1, 2. Sigun sa Ezekiel 47:1-12, ano an nahiling saka naaraman ni Ezekiel? (Hilingon an ritrato sa kapinunan kan kapitulo.)

MAY nahiling pa si Ezekiel na makangangalas sa bisyon manungod sa templo: Igwa nin salog na nagbubulos hali sa sagradong edipisyo! Imahinara siya na pigsususog an salog na may malinawon na tubig. (Basahon an Ezekiel 47:1-12.) Nagtuturo iyan hali sa may entrada kan santuwaryo; dangan nagbubulos iyan paluwas sa templo harani sa sirangan na trangkahan. Ginigiyahan si Ezekiel kan anghel parayo sa templo, mantang pigsusukol kaini an distansiya kan pigbabaklay ninda. Pauruutrong pinaagi kan anghel si Ezekiel sa tubig, asin nahiling kan propeta na pararom iyan nin pararom. Nagin iyan sarong salog na mababalyo sana kun lalanguyon!

² Naaraman ni Ezekiel na an salog nagbubulos pasiring sa Gadan na Dagat. Nauulian an arin man na maasgad saka daing buhay na tubig na pigbubulusan kan salog asin nagkakaigwa diyan nin dakulon na sira. Asin sa mag-ibong na pangpang kan salog, may nahiling siyang dakulon asin manlain-lain na klase nin kahoy. Bulan-bulan, namumunga iyan nin bagong masusustansiyang bunga, asin nag-uugbos iyan nin mga dahon na nakakapaumay. Kan mahiling ni Ezekiel an gabos na iyan, siguradong nakamati siya nin katuninungan asin paglaom. Pero ano an kahulugan kan parteng ini kan bisyon manungod sa templo para sa saiya asin sa saiyang mga kapwa distiyero? Asin ano an kahulugan kaiyan para sa sato ngunyan?

Ano an Kahulugan kan Salog sa Bisyon Para sa mga Nadistiyero?

3. Taano ta dai inisip kan mga Judio kaidto na literal an salog sa bisyon ni Ezekiel?

³ Siguradong dai inisip kan mga Judio kaidto na literal an salog sa bisyon. Imbes, posibleng ipinagirumdom kaiyan sa sainda an saro pang ipinasabong na propesiya manungod sa pagbabalik, na isinurat ni propeta Joel tibaad labing duwang siglo na an nakaagi bago kan panahon na iyan. (Basahon an Joel 3:18.) Kan mabasa kan mga Judiong nadistiyero an ipinasabong na mga tataramon na isinurat ni Joel, dai man ninda inisip na literal na “maturo hali sa kabukidan an mahamis na arak” o na “mabulos hali sa kabubuldan an gatas,” asin dai man ninda inisip na “hali sa harong ni Jehova masulwak an sarong burabod.” Kaagid kaiyan, posibleng nasabutan kan mga kapwa Judio ni Ezekiel na an mensahe kan bisyon kan propeta bako man manungod sa sarong literal na salog.a Kaya ano an mensaheng gustong ipaabot ni Jehova? Tinatabangan kita kan Kasuratan na masabutan an nagkapirang parte kan bisyon na ini. Pero sa pangkagabsan, pag-uulayan niyato an tulong malinaw asin mamumuton na asigurasyon na manunudan ta sa parteng ini kan propesiya.

4. (a) Anong mga bendisyon hali ki Jehova an linalauman kan mga Judio na makakamtan ninda huli sa salog sa bisyon ni Ezekiel? (b) Taano ta an paggamit kan Bibliya sa terminong “salog” saka “tubig” nagtataong asigurasyon sa sato na bebendisyunan ni Jehova an saiyang banwaan? (Hilingon an kahon na “Mga Salog nin mga Bendisyon na Hali ki Jehova.”)

⁴ Sarong salog nin mga bendisyon. Sa Bibliya, an mga salog saka tubig parating ginagamit para iladawan an pagbulos kan nagtataong-buhay na mga bendisyon ni Jehova. Nakahiling si Ezekiel nin arog kaiyan na salog na nagbubulos hali sa templo, kaya an bisyon nakatabang sa banwaan nin Diyos na masabutan na mabulos sainda an nagtataong-buhay na espirituwal na mga bendisyon ni Jehova basta sinusuportaran ninda an dalisay na pagsamba. Anong mga bendisyon? Mag-aako giraray sinda nin espirituwal na mga pagtutukdo hali sa mga saserdote. Asin dahil sa mga atang na idudulot sa templo, makakasigurado giraray sinda na mapapatawad an saindang mga kasalan. (Ezek. 44:15, 23; 45:17) Kaya magigin malinig giraray sinda, na garo baga hinugasan nin dalisay na tubig na nagbubulos hali sa templo.

5. Paano nagtataong asigurasyon an salog sa bisyon na magkakaigwa nin igong bendisyon para sa gabos?

⁵ Pirmi daw magkakaigwa nin igong bendisyon para sa gabos? An ano man na arog kaiyan na paghadit mawawara huling nagtataong asigurasyon an bisyon paagi sa milagrosong pagdakul kan tubig—na nagpuon sa turo pero nagin sarong dakulang salog sa distansiyang mga duwang kilometro sana! (Ezek. 47:3-5) Puwedeng magdakula an populasyon kan mga Judio sa saindang ibinalik na daga; pero an mga bendisyon ni Jehova madakul man para mapaniguan an saindang mga pangangaipo. An salog naglaladawan nin abundansiya!

6. (a) Anong nakakapakusog na panuga an itinatao kan makahulang paglaladawan? (b) Anong patanid an itinatao man kan bisyon? (Hilingon an nota sa ibaba.)

⁶ An nagtataong-buhay na tubig. Sa bisyon ni Ezekiel, an salog nagbulos pasiring sa Gadan na Dagat asin nagtao nin buhay sa dakulang parte kaiyan. Mangnuhon na huli sa tubig, nagkaigwa diyan nin dakulon na manlain-lain na sira na kapareho kan mahihiling sa Dakulang Dagat, o Dagat Mediteraneo. Nagkaigwa pa ngani nin nag-uuswag na negosyo sa paninira sa kalabaan kan baybayon kan Gadan na Dagat sa pag-ultanan nin duwang banwaan na medyo madistansiya sa lambang saro. Sinabi kan anghel: “An gabos mabubuhay sa gabos na lugar na pigbubulusan kan salog.” Pero nangangahulugan daw iyan na an tubig na hali sa harong ni Jehova makakaabot sa gabos na parte kan Gadan na Dagat? Dai. Ipinaliwanag kan anghel na may malaboy na mga lugar na dai maaabot kan nagtataong-buhay na tubig. “Magdadanay sa mga lugar na iyan an asin.”b (Ezek. 47:8-11) Kaya an makahulang paglaladawan na iyan nagtatao nin nakakapakusog na panuga na an dalisay na pagsamba matao nin buhay asin kusog sa mga tawo. Pero igwa man iyan nin patanid: Bako gabos maako kan mga bendisyon ni Jehova; dai man gabos mauumayan.

7. Anong asigurasyon an itinao sa nadistiyerong mga Judio kan mga kahoy sa pangpang kan salog?

⁷ Mga kahoy na nagtatao nin kakanon asin nakakapaumay. Para sain an mga kahoy sa pangpang kan salog? Bako daw na nakakapagayon an mga iyan sa tanawon? Nakakadagdag man an mga iyan sa kahulugan kan bisyon. Siguradong naugma si Ezekiel asin an saiyang mga kahimanwa sa pag-isip-isip sa masiram na mga bunga kan mga kahoy na iyan, bagong mga bunga bulan-bulan! An magayon na paglaladawan na iyan mas nakaasigurar pa sa sainda na papakakanon sinda ni Jehova sa espirituwal. Saka ano pa? Mangnuhon na an mga dahon kan mga kahoy na iyan “magigin pampaumay.” (Ezek. 47:12) Aram ni Jehova na espirituwal na pagpaumay an pinakakaipuhan kan nagbaralik na mga nadistiyero, asin nanuga siya na itatao niya nanggad iyan. Tinukar sa iba pang mga propesiya manungod sa pagbabalik kun paano niya iyan ginibo, arog kan ipinaliwanag sa Kapitulo 9.

8. Taano ta masasabi ta na magkakaigwa nin mas dakulang kautuban an bisyon ni Ezekiel?

⁸ Pero, arog kan pinag-ulayan ta sa Kapitulo 9, dai lubos na naeksperyensiyahan kan nagbaralik na mga nadistiyero an bilog na kautuban kan mga propesiyang iyan. Sinda mismo an dahilan kun taano ta nagin limitado sana an kautuban kan mga iyan. Paano sinda lubos na bebendisyunan ni Jehova kun pirmi sindang nagbabalik sa saindang maraot na paggawi, nagigin masinuway, asin pinapabayaan an dalisay na pagsamba? Nakulgan asin nadisganar an mga maimbod dahil sa paggawi kan saindang mga kapwa Judio. Alagad, aram kan maimbod na mga parasamba ni Jehova na pirming nauutob an mga panuga niya. (Basahon an Josue 23:14.) Kaya maabot an panahon na magkakaigwa nin mas dakulang kautuban an bisyon ni Ezekiel. Pero nuarin?

Nagbubulos an Salog Ngunyan!

9. Nuarin magkakaigwa nin mas dakulang kautuban an bisyon ni Ezekiel manungod sa templo?

⁹ Arog kan naaraman ta sa Kapitulo 14, igwa nin mas dakulang kautuban an bisyon ni Ezekiel manungod sa templo sa “huring kabtang kan mga aldaw,” an panahon na an dalisay na pagsamba ilinangkaw nin urog kisa kasuarin man. (Isa. 2:2) Sa anong paagi nauutob ngunyan an parteng ini kan bisyon ni Ezekiel?

10, 11. (a) Anong mga bendisyon an nagbubulos na garo salog sa sato ngunyan? (b) Paano nagdakula an pagbulos kan mga bendisyon ni Jehova para mapaniguan an nagdadakulang mga pangangaipo sa huring mga aldaw?

¹⁰ Sarong salog nin mga bendisyon. Anong mga bendisyon ngunyan an ipinapagirumdom sa sato kan tubig na nagbubulos hali sa harong ni Jehova? Ipinapagirumdom kaiyan sa sato an gabos na itinatao ni Jehova na nakakatabang sato na magkaigwa nin marahay na espirituwalidad. Panginot diyan an atang na pantubos ni Cristo na naglilinig sa sato, kaya nagin posible na mapatawad an satong mga kasalan. An dalisay na mga katotoohan sa Tataramon nin Diyos iinagid man sa nagtataong-buhay asin nakakalinig na tubig. (Efe. 5:25-27) Paano nagbubulos an arog kaiyan na mga bendisyon sa satong panahon?

¹¹ Kan 1919, pipirang ribo sana an mga lingkod ni Jehova, asin ugmahon sinda sa saindang inaakong espirituwal na kakanon na kaipuhan ninda. Sa suminunod na mga dekada, padagos sindang nagdakul. Labi nang walong milyon ngunyan an bilang kan mga lingkod nin Diyos. Nakasabay daw sa pagdakul na iyan an pagbulos kan dalisay na tubig nin katotoohan? Iyo! Nagsusupay nanggad an inaako tang suplay nin espirituwal na katotoohan. Bilyon-bilyon na Bibliya, libro, magasin, brosyur, asin tract an nagbulos sa mga lingkod nin Diyos sa nag-aging mga taon. Arog kan salog na nahiling ni Ezekiel sa bisyon, marikas na nagdakula an pagbulos kan dalisay na mga katotoohan para mapaniguan an pangangaipo kan mga tawong napapaha sa espirituwal sa bilog na kinaban. Haloy nang iniimprenta an mga publikasyon na basado sa Bibliya. Asin ngunyan, paagi sa website na jw.org, an mga publikasyon na iyan mababasa na sa elektronikong format sa labing 1,000 lengguwahe! Ano an epekto kan siring na tubig nin katotoohan sa mga tawong tama an kamugtakan nin puso?

12. (a) Ano an nahiling tang epekto kan mensahe kan katotoohan sa mga tawo? (b) Anong napapanahon na patanid an itinatao sa sato ngunyan kan bisyon? (Hilingon man an nota sa ibaba.)

¹² An nagtataong-buhay na tubig. Sinabihan si Ezekiel: “An gabos mabubuhay sa gabos na lugar na pigbubulusan kan salog.” Isipa kun paano nagbulos an mensahe nin katotoohan sa gabos na naglaog sa satong ibinalik na espirituwal na daga. An mga katotoohan sa Bibliya nagtao nin buhay asin marahay na espirituwalidad sa minilyon na tawong nag-ako kan katotoohan. Pero, nagtatao man nin napapanahon na patanid an bisyon: Bako gabos padagos na mag-aako kan katotoohan. Arog kan malaboy saka matibo na mga lugar sa Gadan na Dagat sa bisyon ni Ezekiel, igwa nin mga mapundo na sa pag-ako asin pag-aplikar kan katotoohan.c Dai man lugod kita magin arog kaiyan!—Basahon an Deuteronomio 10:16-18.

13. Ano an manunudan ta ngunyan sa mga kahoy sa bisyon?

¹³ Mga kahoy na nagtatao nin kakanon asin nakakapaumay. May manunudan daw kita ngunyan na nakakapakusog na leksiyon sa mga kahoy sa pangpang kan salog sa bisyon? Igwa nanggad! Tandaan na bulan-bulan na namumunga nin bago asin masisiram na bunga an mga kahoy na idto, asin an mga dahon kan mga iyan nakakapaumay. (Ezek. 47:12) Ipinapagirumdom kaiyan sa sato na naglilingkod kita sa Diyos na bukas-palad na nagpapakakan asin nagpapaumay sa sato sa pinakaimportanteng paagi— sa espirituwal. An kinaban ngunyan may hilang asin nagugutom sa espirituwal. Sa kabaliktaran, isipa na sana an itinatao ni Jehova. Pagkatapos magbasa nin sarong artikulo sa satong mga publikasyon, magkanta kan pantapos na kanta sa asembleya o kumbensiyon, o maghiling nin video o JW Broadcasting, namatian mo na daw na dakulang bendisyon saimo an arog kaiyan na espirituwal na mga kakanon? Talagang basog-basog kita sa espirituwal. (Isa. 65:13, 14) Nakakatabang daw sato an satong espirituwal na kakanon? An marahay na mga sadol na inaako ta, na lubos na nakabasar sa Tataramon nin Diyos, nakakatabang sato na malikayan an mga peligro sa satong espirituwalidad arog kan imoralidad, kahanaban, asin kawaran nin pagtubod. Naggibo man si Jehova nin mga areglo para tabangan an mga Kristiyano na maumayan sa hilang sa espirituwal na resulta nin magabat na kasalan. (Basahon an Santiago 5:14.) Talagang nag-aako kita nin dakul na bendisyon, arog kan ipinaparisa kan mga kahoy sa bisyon ni Ezekiel.

14, 15. (a) Ano an dapat tang manudan sa dai naulian na malaboy na mga lugar sa bisyon ni Ezekiel? (b) Paano kita nakikinabang ngunyan sa salog na nahiling ni Ezekiel sa saiyang bisyon?

¹⁴ May manunudan man kitang leksiyon duman sa dai naulian na malaboy na mga lugar. Dai ta lamang gugustuhon na pugulan an pagbulos kan mga bendisyon ni Jehova sa satong buhay. Makamumundo nanggad na magdanay na may hilang sa espirituwal arog kan dakul sa kinaban na ini. (Mat. 13:15) Imbes, nauugma kita na makinabang sa salog nin mga bendisyon. Pag padagos kitang nag-iinom nin dalisay na tubig nin katotoohan hali sa Tataramon nin Diyos, pag sinasabi ta sa iba an mga katotoohan na iyan paagi sa paghuhulit, pag inaako ta an mamumuton na paggiya, pagranga, asin tabang kan mga elder na sinanay kan maimbod na uripon, puwedeng maisip ta an salog sa bisyon ni Ezekiel. An salog na iyan nagtatao nin buhay asin nagpapaumay sain man iyan magbulos!

¹⁵ Pero ano an magigin kautuban sa maabot na panahon kan salog sa bisyon? Arog kan maaaraman ta, an pagbulos kan salog magkakaigwa nin lubos na kautuban sa maabot na Paraiso.

Kun Ano an Magigin Kautuban sa Paraiso kan Bisyon

16, 17. (a) Sa anong paagi magigin mas mahiwas pa an kautuban kan tubig nin buhay sa Paraiso? (b) Paano kita makikinabang sa salog na iyan nin mga bendisyon sa Paraiso?

¹⁶ Naiimahinar mo daw an sadiri mo na nasa Paraiso kaiba an saimong mga amigo saka mga kapamilya asin lubos na ikinakaugma an buhay? An pag-adal sa salog sa bisyon ni Ezekiel makakatabang saimo na magin mas buhay na buhay sa isip mo an buhay sa Paraiso. Paano? Pag-ulayan ta giraray an tulong malinaw na parte kan bisyon na nagpapahiling kan pagkamuot ni Jehova.

¹⁷ Sarong salog nin mga bendisyon. An simbolikong salog magigin mas mahiwas pa an kautuban sa Paraiso, huling an bendisyon na itatao kaiyan bako lang sa espirituwal kundi pati man sa pisikal. Sa panahon kan Sangribong Taon na Paghadi ni Jesus, tatabangan kan Kahadian nin Diyos an mga maimbod na mas makinabang pang marhay sa pantubos. Luway-luway sindang magigin perpekto! Mayo nang mga hilang, doktor, nars, ospital, o health insurance! An tubig nin buhay na iyan mabulos sa milyon-milyon na makakaligtas sa Armagedon, “sarong dakulang kadaklan” na makakabalyo hali sa “dakulang kasakitan.” (Kap. 7:9, 14) Alagad, an inot na bulos na iyan kan salog nin mga bendisyon, dawa ngani kahanga-hanga na iyan, magigin garo turo sana kumpara sa maabot pang mga bendisyon. Arog kan sa bisyon ni Ezekiel, an salog mas lalo pang madakula para mapaniguan an mas dakulang pangangaipo.

18. Sa anong paagi magigin dakulaon na marhay an “salog nin tubig nin buhay” sa panahon kan Milenyo?

¹⁸ An nagtataong-buhay na tubig. Sa panahon kan Milenyo, an “salog nin tubig nin buhay” magigin dakulaon na marhay. (Kap. 22:1) Milyon-milyon, binilyon pa ngani, an mga gadan na bubuhayon liwat asin magkakaigwa nin oportunidad na mabuhay sagkod pa man sa Paraiso! Kaiba sa mga bendisyon na itatao ni Jehova paagi sa Kahadian an pagbuhay liwat sa dakulon na gadan, mga tawong haloy nang nagin alpog sa daga asin dai nang nagigibo pa. (Isa. 26:19) Pero mabubuhay daw sagkod lamang an gabos na bubuhayon liwat?

19. (a) Ano an nagpaparisa na magkakaigwa sa Paraiso nin bagong tubig nin katotoohan hali sa Diyos? (b) Sa anong paagi na an nagkapira sa maabot na panahon magigin siring sa mga lugar na ‘nagdanay an asin’?

¹⁹ An lambang saro kaipuhan na magdesisyon. Igwa kaya nin bubukasan na bagong mga rolyo sa panahon na iyan. Kaya kaiba sa nakakarepreskong tubig hali ki Jehova an ihahayag na bagong mga katotoohan, bagong espirituwal na mga instruksiyon. Bako daw na nakakaugmang antisiparon iyan? Dawa arog kaiyan, igwa pa man giraray nin mga mahabo sa mga bendisyon na iyan asin pipilion na suwayon si Jehova. Puwedeng may mga indibidwal na magrebelde sa panahon kan Milenyo, pero dai sinda tutugutan na magkawsa nin problema sa Paraiso. (Isa. 65:20) Girumdumon lugod niyato an bisyon ni Ezekiel asin isipon an malaboy na mga lugar na idto kun sain ‘nagdanay an asin,’ mga lugar na nagdanay na daing buhay. Kamangmangan nanggad na magsayumang uminom sa mahalagang marhay na tubig nin buhay! Pakatapos kan Milenyo, sarong grupo nin mga rebelde an makampi ki Satanas. An gabos na nagsisikwal sa matanos na pamamahala ni Jehova saro sana an kaaabtan: daing sagkod na kagadanan.—Kap. 20:7-12.

20. Sa panahon kan Milenyo, anong areglo para sa kapakinabangan ta an magpapagirumdom sa sato kan mga kahoy na nahiling ni Ezekiel?

²⁰ Mga kahoy na nagtatao nin kakanon asin nakakapaumay. Habo ni Jehova na an siisay man sa sato dai magkamit nin buhay na daing sagkod. Para tabangan kitang makamtan an magayunon na oportunidad na iinaalok niya, sisiguraduhon niya giraray na igwa nin areglo na kapareho kan mga kahoy na nahiling ni Ezekiel. Pero sa Paraiso, an mga bendisyon ni Jehova bako lang sa espirituwal kundi pati man sa pisikal. Sa langit, si Jesu-Cristo saka an saiyang 144,000 na kairibang tagapamahala mamamahala bilang mga hadi sa panahon kan Milenyo. Bilang mga saserdote, ipapaabot kan 144,000 an mga pakinabang kan atang na pantubos ni Cristo asin tatabangan an maimbod na mga tawo na magin perpekto. (Kap. 20:6) An areglong ini para sa pisikal asin espirituwal na pagpaumay nagpapagirumdom sa sato kan mga kahoy na idto na nahiling ni Ezekiel sa pangpang kan salog, na namumunga nin masusustansiyang bunga asin may mga dahon na nakakapaumay. An bisyon ni Ezekiel may pagkakapareho sa saro pang magayon na propesiya na isinurat ni apostol Juan. (Basahon an Kapahayagan 22:1, 2.) “Para sa pagpaumay kan mga nasyon” an mga dahon kan mga kahoy na nahiling ni Juan. Milyon-milyon na maimbod na mga tawo an makikinabang sa paglilingkod kan 144,000 bilang mga saserdote.

21. Ano an magigin epekto saimo kan paghurop-hurop sa salog sa bisyon ni Ezekiel, asin ano an pag-uulayan sa masunod na kapitulo? (Hilingon an kahon na “An Turo Nagin Dakulang Salog!”)

²¹ Mantang pighuhurop-hurop mo an salog sa bisyon ni Ezekiel, bako daw na nakakamati ka nin katuninungan asin paglaom? Magayunon nanggad na panahon an naghahalat sa sato! Asin isipa na sana—rinibong taon na an nakaagi, nagtao si Jehova nin dakul na propesiya para maimahinar ta an Paraiso asin mapasensiya niya kitang iniimbitaran na magin presente duman para mahiling an dakulang kautuban kan mga iyan. Mahihiling mo daw an mga kautuban kaiyan? Tibaad maisip mo kun may lugar ka daw talaga sa Paraiso. Pag-ulayan ta sa masunod na kapitulo kun paano nagtataong asigurasyon sato an huring parte kan propesiya ni Ezekiel.

1, 2. (a) Ano an ipinagbuot ni Jehova ki Ezekiel? (b) Anong mga hapot an pag-uulayan ta?

NAHILING pa sana ni Ezekiel an sarong bisyon na nagpagirumdom sa saiya sa mga nangyari kan panahon ni Moises asin Josue mga 900 na taon na an nakaagi. Kan panahon na iyan, sinabi ni Jehova ki Moises kun sain an mga linderos kan Dagang Panuga, asin kan huri, sinabi Niya ki Josue kun paano pagbabanga-bangaon an dagang iyan sa mga tribo kan Israel. (Bil. 34:1-15; Jos. 13:7; 22:4, 9) Pero kan panahon ni Ezekiel, kan 593 B.C.E., ipinagbuot sa saiya ni Jehova asin sa mga kapwa niya nadistiyero na pagbanga-bangaon giraray an Dagang Panuga sa mga tribo kan Israel!—Ezek. 45:1; 47:14; 48:29.

² Ano an mensahe kan bisyon na ini para ki Ezekiel asin sa mga kapwa niya nadistiyero? Taano ta mapapakusog kan bisyon na ini an mga lingkod ni Jehova ngunyan? Magkakaigwa daw ini nin mas dakulang kautuban sa maabot na panahon?

Sarong Bisyon na Nagtatao nin Apat na Asigurasyon

3, 4. (a) Anong apat na asigurasyon an itinao sa mga nadistiyero kan huring bisyon ni Ezekiel? (b) Sa kapitulong ini, anong asigurasyon an sisiyasaton ta?

³ An huring bisyon na nahiling ni Ezekiel mababasa sa siyam na kapitulo kan saiyang libro. (Ezek. 40:1–48:35) Nagtao iyan sa mga nadistiyero nin apat na nakakapakusog na asigurasyon manungod sa ibinalik na nasyon nin Israel. Ano an mga asigurasyon na iyan? Inot, ibabalik an dalisay na pagsamba sa templo nin Diyos. Ikaduwa, matanos na mga saserdote asin pastor an manginginot sa ibinalik na nasyon. Ikatulo, igwa nin dagang mana na nakatagama para sa gabos na mabalik sa Israel. Asin ikaapat, masasakaibanan ninda si Jehova asin mairok giraray siya sa kaibanan ninda.

⁴ Pinag-ulayan sa Kapitulo 13 asin 14 kun paano mauutob an inot na duwang asigurasyon—an pagbabalik sa dalisay na pagsamba asin an panginginot kan matanos na mga pastor. Sa kapitulong ini, mapokus kita sa ikatulong asigurasyon, an panuga manungod sa pagmana kan daga. Sa masunod na kapitulo, pag-uulayan ta an panuga manungod sa presensiya ni Jehova.—Ezek. 47:13-21; 48:1-7, 23-29.

‘An Dagang Ini Pagbabanga-bangaon sa Saindo Bilang Mana’

5, 6. (a) Sa bisyon ni Ezekiel, anong teritoryo an pagbabanga-bangaon? (Hilingon an ritrato sa kapinunan kan kapitulo.) (b) Ano an katuyuhan kan bisyon na pagbanga-banga sa daga?

⁵ Basahon an Ezekiel 47:14. Sa bisyon, dinara ni Jehova an atensiyon ni Ezekiel sa sarong porsiyon nin daga na sa dai mahahaloy magigin siring “sa hardin nin Eden.” (Ezek. 36:35) Dangan sinabi ni Jehova: “Ini an teritoryo na pagbabanga-bangaon nindo bilang mana kan 12 tribo kan Israel.” (Ezek. 47:13) “An teritoryo” na pagbabanga-bangaon iyo an ibinalik na daga kan Israel kun sain mabalik an mga nadistiyero. Dangan, arog kan nakarekord sa Ezekiel 47:15-21, pinunan na detalyadong sabihon ni Jehova an eksaktong mga linderos kan bilog na daga.

⁶ Ano an katuyuhan kan bisyon na ini na pagbanga-banga sa daga? An pagkakaladawan sa mga linderos na may eksaktong mga sukol nakaasigurar ki Ezekiel asin sa mga kapwa niya nadistiyero na an saindang namumutan na daga siguradong ibabalik. Isipa na sana kun gurano nakapaugma sa puso kan mga nadistiyero an asigurasyon na iyan na detalyadong sinabi ni Jehova! Nag-ako daw talaga an banwaan nin Diyos kaidto nin daga na pigbanga-banga sainda bilang mana? Iyo.

7. (a) Ano an nagpuon na mangyari kan 537 B.C.E., asin ano an ipinapagirumdom kaiyan sa sato? (b) Anong hapot an sisimbagon ta nguna?

⁷ Kan 537 B.C.E., mga 56 na taon pakatapos na mahiling ni Ezekiel an saiyang bisyon, rinibong mga nadistiyero an nagpuon na magbalik sa daga nin Israel asin mag-istar diyan. An pambihirang mga pangyayaring idto nagpapagirumdom sa sato kan kaagid na mga pangyayari sa banwaan nin Diyos sa presenteng panahon. Masasabi na nag-ako man sinda nin daga. Paano? Tinugutan ni Jehova an saiyang mga lingkod na maglaog sa sarong espirituwal na daga asin mag-istar diyan. Huli kaiyan, an pagbabalik kan suanoy na Dagang Panuga nagtutukdo sa sato nin dakul na leksiyon manungod sa pagbabalik kan espirituwal na daga kan banwaan nin Diyos ngunyan. Pero bago ta pag-ulayan an mga leksiyon na iyan, simbagon ta nguna an hapot na, “Taano ta masasabi ta na talagang nag-eeksister ngunyan an sarong espirituwal na daga?”

8. (a) Anong nasyon an isinalida ni Jehova sa nasyon kan literal na Israel? (b) Ano an espirituwal na daga, o paraiso? (c) Kasuarin iyan nagpuon na mag-eksister, asin sairisay an mga nakaistar diyan?

⁸ Sa mas nainot na bisyon na nahiling ni Ezekiel, ipinarisa ni Jehova na an mga propesiya manungod sa pagbabalik kan Israel magkakaigwa nin mas dakulang kautuban pagkatapos na an “lingkod [niyang] si David,” si Jesu-Cristo, magpuon nang mamahala bilang Hadi. (Ezek. 37:24) Nangyari iyan kan 1914 C.E. Kan panahon na iyan, an nasyon kan literal na Israel haloy nang sinalidahan bilang banwaan nin Diyos kan nasyon kan espirituwal na Israel, na kompuwesto kan mga Kristiyanong linahidan nin espiritu. (Basahon an Mateo 21:43; 1 Pedro 2:9.) Pero, bako lang an nasyon kan literal na Israel an sinalidahan ni Jehova nin espirituwal na nasyon kundi sinalidahan man niya an pisikal na daga kan Israel nin sarong espirituwal na daga, o paraiso. (Isa. 66:8) Arog kan nahiling ta sa Kapitulo 17, an espirituwal na daga iyo an tiwasay na kamugtakan sa espirituwal, na diyan an natatada sa mga linahidan nagsasamba ki Jehova puon kan 1919. (Hilingon an kahon 9B, “Taano ta 1919?”) Sa paglihis nin panahon, an mga may daganon na paglaom, an “ibang mga karnero,” nagpuon man na mag-istar sa espirituwal na dagang ini. (Juan 10:16) Dawa ngani an espirituwal na paraisong ini padagos na nag-uuswag asin naghihiwas ngunyan, an mga bendisyon kaiyan lubos sanang maeeksperyensiyahan pagkatapos kan Armagedon.

Pantay-pantay Asin Eksaktong Pagbanga-banga kan Daga

9. Anong detalyadong instruksiyon an itinao ni Jehova sa pagbanga-banga kan daga?

⁹ Basahon an Ezekiel 48:1, 28. Pagkatapos na sabihon kun sain an mga linderos kan daga, detalyadong sinabi ni Jehova kun paano pagbabanga-bangaon iyan. Ipinagbuot niya na an mga mana kan 12 tribo pantay-pantay asin eksaktong pagbabanga-bangaon puon sa norte sagkod sa timog, na minapuon sa tribo ni Dan sa pinakapuro sa norte sagkod sa tribo ni Gad na nasa pinakapurong linderos sa timog. An kada saro kan 12 tribo tatawan nin pabalagbag na porsiyon nin daga na minapuon sa linderos sa sirangan asin minasagkod sa Dakulang Dagat, o Dagat Mediteraneo, sa sulnupan.—Ezek. 47:20.

10. Anong asigurasyon an itinatao kan parteng ini kan bisyon sa mga nadistiyero?

¹⁰ Anong asigurasyon an itinatao kan parteng ini kan bisyon sa mga nadistiyero? An detalyadong pagkaladawan ni Ezekiel sa pagbanga-banga kan daga siguradong nakatabang sa mga nadistiyero na masabutan na an pagbanga-banga kan daga magigin organisadong marhay. Saro pa, idinuduon kan eksaktong pagkabanga-banga kan daga sa 12 tribo na an lambang saro sa mga mabalik na nadistiyero siguradong mag-aako nin mana sa ibinalik na daga. An gabos na mabalik magkakaigwa nin daga asin maiistaran.

11. Anong mga leksiyon an manunudan ta sa makahulang bisyon manungod sa pagbanga-banga kan daga? (Hilingon an kahon na “An Pagbanga-banga kan Daga.”)

¹¹ Anong nakakapakusog na mga leksiyon an manunudan ta ngunyan sa bisyon na ini? An ibinalik na Dagang Panuga igwa nin lugar kaidto bako lang para sa mga saserdote, mga Levita, asin sa mga pamayo kundi pati man sa gabos na iba pang kabilang sa 12 tribo. (Ezek. 45:4, 5, 7, 8) Kapareho kaiyan ngunyan, an espirituwal na paraiso igwa nin lugar bako lang para sa natatadang mga linahidan asin para sa mga nanginginot na kabilang sa “dakulang kadaklan” kundi pati man sa gabos na iba pang kabilang sa dakulang kadaklan.a (Kap. 7:9) Gurano man kasadit kan satong papel sa organisasyon, siguradong igwa kita nin lugar asin nin mahalagang asignasyon sa espirituwal na daga. Nakakapakusog nanggad na asigurasyon!

Duwang Dakulang Pagkakaiba—Ano an Kahulugan Kaiyan Para sa Sato?

12, 13. Ano an espesipikong ipinagbuot ni Jehova manungod sa pagbanga-banga kan daga sa mga tribo?

¹² Tibaad nakaribong ki Ezekiel an nagkapira sa mga instruksiyon ni Jehova sa pagbanga-banga kan daga huling iba iyan sa mga instruksiyon na itinao kaidto nin Diyos ki Moises. Pag-ulayan ta an duwa sa mga iyan. An inot manungod sa daga; asin an saro pa, manungod sa mga nakaistar diyan.

¹³ Inot, an daga. Pinagbutan si Moises na tawan nin mas dakulang daga an mas dakulang mga tribo. (Bil. 26:52-54) Pero sa bisyon ni Ezekiel, espesipikong ipinagbuot ni Jehova na tawan an gabos na tribo nin daga na “magkaparareho an sukol [“an kada saro kapareho kan sa tugang niya,” nota sa ibaba].” (Ezek. 47:14) Kaya parareho an sukol kan kada mana kan 12 tribo puon sa norteng linderos sagkod sa timog na linderos kaiyan. An gabos na Israelita—ano man an tribo ninda—magkakaigwa nin pantay-pantay na pakinabang sa mga bunga kan Dagang Panuga na bastante sa tubig.

14. Kun manungod sa mga dayuhan na residente, ano an pagkakaiba kan ipinagbuot ni Jehova ki Ezekiel sa sinabi Niya sa Katugunan ni Moises?

¹⁴ Ikaduwa, an mga nakaistar diyan. Prinotektaran kan Katugunan ni Moises an mga dayuhan saka tinugutan sindang umiba sa pagsamba ki Jehova, pero mayo sindang kahirasan sa daga. (Lev. 19:33, 34) Alagad, an sinabi ngunyan ni Jehova ki Ezekiel may pagkakaiba sa ipinagbuot Niya kaidto sa Katugunan. Sinabi saiya ni Jehova: “Tawan nin mana an dayuhan na residente sa teritoryo kan tribo na pig-iistaran niya.” Sa pagbuot na iyan, hinali ni Jehova an dakulang pagkakaiba kan “mga namundag na Israelita” sa mga dayuhan na residente kan daga. (Ezek. 47:22, 23) Sa ibinalik na daga na nahiling ni Ezekiel sa bisyon, naobserbaran niya na an mga nakaistar duman igwa nin pagkapantay-pantay asin pagkasararo sa pagsamba.—Lev. 25:23.

15. Anong dai nagbabagong katotoohan manungod ki Jehova an pinapatunayan kan mga pagbuot niya manungod sa daga saka sa mga nakaistar diyan?

¹⁵ An duwang pambihirang pagbuot na iyan na itinao ki Ezekiel manungod sa daga asin sa mga nakaistar diyan siguradong nakaasigurar sa mga nadistiyero. Aram ninda na tatawan sinda ni Jehova nin pantay-pantay na kahirasan, sinda man namundag na Israelita o dayuhan na nagsasamba ki Jehova. (Esd. 8:20; Neh. 3:26; 7:6, 25; Isa. 56:3, 8) An mga pagbuot na iyan nagpapatunay man sa nakakapakusog asin dai nagbabagong katotoohan na para ki Jehova an gabos na lingkod niya pararehong mahalagang marhay. (Basahon an Hageo 2:7.) Pinapahalagahan ta man na marhay ngunyan an katotoohan na iyan, sa langit man o sa daga an satong paglaom.

16, 17. (a) Paano kita nakikinabang sa pag-adal sa mga detalye manungod sa daga asin sa mga nakaistar diyan? (b) Ano an pag-uulayan ta sa masunod na kapitulo?

¹⁶ Paano kita nakikinabang sa pag-adal sa mga detalyeng iyan manungod sa daga asin sa mga nakaistar diyan? Ipinapagirumdom kaiyan sa sato na dapat na nahihiling na marhay ngunyan an pagkapantay-pantay asin pagkasararo sa satong pambilog na kinaban na kasararuan nin magturugang. Mayong pinapalain si Jehova. Dapat tang haputon an satong sadiri: ‘Dai daw ako nagpapalain-lain arog ni Jehova? Gikan sa puso ko daw na iginagalang an sakong kapagtubod, ano man an saiyang lahi o kamugtakan sa buhay?’ (Roma 12:10) Nauugma kita na tinawan kita gabos ni Jehova nin pantay-pantay na oportunidad sa espirituwal na paraiso, na diyan kita nagtatao nin bilog na kalag na sagradong paglilingkod sa satong Ama sa langit asin nag-aako kan saiyang mga bendisyon.—Gal. 3:26-29; Kap. 7:9.

¹⁷ Pag-ulayan ta ngunyan an ikaapat na asigurasyon na nasa huring kabtang kan huring bisyon ni Ezekiel—an panuga na masasakaibanan si Jehova kan mga nadistiyero. Anong mga leksiyon an manunudan ta sa panugang iyan? Maaaraman ta an simbag diyan sa masunod na kapitulo.

1, 2. (a) Anong porsiyon kan daga an itatagama para sa sarong espesyal na katuyuhan? (Hilingon an ritrato sa cover.) (b) An bisyon nagtatao nin anong asigurasyon sa mga nadistiyero?

SA SAIYANG huring bisyon, naaraman ni Ezekiel an manungod sa sarong porsiyon kan daga na itatagama para sa sarong espesyal na katuyuhan. An itatagamang porsiyon itatao, bako bilang mana para sa sarong tribo kan mga Israelita, kundi bilang kontribusyon ki Jehova. Naaraman man ni Ezekiel an manungod sa sarong pambihirang siyudad na may interesanteng pangaran. An parteng ini kan bisyon nagtatao sa mga nadistiyero kan pinakamahalagang asigurasyon: Masasakaibanan ninda si Jehova pagbalik ninda sa saindang namumutan na daga.

² Detalyadong ilinadawan ni Ezekiel an kontribusyon na iyan. Siyasaton ta an pagkasaysay na ini, na pano nin kahulugan para sa sato na tunay na mga parasamba ni Jehova.

An “Banal na Kontribusyon Kaiba an . . . Siyudad”

3. Ano an limang parte kan dagang itinagama ni Jehova, asin para sa anong katuyuhan an kada parte kaiyan? (Hilingon an kahon na “An Kontribusyon na Itatagama Nindo.”)

³ An espesyal na porsiyon kan daga may sukol na 25,000 na maniko (13 kilometros) puon sa norte sagkod sa timog asin 25,000 na maniko puon sa sirangan sagkod sa sulnupan. An kuwadradong dagang ini inapod na “an bilog na kontribusyon.” Binanga iyan sa tulong pabalagbag na porsiyon. An itaas na porsiyon para sa mga Levita, asin an tahaw na porsiyon itinagama para sa templo asin sa mga saserdote. An duwang porsiyon na iyan iyo an minakompuwesto sa “banal na kontribusyon.” An mas sadit na nasa ibabang porsiyon, o “an natatadang parte,” iyo an “gagamiton kan siyudad.”—Ezek. 48:15, 20.

4. Ano an manunudan ta sa pagkasaysay manungod sa kontribusyon ki Jehova?

⁴ Ano an manunudan ta sa pagkasaysay na ini manungod sa kontribusyon ki Jehova? Paagi sa pagtagama nguna nin daga para sa espesyal na kontribusyon na ini bago su daga para sa mga tribo, ipinahiling ni Jehova na an daga na ini na para sa kontribusyon an dapat tawan nin priyoridad. (Ezek. 45:1) Siguradong dakul an nanudan kan mga nadistiyero sa kun ano an ininot sa pagtagamang ini nin daga. Kaipuhan nindang gibuhon na panginot sa saindang buhay an pagsamba ki Jehova. Sa ngunyan, panginot man sa sato an espirituwal na mga aktibidad, arog kan pag-adal sa Tataramon nin Diyos, pag-atender sa Kristiyanong mga pagtiripon, asin pakikikabtang sa paghuhulit. Pag inaarog ta si Jehova sa pagbugtak nin tamang mga priyoridad, napapagdanay tang panginot sa satong buhay an pagsamba sa saiya.

“Nasa Tahaw Kaiyan an Siyudad”

5, 6. (a) Para kiisay an siyudad? (b) Sa ano dai nanunungod an siyudad, asin taano?

⁵ Basahon an Ezekiel 48:15. Ano an kahulugan kan “siyudad” asin kan daga na nakapalibot diyan? (Ezek. 48:16-18) Sa bisyon, sinabi ni Jehova ki Ezekiel: ‘An siyudad magigin pagsadiri kan bilog na banwaan nin Israel.’ (Ezek. 45:6, 7) Kaya, an siyudad saka an daga na nakapalibot diyan dai kaiba sa “banal na kontribusyon” na “itatagama . . . para ki Jehova.” (Ezek. 48:9) Mantang isinasaisip iyan, siyasaton ta kun ano an manunudan ta ngunyan sa areglo kan siyudad na iyan.

⁶ Para maaraman an mga manunudan ta sa siyudad, aramon ta nguna kun sain dai nanunungod an siyudad. Dai iyan puwedeng ipanungod sa itinugdok liwat na siyudad nin Jerusalem na nasa laog an templo. Taano? Dahil mayo man nin templo sa laog kan siyudad na nahiling ni Ezekiel sa bisyon. Saro pa, dai man nanunungod an siyudad sa ano man na iba pang siyudad sa ibinalik na daga nin Israel. Taano? Dahil mayo nin siyudad na itinugdok kan mga nagbaralik na nadistiyero o kan saindang mga gikan an kapareho kan siyudad na ilinadawan sa bisyon. An siyudad dai man puwedeng ipanungod sa sarong langitnon na siyudad. Taano? Dahil itinugdok iyan sa daga na gagamiton “para sa ordinaryong [o, bakong sagradong] gibuhon” bakong arog kan mga edipisyo na itinugdok sa daga na itinagama para sana sa sagradong pagsamba.—Ezek. 42:20.

7. Sa ano nanunungod an siyudad na nahiling ni Ezekiel, asin minalataw na nagrerepresentar iyan sa ano? (Hilingon an ritrato sa kapinunan kan kapitulo.)

⁷ Kun siring, sa ano nanunungod an siyudad na nahiling ni Ezekiel? Tandaan na an siyudad nahiling niya sa iyo man sanang bisyon kun sain niya nahiling an daga. (Ezek. 40:2; 45:1, 6) Ipinapahiling kan Tataramon nin Diyos na an daga nanunungod sa sarong espirituwal na daga, kaya an siyudad siguradong nanunungod sa sarong espirituwal na siyudad. Sa parati, ano an naiisip mo sa terminong “siyudad”? Maiisip ta diyan an ideya nin sarong grupo nin mga tawo na namumuhay na magkairibanan asin organisado. Kaya, an organisadong marhay na siyudad na nahiling ni Ezekiel, na kuwadrado an korte, minalataw na nagrerepresentar sa sarong organisadong marhay na administrasyon.

8. Abot sain an sakop kan administrasyon na ini, asin taano ta nasabi ta iyan?

⁸ Abot sain an sakop kan administrasyon na ini? Ipinapahiling kan bisyon ni Ezekiel na an siyudad na ini nagpupunsiyonar sa laog kan espirituwal na daga. Kaya, an administrasyon na ini nagpupunsiyonar ngunyan sa laog kan espirituwal na paraiso. Asin ano an ipinaparisa kan detalye na an siyudad yaon sa daga na para sa ordinaryong, o bakong sagradong, gibuhon? Ipinapagirumdom kaiyan sa sato na an siyudad nanunungod bako sa sarong administrasyon sa langit kundi sa sarong administrasyon sa daga na nagpupunsiyonar para sa kapakinabangan kan gabos na nakaistar sa espirituwal na paraiso.

9. (a) Siisay ngunyan an mga kabilang sa administrasyon na ini sa daga? (b) Ano an gigibuhon ni Jesus sa panahon kan Milenyo?

⁹ Siisay an mga kabilang sa administrasyon na ini sa daga? Sa bisyon ni Ezekiel, inaapod na “pamayo” an nanginginot sa gobyerno kan siyudad. (Ezek. 45:7) Siya an paraataman sa mga tawo, pero bako man siyang saserdote o Levita. Maiisip ta sa pamayong ini an mga paraataman ngunyan sa kongregasyon partikular na an mga bakong linahidan nin espiritu. An mapagmalasakit na espirituwal na mga pastor na ini na kabilang sa “ibang mga karnero” mapakumbabang mga lingkod digdi sa daga kan gobyerno ni Cristo sa langit. (Juan 10:16) Sa maabot na Milenyo, mapili saka manombra si Jesus “sa bilog na daga” nin kuwalipikadong mga elder, o “mga pamayo.” (Sal. 45:16) Sa irarom kan paggiya kan langitnon na Kahadian, sinda an maasikaso kan mga bagay-bagay para sa kapakanan kan mga lingkod nin Diyos sa panahon kan Milenyo.

“Si Jehova Yaon Diyan”

10. Ano an pangaran kan siyudad, asin anong asigurasyon an itinatao kaiyan?

¹⁰ Basahon an Ezekiel 48:35. “Si Jehova Yaon Diyan” an pangaran kan siyudad. An pangaran na iyan nagtatao nin asigurasyon na yaon sa siyudad na ini an presensiya ni Jehova. Paagi sa pagpahiling ki Ezekiel kan siyudad na ini na nasa tahaw kan daga, garo man sana sinasabi ni Jehova sa mga nadistiyero: ‘Masasakaibanan giraray nindo ako!’ Nakakapakusog nanggad na asigurasyon!

11. Anong mga leksiyon an manunudan ta sa bisyon ni Ezekiel manungod sa siyudad asin sa makahulugan na pangaran kaiyan?

¹¹ Ano an manunudan ta sa parteng ini kan propesiya ni Ezekiel? An pangaran kan siyudad na ini nag-aasigurar sa sato bilang mga lingkod nin Diyos ngunyan na mairok si Jehova sa kaibanan kan saiyang maimbod na mga lingkod sa daga, ngunyan asin sagkod lamang. Idinuduon man kan makahulugan na pangaran na ini an sarong mahalagang marhay na katotoohan: Nag-eeksister an siyudad bakong para tawan nin kapangyarihan an siisay man na tawo kundi para ipautob an mamumuton saka makatanusan na dalan ni Jehova. Halimbawa, dai itinao ni Jehova sa administrasyon an awtoridad na magbuot kun paano pagbabanga-bangaon an daga. Imbes, linalauman ni Jehova na susunudon ninda an areglo para sa mga mana, o pribilehiyo, na itinao niya mismo sa saiyang mga lingkod, kaiba na an mga “hamak.”—Tal. 19:17; Ezek. 46:18; 48:29.

12. (a) Ano an pambihirang parte kan siyudad, asin ano an ipinaparisa kaiyan? (b) An aspektong ini kan bisyon nagtatao nin anong mahalagang pagirumdom sa mga Kristiyanong paraataman?

¹² Ano pa an sarong pambihirang parte kan siyudad na “Si Jehova Yaon Diyan”? Para sa proteksiyon, an suanoy na mga siyudad igwa nin mga pader na may pipira sanang trangkahan sagkod sa mapupuwede, pero an siyudad na ini igwa nin 12 trangkahan! (Ezek. 48:30-34) An dakul na trangkahan na ini (na tigturulo sa kada gilid kan kuwadradong siyudad) nagpaparisa na an mga administrador kan siyudad madaling dulukon asin handang tumabang sa gabos na lingkod nin Diyos. Dugang pa, an pagkaigwa nin 12 trangkahan kan siyudad nagduduon na bukas iyan sa gabos, sa “bilog na banwaan nin Israel.” (Ezek. 45:6) An pagkaigwa nin dakul na trangkahan kan siyudad, na huli kaiyan madaling makalaog diyan, nagtatao nin mahalagang pagirumdom sa Kristiyanong mga paraataman. Gusto ni Jehova na magin madali sindang dulukon asin pirming handang tumabang sa gabos na nakaistar sa espirituwal na paraiso.

An mga Lingkod nin Diyos “Naglaog Para Magsamba” Asin “Naglilingkod sa Siyudad”

13. Ano an sinambit ni Jehova na iba-ibang paagi nin paglilingkod na gigibuhon kan mga tawo?

¹³ Balikan ta an panahon ni Ezekiel asin aramon ta an iba pang detalye na isinurat niya manungod sa bisyon na ini na pagbanga-banga kan daga. May sinambit man si Jehova na mga nakikikabtang sa iba-ibang paagi nin paglilingkod. An mga saserdote—“an mga lingkod sa santuwaryo”—nagdudulot nin mga atang asin nagdudulok ki Jehova para maglingkod saiya. Asin an mga Levita—an “mga lingkod sa templo”—“[nag-aasikaso] kan mga paglilingkod diyan saka kan gabos na bagay na dapat na gibuhon diyan.” (Ezek. 44:14-16; 45:4, 5) Apuwera kaiyan, may mga trabahador na sibot na nagtatrabaho harani sa siyudad. Siisay an mga trabahador na iyan?

14. Ano an ipinapagirumdom sa sato kan mga trabahador na harani sa siyudad?

¹⁴ An mga trabahador na harani sa siyudad hali “sa gabos na tribo kan Israel.” Ginigibo ninda an mga trabaho na nagsusuportar sa siyudad. Nagtatanom sinda nin mga “magigin pagkakan kan mga naglilingkod sa siyudad.” (Ezek. 48:18, 19) Anong oportunidad na igwa kita ngunyan an ipinapagirumdom sa sato kan areglong ini? An gabos na nakaistar ngunyan sa espirituwal na paraiso igwa nin oportunidad na suportaran an paglilingkod kan linahidan na mga tugang ni Cristo asin kan mga ninombrahan ni Jehova para manginot na kabilang sa “dakulang kadaklan.” (Kap. 7:9, 10) An panginot na paagi para magibo ta iyan iyo an gikan sa buot na pakikikooperar asin pagsunod sa paggiya kan maimbod na uripon.

15, 16. (a) Anong iba pang detalye an sinambit sa bisyon ni Ezekiel? (b) Igwa kita nin oportunidad na makikabtang sa anong kaagid na mga aktibidad?

¹⁵ Igwa pa nin detalye sa bisyon ni Ezekiel na diyan may manunudan kitang leksiyon may koneksiyon sa satong ministeryo. Anong detalye? Sinabi ni Jehova na an mga kabilang sa 12 tribo na bakong Levita magigin sibot sa duwang lokasyon: sa patyo kan templo asin sa pasabsaban kan siyudad. Ano an ginigibo ninda sa duwang lokasyon na iyan? Sa patyo kan templo, an gabos na tribo ‘naglalaog para magsamba’ paagi sa pagdulot nin mga atang ki Jehova. (Ezek. 46:9, 24) Sa daga kan siyudad, an mga kabilang sa gabos na tribo nagduduman para suportaran an siyudad paagi sa pagtanom sa daga. Ano an manunudan ta sa halimbawa kan mga trabahador na ini?

¹⁶ An mga kabilang sa dakulang kadaklan ngunyan igwa nin oportunidad na makikabtang sa mga aktibidad na kaagid kan mga nasa bisyon ni Ezekiel. Sinasamba ninda si Jehova “sa saiyang templo” paagi sa pagdulot nin mga atang nin pag-umaw. (Kap. 7:9-15) Ginigibo ninda iyan paagi sa pakikikabtang sa paghuhulit asin sa pagpahayag kan saindang pagtubod sa Kristiyanong mga pagtiripon. Para sainda, an pagsamba nindang ini ki Jehova an panginot nindang responsabilidad. (1 Cron. 16:29) Apuwera kaiyan, dakul sa mga lingkod nin Diyos an nagsusuportar sa organisasyon nin Diyos sa dakul na praktikal na paagi. Halimbawa, nagtatabang sinda sa pagtugdok asin pagmentenar nin mga Kingdom Hall saka mga pasilidad kan sangay, asin nagtatabang man sinda sa dakul na iba pang proyekto kan organisasyon ni Jehova. Sinusuportaran kan iba an mga proyektong ini paagi sa saindang pinansiyal na mga kontribusyon. An ginigibo ninda maiaagid sa pagtanom sa daga duman sa bisyon, asin ginigibo ninda iyan para “sa ikakamuraway nin Diyos.” (1 Cor. 10:31) Maigot asin maugma sinda sa saindang gibuhon huling aram ninda na si Jehova “nauugmang marhay . . . sa siring na mga atang.” (Heb. 13:16) Lubos mo daw na inaaprobetsaran an mga oportunidad na iyan?

“Igwa nin Bagong mga Langit Asin Sarong Bagong Daga na Hinahalat Ta”

17. (a) Anong mas dakulang kautuban kan bisyon ni Ezekiel an mahihiling ta sa maabot na panahon? (b) Sa panahon kan Milenyo, siisay an makikinabang sa mga gigibuhon kan administrasyon?

¹⁷ Sa maabot na panahon, makakahiling daw kita nin mas dakulang kautuban kan bisyon ni Ezekiel manungod sa kontribusyon? Iyo! Pag-isipan ini: Nahiling ni Ezekiel na nasa tahaw an porsiyon kan daga na inaapod na “banal na kontribusyon.” (Ezek. 48:10) Sa kaagid na paagi, pagkatapos kan Armagedon, sain man kita nakaistar sa daga, si Jehova mairok sa kaibanan ta. (Kap. 21:3) Sa Milenyo, an administrasyon—an buot sabihon, an mga nonombrahan sa daga na mag-asikaso kan mga bagay-bagay para sa kapakanan kan mga lingkod nin Diyos—magigin mas mahiwas an sakop asin makakaabot sa bilog na kinaban. Matao sinda nin mamumuton na paggiya asin instruksiyon sa gabos na kabilang sa “bagong daga,” an sarong bagong sosyedad nin mga tawo.—2 Ped. 3:13.

18. (a) Taano ta makakasigurado kita na an administrasyon mahiro kauyon kan pamamahala nin Diyos? (b) An pangaran kan siyudad nagtatao sa sato nin anong masarig na asigurasyon?

¹⁸ Taano ta makakasigurado kita na an administrasyon padagos na mahiro kauyon kan pamamahala nin Diyos? Huling malinaw na ipinapahiling kan Tataramon nin Diyos na an daganon na siyudad na may 12 trangkahan repleksiyon kan langitnon na siyudad na may 12 trangkahan, an Bagong Jerusalem, na kompuwesto kan 144,000 na kairibang tagapamahala ni Cristo. (Kap. 21:2, 12, 21-27) Ipinaparisa kaini na an magigin mga desisyon kan daganon na administrasyon magigin kauyon kan gabos na desisyon kan Kahadian nin Diyos sa langit, asin maingat nindang ipapautob an mga iyan. Iyo, an pangaran kan siyudad na “Si Jehova Yaon Diyan” nag-aasigurar sa lambang saro sato na an dalisay na pagsamba magdadanay asin mauswag sagkod lamang sa Paraiso. Magayunon nanggad na puturo an naghahalat sa sato!