Ibuuku lya Kubalilapo Ilya Imilandu

20 Pa kutendeka kwa mwaka,* ilyo imfumu shiya mu kulwa inkondo, Yoabu+ na bashilika abena Israele bonse bailesansa abena Amone. Aileshinga Raba+ ninshi Davidi ena ashele mu Yerusalemu.+ Yoabu asanshile umusumba wa Raba kabili alyonawile uyu musumba.+ 2 Lyena Davidi afuulile Malkamu icisote ca bufumu icafinine amakilogramu 34 aya golde,* icakwete amabwe aya mutengo sana, kabili bafwikile Davidi. Alisendele ne fintu ifingi nga nshi ifyo apokolwele mu musumba.+ 3 Kabili asendele abantu abalimo e lyo abapeela umulimo+ wa kuputula amabwe, uwa kupanga ifyela ifyatwa na masembe. E fyo acitile aba mu misumba yonse iya bena Amone. Davidi na bashilika bonse basukile babwelela ku Yerusalemu.

4 Pa numa abena Israele baile mu kulwa inkondo na baPelishiti ku Gesere. Pali ilya nshita Sibekai+ umwina Husha aipeye Safi, uwatuntwike mu bena Refa+ kabili abena Israele balicimfishe abaPelishiti.

5 Na kabili abena Israele balwile na baPelishiti, kabili Elhanani umwana wa kwa Yairi aipeye Laami munyina Galyati+ umwina Giti, uwakwete ifumo ilyali ne ca kwikatilako icali nga kamulando ka bakapikula ba nsalu.+

6 Na kabili kwali inkondo mu Gati,+ umwali umwaume ipaka+ uwali ne minwe 6 kuli cila cisansa, ne fikondo 6 kuli cila lukasa, fyonse pamo fyali 24. Uyu na o atuntwike mu bena Refa.+ 7 Kabili alepontela+ abena Israele. E ico Yonatani umwana wa kwa Shimea,+ munyina Davidi alimwipeye.

8 Aba e batuntwike mu bena Refa+ mu Gati,+ kabili Davidi na bashilika bakwe e babepeye.