‘An Suanoy kan mga Aldaw Tuminukaw’

“DAI nin siisay man na nakahiling sa Dios kasuarin man,” an sabi kan Biblia. (Juan 1:18) Mamurawayon an itsura nin Dios kaya mayong linalang na may laman asin dugo an posibleng makahiling sa saiya asin mabubuhay. (Exodo 33:20) Pero sa nagkapirang pangyayari, tinawan ni Jehova nin bisyon kan langit an piling mga lalaki. An saro iyo si propeta Daniel. Daing duda na huli sa nahiling nia napano sia​—asin siertong mapapano man kita​—nin may pagkangirhat na paggalang. Mangnoha kun paano ilinadawan ni Daniel an nagin pribilehio niang mahiling sa bisyon.a​—Basahon an Daniel 7:​9, 10.

‘An Suanoy kan mga Aldaw.’ An titulong ‘Suanoy kan mga Aldaw,’ na si Daniel sana an naggamit, nagpaparisa dapit sa “saro na halawig na (o gurang na) kun dapit sa mga aldaw.” (Daniel 7:​9, 13, 22) Gurano na kalawig an pag-eksister ni Jehova? Mantang sia an “Hade na dai nin katapusan,” an pag-eksister nia mayo nin kapinonan asin mayo nin katapusan. (1 Timoteo 1:17; Judas 25) Inaasegurar kita kan daing sagkod na pag-eksister nin Dios na daing limite an kadonongan nia, huling ikinokonektar kan Biblia an edad sa kadonongan. (Job 12:12) Totoo, an ideya nin daing sagkod na pag-eksister depisil masabotan kan limitadong isip niato. Pero, maninigo daw talaga kitang maglaom na lubos niatong masasabotan an daing kapareho sa kadonongan na Dios?​—Roma 11:​33, 34.

Mangnohon na an Suanoy kan mga Aldaw ‘tuminukaw.’ Sa anong katuyohan? An konteksto kaiyan nagtatao nin nagkapirang giya, na naggagamit nin mga terminong arog nin “an Hukom [“Hukoman,” NW]” asin “hatol.” (Daniel 7:​10, 22, 26) Sa siring, sa bisyon, si Jehova nakatukaw bilang Hukom. Siisay an huhukoman nia? An mga nasyon kan daga, na mas naenot na ilinadawan sa bisyon ni Daniel bilang mga hayop.b (Daniel 7:​1-8) Anong klaseng Hukom si Jehova?

‘Maputi an saiyang gubing na garo an nabibilog na ambon [“niebe,” NW], asin ta an buhok kan saiyang payo garo an malinig na balukag kan karnero.’ An puti simbolo nin katanosan asin kadalisayan. Sa parate, puti an natural na kolor kan balukag nin karnero. Sa siring, an buhok na arog kan balukag nin karnero kolor puti. Naiimahinar mo daw kun ano an nahiling ni Daniel? Nahihiling mo daw an Hukom na puti an buhok na tibaad nakasulot nin halabang gubing na garo niebe sa kaputian? An mga paglaladawan na ini nag-aasegurar sa sato na matanos asin madonong an mga paghukom ni Jehova. Sia an Hukom na maninigo sa satong lubos na pagtitiwala asin paggalang.

‘Mga manriboribo an nagririlingkod sa saiya, asin mga laksa nin mga laksa an nagtatarabang duman sa atubangan nia.’ Sairisay an mga lingkod na ini sa langit? Ipinapamidbid kan Biblia an mga anghel bilang ‘paralingkod sa saiya [sa Dios].’ (Salmo 104:4) An mga anghel nin Dios, na posibleng ginatos na milyon an bilang, sibot na ‘nag-ootob kan saiyang tataramon’ asin ‘naggigibo kan saiyang kabotan.’ (Salmo 103:​20, 21) Bako daw na dugang pang prueba iyan kan dai marorop na kadonongan nin Dios? May iba pa daw apuera ki Jehova na makakapagpadanay na organisado asin sibot sa arog kaiyan kadakol na hukbo sa langit sa laog nin halawigon na panahon?

An bisyon ni Daniel nakakapahiro sa sato na magtiwala ki Jehova, an Suanoy kan mga Aldaw. Matanos an mga paghukom nia, asin mapagtitiwalaan an kadonongan nia. Taano ta dai mo pag-adalan nin orog pa kun paano ka mapaparani sa Dios na madonong sa gabos?