Esra

1 Kabili mu mwaka wa kubalilapo uwa kuteka kwa kwa Sailasi+ imfumu ya ku Persia, pa kuti amashiwi Yehova asoseele muli Yeremia+ yafikilishiwe, Yehova acincishe+ umutima wa kwa Sailasi imfumu ya ku Persia ica kuti yabilile+ imbila mu bufumu bwa iko bonse, no kulemba,+ ati:

2 “Ifi e fyo Sailasi imfumu ya ku Persia asosele,+ ‘Amabufumu yonse aya pe sonde Yehova Lesa wa mu muulu+ alimpeela,+ kabili nanjeba ukumukuulila ing’anda mu Yerusalemu,+ umusumba uwaba mu Yuda. 3 Umuntu onse uo muli nankwe uwa mu bantu bakwe bonse, lekeni Lesa wakwe abe nankwe.+ E ico mulekeni aye ku Yerusalemu, umusumba uwaba mu Yuda, no kukuula cipya cipya ing’anda ya kwa Yehova Lesa wa kwa Israele, iyali mu Yerusalemu,+ ena e Lesa wa cine.+ 4 Na onse uwashala mu fifulo fyonse umo ayaikala,+ abantu ba muli ifyo fifulo balingile ukumwafwilishako indalama sha silfere na golde ne fipe ne fitekwa pamo no mutuulo wa kuitemenwa+ uwa ng’anda ya kwa Lesa wa cine, iyali mu Yerusalemu.’”

5 E lyo intungulushi+ sha mukowa wa kwa Yuda no wa kwa Benjamini na bashimapepo na bena Lebi, na bonse fye abo umupashi+ wa kwa Lesa wa cine wacincishe, baliimine ukuya ku kukuula cipya cipya ing’anda ya kwa Yehova,+ iyali mu Yerusalemu. 6 Na bena mupalamano babo bonse, bakoseshe+ amaboko yabo pa kubapeela ifipe ifya silfere, ifya golde, ne fipe fimbi e lyo ne fitekwa ne fintu fimbi ifyawamisha, ukulunda pali fyonse ifyo batuulile ku kuitemenwa fye.+

7 Imfumu Sailasi, na yo yaletele ifipe fya mu ng’anda ya kwa Yehova,+ ifyo Nebukadnesari afumishe ku Yerusalemu+ no kufibika mu ng’anda ya kwa lesa wakwe.+ 8 E lyo Sailasi imfumu ya ku Persia apeele ifipe kuli Mitiridati uwalesunga icipao ca ndalama pa kuti afipende no kufipeela kuli Sheshebasari+ umukalamba wa mukowa wa kwa Yuda.+

9 Kabili iyi e mpendwa ya fipe: ifipe ifyapala imiseke ifya golde amakumi yatatu (30), ifipe ifyapala imiseke ifya silfere ikana limo (1,000), ifipe amakumi yabili na pabula (29) ifya kupyanikishapo, 10 imbale ishafonka+ ishinono isha golde amakumi yatatu (30), imbale ishafonka ishinono isha silfere isho balebomfya kuli fimbi imyanda ine ne kumi limo (410), ne fipe fimbi ikana limo (1,000). 11 Ifipe fyonse ifya golde ne fya silfere fyali amakana yasano ne myanda ine (5,400). Fyonse ifi Sheshebasari+ alifibweseshe, abweseeshe na bankole+ ku Yerusalemu ukubafumya ku Babiloni.

2 Kabili aba e baleikala mu fitungu fya bulashi+ abafumine muli bunkole+ abo Nebukadnesari imfumu ya Babiloni asendele bunkole+ ku Babiloni kabili pa numa ababweleele+ ku Yerusalemu na ku calo ca Yuda,+ cila muntu ku musumba wakwe; 2 abaishile na Serubabele,+ ni Yeshua,+ Nehemia, Seraya,+ Reelaya, Mordekai, Bilishani, Mispari, Bigibai, Rehumu, Baana.

Impendwa ya baume abena Israele yali ifi: 3 Abana ba kwa Paroshe+ bali amakana yabili umwanda umo na makumi cinelubali na babili (2,172); 4 abana ba kwa Shefatia+ bali imyanda itatu na makumi cinelubali na babili (372); 5 abana ba kwa Ara+ bali imyanda cinelubali na makumi cinelubali na basano (775); 6 abana ba kwa Pehati-moabu,+ aba mu bana ba kwa Yeshua na Yoabu,+ bali amakana yabili ne myanda cinekonsekonse ne kumi na babili (2,812); 7 abana ba kwa Elamu+ bali ikana limo ne myanda ibili na makumi yasano na bane (1,254); 8 abana ba kwa Satu+ bali imyanda pabula na makumi yane na basano (945); 9 abana ba kwa Sakai+ bali imyanda cinelubali na makumi mutanda (760); 10 abana ba kwa Bani+ bali imyanda mutanda na makumi yane na babili (642); 11 abana ba kwa Bebai+ bali imyanda mutanda na makumi yabili na batatu (623); 12 abana ba kwa Asigadi+ bali ikana limo ne myanda ibili na makumi yabili na babili (1,222); 13 abana ba kwa Adonikamu+ bali imyanda mutanda na makumi mutanda na mutanda (666); 14 abana ba kwa Bigibai+ bali amakana yabili na makumi yasano na mutanda (2,056);15 abana ba kwa Adini+ bali imyanda ine na makumi yasano na bane (454); 16 abana ba kwa Atere,+ aba muli Hisekia, bali amakumi pabula na cinekonsekonse (98); 17 abana ba kwa Besai+ bali imyanda itatu na makumi yabili na batatu (323); 18 abana ba kwa Yora bali umwanda umo ne kumi na babili (112); 19 abana ba kwa Hashumu+ bali imyanda ibili na makumi yabili na batatu (223); 20 abana ba kwa Gibari+ bali amakumi pabula na basano (95); 21 abana ba ku Betelehemu+ bali umwanda umo na makumi yabili na batatu (123); 22 abaume ba ku Netofa+ bali amakumi yasano na mutanda (56)23 abaume ba ku Anatote+ bali umwanda umo na makumi yabili na cinekonsekonse (128); 24 abana ba ku Asimabete+ bali amakumi yane na babili (42); 25 abana ba ku Kiriati-yearimu,+ Kefira na Beerote, bali imyanda cinelubali na makumi yane na batatu (743); 26 abana ba ku Rama+ na Geba+ bali imyanda mutanda na makumi yabili na umo (621); 27 abaume ba ku Mikimasi+ bali umwanda umo na makumi yabili na babili (122); 28 abaume ba ku Betele+ na Ai+ bali imyanda ibili na makumi yabili na batatu (223); 29 abana ba ku Nebo+ bali amakumi yasano na babili (52); 30 abana ba ku Magibishi bali umwanda umo na makumi yasano na mutanda (156); 31 abana ba kwa Elamu+ umbi bali ikana limo ne myanda ibili na makumi yasano na bane (1,254); 32 abana ba kwa Harimu+ bali imyanda itatu na makumi yabili (320); 33 abana ba ku Lode,+ Hadidi+ na Ono,+ bali imyanda cinelubali na makumi yabili na basano (725); 34 abana ba ku Yeriko+ bali imyanda itatu na makumi yane na basano (345); 35 abana ba ku Senaa+ bali amakana yatatu ne myanda mutanda na makumi yatatu (3,630).

36 Aba e bashimapepo:+ Abana ba kwa Yedaya+ aba mu ng’anda ya kwa Yeshua+ bali imyanda pabula na makumi cinelubali na batatu (973); 37 abana ba kwa Imere+ bali ikana limo na makumi yasano na babili (1,052); 38 abana ba kwa Pashihuri+ bali ikana limo ne myanda ibili na makumi yane na cinelubali (1,247); 39 abana ba kwa Harimu+ bali ikana limo ne kumi na cinelubali (1,017).

40 Aba e bena Lebi:+ Abana ba kwa Yeshua+ na Kadmiele,+ aba mu bana ba kwa Hodabiya,+ bali amakumi cinelubali na bane (74). 41 Bakemba, abana ba kwa Asafi,+ bali umwanda umo na makumi yabili na cinekonsekonse (128). 42 Abana ba balinshi ba pa mpongolo, e kutila abana ba kwa Shalumu,+ abana ba kwa Atere,+ abana ba kwa Talmone,+ abana ba kwa Akubu,+ abana ba kwa Hatita,+ abana ba kwa Shobai, bonse pamo bali umwanda umo na makumi yatatu na pabula (139).

43 Aba e bena Netinimu:+ Abana ba kwa Siha, abana ba kwa Hasufa, abana ba kwa Tabaote,+ 44 abana ba kwa Kerose, abana ba kwa Siaha, abana ba kwa Padone,+ 45 abana ba kwa Lebana, abana ba kwa Hagaba, abana ba kwa Akubu, 46 abana ba kwa Hagabu, abana ba kwa Salmai,+ abana ba kwa Hanani, 47 abana ba kwa Gidele, abana ba kwa Gahari,+ abana ba kwa Reaya, 48 abana ba kwa Resini,+ abana ba kwa Nekoda, abana ba kwa Gasamu, 49 abana ba kwa Usa, abana ba kwa Pasea,+ abana ba kwa Besai, 50 abana ba kwa Asina, abana ba kwa Meunimu, abana ba kwa Nefusimu;+ 51 abana ba kwa Bakibuki, abana ba kwa Hakufa, abana ba kwa Harihuri,+ 52 abana ba kwa Basiluti, abana ba kwa Mehida, abana ba kwa Harsha,+ 53 abana ba kwa Barikose, abana ba kwa Sisera, abana ba kwa Tema,+ 54 abana ba kwa Nesiya, abana ba kwa Hatifa.+

55 Aba e bana ba babomfi ba kwa Solomone:+ Abana ba kwa Sotai, abana ba kwa Soferete, abana ba kwa Peruda,+ 56 abana ba kwa Yaala, abana ba kwa Darkone, abana ba kwa Gidele,+ 57 abana ba kwa Shefatia, abana ba kwa Hatili, abana ba kwa Pokerete-hasebaimu, abana ba kwa Ami.+

58 Abena Netinimu+ bonse na bana ba babomfi ba kwa Solomone bali imyanda itatu na makumi pabula na babili (392).+

59 Kabili aba e bafumine ku Tele-mela, Tele-harisha, Kerubi, Adone, na Imere, kabili bafililwe ukwishiba amayanda ya bashibo ne ntuntuko shabo,+ nga ca kuti ba mu bena Israele: 60 abana ba kwa Delaya, abana ba kwa Tobia, abana ba kwa Nekoda,+ bali imyanda mutanda na makumi yasano na babili (652). 61 Kabili aba e ba mu bana ba bashimapepo:+ abana ba kwa Habaya, abana ba kwa Hakose,+ abana ba kwa Barsilai,+ abaupile abakashi ukufuma mu bana banakashi ba kwa Barsilai+ umwina Gileadi no kwinikwa ishina lyabo. 62 Aba e bafwaile ibuuku lyabo ilya mashina pa kuti beshibe intuntuko shabo, lelo bena tabasangilemo amashina yabo, e ico balibafumishe pali bushimapepo abati balikowela.+ 63 E ico Umulashi wa Citungu+ abebele ukuti te kuti balyeko+ ifya mushilo nga nshi akasuke shimapepo eminina na Urimu+ na Tumimu.

64 Ulukuta lonse pamo+ lwali amakana amakumi yane na yabili ne myanda itatu na makumi mutanda (42,360),+ 65 ukufumyako abasha babo abaume na basha babo abanakashi, abali amakana cinelubali ne myanda itatu na makumi yatatu na cinelubali (7,337); kabili bali na bakemba abaume na bakemba abanakashi+ imyanda ibili (200). 66 Bakabalwe babo bali imyanda cinelubali na makumi yatatu na mutanda (736), imfalashi shabo shali imyanda ibili na makumi yane na shisano (245),+ 67 ingamila shabo shali imyanda ine na makumi yatatu na shisano (435), impunda shabo shali amakana mutanda ne myanda cinelubali na makumi yabili (6,720).+

68 Na bamo pa bakalamba+ aba mu mayanda ya bashibo,+ ilyo baishile ku ng’anda ya kwa Yehova,+ iyali mu Yerusalemu,+ bapeele imituulo ya kuitemenwa+ ku ng’anda ya kwa Lesa wa cine, pa kuti ikuulwe pa cifulo ca iko.+ 69 Ukulingana na maka yabo, bapeele golde+ ku cipao ca mulimo, badrakima* amakana amakumi mutanda na imo (61,000), na silfere,+ bamaina* amakana yasano (5,000), ne fya kufwala+ fya bashimapepo umwanda umo (100). 70 E lyo bashimapepo na bena Lebi na bamo pa bantu,+ na bakemba na balinshi ba pa mpongolo na bena Netinimu baikele mu misumba yabo, na bena Israele bonse mu misumba yabo.+

3 Ilyo wafikile umweshi walenga cinelubali (7)+ abana ba kwa Israele bali mu misumba yabo. Kabili abantu balongene ku Yerusalemu+ no mutima umo.+ 2 E lyo Yeshua+ mwana Yehosadaki na bamunyina bashimapepo na Serubabele+ mwana Shealtiele+ na bamunyina balimine no kukuula iciipailo ca kwa Lesa wa kwa Israele, ku kupeelelapo amalambo ya koca ukulingana ne fyalembwa+ mu mafunde ya kwa Mose umuntu wa kwa Lesa wa cine.

3 E ico bakuulile iciipailo apo calingile ukukuulwa,+ pantu baliketwe umwenso uukalamba pa mulandu wa bantu na bantu aba muli filya fyalo,+ kabili baletuulilapo amalambo ya koca kuli Yehova, amalambo ya koca aya lucelo na ya cungulo.+ 4 E lyo basefeshe umutebeto wa nsakwe+ ukulingana ne fyalembwa,+ baletuula na malambo ya koca cila bushiku ukulingana ne mpendwa yalekabilwa cila bushiku.+ 5 Pa numa ya ifi baletuula umutuulo wa koca uwa lyonse+ e kutila uwa pa nshita kwaba umweshi uupya+ na pa nshita ya mitebeto yonse iya mushilo+ iya kwa Yehova na lintu uuli onse atuula umutuulo wa kuitemenwa+ kuli Yehova. 6 Ukutendekela pa bushiku bwa ntanshi ubwa mweshi walenga cinelubali (7)+ ukuya na ku ntanshi batampile ukutuula amalambo ya koca kuli Yehova, ninshi tabalapanga ica kukuulapo itempele lya kwa Yehova.

7 Bapeele ne ndalama+ ku baputula amabwe+ na bacenjela mu fya kupangapanga,+ bapeele ne fya kulya+ ne fya kunwa na mafuta+ ku bena Sidone+ na ku bena Turi,+ ukuti balete imbao sha mukedari ukufuma ku Lebanone+ ukushileta kuli bemba ku Yopa,+ ukulingana ne fyo Sailasi+ imfumu ya Persia yabasuminishe.

8 Kabili mu mwaka walenga bubili ukutula apo baishiile ku ng’anda ya kwa Lesa wa cine ku Yerusalemu, mu mweshi walenga bubili,+ Serubabele+ mwana Shealtiele+ na Yeshua+ mwana Yehosadaki na bamunyinabo bambi, bashimapepo na bena Lebi, na bonse abaishile ku Yerusalemu ukufuma muli bunkole+ batendeke umulimo; basontele na bena Lebi+ ukutendekela pa ba myaka amakumi yabili (20) no kucilapo ukulatungulula umulimo wa pa ng’anda ya kwa Yehova.+ 9 E lyo Yeshua,+ abana bakwe, na bamunyina, na Kadmiele na bana bakwe, na bana ba kwa Yuda, baimine nge bumba limo pa kuti bangalile abalebomba umulimo mu ng’anda ya kwa Lesa wa cine, pamo na bana ba kwa Henadadi,+ na bana babo na bamunyinabo, abena Lebi.

10 Ilyo bakakuula bapangile ica kukuulapo+ itempele lya kwa Yehova, e lyo bashimapepo abafwele ifya bushimapepo,+ abali na mapenga,+ na bena Lebi abana ba kwa Asafi,+ abali na malimba ya nyenjele,+ baimine ku kulumbanya Yehova ukulingana na fyo Davidi imfumu ya bena Israele abebele.+ 11 Awe balayankulana pa kulumbanya+ no kutootela Yehova abati, “pantu musuma,+ pantu icikuuku cakwe ku bena Israele ca muyayaya.”+ Awe abantu bonse, baikatishe amashiwi+ pa kulumbanya Yehova ilyo bapangile ica kukuulapo ing’anda ya kwa Yehova. 12 Kabili abengi pali bashimapepo+ na bena Lebi e lyo na bakalamba+ ba mu ndupwa sha bashibo, abakalamba abamwene ing’anda ya ntanshi,+ balilile+ ishiwi ilikalamba pa menso yabo pa kupanga ica kukuulapo+ iyi ng’anda, e lyo bambi na bo abengi balewelesha no kubilikisha pantu balisansamwike.+ 13 E ico abantu balefilwa ukulekanya iciunda ca kupunda kwa kusansamuka+ ne ciunda ca kulila kwa bantu, pantu abantu balewelesha ne shiwi ilikalamba, ne ciunda ici caumfwikike ukufika ukutali sana.

4 Ilyo abalwani+ ba kwa Yuda na ba kwa Benjamini baumfwile ukuti abantu abafumine muli bunkole+ balekuulila Yehova Lesa wa bena Israele itempele, 2 ilyo line fye baile kuli Serubabele+ na ku bakalamba+ ba mu ndupwa sha bashibo no kubeba abati: “Lekeni tumwafweko ukukuula;+ pantu na ifwe bene tupepa kuli Lesa umo wine uo na imwe mupepako+ kabili e o tutuulako amalambo ukutula fye mu nshiku sha kwa Esari-hadone+ imfumu ya ku Asiria, uwatuletele kuno.”+ 3 Lelo, Serubabele na Yeshua+ na bakalamba+ bambi aba mu ndupwa sha bena Israele ba-aswike abati: “Te kuti tubombele pamo na imwe ukukuula ing’anda ya kwa Lesa wesu,+ pantu fwe bene tuli no kukuulila Yehova Lesa wa bena Israele, nga filya fine fye Imfumu Sailasi+ iya ku Persia yatwebele.”

4 Awe abantu ba muli cilya calo baletompola+ amaboko ya bena Yuda no kulabafuupula ukuti bekuula,+ 5 kabili bapeele impanda mano amafisakanwa+ ukuti shifulunganye ukupanda mano kwabo inshiku shonse isha kwa Sailasi imfumu ya ku Persia ukufika na ku kuteka kwa kwa Dariusi+ imfumu ya ku Persia. 6 Nomba ilyo Ahasuerusi aali pa bufumu, ilyo fye atendeke ukuteka, balembele umulandu wa bufi+ pa bekashi ba mu calo ca Yuda na mu Yerusalemu. 7 Kabili mu nshiku Artakishashete aliko, Bishilamu, Mitiridati, Tabeeli na banankwe bambi balembele kuli Artakishashete imfumu ya ku Persia, na kalata apilibwilwe mu lulimi lwa ciAramaiki+ no kulembwa mu filembo fya ciAramaiki.

8 Rehumu umulashi mukalamba uwa buteko na Shimshai kalemba balembeele imfumu Artakishashete kalata umubi pali Yerusalemu: 9 Awe Rehumu+ umulashi mukalamba uwa buteko na Shimshai kalemba na banabo bambi, bakapingula na balashi banono kwi shilya lya Mumana,+ na bakalemba,+ na bena Ereke,+ na bena Babiloni,+ na bekashi ba mu Susa,+ e kutila, abena Elamu,+ 10 ne nko shimbi+ isho Asenapari+ uwalumbuka kabili shimucindikwa asendele bunkole no kushilenga ukwikala mu misumba ya Samaria,+ e lyo na bambi aba kwi shilya lya Mumana,—; e ico nomba, 11 uyu e kalata uo bakopolwele kuli kalata batumine pali uyu mulandu:

“Kuli Artakishashete+ imfumu ya babomfi benu, abantu ba kwi shilya lya Mumana: E ico nomba, 12 mwe mfumu ishibeni ukuti abaYuda abaishile kuno kuli ifwe ukufuma kuli imwe nabesa ku Yerusalemu. Balekuula umusumba wa bucipondoka kabili uubi, kabili balekuula cipya cipya amalinga+ no kuwamya imifula ya kukuulapo. 13 Nomba, mwe mfumu ishibeni ukuti, uyu musumba nga wakuulwa cipya cipya na malinga ya uko nga yapwa, tabakalelipila umusonko+ nangu umutuulo+ nangu umusangulo, ne ci cikalenga ifyuma+ fya shamfumu ukonaika. 14 Nomba apo ni kwi sano e ko tulya umucele,* te kuti cituwamine ukuleka imfumu iseebane, e co twatumina aya amashiwi no kulenga imfumu ishibe, 15 pa kuti mufwailishe mwi buuku lya lya milandu+ ilya fikolwe fyenu. Kabili mukasanga muli ilyo ibuuku no kwishiba ukuti umusumba ulya musumba wa bucipondoka kabili uonaula ifintu fya shamfumu ne fitungu fya bulashi, kabili muli uyu musumba e mwali abaletendeka ubusangu ukutula fye na mu nshiku sha ku kale. E calenga no kuti ulya musumba ushale icibolya.+ 16 Tulelenga imfumu ishibe ukuti, nga ulya musumba wakuulwa cipya cipya na malinga ya uko yapwa, cine cine fye imwe tamwakakwate amaka pa ncende ya kwi shilya lya Mumana.”+

17 Imfumu yatumine amashiwi kuli Rehumu+ umulashi mukalamba uwa buteko na kuli Shimshai kalemba na ku banabo+ bambi abaleikala mu Samaria na bambi abaleikala bushilya bwa Mumana aiti:

“Mwapoleni!+ Kwena 18 kalata wa bulashi uo mwalembele kuli ifwe nabambelengela kabili amashiwi yonse nayomfwika. 19 E ico nimpeela icipope, kabili nabafwailisha+ no kusanga ukuti ukufuma fye na kale ulya musumba, musumba uwimina ishamfumu kabili mwaba bucipondoka no kwimina ubuteko.+ 20 Mwali ishamfumu ishakosa+ mu Yerusalemu kabili ishaleteka konse na bushilya bwa Mumana,+ kabili baleshituula umusonko, umutuulo no musangulo.+ 21 E ico tumeni icipope ca kulesha aba baume, pa kuti ulya musumba wikuulwa cipya cipya nkasuke ine wine nkatume icipope. 22 Kanshi cenjeleni pa kuti mwilekelesha uyu mulandu no kukanacitapo nangu cimo, pa kuti umuseebanya ku mfumu wicilamo.”+

23 Nomba ilyo kalata wa bulashi uwa mfumu Artakishashete abelengelwe kuli Rehumu+ na Shimshai+ kalemba na banabo,+ ba-angufyenye ukuya ku Yerusalemu ku baYuda no kubalesha ku maka.+ 24 E fyo umulimo uwa kukuula ing’anda ya kwa Lesa, iyali mu Yerusalemu waiminine; kabili waiminine ukufika fye na mu mwaka wa bubili ukutula apo Dariusi+ imfumu ya ku Persia atendekele ukuteka.

5 E lyo kasesema Hagai+ na Sekaria+ umwishikulu wa kwa kasesema Ido,+ baseseme ku baYuda abali mu calo caYuda na mu Yerusalemu, mwi shina+ lya kwa Lesa wa bena Israele uwali na bo.+ 2 E lyo Serubabele+ mwana Shealtiele+ na Yeshua+ mwana Yehosadaki baimine no kutendeka ukukuula cipya cipya ing’anda ya kwa Lesa, iyali mu Yerusalemu; kabili bali na bakasesema+ ba kwa Lesa abalebafwilisha. 3 Pali ilya nshita Tatinai+ umulashi wa kwi shilya lya Mumana+ na Shetari-bosenai na banabo baishile kuli bena, ne fi e fyo balebeba abati: “Nani wamupeele icipope ca kukuula iyi ng’anda no kupwisha ici cikuulwa?”+ 4 E lyo babepwishe abati: “Ni bani amashina aba bene bantu abalekuula ici cikuulwa?” 5 Na menso+ ya kwa Lesa wabo yali pa+ bakalamba ba bena Yuda, kabili tababaleseshe mpaka amashiwi yailefika na kuli Dariusi e lyo na kalata wa bulashi pali uyu mulandu abwela.

6 Uyu e kalata uo bakopolwele+ kuli kalata uo Tatinai+ umulashi wa kwi shilya lya Mumana,+ na Shetari-bosenai+ na banankwe,+ abalashi banono aba kwi shilya lya Mumana, batumine kuli Dariusi imfumu; 7 bamutumiine amashiwi, ne fyalembelwemo ni ifi:

“Ku mfumu Dariusi:

“Umutende ube nenu!+ 8 Mwe mfumu, ishibeni ukuti twaile ku citungu ca bulashi+ ica Yuda ku ng’anda ya kwa Lesa mukulu,+ kabili ilekuulwa, na mabwe yalebikwamo, kabili balesomeka ne fimuti mu fibumba; no mulimo ulya ulebombwa no mukoosha kabili ulebombwa fye bwino. 9 E lyo twaipwishe aba bakalamba. Ne fyo twabepwishe ni fi: ‘Nani wamupeele icipope ca kukuula iyi ng’anda no kupwisha ici cikuulwa?’+ 10 Kabili twabepwishe na mashina yabo pa kuti tulembe amashina ya baume abalebatungulula,+ pa kuti muyeshibe.

11 “Kabili aya e mashiwi batwaswike. Batile: ‘Tuli babomfi ba kwa Lesa wa mu muulu na pe sonde,+ kabili tulekuula cipya cipya ing’anda iyakuulilwe kale sana ilyo ino ishilakuulwa, intu imfumu ya lulumbi iya kwa Israele yakuulile no kupwisha.+ 12 Nomba, apo bashifwe bakalifye+ Lesa wa mu muulu, abapeele+ mu kuboko kwa kwa Nebukadnesari+ umwina Kaldi,+ imfumu ya ku Babiloni, kabili aonawile ing’anda ino+ no kusenda abantu bunkole ku Babiloni.+ 13 Nomba, mu mwaka wa kubalilapo uwa kuteka kwa kwa Sailasi+ imfumu ya ku Babiloni, e mo Sailasi imfumu yafumishe icipope ca kukuula cipya cipya ino ng’anda ya kwa Lesa.+ 14 Kabili ifipe fya golde ne fya silfere+ ifya mu ng’anda ya kwa Lesa ifyo Nebukadnesari afumishe mwi tempele, ilyali mu Yerusalemu, no kufileta kwi tempele lya mu Babiloni,+ imfumu Sailasi+ yalififumishe mwi tempele lya mu Babiloni, no kufipeela kuli Sheshebasari,+ ishina lya muntu uo yasontele ukuba umulashi.+ 15 Kabili yamwebele ati: “Senda ifipe ifi.+ Kabiye, kafibike mwi tempele lya mu Yerusalemu, no kuleka ing’anda ya kwa Lesa ikuulwe cipya cipya palya pene yali.”+ 16 Ilyo Sheshebasari aishile, apangile umufula wa kukuulapo ing’anda ya kwa Lesa,+ mu Yerusalemu; kabili ukutula ilyo ukufika na nomba e yo bakuula lelo tailapwa.’+

17 “E ico nomba nga cili fye bwino ku mfumu, lekeni bafwailikishe+ mu ng’anda ya mfumu iya fyuma iyaba mu Babiloni, pa kuti beshibe nga ca cine ukuti imfumu Sailasi yalifumishe icipope+ ca kukuula cipya cipya ilya ng’anda ya kwa Lesa mu Yerusalemu; kabili lekeni imfumu itutumine ifyo yalapingula pali uyu mulandu.”

6 E lyo Dariusi imfumu yafumishe icipope, kabili bafwaile mu ng’anda umo balesungila amabuuku+ ya fyuma ayabikilwe mu Babiloni. 2 Kabili mu Ekibatana, icifulo ca malinga icali mu citungu ca bulashi ica Madai,+ mwasangilwe icimfungwa, umwalembelwe icishibisho pali uyu mulandu ica kuti:

3 “Mu mwaka wa kubalilapo uwa kuteka kwa mfumu Sailasi,+ imfumu Sailasi yapangile ifunde ukukuma ku ng’anda ya kwa Lesa mu Yerusalemu ati: Lekeni ing’anda ikuulwe cipya cipya pa kuti ibe icifulo uko bakalapeelela amalambo,+ lekeni ne mifula ya iko iya kukuulapo ikoshiwe, ukusansuka kwa iko kube imikono amakumi mutanda (60), mu bwipi ibe imikono amakumi mutanda,+ 4 ibikwemo+ na mabwe imitande itatu ne fimuti umutande umo;+ kabili indalama sha kukuulila shifume mu cipao ca mu ng’anda ya mfumu.+ 5 Na kabili lekeni fibweshiwe ifipe fya golde+ na silfere ifya mu ng’anda ya kwa Lesa ifyo Nebukadnesari+ afumishe mwi tempele ilyali mu Yerusalemu no kufitwala ku Babiloni, fitwalwe kwi tempele lya mu Yerusalemu palya pene lyali no kufibika mu ng’anda ya kwa Lesa.+

6 “Nomba imwe Tatinai+ umulashi wa kwi shilya lya Mumana,+ Shetari-bosenai+ na banenu, abalashi banono+ aba kwi shilya lya Mumana, talukeniko.+ 7 Mwilafulunganya umulimo wa ng’anda ya kwa Lesa.+ Umulashi wa baYuda na bakalamba ba baYuda bakakuula cipya cipya ilya ng’anda ya kwa Lesa pa cifulo ca iko. 8 Na ine nimpeela icipope+ pa fyo mukacita na bakalamba ba baYuda, pa kukuula cipya cipya ilya ng’anda ya kwa Lesa; kabili ukufuma mu cipao ca fyuma fya mfumu+ ica musonko icili kwi shilya lya Mumana, isha kukuulila shikalepeelwa+ bwangu kuli aba baume ukwabula ukuleka.+ 9 Kabili bashimapepo nga batila leteni ing’ombe ishilume ishinono+ na basukusuku+ no twana twa mpaanga+ ifya kutuula imituulo ya koca kuli Lesa wa mu muulu, e lyo ne ngano,+ umucele,+ umwangashi+ na mafuta,+ ukulingana fye ne fyo bashimapepo mu Yerusalemu balanda, mulingile ukulabapeela ifi cila bushiku ukwabula ukufilwa; 10 pa kuti lyonse+ bakaletuula imituulo iisuma+ kuli Lesa wa mu muulu no kulapepelako imfumu na bana ba iko ukuti bale-enda umutende.+ 11 Kabili nimpeela icipope ca kuti, onse uwapula+ mu cipope ici, bakakulumuna icimuti+ ukufuma ku ng’anda yakwe no kumupoopelapo,+ kabili pali uyu mulandu bakasangula ing’anda yakwe icimbusu ca cintubwingi.+ 12 Kabili Lesa uwalenga ishina+ lyakwe ukuba pali cilya cifulo akafumyepo imfumu yonse na bantu bonse abakasuula ici cipope no kufwaya ukonaula+ ilya ng’anda ya kwa Lesa, iyaba mu Yerusalemu. Ine, ne Dariusi nimpeela icipope. Mukonke ici cipope nomba line.”

13 E lyo Tatinai umulashi wa kwi shilya lya Mumana,+ na Shetari-bosenai+ na banabo, ilyo line fye bacitile ukulingana na mashiwi imfumu Dariusi yatumine. 14 Kabili intungulushi+ sha baYuda shalekuula+ no mulimo wale-enda bwino pantu kasesema Hagai+ na Sekaria+ umwishikulu wa kwa Ido+ balebakoselesha, kabili balikuulile no kuipwisha pa mulandu wa cipope ca kwa Lesa wa kwa Israele+ na pa mulandu wa cipope ca kwa Sailasi+ na Dariusi+ na Artakishashete+ imfumu ya Persia. 15 Bapwile ne ng’anda iyi pa bushiku bwalenga shitatu mu mweshi wa Adari,+ e kutila, mu mwaka walenga mutanda (6) uwa kuteka kwa mfumu Dariusi.

16 E lyo abana ba kwa Israele, bashimapepo na bena Lebi+ na bambi abafumine muli bunkole+ balongene pa kuti basefye ukusefya kwa kupeela+ ing’anda ya kwa Lesa kuli Lesa kabili balisekelele. 17 Na pali uku kusefya kwa kupeela iyi ng’anda ya kwa Lesa batuulile ing’ombe ishilume umwanda umo (100), basukusuku imyanda ibili (200), abana ba mpaanga imyanda ine (400) kabili pa kutuula umutuulo wa pa lubembu uwa bena Israele batuulile basawe ikumi limo na babili (12), ukulingana fye ne mpendwa ya mikowa ya bena Israele.+ 18 Basalile na bashimapepo mu mabumba yabo na bena Lebi na bo mu mabumba yabo,+ pa kuti babombe umulimo wa kwa Lesa uwa mu Yerusalemu, ukulingana ne fyalembelwe mwi buuku lya kwa Mose.+

19 Na bafumine muli bunkole bacitile ica kucilila+ pa bushiku bwalenga ikumi limo na shine (14) mu mweshi wa ntanshi.+ 20 Apo bashimapepo na bena Lebi bonse pamo bali-isangulwile,+ bonse fye bali abasanguluka, e ico baipeye inama ya kupeela ilambo lya pa ca kucilila+ ilya bonse abafumine muli bunkole na bamunyinabo bashimapepo e lyo na bene fye. 21 E lyo abana ba kwa Israele ababwelele ukufuma muli bunkole baliile ica kucilila,+ na bonse abailundile kuli bena kabili abaitalwishe ku kukowela+ kwa nko sha muli cilya calo, pa kuti bafwaye Yehova Lesa wa bena Israele+. 22 Kabili basefeshe umutebeto wa mikate ishatutumuka+ pa nshiku cinelubali (7) no kusekelela; pantu Yehova abalengele ukusansamuka, kabili ayalwile+ umutima wa mfumu ya ku Asiria ukuti ibatemwe no kubakosha mu mulimo wa ng’anda ya kwa Lesa wa cine, Lesa wa bena Israele.

7 Nomba pa numa ya ifi fintu, ilyo Artakishashete+ aali imfumu ya Persia, Esra+ mwana Seraya+ mwana Asaria mwana Hilkia+ 2 mwana Shalumu+ mwana Sadoke mwana Ahitubu+ 3 mwana Amaria+ mwana Asaria+ mwana Merayote+ 4 mwana Serahia+ mwana Usi+ mwana Buki+ 5 mwana Abishua+ mwana Finehasi+ mwana Eleasari+ mwana Aarone+ shimapepo mukalamba+— 6 uyu Esra afumine ku Babiloni; kabili ali uwacenjela mu kukopolola+ amafunde ya kwa Mose,+ ayo Yehova Lesa wa kwa Israele abapeele, ica kuti imfumu yamupeele fyonse ifyo alombele+ ukulingana ne fyo ukuboko kwa kwa Yehova Lesa wakwe ukwali pali ena kwafwaile.

7 E ico abana ba kwa Israele bamo na bashimapepo+ bamo na bena Lebi+ na bakemba+ na balinshi ba pa mpongolo+ na bena Netinimu+ baile ku Yerusalemu mu mwaka walenga cinelubali (7) uwa kuteka kwa mfumu Artakishashete.+ 8 Esra afikile ku Yerusalemu mu mweshi walenga busano, e kutila, mu mwaka walenga cinelubali (7) ukutula apo Artakishashete abelele imfumu. 9 Pantu pa bushiku bwa kutampa ubwa mweshi wa kubalilapo ena atile natuleya tufume ku Babiloni, na pa bushiku bwa kutampa ubwa mweshi walenga busano aishile ku Yerusalemu, ukulingana no kuboko kwa kwa Lesa ukwali pali ena.+ 10 Awe Esra ateyenye+ umutima wakwe pa kuti eshibe amafunde ya kwa Yehova+ no kuyakonka+ no kusambilisha+ amafunde+ no mulinganya+ mu Israele.

11 Kabili uyu e kalata uwakopolwelwe muli kalata uo Imfumu Artakishashete yapeele Esra shimapepo kakopolola,+ uwalekopolola amashiwi ya mu mafunde ya kwa Yehova ne fipope fyakwe ku bena Israele:

12 “Artakishashete,+ imfumu ya shamfumu,+ kuli Esra shimapepo, uukopolola amafunde ya kwa Lesa wa mu muulu:+ Umutende ube nobe.+ E ico nomba 13 ine nimpeela icipope+ ca kuti onse uwaba mu bufumu+ bwandi uwa mu bantu ba mu Israele na bashimapepo babo na bena Lebi uulefwaya ukuya pamo nobe ku Yerusalemu aye.+ 14 Apo imfumu ne mpanda mano+ sha iko cinelubali (7) bapeele icipope ca kuyafwailisha+ pali Yuda na Yerusalemu mwi funde+ lya kwa Lesa+ obe ilyo ukwete, 15 no kuleta silfere na golde ifyo imfumu ne mpanda mano sha iko bapeela ku kuitemenwa+ kuli Lesa wa kwa Israele, uo ubwikalo bwakwe bwaba mu Yerusalemu,+ 16 na silfere onse na golde uo wasanga mu calo conse ica bulashi ica Babiloni pamo no bupe bwa bantu+ no bwa bashimapepo abalepeela ku kuitemenwa ku ng’anda ya kwa Lesa wabo,+ mu Yerusalemu; 17 ifyo fine mukangufyanye ukushita mu ndalama ishi ing’ombe ishilume,+ basukusuku,+ abana ba mpaanga+ ne mituulo ya ngano+ ne mituulo ya mwangashi+ no kufipalamika pa ciipailo ca mu ng’anda ya kwa Lesa wenu,+ iyaba mu Yerusalemu.+

18 “Na conse ico iwe na bamunonko mukamona ukuti cili bwino ukucita mu ndalama sha silfere ne sha golde+ ishikashalapo, icilingene no kufwaya+ kwa kwa Lesa wenu, e co mukacite.+ 19 Kabili ifipe+ fyonse ifyo balekupeela ifya kubomfya ku mulimo wa mu ng’anda ya kwa Lesa obe, ukafituule fyonse kuli Lesa ku Yerusalemu.+ 20 Kabili fimbi ifilekabilwa ifya mu ng’anda ya kwa Lesa ifyo wingafwaya ukutuula ukalafifumya mu ng’anda ya cipao iya mfumu+ no kufituula.

21 “Kabili ine wine, ne mfumu Artakishashete, nimpeela icipope+ kuli bonse abasunga ifyuma+ aba kwi shilya lya Mumana,+ ukuti conse ico Esra+ shimapepo, uukopolola amafunde ya kwa Lesa wa mu muulu, amulomba mukamupeele mu kwangufyanya, 22 ukufika na ku matalanti+ umwanda umo (100) aya silfere na madalamu+ ya ngano umwanda umo ne mbeketi+ sha mwangashi+ umwanda umo ne mbeketi sha mafuta+ umwanda umo, no mucele+ uwingi. 23 Beni abacincila+ ukucita fyonse ifikumine ing’anda ya kwa Lesa wa mu mulu+ ukulingana ne cipope+ ca kwa Lesa wa mu muulu, pa kuti ubukali bwi-isa pa buteko bwa mfumu na pa bana ba iko.+ 24 Kabili mwishibe ukuti, bashimapepo+ bonse na bena Lebi,+ na bakemba,+ na balinshi ba pa mwinshi,+ na bena Netinimu,+ na babomfi ba pa ng’anda ino iya kwa Lesa, tabafwile ukwebwa ukutuula umusonko, umutuulo+ nelyo umusangulo.+

25 “Nomba iwe, we Esra, ukulingana na mano+ ya kwa Lesa obe ayo wakwata sonta aba kukalulula imilandu na bapingushi pa kuti balepingula+ abantu bonse ababa kwi shilya lya Mumana, nangu fye ni balya bonse abaishiba amafunde ya kwa Lesa obe; na bonse abashayeshiba mukabafunde.+ 26 Lelo onse uushakakonke amafunde ya kwa Lesa+ obe na mafunde ya mfumu, akapingulwe ilyo line, nampo nga kumwipaya+ nelyo nga kumutamfya mu calo,+ nelyo nga kumulipilisha indalama+ nelyo nga kumupoosa mu cifungo.”

27 Acindikwe Yehova Lesa wa fikolwe fyesu,+ uwabika ica musango uyu mu mutima+ wa mfumu, pa kuti iyemfye+ ing’anda ya kwa Yehova, iyaba mu Yerusalemu! 28 Kabili pa menso ya mfumu ne mpanda mano+ sha iko na bacilolo ba mfumu bonse impalume, nalanga icikuuku+ kuli ine. Na ine, nali-ikoseleshe ukulingana ne fyo ukuboko+ kwa kwa Yehova Lesa wandi kwangafwile, kabili nalongenye abakalamba mu Israele pa kuti beme tuleya na bo.

8 Nomba aba e bali abakalamba ba ndupwa mu mayanda ya bashibo+ kabili ifi e fyo intuntuko+ sha bo twafumine na bo mu Babiloni mu nshita ya kuteka kwa mfumu Artakishashete shalembelwe:+ 2 Pa bana ba kwa Finehasi,+ pali Gershomu; pa bana ba kwa Itamari,+ pali Daniele;+ pa bana ba kwa Davidi,+ pena pali Hatushi; 3 pa bana ba kwa Shekania, na pa bana ba kwa Paroshe,+ pali Sekaria, kabili abaume abalembelwe abo ali na bo bali umwanda umo na makumi yasano (150); 4 pa bana ba kwa Pehati-moabu+, pali Elihoenai mwana Serahia, kabili abaume abo ali na bo bali imyanda ibili (200); 5 pa bana ba kwa Satu,+ pali Shekania mwana Yahasiele, kabili abaume abo ali na bo bali imyanda itatu (300); 6 na pa bana ba kwa Adini,+ pali Ebede mwana Yonatani, kabili abaume abo ali na bo bali amakumi yasano (50); 7 na pa bana ba kwa Elamu,+ pali Yeshaya mwana Atalia, kabili abaume abo ali na bo bali amakumi cinelubali (70); 8 na pa bana ba kwa Shefatia,+ pali Sebadia mwana Mikaele, kabili abaume abo ali na bo bali amakumi cinekonsekonse (80); 9 pa bana ba kwa Yoabu, pali Obadia mwana Yehiele, kabili abaume abo ali na bo bali imyanda ibili ne kumi na cinekonsekonse (218); 10 kabili pa bana ba kwa Bani,+ pali Shelomiti mwana Yosifia, kabili abaume abo ali na bo bali umwanda umo na makumi mutanda (160); 11 kabili pa bana ba kwa Bebai na po, pali Sekaria mwana Bebai,+ kabili abaume abo ali na bo bali amakumi yabili na cinekonsekonse (28); 12 na pa bana ba kwa Asigadi,+ na po pali Yohanani mwana Hakatani, kabili abaume abo ali na bo bali umwanda umo ne kumi limo (110); 13 e lyo pa bana ba kwa Adonikamu,+ aba kulekelesha, amashina yabo ni aya: Elifelete, Yeiele na Shemaya, kabili abaume abo bali na bo bali amakumi mutanda (60); 14 na pa bana ba kwa Bigibai,+ pali Utai na Sabudi, kabili abaume abo bali na bo bali amakumi cinelubali (70).

15 Awe nabalonganike ku mumana+ uwaya ku Ahaba;+ kabili e ko twapangile inkambi inshiku shitatu, pa kuti nceeceete abantu+ na bashimapepo,+ lelo abana ba kwa Lebi+ nshabamwenepo. 16 E ico natumine aba kuyaita Eliesere, Ariele, Shemaya na Elnatani na Yaribu na Elnatani na Natani na Sekaria na Meshulamu, abakalamba, e lyo na Yoyaribu na Elnatani, bakasambilisha.+ 17 Kabili nalibakonkomeshe pali Ido umukalamba wa mu musumba wa Kasifia, kabili nalibebele na mashiwi+ ya kuyaeba Ido na bamunyina abena Netinimu+ aba mu Kasifia, ukuti bakatuleteleko ababomfi+ aba kubombela pa ng’anda ya kwa Lesa wesu. 18 Awe ukulingana no kuboko+ kwa kwa Lesa wesu ukwali pali ifwe, batuleteele umuntu uwashilimuka+ ukufuma pa bana ba kwa Maali+ umwishikulu wa kwa Lebi+ mwana Israele, Sherebia+ na bana bakwe na bamunyina, abantu ikumi limo na cinekonsekonse (18); 19 na Hashabia pamo na Yeshaya ukufuma pa bana ba kwa Merari,+ na bamunyina, na bana babo, abantu amakumi yabili (20). 20 Kabili ku bena Netinimu, abo Davidi na bacilolo basontele ukuti bakulabombela abena Lebi, kwafumine abaNetinimu imyanda ibili na makumi yabili (220), kabili aba bonse balilembelwe amashina.

21 Kabili ilyo twali ku mumana wa Ahaba naebele abantu ukuti tuleke ukulya, pa kuti tuicefye+ kuli Lesa wesu, pa kuti atulange inshila iisuma+ ifwe na bana besu+ abanono pamo ne fipe fyesu fyonse. 22 Pantu nali ne nsoni sha kulomba ku mfumu ibumba lya bashilika+ na bale-endela pali bakabalwe+ aba kutwafwa ukulwa na balwani mu nshila, pantu twasosele ku mfumu atuti: “Ukuboko+ kwa kwa Lesa wesu kwaba pali bonse abamufwaya pa kuti abacitile ifisuma+ kabili alabapokolola, lelo amaka yakwe no bukali bwakwe+ fyaba pali bonse abataluka kuli ena.”+ 23 E ico twalekele ukulya+ kabili twaipwishe+ kuli Lesa wesu pali ici, na o alyumfwile ukupapaata+ kwesu.

24 E ico nomba pa ntungulushi sha bashimapepo nafumishepo bamo ikumi limo na babili (12), na mashina yabo ni, Sherebia,+ Hashabia,+ e lyo na bamunyinabo ikumi (10). 25 Kabili napimine ukufina kwa silfere na golde ne fipe+ no kufipeela kuli bena, pa kuti fibe umusangulo wa kupeela ku ng’anda ya kwa Lesa wesu uo imfumu+ ne mpanda mano+ sha iko na bacilolo ba iko na bena Israele+ bonse abali muli ilya ncende basangwile. 26 E ico napimine mu minwe yabo ukufina kwa matalanti ya silfere+ imyanda mutanda na makumi yasano (650) ne fipe fya silfere umwanda umo (100) ifya mutengo wa matalanti yabili, na golde amatalanti umwanda umo, 27 ne mbale shafonka ishinono isha golde amakumi yabili (20) ishafinine badariki* ikana limo (1,000) ne fipe fibili ifya mukuba uusuma, uwakashikila, uwawama nga golde.

28 E lyo nabebele nati: “Muli ba mushilo+ kuli Yehova, ne fipe+ ifi fya mushilo, na silfere na golde mutuulo wa kuitemenwa uo mwatuula kuli Yehova Lesa wa bashinwe. 29 Loleni kabili muibake mpaka mupime+ ukufina kwa fiko pa menso ya ntungulushi sha bashimapepo na bena Lebi na bacilolo ba fikolwe fya bena Israele mu Yerusalemu, mu miputule ya kuliilamo+ iya ng’anda ya kwa Yehova.” 30 Kabili bashimapepo na bena Lebi bapokele silfere na golde ne fipe ifyapimwa, no kufitwala ku Yerusalemu ku ng’anda ya kwa Lesa wesu.+

31 Na pa kulekelesha twafumine ku mumana wa Ahaba+ pa bushiku bwalenga ikumi na shibili (12) ubwa mweshi wa kubalilapo+ no kuya ku Yerusalemu, kabili ukuboko kwa kwa Lesa wesu kwali pali ifwe, ica kuti atupokolwele+ mu minwe ya balwani na batubelamine mu nshila. 32 E ico twafikile ku Yerusalemu+ no kwikalako inshiku shitatu. 33 Kabili pa bushiku bwalenga shine twapimine ukufina kwa silfere na golde+ ne fipe+ ifyali mu ng’anda ya kwa Lesa wesu ifyali mu minwe ya kwa Mereemote+ mwana Uriya shimapepo kabili ali pamo na Eleasari mwana Finehasi e lyo na Yosabadi+ mwana Yeshua na Noadia mwana Binui,+ abena Lebi, 34 na fyonse fyalipendelwe no kupimwa fyalipiminwe, na pa numa fyalilembelwe ifyo fyafinine pali ilya ine nshita. 35 Ababwelele muli bunkole, abali bankole,+ batuulile amalambo ya koca+ kuli Lesa wa bena Israele, ing’ombe ishilume+ ikumi limo na shibili (12) isha pa bena Israele bonse, basukusuku+ amakumi pabula na mutanda (96), utwana twa mpaanga utulume amakumi cinelubali na cinelubali (77), imbushi ishilume+ ikumi na shibili (12) isha mutuulo wa pa lubembu, fyonse ifi fyali e mutuulo wa koca uwa kutuula kuli Yehova.

36 E lyo twapeele amafunde+ ya mfumu kuli bamushika+ ba mfumu na balashi+ aba kwi shilya lya Mumana,+ na bo balyafwile abantu+ ne ng’anda ya kwa Lesa wa cine.

9 Kabili ilyo fye ifi fintu fyapwile, bacilolo+ baishile kuli ine, abati: “Abena Israele na bashimapepo na bena Lebi tabaipaatula+ ku bantu ba mu fyalo ifi na ku fya bunani+ ifyo balecita, e kutila, ku bena Kaanani,+ ku bena Hiti,+ ku bena Perisi,+ ku bena Yebusi,+ ku bena Amone,+ ku bena Moabu,+ ku bena Egupti+ na ku bena Amore.+ 2 Pantu bena pamo na bana babo abaume nabasumina ukulaupa abana banakashi ba aba bantu;+ kabili aba, ababa ulubuto lwa mushilo,+ nomba nabaitobenkanya+ mu bantu aba muli ifi fyalo, kabili bacilolo na balashi e bali na ku ntanshi+ mu kucita ulu lubembu.”

3 Nomba ilyo fye naumfwile ici cintu nalepwile ica kufwala+ candi e lyo ne ca kufwala candi icabula amaboko, natendeke no kunukula umushishi wa ku mutwe+ wandi no mwefu, kabili naikele fye uwapeshiwa amano.+ 4 Awe bonse abaumfwile umwenso+ pa mashiwi Lesa alandile pa mulandu wa ulu lubembu abafumine muli bunkole bacitile, baishilelongana uko nali ninshi njikele fye uwapeshiwa amano mpaka ukufika ne nshita ya kutuula umutuulo wa ngano uwa cungulo.+

5 Awe ilyo inshita ya kutuula umutuulo wa ngano+ uwa cungulo yafikile nalimine apo naikele uwa bulanda, ninshi nacilepuka ica kufwala candi e lyo ne ca kufwala candi icabula amaboko, kabili nalifukeme+ no kwimya amaboko yandi kuli Yehova Lesa wandi.+ 6 E lyo nakonkenyepo ukusosa ati:+ “Mwe Lesa wandi, ning’umfwa insoni+ kabili ninseebana,+ nimfilwa no kwinuna icinso candi kuli imwe, mwe Lesa wandi, pantu imembu+ shesu nashifula nashitupesha na mano no mulandu wesu naukula ukufika na ku muulu.+ 7 Ukufuma mu nshiku sha fikolwe+ fyesu twaliba no mulandu uukalamba ukufika na buno bushiku;+ na pa mulandu wa membu shesu, ifwe ne shamfumu+ shesu, na bashimapepo+ besu, twalipeelwa mu minwe ya shamfumu sha mu fyalo ifi ku lupanga,+ kuli bunkole+ na ku kupokwa ifyuma+ na ku kuseebana,+ nge fyo cili na buno bwine bushiku. 8 E ico nomba mwe Yehova Lesa wesu namutubelela uluse+ pa kashita fye akanono pa kutushiilako abapusuka+ na pa kutushimpa ngo lupoopo mu cifulo cenu ica mushilo, pa kuti mulenge amenso yesu ukubengeshima+ ku nsansa, mwe Lesa wesu, no kutulubulako panono ku busha.+ 9 Pantu tuli babomfi;+ kabili na mu busha twabamo mwe Lesa tamwatulekelesha,+ lelo mwaba aba cikuuku kuli ifwe pa menso ya shamfumu sha bena Persia,+ no kutupuupuutula pa kuti tukuule ing’anda ya kwa Lesa+ wesu no kukuula cipya cipya ififulo fya iko ifyasanguka ifibolya+ no kutupeela ilinga lya mabwe+ mu calo ca Yuda na mu Yerusalemu.

10 “E ico nomba mwe Lesa wesu, kuti twatila shani? Pantu twalisuula amafunde yenu,+ 11 ayo mwasoseele mu babomfi benu bakasesema, amuti, ‘Icalo ico muleingilamo ku kwikalamo calo icakowela pa mulandu wa kukowela kwa bantu ba mu fyalo ifi,+ pa mulandu wa fya bunani+ ifyo baisushamo ku kukanasanguluka+ kwabo ukutula ku mpela ukufika na ku mpela.+ 12 E ico nomba mwikoofya abana benu abanakashi ku bana babo abaume,+ nangu ukuleka abana babo abanakashi ukuupwa ku bana benu abaume; kabili mwikabafwaila umutende+ nangu ubusuma umuyayaya, pa kuti mukose+ no kulya ifisuma ifya mu calo ico no kuleka cikabe icalo cenu na bana benu umuyayaya.’+ 13 Kabili pa numa ya ifi fyonse ifyatuponena pa micitile yesu iibi+ na pa kuba no mulandu icine cine, apo imwe, mwe Lesa wesu, tamwatukanda ukulingana ne membu shesu,+ kabili mwapeela kuli ifwe aba abapusuka,+ 14 bushe kabili tubwekeshepo ukupula mu mafunde yenu no kulaufishanya+ na bantu abacita ifya bunani ifi?+ Bushe tamwakalipe+ nga nshi ica kuti kubule no wa kushalapo+ nangu uwa kupusuka? 15 Mwe Yehova Lesa wa kwa Israele, mwalilungama,+ pantu natushalapo abapusuka nga fino caba buno bushiku. Moneni tuli pa ntanshi yenu aba mulandu,+ pantu pali uyu mulandu tukwete te kuti twiminine na pa ntanshi yenu nga bashili na mulandu.”+

10 Awe ilyo fye Esra apwile ukupepa+ no kuyebelela,+ ninshi alelila nalaala no bukupeme+ pa ntanshi ya ng’anda+ ya kwa Lesa wa cine, abena Israele balilongene kuli ena, ulukuta ulukalamba nga nshi, abaume na banakashi na bana, pantu abantu balilile nga nshi. 2 E lyo Shekania mwana Yehiele+ uwafumine mu bana ba kwa Elamu+ ayaswike no kutila kuli Esra: “Ifwe natubembukila Lesa wesu, pantu twaupile abanakashi ba ku fyalo fimbi aba mu bantu ba muli ici calo.+ Lelo nomba kuli isubilo+ ku bena Israele pali uyu mulandu. 3 E ico nomba natupangane icipangano+ na Lesa wesu ica kuleka+ aba bakashi bonse na bana bafyala ukulingana na mano Yehova atupanda aya kuba na katiina+ ku mafunde+ ya kwa Lesa wesu, e pa kuti tukonke ifyo ifunde lilanda.+ 4 Ima, pantu mulimo obe ukucita ici, na ifwe tuli nobe. Shipa kabili citapo cimo.”

5 E lyo Esra aimine no kulenga intungulushi sha bashimapepo, abena Lebi na bena Israele bonse ukulapa umulapo+ wa kuti bakacita ukulingana na mashiwi aya. Na bo balilapile. 6 Esra nomba aliimine ukufuma pa ntanshi ya ng’anda ya kwa Lesa wa cine no kuya ku muputule wa kuliilamo+ uwa kwa Yehohanani mwana Eliashibu. Nangu aile kulya, taaliile umukate+ kabili tanwene amenshi, pantu aleloosha+ pa mulandu wa lubembu lwa baali muli bankole.

7 Kabili balibilile imbila mu Yuda na mu Yerusalemu monse ukuti bonse abaali kale muli bunkole+ balongane ku Yerusalemu; 8 kabili onse uushaileko+ mu nshiku shitatu ukulingana na mano bacilolo+ na bakalamba babapandile—ifipe fyakwe fyonse fyali no kupokwa+ no mwine bali no kumufumya+ mu lukuta lwa baali muli bunkole. 9 E ico abaume bonse aba muli Yuda na ba muli Benjamini balilongene ku Yerusalemu mu nshiku shitatu, e kutila, mu mweshi walenga pabula (9)+ pa bushiku bwalenga amakumi yabili (20) ubwa uyu wine mweshi, awe abantu bonse baikele mu lubansa lwa ng’anda ya kwa Lesa wa cine, baletutuma pali uyu mulandu na pa mulandu wa kuti kwali imfula.+

10 E lyo shimapepo Esra aimine no kubeba ati: “Imwe mwalibembuka pantu mwaupile abanakashi+ ba ku fyalo fimbi mwalundapo na pa milandu ya bena Israele.+ 11 E ico nomba yebeleleni+ kuli Yehova Lesa wa fikolwe fyenu no kucita ico alefwaya+ kabili talukeni abantu aba muli ici calo na banakashi ba ku fyalo fimbi.”+ 12 E lyo ulukuta lonse lwayaswike no kusansula ishiwi aluti: “Tukakonka aya yene mashiwi mwalanda.+ 13 Lelo, abantu nabafula, kabili ni nshita ya mainsa, kabili tatwingeminina pa nse; no yu mulimo te wa bushiku bumo nangu shibili, pantu twalipondoka apakalamba pali uyu mulandu. 14 E ico, shi lekeni bacilolo+ besu balandileko ulukuta lonse; kabili bonse aba mu misumba yesu abaupa abanakashi ba ku fyalo fimbi, ilyo inshita yafika lekeni bese pamo ne ntungulushi sha mu musumba umo umo na bakapingula mpaka tukanashe ubukali bwa kwa Lesa wesu ubupya ngo mulilo, pa mulandu uo twacita.”

15 (Lelo, Yonatani mwana Asaele na Yaaseya mwana Tikba bena balikeene,+ kabili Meshulamu na Shabetai+ abena Lebi e babaafwile.) 16 Kabili abaali kale muli bunkole+ bacitile ifyo fine; nomba Esra shimapepo na baume abali intungulushi sha bashibo pa ba mu ng’anda yabo,+ bonse abo baitile mu mashina yabo, bali-ifumisheko kabili pa bushiku bwa kubalilapo ubwa mweshi we kumi (10)+ balikele pa kuti bafwailishe uyu mulandu;+ 17 awe pa bushiku bwa kubalilapo ubwa mweshi wa kubalilapo basukile bapwisha ukumona abaume bonse abaupile abanakashi ba ku fyalo fimbi.+ 18 Kabili abana ba bashimapepo+ bamo abaupile abanakashi ba ku fyalo fimbi balisangilwe; pa bana ba kwa Yeshua+ mwana Yehosadaki+ na bamunyina, abasangilwe ni Maaseya na Eliesere na Yaribu na Gedalia. 19 Lelo balilaile baposhanya na mu minwe ukuti bakatamfya abakashi babo, bati no kuti, apo basangilwe no mulandu,+ bafwile ukufumya sukusuku+ pa fitekwa uwa kutuula pa kufuta pa mulandu bacitile.

20 Kabili pa bana ba kwa Imere+ abasangilwe ni Hanani na Sebadia; 21 na ba pa bana ba kwa Harimu+ abasangilwe ni Maaseya na Eliya na Shemaya na Yehiele na Usia; 22 kabili pa bana ba kwa Pashihuri,+ abasangilwe ni Elioenai, Maaseya, Ishmaele, Netanele, Yosabadi na Eleasa. 23 E lyo pa bena Lebi, abasangilwe ni Yosabadi na Shimei na Kelaya (e kutila, Kelita), Petahia, Yuda na Eliesere; 24 na pali bakemba, uwasangilwe ni Eliashibu; na pa balinshi ba mpongolo, abasangilwe ni Shalumu na Telemu na Uri.

25 Na pa bena Israele, pa bana ba kwa Paroshe+ abasangilwe ni Ramia na Isia na Malkiya na Miyamini na Eleasari na Malkiya na Benaya; 26 na pa bana ba kwa Elamu+ abasangilwe ni Matania, Sekaria na Yehiele+ na Abdi na Yeremote na Eliya; 27 na pa bana ba kwa Satu+ abasangilwe ni Elioenai, Eliashibu, Matania na Yeremote na Sabadi na Asisa; 28 kabili pa bana ba kwa Bebai+ abasangilwe ni Yehohanani, Hanania, Sabai, Atilai; 29 na pa bana ba kwa Bani abasangilwe ni Meshulamu, Maluki na Adaya, Yashubu na Sheali na Yeremote; 30 na pa bana ba kwa Pehati-moabu+ abasangilwe ni Adina na Kelali, Benaya, Maaseya, Matania, Besalele na Binui na Manase; 31 kabili pa bana ba kwa Harimu+ abasangilwe ni Eliesere, Ishiya, Malkiya,+ Shemaya, Shimeone, 32 Benjamini, Maluki na Shemaria; 33 na pa bana ba kwa Hashumu+ ni Matenai, Matata, Sabadi, Elifelete, Yeremai, Manase na Shimei; 34 kabili pa bana ba kwa Bani abasangilwe ni Maadai, Amramu na Uele, 35 Benaya, Bedia, Keluyi, 36 Bania, Mereemote, Eliashibu, 37 Matania, Matenai na Yaasu; 38 kabili pa bana ba kwa Binui abasangilwe ni Shimei 39 na Shelemia na Natani na Adaya, 40 Makenadebai, Shashai, Sharai, 41 Asarele na Shelemia, Shemaria, 42 Shalumu, Amaria, Yosefe; 43 na pa bana ba kwa Nebo abasangilwe ni Yeiele, Matitia, Sabadi, Sebina, Yadai na Yoele na Benaya. 44 Aba bonse baupile abanakashi ba ku fyalo fimbi,+ kabili balitamfishe abakashi kumo na bana.