Sairisay an Katuod nin Diyos?

Si Jesu-Cristo an Aki ni Jehova asin an saiyang pinakadayupot saka pinakamamahal na katuod. Bago si Jesus nabuhay bilang tawo digdi sa daga, nabuhay na siya sa langit bilang makapangyarihan na espiritung linalang. (Juan 17:5) Dangan nagdigdi siya sa daga tanganing magtukdo sa mga tawo kan katotoohan manungod sa Diyos. (Juan 18:37) Itinao man niya an saiyang buhay bilang tawo para iligtas sa kasalan asin kagadanan an masinunod na mga tawo. (Roma 6:23) Si Jesus iyo ngunyan an Hadi sa Kahadian nin Diyos, sarong gobyerno sa langit na magpapagin posible kan Paraiso digdi sa daga.​—Kapahayagan 19:16.

An mga anghel katuod man nin Diyos. An buhay kan mga anghel dai nagpuon bilang mga tawo digdi sa daga. Sinda linalang sa langit bago ginibo nin Diyos an daga. (Job 38:​4-7) Milyon-milyon an mga anghel. (Daniel 7:​10) Gusto kan mga katuod na ini nin Diyos sa langit na an mga tawo makanuod kan katotoohan manungod ki Jehova.​—Kapahayagan 14:​6, 7.

An Diyos may mga katuod man digdi sa daga; inaapod niya sinda na saiyang mga saksi. An saksi sa husgado nagsasabi kan aram niya manungod sa sarong tawo o bagay. An Mga Saksi ni Jehova nagsasabi sa iba kan aram ninda manungod ki Jehova asin sa saiyang katuyuhan. (Isaias 43:10) Arog kan mga anghel, gusto kan mga Saksi na tabangan kang makanuod kan katotoohan manungod ki Jehova. Gusto ninda na ika magin katuod man nin Diyos.