Ibuuku lya Kubalilapo Ilya Imilandu
19 Pa numa Nahashi imfumu ya bena Amone alifwile, kabili umwana wakwe e wamupyene pa bufumu.+ 2 E lyo Davidi alandile ati: “Nalalanga Hanuni umwana wa kwa Nahashi ukutemwa ukushipwa+ pantu wishi alinangile ukutemwa ukushipwa.” E ico Davidi atumine ababomfi bakwe mu kusansamusha Hanuni pa mfwa ya kwa wishi. Lelo ilyo ababomfi ba kwa Davidi bafikile mu calo ca bena Amone+ mu kusansamusha Hanuni, 3 bacilolo ba bena Amone baebele Hanuni abati: “Bushe imwe muleti ico Davidi atumiine ababomfi ni co alefwaya ukumusansamusha? Bushe ico abatumiine te ico alefwaya ukufwayafwaya mu musumba pa kuti awishibe bwino e lyo ausanse?” 4 E ico Hanuni asendele ababomfi ba kwa Davidi, ababeya umwefu,+ aputula ifya kufwala fyabo ukufisha mu matako e lyo abaleka baya. 5 Ilyo bamo baebele Davidi ifyacitikile aba abaume, ilyo line atumine aba kuyabakumanya, pantu aba baume balibaseebenye nga nshi; kabili imfumu yabebele aiti: “Ikaleni mu Yeriko+ mpaka umwefu ukamene, e lyo mukabwele.”
6 Mu kupita kwa nshita abena Amone bamwene ukuti Davidi alibapatile sana, e ico Hanuni na bena Amone batumiine aba ku Mesopotamia,* aba ku Aramu-maaka na ba ku Soba+ amatalanti* ya silfere 1,000 pa kuti nabo babatumine amaceleta na balenina pali bakabalwe. 7 E ico babatumiine amaceleta 32,000. Imfumu ya ku Maaka na bantu ba iko nabo balile. Lyena baishilepanga inkambi mupepi na Medeba.+ Abena Amone balifumine mu misumba yabo kabili balilongene pa kuti balwe inkondo.
8 Ilyo Davidi aumfwile, atumine Yoabu+ na bashilika bonse, kumo na baume abakwatishe amaka.+ 9 Kabili abena Amone balifumine batantama pa mpongolo ya musumba pa kuti balwe inkondo, ninshi imfumu ishaishile nasho nashitantama sheka mu mpanga.
10 Ilyo Yoabu amwene ukuti abalwani balamusanshila ku ntanshi na ku numa, ilyo line asalile abashilika abena Israele abaishibishe ukulwa kabili alibatantamike pa kuti balwe na bena Siria.+ 11 Lyena apeele Abishai munyina+ amaka ya kutungulula abaume abashele, pa kuti abatantamike balwe na bena Amone. 12 Lyena amwebele ati: “Nga ca kuti abena Siria+ bancila amaka, wise ungafwe; lelo nga ca kuti abena Amone bakucila amaka, nalaisa kwafwa. 13 Tufwile ukuba abakosa kabili abashipa+ pa kuti tucingilile abantu besu ne misumba ya kwa Lesa wesu, kabili Yehova alacita ico alamona ukuti e ciweme.”
14 Lyena Yoabu na baume abo ali nabo baile balepalama ku bena Siria pa kuti balwe nabo, lelo abena Siria balifulumwike.+ 15 Ilyo abena Amone bamwene ukuti abena Siria bafulumuka, nabo bafulumwike Abishai kabili baingile mu musumba. Pa numa, Yoabu alibwelelemo ku Yerusalemu.
16 Ilyo abena Siria bamwene ukuti babacimfya, batumine aba kuyasenda abena Siria abali mu ncende ya Mumana wa Yufrate,+ kabili Shofaki umukalamba wa bashilika ba kwa Hadadesere e walebatungulula.+
17 Ilyo bamo bashimikile Davidi ifi, ilyo line fye alongenye abashilika abena Israele bonse kabili ba-abwike Yordani bayafika no kwali abena Siria e lyo batantama pa kuti balwe nabo. Lyena Davidi alilwile na bena Siria.+ 18 Lelo abena Siria balifulumwike abena Israele; kabili Davidi aipeye abena Siria 7,000 abale-ensha amaceleta na bashilika bambi 40,000 kabili aipeye Shofaki umukalamba wa bashilika babo. 19 Ilyo ababomfi ba kwa Hadadesere bamwene ukuti babacimfya,+ ilyo line bapangene na Davidi icipangano ca mutende kabili baishileba ababomfi ba bena Israele.+ Ukutula ubu bushiku abena Siria tabalefwaya ukwafwa abena Amone.