo sa paglilingkod sa mga kapagtubod.

16, 17. Ano an katuyuhan kan Pang-Kahadian na Paadalan sa Pagmiministro? (Hilingon man an nota sa ibaba.)

¹⁶ Pang-Kahadian na Paadalan sa Pagmiministro. Nagpuon an inot na klase kaini kan Marso 9, 1959, sa South Lansing, New York. Iniimbitaran sa sarong bulan na pag-adal an nagbibiyaheng mga paraataman siring man an mga congregation servant. Pag-abot nin panahon, trinadusir sa ibang lengguwahe hali sa Ingles an pinag-aadalan diyan, asin luway-luway na pinunan kaiyan na sanayon an mga brother sa bilog na kinaban.f

¹⁷ Mapadapit sa katuyuhan kan Pang-Kahadian na Paadalan sa Pagmiministro, nagsabi an 1962 Yearbook of Jehovah’s Witnesses: “Sa sibot-sibot na kinaban na ini, dapat na kaya nin sarong paraataman sa kongregasyon kan mga saksi ni Jehova na organisaron an saiyang buhay para matawan niya nin tamang atensiyon an gabos na nasa kongregasyon asin magin bendisyon para sa sainda. Kasabay kaiyan, dai niya puwedeng baliwalaon an sadiring pamilya para inuton an kapakanan kan kongregasyon, kundi dapat siyang magin timbang. Marahayon nanggad na oportunidad an itinatao sa mga congregation servant sa bilog na kinaban na sanayon sa Pang-Kahadian na Paadalan sa Pagmiministro na makakatabang sa sainda na gibuhon an sinasabi kan Bibliya bilang mga paraataman!”—1 Tim. 3:1-7; Tito 1:5-9.

18. Paano nakikinabang an gabos na lingkod nin Diyos sa Pang-Kahadian na Paadalan sa Pagmiministro?

¹⁸ Nakikinabang an gabos na lingkod nin Diyos sa Pang-Kahadian na Paadalan sa Pagmiministro. Taano man? Pag inaaplikar nin mga elder asin ministeryal na lingkod an nanunudan ninda diyan, arog ni Jesus, nagigin gikanan sinda nin kaginhawahan para sa mga kapagtubod. Bako daw na inaapresyar mo an mabuot na tataramon, pagigin andam na maghinanyog, o nakakapakusog na pagdalaw nin mapagmakulog na elder o ministeryal na lingkod? (1 Tes. 5:11) Bendisyon nanggad sa kongregasyon ninda an kuwalipikadong mga lalaking iyan!

19. Ano pang mga paadalan an dinidirehiran kan Teaching Committee, asin ano an katuyuhan kaiyan?

¹⁹ Iba pang teokratikong paadalan. An Teaching Committee kan Namamahalang Grupo an nagdidirehir sa iba pang paadalan na nagtatao nin pagsasanay sa mga brother na nasa katungdan na may paninimbagan sa organisasyon. Dinisenyo an mga paadalan na iyan para tabangan an mga brother na nasa katungdan—elder sa kongregasyon, nagbibiyaheng paraataman, asin miyembro kan Branch Committee—na magin mas epektibo sa pag-utob kan dakul na paninimbagan ninda. Dinadagka sinda kan mga kursong basado sa Bibliya na papagdanayon na makusog an saindang espirituwalidad asin iaplikar an mga prinsipyo sa Kasuratan sa pagtratar ninda sa mahalagang marhay na mga karnero na ipinagkatiwala ni Jehova sa saindang pangangataman.—1 Ped. 5:1-3.

20. Taano ta nasabi ni Jesus na kita gabos ‘tinutukduan ni Jehova,’ asin ano an determinado mong gibuhon?

²⁰ Malinaw na sinisiyerto kan Mesiyanikong Hadi na sinasanay na marhay an mga parasunod niya. An gabos na pagsasanay minagikan sa taas pababa: sinanay ni Jehova an saiyang Aki, asin sinasanay kan Aki an mga parasunod niya. Huli kaini, nasabi ni Jesus na kita gabos ‘tinutukduan ni Jehova.’ (Juan 6:45; Isa. 54:13) Magin determinado kitang lubos na aprobetsaran an itinataong pagsasanay sa sato kan Hadi niyato. Asin girumdumon ta na an panginot na katuyuhan kan gabos na pagsasanay na ini iyo na tabangan kitang magdanay na makusog sa espirituwal tanganing lubos na mautob niyato an satong ministeryo.