Ibuuku lya Bubili Ilya Imilandu

1 Kabili Solomone mwana Davidi atwalilile ukukoselako mu bufumu+ bwakwe, na Yehova Lesa wakwe ali nankwe+ kabili alemucindamika nga nshi.+

2 Kabili Solomone asosele amashiwi ku bena Israele bonse, kuli bacilolo ba pa bantu amakana+ na ba pa bantu imyanda+ na ku bapingushi+ na ku ntungulushi shonse isha mu Israele yonse,+ intungulushi sha mukowa.+ 3 E lyo Solomone no lukuta lonse pamo na ena baile ku ncende balepepelapo mu Gibeone;+ pantu kulya e kwali icikuulwa ca kukumaninako+ ica kwa Lesa wa cine, ico Mose umubomfi+ wa kwa Yehova apangile mu matololo. 4 Lelo, Davidi asendele icipao+ ca kwa Lesa wa cine ukufuma ku Kiriati-yearimu+ no kucitwala ku cifulo ico Davidi acipekanishishe,+ pantu acipangiile itenti mu Yerusalemu.+ 5 Kabili iciipailo+ ca mukuba ico Besalele+ mwana Uri mwana Huri+ apangile bacibikile pa ntanshi ya cikuulwa ca mushilo ica kwa Yehova; kabili Solomone no lukuta baleya ku ciipailo pa kwipusha kuli Lesa. 6 Kabili palya e po Solomone atuuliile imituulo kuli Yehova pa ciipailo ca mukuba icali mu cikuulwa ca kukumaninako, kabili e po atuuliile imituulo ya koca ikana limo (1,000).+

7 Awe Lesa amoneke kuli Solomone ubushiku no kumwipusha ati: “Lomba! Cinshi ulefwaya nkupeele?”+ 8 E lyo Solomone atile kuli Lesa: “Ni mwe mwali ne cikuuku nga nshi kuli Davidi tata+ kabili ni mwe mumbikile pa bufumu ukumupyana.+ 9 Nomba, mwe Yehova Lesa, lekeni ubulayo bwenu kuli Davidi tata bufikilishiwe,+ pantu ni mwe munsontele ukuba imfumu+ pa bantu abafula ngo lukungu lwa pe sonde.+ 10 Nomba mpeeni amano no kwishiba+ pa kuti ndetungulula aba bantu,+ pantu nani uwingapingula aba bantu benu abafula ifi?”+

11 E lyo Yehova atile kuli Solomone: “Pa mulandu wa kuti ici e co ulefwaya mu mutima+ kabili taulombele ifyuma, ubukankaala no mucinshi nelyo umweo wa bakupata, kabili taulombele inshiku ishingi,+ lelo walomba amano no kwishiba pa kuti ulepingula abantu bandi abo nakusontelepo ukuba imfumu,+ 12 amano no kwishiba ndekupeela;+ kabili ne fyuma no bukankaala no mucinshi ndekupeela ifyo imfumu shonse ishakutangilile shishatalile ashikwata,+ kabili ifyo imfumu yonse iikakonkapo ishakatale aikwata.”+

13 E ico Solomone afumine pa ncende ya mapepo mu Gibeone,+ ukufuma pa ntanshi ya cikuulwa ca kukumaninako,+ no kuya ku Yerusalemu no kutwalilila ukuteka abena Israele.+ 14 Kabili Solomone alelonganika amaceleta na bakabalwe ica kuti akwete amaceleta ikana limo ne myanda ine (1,400) na bakabalwe+ amakana ikumi na yabili (12,000), ifyo abikile mu misumba ya maceleta+ kabili mupepi ne mfumu mu Yerusalemu. 15 Kabili imfumu yalengele silfere na golde ukufula mu Yerusalemu kwati mabwe;+ kabili yalengele imbao sha mukedari ukufula kwati mikunyu+ iyaba mu Shefela+ pantu yali iingi nga nshi. 16 Kabili kwali bakabalwe abo Solomone alefumya ku Egupti,+ kabili ibumba lya bashimakwebo ba mfumu balepokelela bakabalwe abengi no kubashita.+ 17 Kabili baleleta ukufuma ku Egupti iceleta ilyaleshitwa pa ndalama sha silfere imyanda mutanda (600), na kabalwe uwaleshitwa pa ndalama sha silfere umwanda umo na makumi yasano (150); kabili e fyo cali ku shamfumu shonse isha bena Hiti ne shamfumu sha ku Siria.+ Ukupitila muli shena e mo ifi fyaleishila.

2 Solomone nomba aebele abantu ukukuulila ishina+ lya kwa Yehova ing’anda+ ne ng’anda ya bufumu bwakwe.+ 2 Awe Solomone apendele abantu amakana amakumi cinelubali (70,000) aba kusenda ifipe na bantu amakana amakumi cinekonsekonse (80,000) aba kuputula amabwe mu lupili,+ kabili abantu amakana yatatu ne myanda mutanda (3,600) aba kubangalila.+ 3 Kabili, Solomone atumine amashiwi kuli Hiramu+ imfumu ya ku Turi, ati: “Filya fine wacitile kuli Davidi+ tata kabili walemutumina imikedari ya kuikuulila inga’nda ya kwikalamo,— 4 mona, ine ndekuulila+ ishina+ lya kwa Yehova Lesa wandi ing’anda iya kuti nkailenga ukuba iya mushilo+ kuli ena, pa kuti ndeoca ifyanunkila+ kuli ena, no mukate+ wa lyonse uwa kutuntikanya ne mituulo ya koca ulucelo ne cungulo,+ pa masabata+ na pa kutendeka kwa myeshi+ na pa nshita ya mitebeto+ ya kwa Yehova Lesa wesu. Ici cikaba pa bena Israele umuyayaya.+ 5 Kabili ing’anda ndekuula ikaba iikalamba,+ pantu Lesa wesu mukalamba ukucila balesa bambi.+ 6 Kabili nani uwingaba na maka ya kumukuulila ing’anda?+ Pantu imyulu ne myulu ya myulu te kuti imukumane,+ kabili ine, nine nani+ uwa kuti imukuulile ng’anda kano fye iya kufutumwinamo icushi ce lambo kuli ena?+ 7 E ico nomba ntumina umuntu uwacenjela uwaishiba ukubomba na golde na silfere no mukuba+ ne fyela no bushishi bwa masako ya mpaanga ayatumpikwa mu fyakashikila ne fyakashika ce no bushishi bwa bluu, kabili uwaishiba ukubasa ifilembo, pamo na bacenjela ababa na ine mu Yuda na mu Yerusalemu, abo Davidi tata asalile.+ 8 Kabili ntumina imiti ya mikedari,+ imikupri+ ne mialgumi+ ukufuma ku Lebanone,+ pantu nalishiba ukuti ababomfi bobe balishiba sana ukutema imiti ya mu Lebanone,+ (kabili ababomfi bandi bakabombela pamo na babomfi bobe,) 9 aba kuti balempekanishisha imbao ishingi, pantu ing’anda ndekuula ikaba iikalamba icipesha amano. 10 Kabili mona! napeela amadalamu* amakana amakumi yabili (20,000) aya ngano sha kulya ababomfi bobe, abalelonganika imbao na baletema imiti, na barle amadalamu amakana amakumi yabili,+ no mwangashi+ imbeketi* amakana amakumi yabili (20,000), na mafuta imbeketi amakana amakumi yabili.”

11 Awe Hiramu imfumu ya bena Turi+ alembele amashiwi yakwe no kutuma kuli Solomone ati: “Pantu Yehova alitemenwe+ abantu bakwe nacita iwe ukuba imfumu pali bena.”+ 12 Kabili Hiramu atile: “Acindikwe Yehova Lesa wa kwa Israele,+ uwapangile imyulu ne sonde,+ pantu apeela Davidi imfumu umwana wa mano, uwacenjela kabili uwiluka,+ uukakuulila Yehova ing’anda no kukuula ing’anda ya bufumu bwakwe.+ 13 Kabili nomba natuma umuntu uwacenjela, kabili uwiluka, Hiramu-abi,+ 14 umwana wa mwanakashi wa bana ba kwa Dani lelo wishi ali mwina Turi, uwaishiba ukubomba na golde na silfere, umukuba,+ ifyela, amabwe+ ne mbao, mu bushishi bwa masako ya mpaanga ayatumpikwa mu fyakashikila,+ mu bushishi+ bwa bluu na mu nsalu ishisuma+ na mu shakashika ce+ no kubasa+ ifilembo ifya misango yonse no kwelenganya ifya kupangapanga+ fya misango yonse ifingapeelwa kuli ena pamo na baume bobe abacenjela na baume bacenjela aba kwa Davidi wiso. 15 E ico nomba ingano na barle, amafuta no mwangashi ifyo shikulu alaile, atume ku babomfi bakwe.+ 16 Lelo ifwe, tukatema imiti+ ku Lebanone ukulingana ne yo mulekabila,+ kabili tukaleta kuli imwe ku Yopa+ ile-elela pali bemba+ kabili iyakakwa pamo, kabili imwe, mukaisenda ku Yerusalemu.”

17 E lyo Solomone apendele abaume bonse abali abalebeshi, abali mu calo ca Israele,+ ninshi Davidi wishi alibapenda kale;+ kabili basangile abantu amakana umwanda na makumi yasano na yatatu ne myanda mutanda (153,600). 18 E ico asontele amakana amakumi cinelubali (70,000) aba kusenda ifipe+ na makana amakumi cinekonsekonse (80,000) aba kuputula amabwe+ mu lupili na makana yatatu ne myanda mutanda (3,600) aba kwangalila abalebomba.+

3 Awe Solomone atendeke ukukuula ing’anda ya kwa Yehova+ mu Yerusalemu pa Lupili lwa Moria,+ apo Yehova amonekele kuli Davidi wishi,+ mu ncende iyo Davidi apekenye apa kupumina ingano apa kwa Ornani+ umwina Yebusi. 2 Kabili atendeke ukukuula mu mweshi wa bubili pa bushiku bwa cibili, mu mwaka walenga bune uwa kuteka kwakwe.+ 3 Kabili uyu e mufula Solomone aimbile uwa kukuulapo ing’anda ya kwa Lesa wa cine, ubutali mu mikono, nga kukonka ifyo balepima kale, yali imikono amakumi mutanda (60), e lyo mu bwipi imikono amakumi yabili (20).+ 4 Kabili umuputule wa kwingililapo+ uwali pa ntanshi walepele imikono amakumi yabili (20) kabili wabelele mu bwipi bwa ng’anda, kabili ukuya mu muulu walepele imikono umwanda umo na makumi yabili (120); kabili mu kati abikilemo golde iisuma. 5 Kabili ing’anda iikalamba+ aikupile ne mbao sha mukupri, e lyo abikileko golde+ iisuma, no kulengapo ifimpashanya fya tuncindu+ ne minyololo.+ 6 Kabili, ku ng’anda abikileko amabwe ayauma umutengo pa kuti aiyemfye;+ kabili golde+ yafumine ku calo ukwali golde. 7 Kabili abikile golde+ ku ng’anda, ku nsonta, ku minshi na ku fibumba fya iko na ku fiibi fya iko; kabili pa fibumba abashiilepo bakerubi.+

8 Kabili apangile ing’anda umwali umuputule wa Mushilo Nga Nshi,+ ubutali bwa uko bwali imikono amakumi yabili (20) ukulingana no bwipi bwa ng’anda,+ kabili mu bwipi yalepele imikono amakumi yabili; e lyo abikileko golde iisuma iyali amatalanti imyanda mutanda (600). 9 Kabili imisomali+ ya golde yafinine amakilogramu nalimo amakumi yasano na cinelubali (57); kabili ku miputule ya pa muulu abikileko golde.

10 E lyo mu ng’anda umwali umuputule wa Mushilo Nga Nshi apangiilemo bakerubi babili+ aba kubasa, no kubikako golde.+ 11 Amapindo ya bakerubi+ yena yalepele imikono amakumi yabili (20), ipindo limo ilyalepele imikono amakumi yabili lyafikile ku cibumba ca ng’anda, ne pindo limbi ilyalepele imikono isano lyafikile kwi pindo lya kwa kerubi umbi.+ 12 Kabili ipindo lya kwa kerubi umbi ilyalepele imikono isano lyalefika ku cibumba ca ng’anda, e lyo ipindo limbi ilyalepele imikono isano lyalekumya ipindo lya kwa kerubi umbi.+ 13 Amapindo ya bakerubi ayafunguluka yalepele imikono amakumi yabili (20); kabili baiminine ku makasa yabo ne finso fyabo fyaloseshe mu kati.

14 Kabili, apangile insalu ya kucingilako+ iya bushishi bwa bluu+ no bwa masako ya mpaanga ayatumpikwa mu fyakashikila no bwakashika ce ne nsalu iisuma, no kupikwilapo bakerubi.+

15 E lyo apangile pa ntanshi ya ng’anda inceshi+ shibili, ishalepele imikono amakumi yatatu na isano (35), kabili icitebo+ icali pa muulu wa luceshi lumo lumo calepele imikono isano. 16 Kabili apangile iminyololo+ iyaba kwati tuminyololo twa mu mukoshi no kuibika pa muulu wa nceshi, kabili apangile na mapomegranate+ umwanda umo (100) no kuyabika pa minyololo. 17 Kabili aimike inceshi pa ntanshi ye tempele, lumo ku kulyo na lumbi ku kuso, e lyo ainike ulwali ku kulyo ati Yakini no lwali ku kuso alwinike ati Boasi.+

4 E lyo apangile iciipailo ca mukuba,+ icalepele imikono amakumi yabili (20), kabili mu bwipi cali imikono amakumi yabili, na mu butali cali imikono ikumi (10).+

2 Kabili apangile icishiba+ icaengwa icali imikono ikumi (10) ukufuma ku lubali lumo ulwa mulomo wa ciko ukucilinganya ukufika ku lubali lumbi ulwa mulomo, kabili cali icashinguluka konse, kabili mu butali calepele imikono isano, kabili umwando uwalepa imikono amakumi yatatu (30) e walecishinguluka konse.+ 3 Kabili ifyaba nge nkombo+ fyashingulwike mwi samba lya ciipailo, mu mukono umo fyalimo ikumi (10), ukushinguluka icishiba conse.+ Ifyo fintu ifyaba nge nkombo fyali mu mitande ibili, bafipangiile mu cikombola. 4 Cabikilwe pa ng’ombe ikumi na shibili (12),+ shitatu shaloseshe ku kapinda ka ku kuso na shitatu shaloseshe ku masamba kabili shitatu shaloseshe ku kapinda ka ku kulyo e lyo shitatu shaloseshe ku kabanga; kabili icishiba catekelwe pali shena, kabili inuma sha shiko shonse shaloseshe mu kati.+ 5 No mutika wa ciko wali ngo lupi mu bwipi; kabili umulomo wa ciko wali ngo mulomo wa kapu, kwati liluba lyabalula.+ Mwaleingila imbeketi+ sha menshi amakana yatatu (3,000).+

6 Kabili, apangile ifya kubikamo amenshi ya kusamba ikumi (10), kabili abikile fisano ku kulyo na fisano ku kuso,+ ifya kusambamo.+ E mo balesamfisha ifyo balebomfya mu mituulo ya koca.+ Lelo mu cishiba e mo bashimapepo balefumya amenshi ya kusamba.+

7 E lyo apangile ifya kutekapo inyali+ ifya golde ifyali ikumi (10) kabili fyapangilwe cimo cine,+ kabili afibikile mwi tempele, fisano ku kulyo na fisano ku kuso.+

8 Kabili, apangile amatebulo ikumi (10), no kuyabika mwi tempele, yasano ku kulyo na yasano ku kuso,+ no kupanga imbale shafonka isha golde umwanda umo (100).

9 E lyo apangile ulubansa+ lwa bashimapepo+ no lubansa ulukalamba+ ne fiibi fya lubansa, kabili ku fiibi abikileko umukuba. 10 Kabili icishiba acibikile ku kulyo, ku kabanga, ukulola ku kapinda ka ku kulyo.+

11 Awe Hiramu apangile ifya kukushilapo imito+ na bafosholo+ ne mbale shafonka.+

E ico Hiramu apwishishe umulimo uo abombeele Imfumu Solomone uwa pa ng’anda ya kwa Lesa wa cine. 12 Inceshi shibili+ ne fitebo+ ifyabulungana ifyali pa muulu wa nceshi shibili e lyo ne fyapikulwa+ fibili ifya kufimba pa fitebo fibili ifyabulungana ifyali pa muulu wa nceshi 13 na mapomegranate+ imyanda ine (400) aya ku fyapikulwa fibili, imitande ibili iya mapomegranate ku capikulwa cimo cimo aya kufimba ifitebo fibili ifyashinguluka ifyali pa nceshi,+ 14 ne fya kusendelapo+ ikumi (10) ne fya kubikamo amenshi ya kusamba+ ikumi ifyali pa fya kusendelapo; 15 icishiba+ cimo ne ng’ombe ikumi na shibili (12) ishali pe samba lya ciko,+ 16 ne fya kukushilapo imito na bafosholo+ ne mitunkulo+ ne fipe+ fyabo fyonse ifyo Hiramu-abibu+ apangiile Imfumu Solomone ifya mu nga’nda ya kwa Yehova, ifya mukuba uusuma. 17 Mu Citungu ca Yordani e mo imfumu yafipangiile mu mushili we bumba pa kati ka Sukote+ na Sereda.+ 18 E ico Solomone apangile ifipe fyonse ifingi nga nshi, kabili ukufina kwa mukuba takwaishibikwe.+

19 Kabili Solomone apangile ifipe+ fyonse ifyali mu ng’anda ya kwa Lesa wa cine ne ciipailo+ ca golde na matebulo+ apali umukate uo baletuntikanya, 20 ne fya kutekapo inyali+ ifya golde iisuma ne nyali+ sha fiko isha golde iisuma, pa kuti shilesanika ku ntanshi ya muputule+ wa mu kati na nkati ukulingana ne funde; 21 na maluba ne nyali ne fya kumanikilako,+ ifya golde, (yali ni golde iwamisha,) 22 ne fya kushimishako umulilo ne mbale shafonka na makapu ne fifutumwino, ifya golde+ iisuma, no mwinshi wa ng’anda,+ ifiibi fya mu kati ifya mu muputule wa Mushilo Nga Nshi ne fiibi+ fya kwi tempele, fyali ifya golde.

5 Awe imilimo yonse iyo Solomone ali no kubomba ku ng’anda ya kwa Yehova yalipwile,+ kabili Solomone atendeke ukuletelamo ifintu ifyo Davidi wishi apeele;+ kabili silfere na golde ne fipe fyonse afibikile umwa kusungila ifipe fya mu ng’anda ya kwa Lesa wa cine.+ 2 E lyo Solomone alonganike abakalamba ba kwa Israele+ ne ntungulushi shonse isha mikowa,+ intungulushi sha mu mayanda ya bashibo+ ba bana ba kwa Israele, ku Yerusalemu, pa kuti balete icipao+ ca cipangano ica kwa Yehova ukucifumya+ mu Musumba wa kwa Davidi,+ e kuti, mu Sione.+ 3 E ico abaume bonse aba bena Israele balongene ku mfumu pa mutebeto, uwa mu mweshi walenga cinelubali (7).+

4 Awe abakalamba ba bena Israele bonse balishile,+ kabili abena Lebi e basendele Icipao.+ 5 Kabili baletele Icipao+ ne cikuulwa ca kukumaninako+ ne fipe+ fyonse ifya mushilo ifyali muli ici cikuulwa. Bashimapepo abena Lebi* balifiletele.+ 6 Kabili Imfumu Solomone no lukuta lonse ulwa bena Israele ulwalongene uko yali pa ntanshi ya Cipao baletuula amalambo+ ya mpaanga ne ng’ombe ayashingapendwa ku bwingi. 7 E lyo bashimapepo baletele icipao ca cipangano ica kwa Yehova mu cifulo ca ciko, mu muputule wa mu kati na nkati+ uwa mu ng’anda, e kuti mu Muputule wa Mushilo Nga Nshi,+ mwi samba lya mapindo ya bakerubi.+ 8 E ico bakerubi bafungulwile amapindo yabo pa muulu wa paikele Icipao, kabili aba bakerubi bafimbile Icipao pa muulu+ icali ne mitembo.+ 9 Lelo imitembo yalilepele, ica kuti nga uli mu Muputule wa Mushilo kuti wamona impela ya mitembo iili mu muputule wa mu kati na nkati, lelo ku nse kwena tayalemoneka, kabili yaba mulya mwine ukufika na lelo.+ 10 Tamwali nangu kamo mu Cipao kano fye amabwe yabili ayapapaatala+ ayo Mose abikilemo ku Horebu,+ ilyo Yehova apangene+ icipangano na bana ba kwa Israele ilyo balefuma mu Egupti.+

11 Nomba ilyo bashimapepo bafumine mu muputule wa mushilo (pantu bashimapepo bonse abaliko bali-isangulwile+—tabalekonka umo babakanishishe);+ 12 na bena Lebi+ abaleimba bali ba muli Asafi,+ Hemani,+ Yedutuni+ na bana babo na bamunyinabo bonse, bafwele insalu ishisuma kabili bali na malimba+ ne filimba fya nsale+ na bansango,+ baiminine ku kabanga ka ciipailo pamo na bashimapepo bonse pamo umwanda umo na makumi yabili (120) abalelisha amapenga;+ 13 nomba ilyo abalelisha amapenga na baleimba batendeke ukwimbila pamo+ ukulumbanya no kutasha Yehova, kabili ilyo batendeke ukulisha amapenga na malimba ne filimba fya nyimbo+ no kulumbanya+ Yehova abati, “pantu musuma,+ pantu icikuku+ cakwe ca muyayaya,” ing’anda yaiswilemo ikumbi,+ inga’nda ya kwa Yehova ine,+ 14 kabili bashimapepo bafililwe ukwiminina pa kuti babombe pa mulandu we kumbi;+ pantu ubukata+ bwa kwa Yehova bwaiswile mu ng’anda ya kwa Lesa wa cine.

6 E lyo Solomone atile:+ “Yehova umwine atile akekala mwi kumbi ilyafiita;+ 2 kabili ine, nimukuulila ing’anda apasansuka+ kabili icifulo icibelelela ico mukalaikalamo umuyayaya.”+

3 Awe imfumu yalipilibwike no kutendeka ukupaala+ ulukuta lonse ulwa bena Israele, ninshi ulukuta lonse ulwa kwa Israele nalwiminina.+ 4 Kabili yatile: “Acindikwe Yehova Lesa wa kwa Israele,+ uwasosele kuli Davidi tata+ kabili ku kuboko kwakwe nafikilisha ifyo alaile,+ ukutila, 5 ‘Ukutula pa bushiku nafumishe abantu bandi mu calo ca Egupti, nshasala umusumba nangu umo mu mikowa yonse iya bena Israele umwa kukuulila ishina+ lyandi ing’anda pa kuti likabe mulya, kabili nshasala umuntu nangu umo ukuba intungulushi pa bantu bandi abena Israele.+ 6 Lelo nkasala Yerusalemu+ ukuti ishina lyandi likabe mulya, kabili nkasala Davidi ukuti akaletungulula abantu bandi abena Israele.’+ 7 Kabili Davidi tata alefwaisha sana ukukuulila ishina lya kwa Yehova Lesa wa kwa Israele ing’anda.+ 8 Lelo Yehova atile kuli Davidi tata, ‘Pa mulandu wa kuti walefwaisha sana ukukuulila ishina lyandi ing’anda, walicita bwino, pantu e co walefwaisha.+ 9 Nomba, te iwe ukakuula ing’anda,+ lelo umwana obe uukafuma muli iwe* e ukakuulila ishina lyandi ing’anda.’+ 10 Kabili Yehova alifikilishe amashiwi+ asosele, aya kuti mpyane Davidi tata+ no kwikala pa cipuna+ ca bufumu ica kwa Israele, ifyo Yehova asosele,+ no kuti nkuulile ishina lya kwa Yehova Lesa wa kwa Israele ing’anda,+ 11 no kuti mbikemo Icipao+ umwaba icipangano Yehova apangene na bana ba kwa Israele.”+

12 Kabili aiminine pa ntanshi ya ciipailo ca kwa Yehova, pa ntanshi ya lukuta lonse ulwa bena Israele,+ kabili aimishe amaboko yakwe mu muulu.+ 13 (Pantu Solomone apangile icisebele+ ca mukuba no kucibika pa kati na nkati aka lubansa.+ Mu butali calepele imikono isano, kabili mu bwipi calepele imikono isano, e lyo ukuya mu muulu calepele imikono itatu; kabili e po aiminine.) Awe alifukeme+ pa ntanshi ya lukuta lonse ulwa bena Israele kabili aimishe amaboko yakwe mu muulu.+ 14 Kabili atile: “Mwe Yehova Lesa wa kwa Israele,+ takwaba Lesa uwaba nga imwe+ mu muulu nangu pano isonde, uusunga icipangano+ kabili uwaba ne cikuuku ku babomfi benu abacita ifyo mufwaya ne mitima yabo yonse;+ 15 imwe mwe bacita ku mubomfi wenu Davidi tata ifyo mwamulaile,+ kabili ku kanwa kenu ni mwe mwamulaile, kabili ku kuboko kwenu buno bushiku mwafikilisha ifyo mwalaile.+ 16 E ico nomba, mwe Yehova Lesa wa bena Israele, citileni umubomfi wenu tata Davidi ico mwamulaile, amuti, ‘Takwakatale akubula umuntu obe ku cinso candi uwa kwikala pa cipuna ca bufumu ica bena Israele,+ nga ca kuti fye abana+ bobe bakabika amano ku mibele yabo pa kwenda mu mafunde yandi,+ nge fyo waenda ku cinso candi.’+ 17 E ico nomba, mwe Yehova Lesa wa kwa Israele,+ lekeni ubulayo+ bwenu ubo mwalaile umubomfi wenu Davidi bufikilishiwe.+

18 “Lelo bushe cine cine Lesa kuti aikala pe sonde na bantu?+ Moneni umuulu, no muulu wa myulu te kuti umukumane;+ pali bufi iyi ng’anda iyo nkuulile!+ 19 Kabili umfweni ipepo lya mubomfi+ wenu no kulomba kwakwe ukwa kuti mumupaale,+ mwe Yehova Lesa wandi, pa kukutika ku kupapaata+ na kwi pepo ilyo umubomfi wenu alepepa kuli imwe,+ 20 pa kuti amenso yenu yalelolesha+ pa ng’anda ino akasuba no bushiku, pa cifulo ico mwatile mukabikapo ishina+ lyenu, pa kukutika kwi pepo ilyo umubomfi wenu alepepa nalosha kuli cino cifulo.+ 21 Kabili mulekutika ku kupapaata kwa mubomfi+ wenu no kwa bantu benu abena Israele ilyo balepepa ninshi nabalosha kuli cino cifulo,+ pa kuti muumfwe uko mwaikala, ku muulu;+ kabili mumfwe no kutubelela uluse.+

22 “Umuntu nga abembukila umunankwe+ kabili alapa no mulapo wa citiipu,+ kabili aisa pa ntanshi ya ciipailo cenu muli ino ng’anda ninshi alilapo umulapo,+ 23 na imwe mukomfwe mu muulu,+ kabili mukacitepo cimo+ no kupingula ababomfi benu pa kuti mukande umubifi pa kubika imibele yakwe pa mutwe+ wakwe no kupingula umulungami ukuti mulungami+ pa kumulambula ukulingana no bulungami bwakwe.+

24 “Kabili abantu benu abena Israele nga babacimfya ku balwani+ pa mulandu wa kuti balebembukila imwe,+ kabili babwela+ no kulumbanya ishina+ lyenu no kupepa+ muli ino ng’anda no kumulomba ukuti mubabelele uluse,+ 25 imwe mukomfwe mu muulu,+ no kwelela+ ulubembu lwa bantu benu abena Israele no kubabwesesha+ ku calo mwabapeele pamo ne fikolwe fyabo.+

26 “Umuulu nga waisalwa ica kuti ne mfula tailokele+ pa mulandu wa kuti balemubembukila,+ kabili nga bapepa nabalosha kuli cino cifulo+ no kulumbanya ishina lyenu kabili bayaluka ukufuma ku lubembu lwabo pantu mwabacusha,+ 27 na imwe mukomfwe mu muulu, no kwelela ulubembu lwa babomfi benu, ulwa bantu benu abena Israele pantu mulabasambilisha+ inshila iisuma+ iyo bafwile ukwendamo; kabili mukaloshe imfula+ pa calo ico mwapeela abantu benu ukuba ubupyani bwabo.+

28 “Nga mu calo mwapona icipowe+ nangu icikuko,+ nangu nga mwaba ukubabuka kwa mabula+ nelyo ukufufuma kwa mabula,+ nga kwaba makanta+ nelyo impemfu;+ nga abalwani+ babo babashinga mu misumba yabo+—nelyo nga kwapona icikuko ca musango onse no bulwele+ bwa musango onse— 29 ipepo+ lyonse, ukulomba konse ukwa kubelelwa uluse+ ukwa muntu onse nangu ukwa bantu benu abena Israele,+ pantu cila muntu alishiba icikuko+ cakwe no kukalipwa kwakwe; ilyo aimya amaboko yakwe nalosha kuli ino ng’anda,+ 30 na imwe mukomfwe mu muulu, mu cifulo cenu,+ kabili mukabelele uluse+ no kupeela onse ukulingana ne mibele yakwe,+ pantu mwalishiba umutima+ wakwe (pantu ni mwe mweka mwaishiba bwino imitima ya bana ba bantu);+ 31 pa kutila balemutiina+ pa kwenda mu nshila shenu inshiku shonse isho bali abomi pa calo ico mwapeele ifikolwe fyesu.+

32 “Kabili uwa ku calo cimbi uushili wa mu bantu benu abena Israele+ kabili uwafuma ku calo ca kutali pa mulandu we shina+ lyenu ilikalamba no kuboko kwenu ukwa maka+ kabili ukuboko kwenu ukwatambalikwa,+ kabili nga aisa no kupepa nalosha kuli ino ng’anda,+ 33 na imwe mukomfwe mu muulu, mu bwikalo bwenu+ ububelelela, kabili mukacite ukulingana na fyonse ifyo uwa ku calo cimbi akamulomba;+ pa kuti aba pano isonde bonse bekeshibe ishina+ lyenu no kumutiina+ ifyo abantu benu abena Israele bamutiina, kabili bakeshibe no kuti ishina lyenu lyainikwa pa ng’anda ino iyo nakuula.+

34 “Nga abantu benu baya ku nkondo+ ku kulwa na balwani babo mu nshila iyo mwabatumamo,+ kabili bapepa+ kuli imwe nabalosha kuli uno musumba uo mwasala kabili nabalosha ku ng’anda iyo nakuulila ishina lyenu,+ 35 imwe mukomfwe mu muulu ipepo lyabo no kulomba kwabo ukwa kuti mubaafwe,+ kabili mukabakandileko abalwani babo.+

36 “Nga bamubembukila+ (pantu takwaba umuntu uushibembuka),+ kabili mwabafulilwa no kubapoosa ku balwani, kabili aba kubasenda bunkole babasenda ku calo ca kutali nelyo ica mupepi;+ 37 kabili nga bailuka ilyo bali mu calo umo babasendele bunkole, kabili babwela no kulomba ukuti mubabelele uluse ilyo bali mu calo umo babasenda bunkole,+ abati, ‘Natubembuka,+ natulufyanya+ no kubifya’;+ 38 kabili babwelela kuli imwe ne mitima+ yabo yonse no mweo wabo onse mu calo umo baba bankole ba bantu babasendele bunkole,+ kabili nga bapepa nabalosha ku calo cabo ico mwapeele ku fikolwe fyabo na ku musumba uo mwasala+ ne ng’anda iyo nakuulila ishina lyenu;+ 39 awe imwe mu muulu, mu bwikalo bwenu+ ububelelela, mukomfwe ipepo lyabo no kulomba kwabo ukwa kubabelela uluse,+ kabili mukabapingwileko+ no kwelela+ abantu benu abamubembukila.

40 “Nomba, mwe Lesa wandi, lekeni amenso+ yenu yalemona na matwi+ yenu yakutike ipepo lya pali cino cifulo. 41 E ico nomba imeni,+ mwe Yehova Lesa, mu kutuusha+ kwenu, imwe ne Cipao ca maka yenu.+ Lekeni bashimapepo benu, mwe Yehova Lesa, bafwale ipusukilo, kabili lekeni aba cishinka benu basekelele mu busuma.+ 42 Mwe Yehova Lesa, mwibwesha icinso ca wasubwa+ wenu. Shi ibukisheni ifyo mwali ne cikuuku kuli Davidi umubomfi wenu.”+

7 Nomba ilyo Solomone apwile fye ukupepa,+ umulilo waliponene ku muulu+ no koca umutuulo wa koca+ na malambo, no bukata+ bwa kwa Yehova bwaiswile mu ng’anda. 2 Kabili bashimapepo balifililwe ukwingila mu ng’anda ya kwa Yehova+ pantu ubukata bwa kwa Yehova bwaiswile mu ng’anda ya kwa Yehova. 3 Kabili abana ba kwa Israele bonse balimweneko ilyo umulilo waponene no bukata bwa kwa Yehova bwali pa ng’anda, kabili ilyo line fye balikonteme+ no kulosha ifinso fyabo pa nshi apalambatikwe amabwe no kufukama+ no kutasha Yehova, “pantu musuma,+ pantu icikuuku cakwe ca muyayaya.”+

4 Kabili imfumu na bantu bonse batuulile amalambo kuli Yehova.+ 5 Kabili Imfumu Solomone yatuulile ilambo lya ng’ombe amakana amakumi yabili na yabili (22,000) ne mpaanga amakana umwanda umo na makana amakumi yabili (120,000).+ E fyo imfumu na bantu bonse bapeele+ ing’anda ya kwa Lesa wa cine. 6 Kabili bashimapepo+ baiminine mu fifulo fyabo ifya kubombelamo, kabili abena Lebi+ bali ne filimba fya nyimbo+ sha kwimbila Yehova isho Davidi+ ashikile ku kutashishako Yehova, “pantu icikuuku cakwe ca muyayaya,” ilyo Davidi alelumbanishisha muli bena, kabili bashimapepo balelisha sana amapenga+ pa ntanshi yabo, ninshi abena Israele bonse nabeminina.

7 E lyo Solomone asangulwile+ pa kati ka lubansa lwa ku ntanshi ya ng’anda ya kwa Yehova, pantu e po apeelele imituulo ya koca+ na mafuta ya malambo ya mutende, pantu iciipailo ca mukuba+ ico Solomone apangile calicepele ukutuulilapo umutuulo wa koca no mutuulo wa ngano+ e lyo na mafuta.+ 8 Kabili pa nshita ilya, Solomone acitile umutebeto+ uwa nshiku cinelubali (7), na bena Israele bonse bali nankwe,+ ulukuta+ ulukalamba nga nshi ukufuma ku mupaka wa Hamati+ ukufika ku mumana wa Egupti.+ 9 Lelo pa bushiku bwa cinekonsekonse (8) balilongene ukulongana kwacindamisha,+ pantu ukusefya kwa pa kupeela iciipailo kuli Lesa kwasendele inshiku cinelubali (7) e lyo no mutebeto na o wasendele inshiku cinelubali. 10 Kabili pa bushiku bwalenga amakumi yabili na shitatu (23) mu mweshi walenga cinelubali (7) alekele abantu baye ku mwabo, balesekelela+ no kuumfwa bwino mu mutima pa busuma+ ubo Yehova acitiile Davidi na Solomone na bantu bakwe abena Israele.+

11 E fyo Solomone apwile ukukuula ing’anda ya kwa Yehova+ ne ng’anda ya mfumu;+ kabili conse icaishile mu mutima wa kwa Solomone ukuti acite ku ng’anda ya kwa Yehova ne ng’anda yakwe, alicitile. 12 Yehova nomba amoneke+ kuli Solomone ubushiku no kumweba ati: “Ning’umfwa ipepo+ lyobe, kabili ninsala+ cino cifulo ukuba ing’anda ya malambo.+ 13 Nga naisala imyulu pa kuti imfula iloka+ kabili nga naeba ifipaso ukulya ifimenwa fya mu calo+ kabili nga natuma icikuko pa bantu bandi,+ 14 kabili abantu bandi+ abainikwa ishina+ lyandi baicefya+ no kupepa+ no kulomba+ ukuti mbabelele uluse kabili bafuma na ku nshila shabo ishibi,+ ine nkomfwa mu muulu+ no kwelela ulubembu+ lwabo, kabili nkaposha icalo cabo.+ 15 Nomba amenso+ yandi yakulamona na matwi+ yandi yakulaumfwa ukupepa ukukalaba pali cino cifulo. 16 E ico nomba ninsala+ no kulenga ino ng’anda ukuba iya mushilo pa kuti ishina+ lyandi libemo umuyayaya,+ kabili amenso yandi no mutima wandi fikabamo pe.+

17 “Kabili nga wakulacita ifyo mfwaya, nga filya Davidi+ wiso alecita, no kucita ukulingana na fyonse ifyo nakweba,+ kabili nga wakulasunga ifipope+ fyandi no kukonka ubupingushi bwandi,+ 18 na ine nkapampamika icipuna cobe ica bufumu,+ ifyo napangene na Davidi wiso,+ ukutila, ‘Takwakabule umuntu obe uwa kuteka abena Israele.’+ 19 Lelo nga mwayaluka+ no kuleka ifipope+ fyandi na mafunde+ yandi ifyo namupeela, kabili mwaya na mu kubombela tulesa+ tumbi no kutukontamina,+ 20 na ine ninshi nkabanukula pa calo ico nabapeela;+ kabili iyi ng’anda iyo nengele iya mushilo+ pa mulandu we shina lyandi, nkaipoosa ikafume pa ntanshi yandi,+ kabili nkalenga abantu bonse ukulanda pali iyi ng’anda insoso sha manshoko+ kabili bakalaiseka.+ 21 E lyo iyi ng’anda yena, iikaba ifitantaala,+ onse uulepitapo akalolesha no kupapa,+ kabili akatila, ‘Nga cinshi Yehova acitile ifi kuli ici calo na kuli iyi ng’anda?’+ 22 Kabili bakatila, ‘Ni co bashile Yehova+ Lesa wa fikolwe fyabo uwabafumishe mu calo ca Egupti,+ kabili baikatilile kuli balesa+ bambi no kubakontamina no kubabombela.+ E mulandu wine aletele ububi bonse ubu pali bena.’”+

8 Nomba pa mpela ya myaka amakumi yabili (20),+ iyo Solomone akuulilemo ing’anda ya kwa Yehova+ ne ng’anda yakwe,+ 2 e lyo Solomone akuulile cipya cipya imisumba iyo Hiramu+ apeele Solomone no kulenga abana ba kwa Israele ukwikalamo. 3 Kabili Solomone aile ku musumba wa Hamati-soba no ku-ucimfya. 4 Kabili akuulile cipya cipya Tadmore mu matololo ne misumba yonse iyo baletutilamo+ ifintu iyo akuulile mu Hamati.+ 5 Kabili akuulile Bete-horone wa pa muulu+ na Bete-horone wa mwi samba,+ imisumba iyo bacingilile na malinga,+ ifiibi ne milando,+ 6 akuulile na Baalati+ ne misumba yonse iya matala iyali iya kwa Solomone ne misumba ya maceleta+ ne misumba ya bale-endela pali bakabalwe+ ne cisuma conse ico Solomone+ afwaile ukukuula mu Yerusalemu na mu Lebanone+ na mu calo conse ico aleteka.

7 E lyo abantu bonse abashele pa bena Hiti+ na bena Amore+ na bena Perisi+ na bena Hibi+ na bena Yebusi,+ abashali bena Israele,+ 8 abana babo abashele mu calo, abo abena Israele bashaipeye,+ bena Solomone alebeta+ ku kubomba umulimo wa kupatikishiwa kabili balabomba uyu mulimo ukufika na lelo.+ 9 Lelo tapali nangu bamo pa bana ba kwa Israele abo Solomone acitile abasha mu mulimo wakwe;+ pantu bali e abashilika+ kabili intungulushi sha bakalamba ba bashilika kabili intungulushi sha ba kwensha amaceleta+ na bale-endela pali bakabalwe.+ 10 Aba e bali abakalamba ba nkonkani+ sha Mfumu Solomone, imyanda ibili na makumi yasano (250), bakapitao ba bantu.+

11 Kabili Solomone afumishe umwana mwanakashi+ uwa kwa Farao ku Musumba wa kwa Davidi+ no kumuleta ku ng’anda iyo amukuuliile,+ pantu atile: “Nangu kwena mukashi wandi, tafwile ukwikala mu ng’anda ya kwa Davidi imfumu ya bena Israele, pantu incende umwapitile icipao ca kwa Yehova sha mushilo.”+

12 E lyo Solomone atuulile amalambo ya koca+ kuli Yehova pa ciipailo+ ca kwa Yehova ico akuulile pa ntanshi ya muputule wa kwingililapo,+ 13 kabili cila bushiku+ alepeela amalambo ukukonka ifunde lya kwa Mose ilya pa masabata+ na pa myeshi ipya+ na pa mitebeto+ yatantikwa imiku itatu mu mwaka,+ pa mutebeto wa mikate ishatutumuka+ na pa mutebeto wa milungu+ na pa mutebeto wa nsakwe.+ 14 Kabili, ayakenye amabumba+ ya bashimapepo mu milimo yabo ukulingana ne fyo Davidi wishi amwebele,+ na bena Lebi+ apo balebombela, pa kuti balelumbanya+ no kubomba+ pa ntanshi ya bashimapepo cila bushiku,+ na balinshi ba pa mpongolo mu mabumba yabo pa mpongolo+ shalekanalekana, pantu e fyali ifunde lya kwa Davidi umuntu wa kwa Lesa wa cine. 15 Kabili tabapaaswike kwi funde lya mfumu ilyo yapeele bashimapepo na bena Lebi ilyalandile pa mulandu onse ne lyalandile pa fipe.+ 16 Kanshi umulimo onse uwa kwa Solomone walipekanishiwe+ ukutula pa bushiku baimbile umufula wa ng’anda ya kwa Yehova mpaka yapwa.+ E fyo ing’anda ya kwa Yehova yapwile.+

17 E lyo Solomone aile ku Esione-gebere+ na ku Elote+ mu lulamba lwa mumana mu calo ca Edomu.+ 18 Kabili Hiramu+ lyonse alebomfya ababomfi bakwe ukumutumina amato na babomfi abaishibe bemba bwino,+ kabili baleya na babomfi ba kwa Solomone ku Ofiri+ no kusendako amatalanti ya golde+ imyanda ine na makumi yasano (450)+ no kuleta ku Mfumu Solomone.+

9 Kabili namfumu wa ku Sheba+ alyumfwile ululumbi lwa kwa Solomone, kabili alishile ku Yerusalemu ku kwesha Solomone na mepusho yayafya,+ aishile pamo ne bumba lya bantu ilikulu ne ngamila+ ishasendele amafuta ya balsamu,+ na golde+ iingi, na mabwe ayauma umutengo.+ E fyo afikile kuli Solomone no kulanda nankwe fyonse ifyali mu mutima wakwe.+ 2 Awe Solomone na o amulondolwelele fyonse ifyo aipwishe,+ kabili takwali nangu cimo ico Solomone ashamulondolwelele.+

3 Ilyo namfumu wa ku Sheba amwene amano+ ya kwa Solomone ne ng’anda iyo akuulile,+ 4 ne fya kulya ifyali pe tebulo+ lyakwe ne mikalile ya babomfi bakwe ne mibombele ya ba kupekanya ifya kulya ne mifwalile+ yabo ne mibombele ya baleleta ifya kunwa+ ne mifwalile yabo, na malambo yakwe aya koca+ ayo aletuula lyonse pa ng’anda ya kwa Yehova,+ calimupeseshe sana amano. 5 E ico atile ku mfumu: “Ya cine amashiwi naumfwile ku calo candi pali iwe na pa mano yobe.+ 6 Na ine nshasumine+ amashiwi yabo mpaka ne mwine naisa no kuimwena na menso yandi;+ kabili mona! ifyo banjebele tafifikile na kuli hafu wa mano yobe ayengi.+ Naficila pa lulumbi ulo naumfwile.+ 7 Balipaalwa+ abantu bobe, kabili balipaalwa ababomfi bobe aba abeminina pa ntanshi yobe lyonse no kukutika ku mano yobe.+ 8 Yehova Lesa obe acindikwe,+ uwa kutemenwe+ pa kukubika pa cipuna+ cakwe ica bufumu pa kutila uletekelako Yehova Lesa obe;+ pantu Lesa obe alitemenwe+ abena Israele, pa kuti amulenge ukubako umuyayaya, pantu akusontele ukuba imfumu+ yabo ku kupingula+ mu bulungami.”+

9 E lyo nomba apeele imfumu amatalanti ya golde+ umwanda umo na makumi yabili (120), na mafuta+ ya balsamu ayengi nga nshi, na mabwe ayauma umutengo;+ kabili takwatalile akuba amafuta ya balsamu nga yalya namfumu wa ku Sheba apeele Imfumu Solomone.+

10 Kabili, ababomfi ba kwa Hiramu+ na babomfi ba kwa Solomone abaletele golde+ ukufuma ku Ofiri, baletele imbao sha fimuti fya mialgumi+ na mabwe ayauma umutengo.+ 11 Ne mfumu yapangile ku mbao sha fimuti fya mialgumi amatabo+ ya ng’anda ya kwa Yehova na ya ng’anda+ ya mfumu e lyo na bansango+ ne filimba fya nsale+ ifya bakemba,+ kabili takwatalile akuba ifyaba nga filya mu Yuda.

12 Kabili Imfumu Solomone yapeele namfumu+ wa ku Sheba fyonse ifyo alombele, kabili fyalicilile umutengo wa fyo aletele ku mfumu. E ico alipilibwike no kubwelela ku calo cakwe, pamo na babomfi bakwe.+

13 Kabili golde iyaishile kuli Solomone mu mwaka umo yafinine amatalanti ya golde imyanda mutanda na makumi mutanda na mutanda (666),+ 14 ukwabula ukupendelako iyafumine ku baume ba pa lwendo na bashimakwebo+ abaleleta ifipe ne shamfumu shonse isha bena Arabia+ na balashi ba calo abaleleta golde na silfere kuli Solomone.

15 Kabili Imfumu Solomone yapangile inkwela ishikalamba imyanda ibili (200) isha golde+ iya kufula (yabikile na mashekele ya golde iya kufula imyanda mutanda [600] pa nkwela imo na imo iikalamba),+ 16 ne nkwela ishinono isha golde iya kufula imyanda itatu (300) (yabikile bamaina* batatu aba golde pa nkwela imo na imo iinono).+ E lyo nomba imfumu yafibikile mu ng’anda iitwa ati Umutengo wa Lebanone.+

17 Kabili imfumu yapangile icipuna ca bufumu icikalamba ica meno ya nsofu no kubikako golde iisuma.+ 18 Kabili kwali amatabo mutanda (6) aya kunininapo ukuya pa cipuna ca bufumu, kabili kwali akapuna ka kunyantapo amakasa ku cipuna ca mfumu aka golde (fyalikuminkene), kabili kwali ne fya kushintilishapo amaboko ku kulyo na ku kuso ukwa cipuna, ne nkalamo+ shibili shaiminine ku mbali ya fya kushintilishapo amaboko.+ 19 Kabili kwali ne nkalamo+ ikumi na shibili (12) pa matabo mutanda ku kulyo na ku kuso. Takwali ubufumu bumbi ubwapangile icipuna ca bufumu nga ici.+ 20 Kabili ifya kunwenamo+ fyonse ifya Mfumu Solomone fyali ifya golde,+ ne fipe fyonse ifya ng’anda iitwa ati Umutengo wa Lebanone+ fyali ifya golde iisuma nga nshi. Tamwali ica silfere nangu cimo; silfere tayali kantu+ mu nshiku sha kwa Solomone. 21 Pantu amato ya mfumu yaleya ku Tarshishi+ pamo na babomfi ba kwa Hiramu.+ Amato ya ku Tarshishi yaleisamo umuku umo lyonse nga papita imyaka itatu, yaleleta golde na silfere,+ ameno ya nsofu,+ na fikolwe na bapikoko.+

22 E ico Imfumu Solomone yalikwete sana ifyuma+ na mano+ ukucila imfumu shonse isha pano isonde. 23 Kabili imfumu sha pe sonde shonse shalefwaya+ ukumona Solomone pa kuti shumfwe amano+ yakwe, ayo Lesa wa cine abikile mu mutima wakwe.+ 24 Kabili cila muntu aleleta ubupe,+ ifipe fya silfere ne fipe fya golde+ ne fya kufwala,+ ifyanso fya bulwi na mafuta ya balsamu, bakabalwe ne mfalashi cila mwaka.+ 25 Kabili Solomone akwete amatanga ya bakabalwe+ imyanda ine (400) na maceleta+ na bakabalwe amakana ikumi na yabili (12,000), kabili afibikile mu misumba ya maceleta+ kabili mupepi ne mfumu mu Yerusalemu. 26 Kabili aleteka imfumu shonse ukutula pa Mumana ukufika ku calo ca baPelishiti no kufika ku mupaka wa Egupti.+ 27 Kabili imfumu yalengele silfere mu Yerusalemu ukuba kwati mabwe; ne mbao sha fimuti fya mukedari yalengele shafula+ kwati fimuti fya mukunyu+ ifyaba mu Shefela.+ 28 Kabili kwali abalefumya bakabalwe+ ku Egupti na ku fyalo fimbi fyonse no kubaleta kuli Solomone.+

29 Nomba imilandu yashalako iya kwa Solomone,+ iya kubalilapo ne ya kulekelesha, bushe tayalembwa mu mashiwi ya kwa Natani+ kasesema na mu kusesema kwa kwa Ahiya+ umwina Shilo+ na mu fyalembwa fya fimonwa ifyo Ido,+ uwalemona ifimonwa, amwene pali Yeroboamu+ mwana Nebati?+ 30 Kabili Solomone atekele abena Israele bonse mu Yerusalemu imyaka amakumi yane (40). 31 Awe Solomone asukile alaala ukwalaala ifikolwe fyakwe. E ico bamushiikile mu Musumba wa kwa Davidi wishi;+ kabili Rehoboamu+ umwana wakwe alimupyene no kutendeka ukuteka.+

10 Kabili Rehoboamu+ aile ku Shekemu,+ pantu ku Shekemu e ko abena Israele bonse bamubikiile pa bufumu. 2 Nomba ilyo fye Yeroboamu+ mwana Nebati aumfwile ifi, ninshi acili mu Egupti,+ (pantu Yeroboamu alibutwike pa mulandu wa mfumu Solomone), Yeroboamu bwangu bwangu alibwelele ukufuma ku Egupti.+ 3 Awe batumine aba kuyamwita na bo bailemwita, kabili Yeroboamu na bena Israele bonse baishile no kulanda kuli Rehoboamu, abati:+ 4 “Wiso ena alengele ikoli lyesu ukuba ilyafina;+ nomba iwe angushako umulimo wa-afya uwa kwa wiso ne koli+ lyafina ilyo abikile pali ifwe, na ifwe tukalakubombela.”+

5 Na o abebele ati: “Lekeni papite inshiku shitatu. E lyo mukabwele kuli ine.” Awe abantu baliile. 6 Kabili Imfumu Rehoboamu yatendeke ukupandana amano+ na bakalamba abalebombela Solomone wishi ilyo ali uwa mweo, aiti: “Bushe batini nkabasuke shani aba bantu?”+ 7 Na bo basosele kuli ena abati: “Nga mwaba bwino kuli aba bantu no kubasekesha no kubeba amashiwi ayasuma,+ ninshi bakaba ababomfi benu inshiku shonse.”+

8 Lelo asuulile ifyo abakalamba bamupandile amano,+ kabili atendeke ukupandana amano na balumendo abo akulile na bo,+ abalemubombela.+ 9 Kabili abepwishe ati: “Bushe batini mano+ nshi mulempandako pa fyo tukasuka aba bantu abanjebele abati, ‘Angusheniko ikoli ilyo shinwe abikile pali ifwe’?”+ 10 Na balumendo abakulile nankwe bamwaswike abati: “Aba bantu abacilanda na imwe abati, ‘Wiso ena, alengele ikoli lyesu ukufina, lelo iwe, utwangushisheko’; ifi e fyo mukabebe,+ amuti, ‘Ine nkamucusha ukucila ifyo tata amucushishe.*+ 11 Tata ena abikile ikoli lyafina pali imwe nomba ine nkalilenga ukufininako.+ Tata amufopawile ifikoti, lelo ine nkamufopaula ifikoti ifyatapata nga bakaling’ongo.’”+

12 Awe Yeroboamu na bantu bonse baishile kuli Rehoboamu pa bushiku bwalenga shitatu, nga mulya mwine imfumu yasosele, aiti: “Mukabwele pa numa ya nshiku shitatu.”+ 13 Lelo imfumu yalibasasukiile.+ Awe Imfumu Rehoboamu yasuulile ukupanda amano+ kwa bakalamba,+ 14 kabili yalandile na bo ukulingana no kupanda amano ukwa balumendo,+ aiti: “Ndelenga ikoli lyenu ukufininako, kabili no kulunda nkalundako. Tata amufopawile ifikoti, lelo ine, nkamufopaula ifikoti fyatapata nga bakaling’ongo.”+ 15 Kabili imfumu tayakutike ku bantu; pantu uwalengele ifi ni Yehova Lesa+ wa cine pa kuti afikilishe amashiwi+ yakwe ayo asoseele muli Ahiya+ umwina Shilo+ kuli Yeroboamu mwana Nebati.+

16 Awe abena Israele bonse, apo imfumu yakeene ukumfwa kuli bena, e lyo ba-aswike imfumu, abati: “Bushe balatwakanyako ifya kwa Davidi?+ Tapali ubupyani bwesu muli mwana Yese.+ Natuleya kuli balesa besu,+ mwe bena Israele! Nomba uimwene ing’anda yobe, we Davidi.”+ E lyo abena Israele bonse baile ku matenti yabo.

17 Lelo abana ba kwa Israele abaleikala mu misumba ya kwa Yuda, Rehoboamu e walebateka.+

18 E lyo Imfumu Rehoboamu yatumine Hadoramu,+ uwaleangalila abalebomba umulimo wa kupatikishiwa, na bana ba kwa Israele bamupoolele amabwe,+ kabili alifwile. Ne Mfumu Rehoboamu yaninine mwi celeta no kufulumukila ku Yerusalemu.+ 19 Kabili abena Israele batwalilile ukusangukila+ aba mu ng’anda ya kwa Davidi ukufika na buno bushiku.

11 Ilyo Rehoboamu afikile mu Yerusalemu,+ apo pene alonganike aba mu ng’anda ya kwa Yuda na Benjamini,+ abaume bene bene aba bulwi amakana umwanda umo na makana amakumi cinekonsekonse (180,000), pa kuti ayelwisha+ abena Israele pa kuti babweseshe ubufumu kuli Rehoboamu. 2 E lyo nomba icebo ca kwa Yehova caishile kuli Shemaya+ umuntu wa kwa Lesa wa cine, aciti: 3 “Sosa kuli Rehoboamu mwana Solomone imfumu ya kwa Yuda+ na ku bena Israele bonse abali muli Yuda na Benjamini, auti, 4 ‘Yehova atila: “Mwiya mu kulwisha bamunyinenwe.+ Bwelelenimo cila muntu ku mwakwe, pantu nine nengele ukuti ici cicitike.”’”+ Awe baumfwilile ifyo Yehova asosele kabili tabailelwa na Yeroboamu.+

5 Awe Rehoboamu alitwalilile ukwikala mu Yerusalemu kabili akuulile imisumba ya malinga mu Yuda. 6 E ico akuulile cipya cipya Betelehemu+ na Etamu+ na Tekoa,+ 7 na Betsuri+ na Soko+ na Adulamu,+ 8 na Gati+ na Maresha+ na Sifi,+ 9 na Adoraimu na Lakishi+ na Aseka,+ 10 na Sora+ na Ayalone+ na Hebrone,+ imisumba ya malinga, iyali mu Yuda na Benjamini. 11 Kabili, akoseshe imisumba ya malinga+ no kubikamo intungulushi+ ne fya kulya na mafuta no mwangashi, 12 na mu misumba yalekanalekana yonse abikilemo inkwela+ ishikalamba na mafumo;+ kabili ali-ikoseshe nga nshi. Kabili abena Yuda na bena Benjamini bali bantu bakwe.

13 Kabili bashimapepo na bena Lebi abali mu Israele bonse baishile kuli ena ukufuma mu fitungu fyabo fyonse. 14 Pantu abena Lebi bashiile impanga shabo isha mulemfwe+ ne fyuma+ fyabo no kwisa ku Yuda na ku Yerusalemu,+ pantu Yeroboamu+ na bana bakwe babafumishe+ pa mulimo wa kubombela Yehova bushimapepo. 15 Kabili afwaile bashimapepo aba kubombela pa fifulo fya kupepelapo+ na ba kubombela ifibanda fimoneka nge mbushi+ e lyo na ba kubombela abana ba ng’ombe abo apangile.+ 16 Kabili ababakonkele abafumine mu mikowa yonse iya bena Israele, abalepeela imitima yabo ku kufwaya Yehova Lesa wa bena Israele balishile ku Yerusalemu+ pa kuti batuule amalambo+ kuli Yehova Lesa wa fikolwe fyabo. 17 Kabili balekosha ubufumu bwa kwa Yuda+ no kukosha Rehoboamu mwana Solomone imyaka itatu, pantu baendele mu nshila ya kwa Davidi na Solomone imyaka itatu.+

18 E lyo Rehoboamu aupile Mahalati umwana mwanakashi wa kwa Yerimote mwana Davidi, kabili umwana wa kwa Abihaili umwana mwanakashi wa kwa Eliabu+ mwana Yese. 19 Awe umuya inshiku amufyalile abana, Yeushi na Shemaria na Sahamu. 20 E lyo aupile na Maaka+ umwishikulu wa kwa Abishalomu.+ Umuya inshiku amufyalile Abiya+ na Atai na Sisa na Shelomiti. 21 Kabili Rehoboamu atemenwe nga nshi Maaka umwishikulu wa kwa Abishalomu ukucila abakashi bakwe+ bambi na bakanakashi bakwe; pantu aupile abanakashi ikumi na cinekonsekonse (18), na bakanakashi amakumi mutanda (60), kabili afyele abana abaume amakumi yabili na cinekonsekonse (28) na bana abanakashi amakumi mutanda (60). 22 Awe Rehoboamu asontele Abiya mwana Maaka ukuba umukalamba, ukuba intungulushi pali bamunyina, pantu aletontonkanya pa kumubika pa bufumu. 23 Lelo, ali no mucetekanya+ kabili asontele bamo pa bana bakwe bonse mu calo conse ica kwa Yuda na Benjamini,+ mu misumba ya malinga yonse,+ no kubapeela ifya kulya ifingi+ no kubafwaila abanakashi abengi.+

12 Nomba, ilyo ubufumu bwa kwa Rehoboamu bwapampamikwe+ kabili ilyo akosele, alekele ukukonka amafunde ya kwa Yehova,+ pamo na bena Israele+ bonse. 2 Kabili mu mwaka walenga isano uwa kuteka kwa Mfumu Rehoboamu,+ Shishaki+ imfumu ya ku Egupti aishile ku kulwisha Yerusalemu, (pantu tabali ne cishinka kuli Yehova,)+ 3 na maceleta+ ikana ne myanda ibili (1,200) na bale-endela pali bakabalwe amakana amakumi mutanda (60,000); kabili abantu abo ali na bo abafumine ku Egupti bali imintapendwa+—abena Libya,+ abena Sukimu na bena Etiopia.+ 4 Kabili apokele imisumba ya malinga iya bena Yuda+ kabili asukile aisa na ku Yerusalemu.+

5 Nomba Shemaya+ kasesema aishile kuli Rehoboamu na bacilolo ba bena Yuda abalongene mu Yerusalemu pa mulandu wa kwa Shishaki, kabili atile kuli bena: “Yehova atila, ‘Imwe namunsha,+ e ico na ine namupeela+ mu maboko ya kwa Shishaki.’” 6 E lyo bacilolo ba kwa Israele ne mfumu baicefeshe+ no kutila: “Yehova mulungami.”+ 7 Kabili ilyo Yehova amwene+ ukuti baicefya, icebo ca kwa Yehova cafikile kuli Shemaya,+ aciti: “Nabaicefya.+ Nshabonaule,+ kabili nomba line nalabapususha, kabili icipyu candi tacapongololwe pali Yerusalemu ku kuboko kwa kwa Shishaki.+ 8 Lelo bakaba ababomfi bakwe,+ pa kuti bakeshibe ubupusano bwaba pa kubombela+ ine no kubombela amabufumu ya mu calo.”+

9 E ico Shishaki+ Imfumu ya ku Egupti yaishile ku kulwisha Yerusalemu no kubuula ifipe fya mu ng’anda ya kwa Yehova+ ne fipe fya mu ng’anda ya mfumu.+ Asendele fyonse; kabili asendele ne nkwela sha golde shonse isho Solomone apangile.+ 10 E ico Imfumu Rehoboamu yapangiilepo inkwela sha mukuba, kabili yashipeele na mu minwe ya bakalamba abaleangalila inkombe,+ abalinshi abalelonda+ pa mwinshi wa ng’anda ya mfumu.+ 11 Kabili lyonse imfumu nga yaisa ku ng’anda ya kwa Yehova, inkombe shaleingila no kushisenda no kushibwesesha mu muputule wa balinshi uwa nkombe.+ 12 Kabili apo ali-icefeshe, ubukali bwa kwa Yehova bwalifumine pali ena,+ kabili tatontonkenye pa kubonaula bonse.+ E lyo kabili mwali ne fisuma muli Yuda.+

13 Kabili Imfumu Rehoboamu yatwalilile ukuikosha mu Yerusalemu no kutwalilila ukuteka; pantu Rehoboamu+ ali ne myaka amakumi yane na umo (41) ilyo atendeke ukuteka, kabili atekele imyaka ikumi na cinelubali (17) mu Yerusalemu, umusumba+ uo Yehova asalile mu mikowa yonse iya kwa Israele ku kubikamo ishina lyakwe.+ Ne shina lya kwa nyina ni Naama,+ umwina Amone.+ 14 Lelo acitile ifyabipa,+ pantu takoseshe umutima wakwe ukufwaya Yehova.+

15 Nomba imilandu ya kwa Rehoboamu, iya kubalilapo ne ya kulekelesha,+ bushe tayalembwa mu mashiwi ya kwa Shemaya+ kasesema na Ido+ uwalemona ifimonwa ukulingana no kulembwa kwa ntuntuko sha kufyalwa? Kabili lyonse kwaleba inkondo pali Rehoboamu+ na Yeroboamu.+ 16 Awe Rehoboamu asukile alaala ukwalaala ifikolwe+ fyakwe kabili bamushiikile mu Musumba wa kwa Davidi;+ kabili Abiya+ umwana wakwe alimupyene no kutendeka ukuteka.

13 Mu mwaka walenga ikumi na cinekonsekonse (18) uwa kuteka kwa Mfumu Yeroboamu e mo Abiya atendeke ukuteka icalo ca Yuda.+ 2 Atekele imyaka itatu mu Yerusalemu, kabili ishina lya kwa nyina ni Mikaya,+ umwana mwanakashi wa kwa Uriele uwa ku Gibea.+ Kabili kwali inkondo pali Abiya na Yeroboamu.+

3 E ico ilyo Abiya aile ku kulwa ali na bashilika amakana imyanda ine (400,000) abaume impalume aba bulwi,+ abakosa. Awe Yeroboamu ali-ipekenye ukuyalwa kabili ali na baume amakana imyanda cinekonsekonse (800,000), abaume abakosa, impalume, kabili aba maka.+ 4 Kabili Abiya nomba aiminine pa Lupili lwa Semaraimu, ulwabela mu calo ca mpili ica kwa Efraimu,+ no kutila: “Ng’umfweni, mwe mfumu Yeroboamu na mwe bena Israele bonse. 5 Bushe tamwaishiba ukuti Yehova Lesa wa bena Israele alipeela Davidi+ ubufumu pali Israele umuyayaya,+ kuli ena na ku bana bakwe,+ pa kupangana nankwe icipangano ca mucele?+ 6 Kabili Yeroboamu+ mwana Nebati, umubomfi+ wa kwa Solomone mwana Davidi, alimine no kupondokela+ shikulu wakwe.+ 7 Kabili abaume abashakwata ifya kucita,+ abaume ifinangwa,+ balelongana kuli ena. Awe basukile bacila Rehoboamu mwana Solomone amaka, ninshi Rehoboamu+ ali umwaice kabili uwa mwenso,+ kabili alifililwe ukubalwisha.

8 “E ico nomba imwe mulefwaya ukulwisha ubufumu bwa kwa Yehova mu kuboko kwa bana ba kwa Davidi,+ pantu muli ibumba ilikalamba+ kabili namukwata abana ba ng’ombe aba golde abo Yeroboamu amupangiile ukuba balesa.+ 9 Bushe tamwatamfya bashimapepo ba kwa Yehova,+ abana ba kwa Aarone, na bena Lebi, kabili bushe tamuleisalila bashimapepo nge ficita abantu ba mu fyalo fimbi?+ Kabili onse uwaishile no kuicita shimapepo pa kupeela umwana wa ng’ombe na basukusuku cinelubali (7), aleba shimapepo wa bashili balesa.+ 10 Lelo ifwe, Yehova e Lesa+ wesu, kabili tatwamusha; lelo bashimapepo balebombela Yehova, abana ba kwa Aarone, na bena Lebi mu mulimo wabo.+ 11 Kabili balefutumuna imituulo ya koca kuli Yehova cila lucelo e lyo na cila cungulo+ ne fyanunkila;+ kabili pa matebulo aya golde iisuma pali umukate,+ kabili kuli ica kutekapo inyali+ ica golde ne nyali sha ciko isha kusanika cila cungulo;+ pantu tuleumfwila+ Yehova Lesa wesu, lelo imwe mwalimusha.+ 12 Kabili, moneni! ku ntanshi yesu kuli Lesa+ wa cine na bashimapepo+ bakwe abali na mapenga+ ya kulisha ku kubila ubulwi pali imwe. Mwe bana ba kwa Israele, mwilwisha Yehova Lesa wa fikolwe fyenu,+ pantu tamwakatunguluke.”+

13 Lelo, Yeroboamu ena atumine aba kubabelamina ukubashinguluka ku numa yabo, kabili kwali ababeleme ku ntanshi ya bena Yuda na ku numa yabo.+ 14 Ilyo abena Yuda bapilibwike, moneni, kwali abalebalwisha ku ntanshi na ku numa.+ Kabili baliliile kuli Yehova,+ ninshi bashimapepo balelisha nga nshi amapenga. 15 Kabili abaume ba kwa Yuda baweleshe ukuwelesha kwa bulwi.+ Nomba, ilyo abaume aba Yuda baweleshe ukuwelesha kwa bulwi, Lesa wa cine acimfishe+ Yeroboamu na bena Israele bonse ku cinso ca kwa Abiya+ na Yuda. 16 Kabili abana ba kwa Israele e pa kufulumuka abena Yuda, e lyo Lesa abapeele mu minwe yabo.+ 17 Kabili Abiya na bantu bakwe baipeye abantu abengi; kabili abaume abakosa amakana imyanda isano (500,000) aba mu Israele e bafwile. 18 E fyo abana ba kwa Israele bacefiwe pali ilya nshita, lelo abana ba kwa Yuda balicimfishe pantu bashintilile+ pali Yehova Lesa wa fikolwe fyabo. 19 Kabili Abiya akonkele Yeroboamu ulubilo no kumupoka imisumba, Betele+ ne mishi ya uko, Yeshana ne mishi ya uko, na Efrainu ne misumba ya uko.+ 20 Kabili Yeroboamu tali na maka na kabili+ mu nshiku sha kwa Abiya; lelo Yehova alimuumine,+ kabili alifwile.

21 Kabili Abiya atwalilile ukuikosha.+ Umuya inshiku, aupile abanakashi ikumi na bane (14),+ kabili akwete abana abaume+ amakumi yabili na babili (22) na bana abanakashi ikumi na mutanda (16). 22 Kabili imilandu yashalako iya kwa Abiya, ne mibele yakwe ne fyo asosele, fyalilembwa mu mashiwi ya kwa Ido kasesema.+

14 Awe Abiya asukile alaala ukwalaala ifikolwe fyakwe,+ kabili bamushiikile mu Musumba wa kwa Davidi;+ kabili Asa+ umwana wakwe alimupyene no kutendeka ukuteka. Mu nshiku shakwe, icalo cali tondolo+ imyaka ikumi (10).

2 Kabili Asa alecita ifisuma kabili ifyalungama mu menso ya kwa Yehova Lesa wakwe. 3 E ico aonawile ifiipailo+ fya bena fyalo ne fifulo balepepelapo+ no kutobaula ifimabwe ifyo baimike+ no kuputaula ifimuti ifyo baimike.+ 4 Kabili, aebele abena Yuda ukufwaya+ Yehova Lesa wa fikolwe fyabo no kukonka amafunde+ ne fipope.+ 5 Awe aonawile ififulo balepepelapo ne fyo balefutumwinapo ifyanunkila mu misumba yonse iya kwa Yuda;+ kabili mu bufumu mwali tondolo+ ilyo aleteka. 6 Kabili akuulile imisumba ya malinga mu Yuda,+ pantu icalo cali tondolo; kabili takwali uwalemulwisha mu myaka iyi, pantu Yehova amulengele ukutuusha.+ 7 E ico atile ku baYuda: “Natukuule iyi misumba no kushingulushako amalinga+ ne mpungu,+ ne fiibi ne mipindo.+ Natukwata icalo, pantu twalifwaya Yehova Lesa wesu.+ Twalimufwaya, na o natulenga ukutuusha konse.”+ Kabili balekuula no kutunguluka.+

8 Kabili Asa ali ne bumba lya bashilika abalesenda inkwela shikalamba+ na mafumo,+ amakana imyanda itatu (300,000) abafumine mu Yuda.+ Kabili abafumine muli Benjamini abalesenda inkwela na baishiba ukubomfya ubuta+ bali amakana imyanda ibili na makana amakumi cinekonsekonse (280,000).+ Bonse aba bali baume impalume shakosa, aba maka.

9 Pa numa Sera umwina Etiopia+ aile ku kubalwisha ne bumba lya bashilika umwali abaume milioni imo (1,000,000)+ na maceleta imyanda itatu (300), kabili baishile ku Maresha.+ 10 E lyo Asa aile ku kumulwisha no kuipekanishisha ukulwa mu mupokapoka wa Sefata pa Maresha. 11 Kabili Asa aliliile kuli Yehova Lesa+ wakwe no kutila: “Mwe Yehova, imwe takwaba ukuti bengi nelyo tabakwata amaka, mulaafwa.+ Twafweni, mwe Yehova Lesa wesu, pantu twashintilila pali imwe,+ kabili ni mwi shina+ lyenu twishiile ku kulwisha ili bumba. Mwe Yehova, ni mwe Lesa wesu.+ Mwileka umuntunse amucishe amaka.”+

12 E lyo Yehova acimfishe+ abena Etiopia pa menso ya kwa Asa na pa menso ya kwa Yuda, kabili abena Etiopia balifulumwike. 13 Kabili Asa na bantu abo ali na bo babakonkele ulubilo ukufika ku Gerari,+ kabili abena Etiopia balefwa fye mpaka pabula no wa kupusukapo pali bena; pantu balitobawilwe pa ntanshi ya kwa Yehova+ na pa ntanshi ya nkambi yakwe.+ E lyo basendele ifyo bapokolwele ifingi nga nshi.+ 14 Kabili bacimfishe imisumba yonse iyali mupepi na Gerari, pantu baletiina+ Yehova; kabili bapokolwele ifya mu misumba yonse, pantu mwali ifingi ifya kupoka muli yena.+ 15 Kabili basanshile na matenti+ ya bacemi no kusenda+ ifitekwa ifingi nga nshi ne ngamila,+ e lyo babwelele ku Yerusalemu.

15 Nomba umupashi+ wa kwa Lesa waishile pali Asaria mwana Odedi.+ 2 E ico aile ku mfumu Asa no kuyeba ati: “Ng’umfweni, mwe Asa na mwe baYuda bonse na mwe bena Benjamini! Yehova akulaba na imwe cikulu fye na imwe mwaba nankwe;+ kabili nga mwamufwaya,+ akaleka mukamusange, lelo nga mwamusha na o akamusha.+ 3 Kabili inshiku ishingi Israele+ ali uwabula Lesa wa cine kabili takwali shimapepo wa kusambilisha+ kabili takwali amafunde. 4 Lelo ilyo babwelele kuli Yehova Lesa wa bena Israele+ mu kucula+ kwabo no kumufwaya, abalekele bamusanga.+ 5 Kabili muli shilya nshiku takwali uwale-enda umutende,+ pantu kwali icimfulunganya sana ica bekashi bonse aba mu fyalo.+ 6 Kabili balibatobawile, uluko ukutobaula uluko,+ no musumba ukutobaula umusumba unankwe, pantu Lesa alibafulungenye ku musango onse uwa kucula.+ 7 Lelo imwe, shipeni+ kabili mwileka amaboko yenu yatompoke,+ pantu kuli icilambu ku mulimo wenu.”+

8 Ilyo Asa aumfwile aya mashiwi no kusesema kwa kwa Odedi+ kasesema, alishipile no kulenga ifya bunani+ ukupwa mu calo conse ica Yuda na Benjamini na mu misumba iyo apokele mu calo ca mpili ica bena Efraimu,+ kabili akuulile cipya cipya icipailo ca kwa Yehova icali ku ntanshi ya muputule wa kwingililapo uwa kwa Yehova.+ 9 Kabili alonganike abena Yuda na bena Benjamini+ bonse pamo na balebeshi+ abafumine kuli Efraimu na Manase na Simeone, pantu abengi aba mu Israele bayalukile kuli ena ilyo bamwene ukuti Yehova Lesa wakwe ali nankwe.+ 10 E ico balongene pamo mu Yerusalemu mu mweshi walenga itatu uwa mu mwaka walenga ikumi na isano (15) ukutula apo Asa atendekele ukuteka. 11 E lyo baipeye inama sha kutuula amalambo kuli Yehova bulya bwine bushiku ukufuma pa fyo bapokolwele ifyo baletele, ing’ombe imyanda cinelubali (700) ne mpaanga amakana cinelubali (7,000). 12 Kabili, bapangene icipangano+ ca kufwaya Yehova Lesa wa fikolwe fyabo ne mitima yabo yonse ne myeo yabo yonse;+ 13 ukuti onse uushali na kufwaya Yehova Lesa wa kwa Israele ali no kufwa,+ nampo nga mulanda nelyo mucindami,+ umwaume nelyo umwanakashi.+ 14 E ico balapile+ kuli Yehova ne shiwi ilikalamba no kupunda kwa kusekelela na mapenga ne ntandala. 15 Kabili abena Yuda bonse balisekelele+ pa mulapo balapile; pantu balapile ne mitima yabo yonse kabili bali ne nsansa nga nshi pa kumufwaya, kabili balimusangile;+ kabili Yehova alebalenga ukutuusha mu calo conse.+

16 Maaka+ nakulu ena, imfumu Asa yalimufumishe+ pali bunamfumu,+ pantu alipangile akalubi ka bunani akalebomfiwa mu kupepa icimuti caimikwa;+ kabili Asa aonawile akalubi+ kakwe aka bunani no kukashonaula no kukocela+ mu mupokapoka wa Kidrone.+ 17 Kabili ififulo fya kupepelapo+ tafyalobele mu Israele.+ Asa fye e wali no mutima wa cishinka inshiku shakwe shonse.+ 18 Kabili ifintu ifyo wishi alengele ukuba ifya mushilo ne fintu+ ifyo umwine alengele ukuba ifya mushilo Asa afiletele mu ng’anda ya kwa Lesa wa cine, silfere na golde ne fipe.+ 19 Lelo, takwali inkondo ukufika mu mwaka walenga amakumi yatatu na isano (35) ukutula apo Asa atendekele ukuteka.+

16 Mu mwaka walenga amakumi yatatu na mutanda (36) ukutula apo Asa atendekele ukuteka, Baasha+ imfumu ya kwa Israele aile ku kulwisha Yuda no kutendeka ukukuula umusumba wa Rama,+ pa kuti kwiba nangu umo uwa kufuma nelyo ukwingila kuli Asa imfumu ya kwa Yuda.+ 2 Awe Asa afumishe silfere na golde ukufuma mu cipao ca ng’anda ya kwa Yehova+ ne cipao ca ng’anda ya mfumu+ no kutumina Ben-hadadi+ imfumu ya bena Siria,+ uwaleikala mu Damaseke,+ no kutila: 3 “Paliba icipangano pali ine na iwe e lyo na pali tata na wiso. Mona nakutumina silfere na golde. Kabiye, katobe icipangano ico wapangene na Baasha+ imfumu ya kwa Israele, pa kuti afume kuli ine.”+

4 E ico Ben-hadadi alikutike ku Mfumu Asa no kutuma abakalamba ba bashilika bakwe ku kulwisha imisumba ya kwa Israele, kabili bailecimfya Iyone+ na Dani+ na Abelemaimu+ ne ncende baletutilamo+ ifintu fyonse iya mu misumba ya kwa Naftali.+ 5 Nomba ilyo Baasha aumfwile fye ifi, alekele ukukuula Rama apo pene no kuleka umulimo wakwe.+ 6 Lelo Asa imfumu abuulile abaYuda bonse,+ kabili basendele amabwe ayali mu Rama+ ne mbao isho Baasha akuuliileko,+ kabili Asa atendeke ukukuulilako Geba+ na Mispa.+

7 E lyo Hanani+ kamona aishile kuli Asa imfumu ya bena Yuda no kumweba ati: “Apo washintilile pa mfumu ya bena Siria+ kabili tawashintilile pali Yehova Lesa obe,+ pali uyu mulandu amabumba ya bashilika aya mfumu ya ku Siria nayafulumuka mu minwe yobe. 8 Bushe abena Etiopia+ na bena Libya+ tabali libumba ilikalamba, bushe tabali na maceleta ayengi na bale-endela pali bakabalwe abengi;+ kabili apo washintilile pali Yehova, bushe tabapeele mu minwe yobe?+ 9 Pantu, amenso+ ya kwa Yehova, yalamona mu calo conse+ pa kuti alange amaka yakwe aya kwafwa ababa ne mitima+ ya cishinka kuli ena. Kwena ici wacita ca buwelewele,+ pantu ukufuma nomba kwakulaba inkondo kuli iwe.”+

10 Lelo Asa afuliilwe kamona no kumubika mu makusu+ mu cifungo, pantu alimukalipile pali ifi.+ Kabili Asa atendeke ukucushishamo+ abantu bambi pali ilya ine nshita. 11 Kabili moneni! imilandu ya kwa Asa, iya kubalilapo ne ya kulekelesha, yalilembwa mwi Buuku+ lya Shamfumu sha baYuda na bena Israele.

12 Kabili mu mwaka walenga amakumi yatatu na pabula (39) uwa kuteka kwakwe, Asa alwele ubulwele bwa ku makasa mpaka alwalisha;+ kabili na mu kulwala kwakwe tafwaile Yehova+ lelo afwaile bakondapa.+ 13 Awe Asa aleele ukwalaala ifikolwe fyakwe+ kabili afwile mu mwaka walenga amakumi yane na umo (41) uwa kuteka kwakwe. 14 E ico bamushiikile mu nshiishi+ yakwe iyacindama iyo aimbiile umwine mu Musumba wa kwa Davidi;+ kabili bamulambalike pa busanshi apabikilwe amafuta ya balsamu+ ne misango yalekanalekana iya mafuta yasakanishiwa+ kabili ayaibela.+ Kabili pa cililo cakwe, bamoceleele+ ifyanunkila ifingi nga nshi.

17 Kabili Yehoshafati+ umwana wakwe alimupyene no kutendeka ukuteka no kukosha ubufumu bwakwe pa bena Israele. 2 Kabili abikile abashilika mu misumba ya malinga yonse iya mu Yuda no kubika amabumba ya bashilika mu calo ca bena Yuda na mu misumba ya bena Efraimu iyo Asa wishi apokele.+ 3 Kabili Yehova ali na Yehoshafati,+ pantu aendele mu nshila sha kwa Davidi icikolwe+ cakwe kabili tafwaile baBaali.+ 4 Pantu alefwaya+ Lesa wa kwa wishi kabili aendele mu mafunde yakwe,+ kabili talecita nge fyalecita abena Israele+. 5 Kabili Yehova apampamike ubufumu mu minwe yakwe;+ kabili abena Yuda bonse balepeela Yehoshafati ifya bupe,+ kabili alikwete ifyuma ifingi no kucindama nga nshi.+ 6 Kabili umutima wakwe wali uwashangila ukwenda mu nshila+ sha kwa Yehova, kabili aonawile ne fifulo balepepelapo+ no konaula ifimuti ifyo baimike+ mu Yuda.

7 Kabili mu mwaka walenga itatu uwa kuteka kwakwe atumine aba kuyaita bacilolo bakwe, e kuti Ben-hayili na Obadia na Sekaria na Netanele na Mikaya, pa kuti balesambilisha mu misumba ya mu Yuda, 8 kabili bali pamo na bena Lebi. Amashina ya aba bena Lebi ni Shemaya na Netania na Sebadia na Asaele na Shemiramote na Yehonatani na Adoniya na Tobiya na Tob-adoniya abena Lebi, kabili bali pamo na Elishama na Yehoramu bashimapepo.+ 9 Kabili batendeke ukusambilisha+ abantu mu Yuda, kabili balikwete ibuuku lya mafunde+ ya kwa Yehova; kabili baleya mu misumba yonse iya baYuda no kulasambilisha abantu.

10 Awe umwenso+ wa kutiina Yehova waishile pa mabufumu yonse aya mu fyalo fyali mupepi na Yuda, kabili tabalwishishe Yehoshafati.+ 11 Kabili abaPelishiti bamo baletuula kuli Yehoshafati ifya bupe+ ne ndalama.+ Abena Arabia+ na bo balemuletela ifitekwa, basukusuku amakana cinelubali ne myanda cinelubali (7,700) na basawe amakana cinelubali ne myanda cinelubali.+

12 Kabili Yehoshafati aile alelunduluka no kukulilako icine cine;+ kabili akuulile imisumba ya malinga+ ne misumba iyo baletutilamo+ ifintu mu Yuda. 13 Kabili alikwete imilimo iingi mu mishi ya mu Yuda; kabili mwali abashilika,+ abaume aba maka kabili impalume+ mu Yerusalemu. 14 Kabili iyi e yali imilimo yabo ukulingana na mayanda ya bashibo: Muli Yuda bacilolo ba pa bantu amakana, Adna umukalamba, kabili ali pamo na baume aba maka kabili impalume amakana imyanda itatu (300,000).+ 15 Kabili aleangalila Yehohanani umukalamba, kabili ali pamo na bantu amakana imyanda ibili na makana amakumi cinekonsekonse (280,000). 16 Kabili aleangalila Amasia mwana Sikri uwaitemenwe+ ukubombela Yehova, kabili ali pamo na baume aba maka kabili impalume amakana imyanda ibili (200,000). 17 Kabili ukufuma muli Benjamini+ mwali umwaume uwa maka kabili impalume Eliada, kabili ali pamo na baume amakana imyanda ibili (200,000) abali no buta ne nkwela.+ 18 Kabili aleangalila Yehosabadi, e lyo kabili ali pamo na baume amakana umwanda umo na makana amakumi cinekonsekonse (180,000) abaipekenye ukulwa inkondo. 19 Aba e balebombela imfumu ukufumyako balya imfumu yabikile mu misumba ya malinga+ mu Yuda monse.

18 Kabili Yehoshafati anonkele ifyuma ifingi kabili alicindeme nga nshi;+ lelo apangene icipangano ca cupo+ na Ahabu.+ 2 E ico ilyo imyaka yapitilepo aile kuli Ahabu ku Samaria;+ kabili Ahabu aipaile Yehoshafati na bantu abo ali na bo ilambo lya mpaanga+ ne ng’ombe ishingi. Kabili atendeke ukumusembeleka+ ukuti aye nankwe mu kulwisha abena Ramote-gileadi.+ 3 Kabili Ahabu imfumu ya bena Israele aebele Yehoshafati imfumu ya kwa Yuda ati: “Bushe kuti twaya na iwe ku Ramote-gileadi?”+ Na o amwaswike ati: “Ine cimo na iwe, kabili abantu bandi cimo na bantu bobe kabili tuli nobe mu bulwi.”+

4 Lelo Yehoshafati aebele imfumu ya kwa Israele ati: “Tala ipusha+ tumfwe ifyo Yehova alasosa.” 5 E ico imfumu ya kwa Israele yalonganike bakasesema+ imyanda ine (400) no kubepusha aiti: “Bushe tuyelwisha Ramote-gileadi, nangu twiya?”+ Na bo batile: “Kabiyeni, kabili Lesa wa cine alepeela uyu musumba mu minwe ya mfumu.”

6 Lelo Yehoshafati asosele ukuti: “Bushe takuli kasesema wa kwa Yehova na umbi kuno?+ Nga e ko ali, natwipushishe muli ena.”+ 7 Kabili imfumu ya kwa Israele yatile kuli Yehoshafati:+ “Kucili umuntu na umbi+ uwa kwipushishamo kuli Yehova, nomba ine nalimupata,+ pantu inshiku shakwe shonse tansesemena ifisuma iyo, kano ifibi.+ Ni Mikaya mwana Imla.”+ Lelo Yehoshafati atile: “Imfumu iisosa icintu ca musango yo.”+

8 Awe imfumu ya kwa Israele yaitile cilolo wa kwi sano+ no kusosa aiti: “Leta Mikaya mwana Imla bwangu bwangu.”+ 9 Kabili imfumu ya Israele na Yehoshafati imfumu ya Yuda baikele cila muntu pa cipuna cakwe ica bufumu, nabafwala ne fya kufwala fya mfumu,+ kabili baikele pa ca kupuminapo ingano ica pa mwinshi wa musumba wa Samaria; kabili bakasesema bonse balecita ku cinso cabo nga filya fine bakasesema bacita.+ 10 E lyo Sidekia mwana Kenaana apangile insengo+ sha cela no kutila: “Ifi e fyo Yehova asosa,+ ‘Kuli ishi nsengo e ko ukasunkila abena Siria mpaka ukubalofye.’”+ 11 Na bakasesema bambi bonse balesesema fimo fine, abati: “Kabiyeni ku Ramote-gileadi no kucimfya,+ kabili Yehova alepeela uyu musumba mu minwe ya mfumu.”+

12 Kabili inkombe iyo batumine ku kwita Mikaya yamwebele aiti: “Mona! Amashiwi ayo bakasesema bonse balandile ku mfumu nayawama; na iwe ulande amashiwi yamo yene nge fyo balandile+ kabili ulande ifisuma.”+ 13 Lelo Mikaya atile: “Na pali Yehova,+ ifyo Lesa wandi alenjeba, e fyo nalalanda.”+ 14 E lyo aile ku mfumu, ne mfumu yamwipwishe aiti: “Mikaya, bushe tuleya ku Ramote-gileadi ku kulwa nangu twiyako?” Na o apo pene ayaswike ati: “Kabiyeni no kucimfya; kabili bakapeelwa mu minwe yenu.”+ 15 Awe imfumu yamwipwishe aiti: “Bushe miku inga nkakulenga ukulapa+ ukuti taufwile ukunjeba cimbi kano icishinka mwi shina lya kwa Yehova?”+ 16 E ico atile: “Ndemona abena Israele bonse nabasalangana pa mpili, kwati ni mpaanga ishabula kacema.+ Kabili Yehova atile: ‘Aba tabakwata bashikulwibo.+ Lekeni babwelelemo umutende cila muntu ku mwakwe.’”+

17 E lyo imfumu ya kwa Israele yaebele Yehoshafati aiti: “Bushe nshacikweba ukuti, ‘Tansesemene ifisuma kano fye ifibi’?”+

18 Kabili Mikaya akonkenyepo ukusosa ati: “E ico umfweni ifyo Yehova asosa:+ Ndemona Yehova naikala pa cipuna+ cakwe ica bufumu ne bumba+ lyakwe lyonse ilya mu muulu naliminina ku kulyo kwakwe na ku kuso kwakwe.+ 19 Na Yehova atile, ‘Nani alayabepa Ahabu imfumu ya kwa Israele pa kuti ayeipaiwa mu Ramote-gileadi?’ Awe batendeke ukulandapo, uyu alesosa ifi, umbi na o alesosa ifi.+ 20 Awe umupashi+ umo waishileiminina ku cinso ca kwa Yehova, auti, ‘Ine nalayamubepa.’ Na o Yehova awipwishe ati, ‘Walayamubepa shani?’+ 21 Na o watile, ‘Ndeyaba umupashi wa bufi mu tunwa twa bakasesema bakwe bonse.’+ E ico Lesa atile, ‘Walayamubepa, kabili no kucimfya ulecimfya.+ Kabiye, kacite ifyo fine.’+ 22 E ico nomba Yehova nabika umupashi wa bufi mu tunwa twa bakasesema benu aba;+ lelo Yehova umwine alandile ukuti ububi buleisa pali iwe.”+

23 Nomba Sidekia+ mwana Kenaana+ alipaleme no kuuma Mikaya+ pe saya+ no kutila: “Bushe umupashi wa kwa Yehova wacipita shani pali ine no kulanda na iwe?”+ 24 Na o Mikaya atile: “Mona! Iwe ukamona ifyo umupashi upitile mu bushiku+ bulya ilyo ukengila mu muputule wa mu kati ku kufisama.”+ 25 E lyo imfumu ya kwa Israele yatile: “Buuleni Mikaya no kumubwesesha kuli Amone mushika wa musumba na kuli Yoashi umwana wa mfumu.+ 26 Kabili mutile, ‘Imfumu yatila: “Bikeni uyu muntu mu cifungo+ no kulamupeela ifya kulya ifinono+ na menshi ayanono mpaka nkabwele umutende.”’”+ 27 Na o Mikaya atile: “Nga cine cine mwabwela umutende, ninshi Yehova talandile na ine.”+ Kabili asosele no kuti: “Umfweni mwe bantu bonse.”+

28 Awe imfumu ya kwa Israele na Yehoshafati imfumu ya kwa Yuda baile ku Ramote-gileadi.+ 29 Imfumu ya ku Israele nomba yatile kuli Yehoshafati: “Ine nalaifungushanya+ no kuya ku bulwi, lelo iwe ufwale fye ifya kufwala fyobe ifya mfumu.”+ Awe imfumu ya ku Israele yali-ifungushenye e lyo baile ku kulwa.+ 30 Nomba imfumu ya Siria, yena yaebele abakalamba ba bashilika ba iko aba maceleta, aiti: “Mwilwa no muntu uushacindama nelyo uwacindama, kano fye ne mfumu ya kwa Israele.”+ 31 Nomba ilyo abakalamba ba maceleta bamwene Yehoshafati, batile: “Uyu e mfumu ya kwa Israele.”+ E ico balipilibwike pa kuti balwe nankwe; na o Yehoshafati e pa kupunda mutuule,+ na Yehova alimwafwile,+ kabili Lesa abatalwishe kuli ena.+ 32 Nomba ilyo fye abakalamba ba maceleta bamwene ukuti te mfumu ya kwa Israele, apo pene balekele ukumukonka.+

33 Lelo umuntu umo apoosele umufwi ukwabula ukwishiba, kabili alashile+ imfumu ya kwa Israele apalundanina ica kucinga icifuba, kabili imfumu yaebele uwale-ensha iceleta ati:+ “Alula ukuboko kobe, no kumfumya mu nkambi, pantu nabancena icibi.”+ 34 Kabili ubulwi bwalekoselako fye bulya bushiku, ne mfumu ya kwa Israele yabikilwe mwi celeta naiminina ukulungatana na bena Siria ukufika icungulo; kabili yasukile yafwa ilyo akasuba kalewa.+

19 Awe Yehoshafati imfumu ya bena Yuda abweleele umutende+ ku ng’anda ku mwakwe ku Yerusalemu. 2 Nomba Yehu+ mwana Hanani+ uwalemona ifimonwa+ aile kuli ena no kwipusha Imfumu Yehoshafati ati: “Bushe ababifi bafwile ukwafwilishiwa,+ kabili bushe abapata+ Yehova e bo ufwile ukutemwa?+ Pali uyu mulandu pali ubukali+ pali iwe ukufuma kuli Yehova. 3 Lelo, kuli ifisuma+ ifisangilwe muli iwe, pantu walifumya mu calo+ ifimuti fyaimikwa kabili waliteyanya umutima obe ku kufwaya Lesa wa cine.”+

4 Awe Yehoshafati aleikala mu Yerusalemu; kabili atendeke ukuya ku bantu ukufuma ku Beere-sheba+ ukufika na ku calo ca mpili ica kwa Efraimu,+ pa kuti ababweseshe kuli Yehova Lesa wa fikolwe fyabo.+ 5 Kabili abikile abapingushi mu calo conse, mu misumba ya malinga yonse iya mu calo ca Yuda, mu musumba no musumba.+ 6 Kabili aebele abapingushi ati: “Bikeni amano ku fyo mulecita,+ pantu te muntu mulepingwila lelo ni Yehova;+ kabili ali na imwe ilyo mulepingula.+ 7 E ico nomba muletiina+ Yehova.+ Cenjeleni kabili bombeni bwino bwino,+ pantu kuli Yehova Lesa wesu takwaba bubifi+ nelyo akapaatulula+ nelyo ukupoka amafisakanwa.”+

8 Kabili mu Yerusalemu na mo Yehoshafati abikilemo abena Lebi+ bamo na bashimapepo+ na bamo pa bakalamba ba ndupwa+ sha bena Israele pa kuti balepingwilako+ Yehova no kupingula imilandu+ ya bekashi ba mu Yerusalemu. 9 Kabili, abebele no kutila: “Ifi e fyo mulecita ilyo muletiina+ Yehova muli bucishinka na mu mitima ya cishinka. 10 E lyo umulandu wa kulubulula onse uo baleta kuli imwe uwa bamunyinenwe abekala mu misumba, uwa kusumya umulopa,+ uukumine amafunde+ ne fipope+ no bupingushi,+ mulebasoka pa kuti belabifya kuli Yehova no bukali+ bwikesa pali imwe na pali bamunyinenwe. Ifi e fyo mulecita pa kuti mwikaba no mulandu. 11 Kabili Amaria shimapepo mukalamba e wa kulamutungulula mu mulandu onse uwa kwa Yehova;+ e lyo Sebadia mwana Ishmaele intungulushi ya ng’anda ya kwa Yuda e wa kulamutungulula mu milandu yonse iya mfumu; kabili kuli na bena Lebi aba kumwangalila. Koseni+ kabili citenipo fimo, kabili lekeni Yehova+ abe na balecita ifisuma.”+

20 Nomba pa numa abana ba kwa Moabu+ na bana ba kwa Amoni+ pamo na baAmonimu+ baile ku kulwisha Yehoshafati.+ 2 Awe abantu balishile no kweba Yehoshafati, abati: “Kuli ibumba ilikalamba ilishile ku kumulwisha ilifumine mu citungu ca bemba, ku Edomu;+ kabili bali mu Hasasone-tamari, e kutila, ku Engedi.”+ 3 Awe Yehoshafati alitiinine+ kabili abikile umutima ku kufwaya Yehova.+ E ico asosele ukuti abantu baleke ukulya+ mu Yuda monse. 4 Awe aba mu Yuda balilongene pamo pa kuti bepushe kuli Yehova.+ Kabili bafumine mu mishi yonse iya kwa Yuda pa kuti bese bepushe kuli Yehova.+

5 E lyo Yehoshafati aiminine mu lukuta lwa bena Yuda no lwa bena Yerusalemu mu ng’anda ya kwa Yehova+ pa ntanshi ya lubansa lupya,+ 6 kabili atile:+

“Mwe Yehova Lesa wa fikolwe fyesu,+ bushe te imwe Lesa mu muulu,+ kabili bushe tamuteka amabufumu yonse aya mu nko,+ kabili bushe ukuboko kwenu te kwa maka kabili ukwakosa, ica kuti takuli uwingalwa na imwe?+ 7 Bushe te imwe, mwe Lesa wesu,+ mwe batamfishe abekashi ba muli cino calo pa ntanshi ya bantu benu abena Israele+ no kucipeela+ umuyayaya ku bana ba kwa Abrahamu, uo mwatemenwe?+ 8 Kabili e mo batendeke ukulaikala, no kukuulila ishina lyenu ing’anda ya mushilo,+ kabili batile, 9 ‘Nga ca kuti ububi bwatwishila,+ nangu ulupanga, ubupingushi ubukali, nelyo icikuko,+ nelyo icipowe,+ shi lekeni twiminine pa ntanshi ya ino ng’anda+ na pa ntanshi yenu (pantu ishina+ lyenu lyaba muli iyi ng’anda), pa kuti tulilile kuli imwe mu kucula kwesu, kabili mutumfwe no kutupususha.’+ 10 E ico nomba abana ba kwa Amoni,+ na bana ba kwa Moabu+ na ba mu calo ca mpili ica Seiri,+ abo mushasuminishe abena Israele ukusansa ilyo balefuma mu calo ca Egupti, lelo bapitile kumbi kabili tababepeye,+ 11 moneni, baletulambula+ lelo pa kwisa mu kutufumya mu calo cenu ico mwatupeela.+ 12 Mwe Lesa wesu, bushe tamwabapingule?+ Pantu ifwe tatukwete amaka kuli ili bumba ilikalamba ilileisa mu kutulwisha;+ kabili ifwe tatwishibe ico twalacita,+ lelo twalosha amenso yesu kuli imwe.”+

13 Iyi nshita yonse, bonse aba mu Yuda baiminine pa ntanshi ya kwa Yehova,+ pamo na bana babo abanono,+ na bakashi babo na bana babo abaume.

14 Nomba umupashi+ wa kwa Yehova waishile pali Yahasiele mwana Sekaria mwana Benaya mwana Yeiele mwana Matania umwina Lebi uwa mu bana ba kwa Asafi,+ mu lukuta. 15 E ico atile: “Kutikeni, mwe bena Yuda bonse na imwe mwe bekashi ba mu Yerusalemu na imwe mwe Mfumu Yehoshafati! Yehova atila kuli imwe, ‘Mwitiina+ nangu ukuba no mwenso pa mulandu wa ili ibumba ilikalamba; pantu ubulwi te bwenu, lelo bwa kwa Lesa.+ 16 Mailo mukaye ku kubalwisha. Moneni bakeshila pa mupata wa pa Sisi; kabili mukabasanga ku mpela ya mupokapoka pa ntanshi ya matololo ya Yeruele. 17 Tamwakalweko+ muli ubu bulwi. Tantameni, iminineni shilili+ no kumona ifyo Yehova akamupususha.+ Mwitiina nelyo ukuba no mwenso,+ mwe bena Yuda na mwe ba mu Yerusalemu. Mukaye kuli bena mailo, kabili Yehova akaba na imwe.’”+

18 Awe Yehoshafati alikonteme no kushimpa icinso cakwe pa nshi,+ na bena Yuda bonse na bekashi ba mu Yerusalemu baliwile pa nshi kuli Yehova no kukontama kuli Yehova.+ 19 E lyo abena Lebi+ aba mu bana ba kwa Kohati+ na ba mu bana ba kwa Kora+ baliminine pa kuti batashe Yehova Lesa wa bena Israele ne shiwi ilikalamba nga nshi.+

20 Kabili baimine ulucelocelo no kuya ku matololo+ ya ku Tekoa.+ Kabili ilyo balefuma, Yehoshafati aliminine no kutila: “Ng’umfweni, mwe bena Yuda na imwe mwe bekashi ba mu Yerusalemu!+ Cetekeleni+ Yehova Lesa wenu pa kuti mukekale imyaka iingi. Cetekeleni bakasesema+ bakwe e lyo mwalacimfya.”

21 Kabili, apandene amano+ na bantu no kubika aba kwimbila+ Yehova na ba kulumbanya+ mu fya kufwala fya mushilo+ ilyo bali pa ntanshi ya baume abali ne fyanso,+ kabili baleti: “Lumbanyeni Yehova,+ pantu icikuuku cakwe ca muyayaya.”+

22 Kabili ilyo batendeke ukwaula no kulumbanya, Yehova abikile aba kubelamina+ abana ba kwa Amoni, abana ba kwa Moabu na ba mu calo ca mpili ica Seiri abaleisa mu Yuda, kabili batendeke ukwipayana.+ 23 Kabili abana ba kwa Amoni na bana ba kwa Moabu baimiine abekashi ba mu calo ca mpili ica Seiri+ pa kuti babepaye no kubalofya; kabili ilyo bapwile ukwipaya abekashi ba mu Seiri, balyafwene cila muntu ukwipaya umunankwe.+

24 Nomba abaYuda bena, baile ku lupungu lwa kwa kalinda ulwali mu matololo.+ Ilyo baloleshe kwi bumba, moneni, bonse nabafwa kabili ifitumbi filambalele pa nshi+ ukwabula no wa kupusuka. 25 E lyo Yehoshafati na bantu bakwe baishile ku kusenda ifintu fyabo,+ kabili basangilepo ifipe ifingi ne fya kufwala ne fipe ifisuma; kabili basendele ifingi nga nshi ica kuti bafililwe ukusenda na fimbi.+ Kabili balesenda ifi fipe inshiku shitatu, pantu fyali ifingi. 26 Kabili pa bushiku bwalenga shine balongene pamo mu mpanga yabatama iya Beraka, pantu kulya kwine e ko balumbanishishe Yehova.+ E mulandu wine bainikile ishina+ lya ilya ncende abati Impanga Yabatama iya Beraka, ukufika na lelo.

27 E lyo abaume ba mu Yuda bonse na ba mu Yerusalemu, ninshi Yehoshafati alebatungulula, babwelele ku Yerusalemu balesekelela, pantu Yehova abalengele ukusekelela pa balwani babo.+ 28 E ico baishile ku Yerusalemu ne filimba fya nsale+ na bansango+ na mapenga+ ku ng’anda ya kwa Yehova.+ 29 Kabili amabufumu yonse aya mu fyalo yatiinine+ Lesa ilyo baumfwile ukuti Yehova alwishishe abalwani ba bena Israele.+ 30 E ico mu bufumu bwa kwa Yehoshafati mwali tondolo, na Lesa wakwe alemulenga ukutuusha mu calo conse.+

31 Kabili Yehoshafati+ aleteka Yuda. Ali ne myaka amakumi yatatu na isano (35) ilyo atendeke ukuteka kabili atekele mu Yerusalemu imyaka amakumi yabili na isano (25). Ne shina lya kwa nyina ni Asuba+ mwana Shilhi. 32 Kabili ale-enda mu nshila ya kwa Asa+ wishi, kabili tafuminemo, alecita ifisuma mu menso ya kwa Yehova.+ 33 Ififulo fya kupepelapo+ e fyo fye bashaonawile; kabili abantu tabapekenye imitima yabo ukulola kuli Lesa wa fikolwe fyabo.+

34 Imilandu yashalako iya kwa Yehoshafati, iya kubalilapo ne ya kulekelesha, yalilembwa mu mashiwi ya kwa Yehu+ mwana Hanani,+ aya mwi Buuku+ lya Shamfumu sha mu Israele. 35 Kabili pa numa ya ifi Yehoshafati imfumu ya ku Yuda abombeele pamo na Ahasia+ imfumu ya ku Israele, uwalecita ifyabipa.+ 36 E ico atendeke ukubombela pamo nankwe mu kupanga amato ya kuya ku Tarshishi+ kabili bapangile amato mu Esione-gebere.+ 37 Lelo, Eliesere mwana Dodabahu uwa ku Maresha asesemene Yehoshafati ukutila: “Apo wabombela pamo na Ahasia,+ Yehova akabongolola imilimo yobe.”+ Awe amato yalyonaike,+ kabili tayakosele aya kuti yaye ku Tarshishi.+

21 Awe Yehoshafati aleele ukwalaala ifikolwe+ fyakwe kabili bamushiikile ukwashiikwa ifikolwe+ fyakwe mu Musumba wa kwa Davidi; kabili Yehoramu+ umwana wakwe alimupyene no kutendeka ukuteka. 2 Kabili alikwete bamunyina, abana ba kwa Yehoshafati, kabili amashina yabo ni Asaria na Yehiele na Sekaria na Asaria na Mikaele na Shefatia, bonse aba bali bana ba kwa Yehoshafati imfumu ya bena Israele. 3 Awe shibo abapeele ifya bupe ifingi+ ifya silfere ne fya golde ne fipe ifisuma pamo ne misumba ya malinga mu Yuda;+ lelo Yehoramu+ e o apeele ubufumu, pantu e wali ibeli.+

4 Ilyo Yehoramu atendeke ukuteka ubufumu bwa kwa wishi, ali-ikoseshe, kabili aipeye bamunyina+ bonse ku lupanga na bacilolo ba kwa Israele bonse. 5 Yehoramu ali ne myaka amakumi yatatu na ibili (32) ilyo atendeke ukuteka, kabili atekele+ mu Yerusalemu imyaka cinekonsekonse (8). 6 Kabili aendele mu nshila ya shamfumu sha mu Israele,+ filya aba mu ng’anda ya kwa Ahabu bacitile; pantu aupile umwana mwanakashi wa kwa Ahabu,+ kabili alecita ifyabipa mu menso ya kwa Yehova.+ 7 Kabili Yehova talefwaya ukonaula ing’anda ya kwa Davidi,+ pa mulandu wa cipangano+ apangene na Davidi, kabili nge fyo asosele ukuti akapeela inyali+ kuli ena+ na ku bana bakwe inshiku shonse.

8 Mu nshiku shakwe, abena Edomu+ balipondokele Yuda+ kabili baisaliile imfumu yabo iya kubateka.+ 9 E ico Yehoramu pamo na bakalamba balyabwike na maceleta yonse pamo nankwe. Kabili aimine ubushiku no kusansa abena Edomu abamushingulwike pamo na bakalamba ba maceleta. 10 Lelo Edomu atwalilile ukupondokela Yuda ukufika na lelo. E lyo na Libna+ alimupondokele pa nshita imo ine, pantu ashile Yehova Lesa wa fikolwe fyakwe.+ 11 Na o apangile ififulo fya kupepelapo+ pa mpili sha mu Yuda, pa kuti alenge abekashi ba mu Yerusalemu ukucita ubulalelale,+ no kulufya abena Yuda.+

12 Umuya inshiku kasesema Eliya+ amulembeele+ ukutila: “Yehova Lesa wa kwa Davidi icikolwe cobe atila, ‘Apo tawaenda mu nshila ya kwa Yehoshafati+ wiso nangu mu nshila ya kwa Asa+ imfumu ya baYuda, 13 lelo wenda mu nshila ya shamfumu sha mu Israele+ kabili walenga abena Yuda na bekashi ba mu Yerusalemu ukucita ubulalelale+ filya fine aba mu ng’anda ya kwa Ahabu balengele abantu ukucita ubulalelale,+ kabili na bamunonko, aba mu ng’anda ya kwa wiso, abaweme ukukucila, walibepaya;+ 14 mona! Yehova alekanda+ icabipisha abantu bobe+ na bana+ bobe na bakashi bobe kabili aleonaula ne fipe fyobe fyonse. 15 Kabili ukalwala amalwele ayengi,+ no bulwele bwa mu mala, mpaka amala yobe yakafume pa mulandu wa kulwala kobe cila bushiku.’”+

16 Awe Yehova alengele imitima+ ya baPelishiti+ na bena Arabia+ abali mupepi na bena Etiopia+ ukwimina Yehoramu. 17 E ico baishile mu musumba wa Yuda kabili baingile ku maka no kusenda ifipe fyonse ifyali mu ng’anda ya mfumu+ na bana bakwe na bakashi+ bakwe, kabili tapali umwana uwashele kano fye Yehoahasi,+ umwana wakwe umunono pali bonse. 18 Kabili pa numa ya ifi fyonse Yehova alimulwalike ubulwele bwa mu mala ubwabula ukupola.+ 19 Nomba mu nshiku shakonkelepo, ilyo papitile imyaka ibili, amala+ yakwe yalifumine ilyo alelwala, kabili asukile afwa na malwele yakwe ayabi; kabili abantu bakwe tabamoceleele+ ifyanunkila nge fyo bacitiile ifikolwe fyakwe. 20 Ali ne myaka amakumi yatatu na ibili (32) ilyo atendeke ukuteka kabili atekele imyaka cinekonsekonse (8) mu Yerusalemu. Awe e fyo aile ukwabula no wa kumutemwa.+ E ico bamushiikile mu Musumba wa kwa Davidi,+ lelo tabamushiikile mu nshiishi ya shamfumu.+

22 Awe abekashi ba mu Yerusalemu bapyanikepo Ahasia+ umwana wakwe umwaice sana pali ena no kumubika pa bufumu, (pantu ibumba lya bashilika ilyaishile na bena Arabia+ ku nkambi lyalipeye abakalamba bonse,)+ kabili Ahasia mwana Yehoramu atendeke ukuteka mu Yuda. 2 Ahasia ali ne myaka amakumi yabili na ibili (22) ilyo atendeke ukuteka,+ kabili atekele umwaka umo mu Yerusalemu. Ne shina lya kwa nyina ni Atalia+ umwishikulu wa kwa Omri.+

3 Na o aendele mu nshila ya ba mu ng’anda ya kwa Ahabu,+ pantu nyina+ e walemupanda amano ya kucita ifyabipa. 4 Kabili alecita ifyabipa mu menso ya kwa Yehova, nge fyalecita aba mu ng’anda ya kwa Ahabu, pantu e balemupanda amano+ ilyo wishi afwile, kabili balimuletelele. 5 Awe alekonka amano yabo,+ kabili aile na Yehoramu+ mwana Ahabu imfumu ya bena Israele ku kulwa na Hasaele+ imfumu ya bena Siria ku Ramote-gileadi,+ uko abalasa imifwi balashiile Yehoramu.+ 6 E ico alibwelelemo ku Yesreele+ pa kuti ifilonda fipole ifyo bamucenene ku Rama+ ilyo alelwa na Hasaele imfumu ya Siria.

Kabili Asaria+ umwana wa kwa Yehoramu+ imfumu ya baYuda, aile ku kupempula Yehoramu+ mwana Ahabu mu Yesreele, pantu alilwele.+ 7 Lelo ukucimfiwa+ kwa kwa Ahasia kwafumine kuli Lesa,+ ilyo aile kuli Yehoramu; kabili ilyo aishile, aile+ na Yehoramu kuli Yehu+ umwishikulu wa kwa Nimshi,+ uo Yehova asubile+ ukonaula aba mu ng’anda ya kwa Ahabu.+ 8 Nomba ilyo Yehu atendeke ukubikana ifikansa na ba mu ng’anda ya kwa Ahabu,+ asangile bacilolo ba bena Yuda na bana ba bamunyina ba kwa Ahasia,+ ababomfi ba kwa Ahasia, kabili alibepeye.+ 9 E lyo aile ku kufwaya Ahasia, kabili balimwikete,+ pantu ailebelama mu Samaria,+ kabili bamuletele kuli Yehu. Kabili balimwipeye no kumushiika,+ pantu batile: “Mwishikulu wa kwa Yehoshafati,+ uwafwaile Yehova no mutima wakwe onse.”+ Kabili takwali nangu umo uwa mu ng’anda ya kwa Ahasia uwali no kuteka ubufumu.

10 Nomba Atalia+ nyina wa kwa Ahasia ena, alimwene ukuti umwana wakwe nafwa. E ico aliimine no kwipaya aba ku bufumu bonse aba mu ng’anda ya kwa Yuda.+ 11 Lelo, Yehoshabeati+ umwana mwanakashi wa mfumu abuulile Yehoashi+ umwana wa kwa Ahasia no kumufumya pa bana ba mfumu abo bali no kwipaya, kabili atwele uyu mwana pamo no walemusakamana mu muputule wa mu kati umwali ifya kusendamapo. Kabili Yehoshabeati umwana mwanakashi wa Mfumu Yehoramu,+ umukashi wa kwa shimapepo Yehoyada,+ (pantu ali ni nkashi ya kwa Ahasia,) alimufishile pa mulandu wa kwa Atalia, kabili tamwipeye.+ 12 Kabili aikele na bo mu ng’anda ya kwa Lesa wa cine, ukumufisa pa myaka mutanda (6),+ ninshi Atalia e wali namfumu+ uwaleteka icalo.+

23 Kabili mu mwaka uwalenga cinelubali (7), Yehoyada+ alishipile no kubuula abakalamba ba bashilika umwanda umo (100),+ e kutila, Asaria mwana Yerohamu, na Ishmaele mwana Yehohanani na Asaria mwana Obedi na Maaseya mwana Adaya na Elishafati mwana Sikri, no kupangana icipangano na bo. 2 E lyo bashingulwike mu Yuda monse no kwita abena Lebi+ mu misumba yonse iya bena Yuda na bakalamba+ ba ndupwa+ sha bena Israele. Kabili baishile ku Yerusalemu. 3 E lyo ulukuta lonse lwapangene icipangano+ ne mfumu mu ng’anda+ ya kwa Lesa wa cine, e lyo yabebele aiti:

“Moneni! Umwana+ wa mfumu akateka,+ nge fyo Yehova alaile pa bana ba kwa Davidi.+ 4 Ifi e fyo mukacite: bamo pali imwe abaleisa pe sabata,+ bashimapepo+ na bena Lebi,+ bakalalinda pa mwinshi;+ 5 kabili bamo bakaba pa ng’anda ya mfumu;+ na bambi bakaba pa Mpongolo ya Mufula;+ e lyo abantu bonse bena bakaba mu mansa+ sha ng’anda ya kwa Yehova. 6 Kabili mwikaleka nangu umo ukwingila mu ng’anda ya kwa Yehova+ kano bashimapepo na bena Lebi abalebomba imilimo.+ Aba e bakengila, pantu libumba lya mushilo,+ kabili abantu bonse bakacita ifyo bafwile ukucita kuli Yehova. 7 Kabili abena Lebi bakashinguluke imfumu konse,+ cila muntu ne fyanso fyakwe mu minwe yakwe; kabili onse uwaingila mu ng’anda akepaiwe. Kabili mukaleba ne mfumu ilyo yaingila na lintu yafuma.”

8 Kabili abena Lebi na baYuda bonse bacitile ukulingana na fyonse ifyo Yehoyada+ shimapepo asosele.+ E ico cila muntu asendele abantu bakwe abaleisa pe sabata pamo na balefuma pe sabata,+ pantu Yehoyada shimapepo tasuminishe aya amabumba+ ukuleka ukubomba imilimo yabo. 9 Kabili, shimapepo Yehoyada apeele bacilolo ba pa myanda+ amafumo ne nkwela ishikalamba ne shinono+ ifyali fya Mfumu Davidi,+ ifyali mu ng’anda ya kwa Lesa wa cine.+ 10 Kabili aimike abantu bonse,+ cila muntu ne canso cakwe mu minwe, ukufuma ku kulyo kwa ng’anda ukufika ku kuso kwa ng’anda, mupepi ne ciipailo kabili mupepi ne ng’anda, bali fye konse mupepi ne mfumu. 11 E lyo bafumishe+ umwana wa mfumu no kubika pali ena icilongwe+ na Mafunde Ikumi+ no kumubika pa bufumu, kabili Yehoyada na bana bakwe balimusubile+ no kutila: “Kalebalika mwe mfumu!”+

12 Ilyo Atalia aumfwile amashiwi ya bantu abalebutuka no kulumbanya imfumu,+ apo pene aile ku bantu pa ng’anda ya kwa Yehova. 13 Kabili aliloleshe no kumona imfumu naiminina pa luceshi+ lwa iko pa mwinshi, na bacilolo+ na mapenga+ mupepi ne mfumu, na bantu bonse aba mu calo balesekelela+ no kulisha+ amapenga, na bakemba+ ne filimba fya nyimbo, na baletungulula abaleimba. Ilyo line fye Atalia alepwile ifya kufwala fyakwe no kutila: “Nabampondokela! Nabampondokela!”+ 14 Lelo shimapepo Yehoyada afumishe bacilolo ba pa myanda pa nse, abo basontele pe bumba lya bashilika, no kubeba ati: “Mufumyeni mu mutande wa bantu;+ kabili onse uwalamukonka, afwile ukumwipaila ku lupanga!” Pantu shimapepo atile: “Mwimwipaila mu ng’anda ya kwa Yehova.” 15 E ico balimwikete. Ilyo aishile pa mwinshi wa mpongolo ya bakabalwe iya ng’anda ya mfumu, ilyo line bamwipaile palya pene.+

16 E lyo Yehoyada apangene icipangano na bantu bonse ne mfumu ukuti bali no kuba abantu+ ba kwa Yehova pe. 17 Pa numa abantu bonse baile ku ng’anda ya kwa Baali no kuibongolola;+ kabili ifiipailo+ fyakwe ne fimpashanya fyakwe balifitobele,+ kabili baipaile+ Matani+ shimapepo wa kwa Baali ku ntanshi ya fiipailo. 18 Kabili, Yehoyada apeele imilimo ya mu ng’anda ya kwa Yehova mu minwe ya bashimapepo na bena Lebi, abo Davidi+ ayakenye mu mabumba pa ng’anda ya kwa Yehova pa kuti baletuula amalambo ya koca aya kwa Yehova ukulingana ne fyalembwa mu mafunde ya kwa Mose,+ ukuyatuula no kusekelela ne nyimbo ukulingana ne fyo Davidi apekenye. 19 E ico abikile abalelinda impongolo+ pa mpongolo+ sha ng’anda ya kwa Yehova pa kuti onse uwakowela mu musango onse eingilamo. 20 Nomba abuulile bacilolo ba pa myanda+ na bashimucindikwa na bakateka ba bantu na bantu ba mu calo bonse no kuleta imfumu ukufuma ku ng’anda ya kwa Yehova.+ E lyo bapitile pa mpongolo yabela pa muulu no kuya ku ng’anda ya mfumu no kuteka imfumu pa cipuna+ ca bufumu. 21 Kabili abantu bonse aba mu calo balesekelela;+ na mu musumba tamwali ifimfulunganya, kabili baipeye Atalia ku lupanga.+

24 Yehoashi ali ne myaka cinelubali (7) ilyo atendeke ukuteka,+ kabili atekele imyaka amakumi yane (40) mu Yerusalemu.+ Kabili ishina lya kwa nyina ni Sibia uwa ku Beere-sheba.+ 2 Kabili Yehoashi+ alecita ifisuma mu menso ya kwa Yehova+ inshiku shonse isha kwa Yehoyada shimapepo.+ 3 Kabili Yehoyada amufwaile abanakashi babili, kabili afyele abana baume na bana banakashi.+

4 Nomba pa numa, Yehoashi mu mutima alefwaya ukuwamya ing’anda ya kwa Yehova.+ 5 Awe aitile bashimapepo+ na bena Lebi pamo no kubeba ati: “Kabiyeni mu misumba ya kwa Yuda no kulonganya indalama mu Israele yonse isha kuwamisha+ ing’anda ya kwa Lesa wenu cila mwaka;+ kabili mwangufyanye ukucita ici.” Lelo abena Lebi tabayangufyenye ukucita ici.+ 6 E ico imfumu yaitile Yehoyada umukalamba wabo no kumwipusha aiti:+ “Cinshi ushebele abena Lebi ukuleta umutuulo wa mushilo ukufuma mu Yuda na mu Yerusalemu, uo Mose+ umubomfi wa kwa Yehova aebele abantu ukuleta, no wa lukuta lwa bena Israele, uwa cikuulwa umwaba icipao ca Cipangano?+ 7 Pantu abana+ ba kwa Atalia, umwanakashi umubifi, baingile mu ng’anda ya kwa Lesa wa cine+ kabili bapeele ifya mushilo+ fyonse ifyali mu ng’anda ya kwa Yehova kuli baBaali.”+ 8 E lyo imfumu yaebele, abantu na bo bapangile icipao+ no kucibika pa nse, pa mpongolo ya ng’anda ya kwa Yehova. 9 Pa numa babilile mu Yuda monse na mu Yerusalemu ukuti abantu balete kuli Yehova umutuulo+ uwa mushilo uo Mose+ umubomfi wa kwa Lesa wa cine aebele abena Israele ukuleta mu matololo. 10 Kabili bacilolo+ bonse na bantu bonse batendeke ukusekelela,+ kabili baleleta no kubika mu cipao+ mpaka bonse bapwa ukupeela.

11 Nomba pa nshita yalinga, aleleta icipao ku kwangalilwa ne mfumu, na baleleta bena Lebi,+ kabili, nga bamona ukuti indalama shafula,+ kalemba+ wa mfumu na kaafwa wa mukalamba wa bashimapepo baleisa no kufumya ishali mu cipao no kucimya ukucibwesesha pa ncende ya ciko. E fyo balecita cila bushiku, kabili balonganike indalama ishingi. 12 E lyo nomba imfumu na Yehoyada balepeela ishi ndalama ku balebomba+ umulimo wa pa ng’anda ya kwa Yehova,+ kabili baleingisha incito aba kuputula amabwe+ na bacenjela mu fya kupangapanga+ aba kuwamya ing’anda ya kwa Yehova,+ na babomfi abaishiba umulimo wa fyela no mukuba aba kuwamya ing’anda ya kwa Yehova.+ 13 Kabili aba kubomba imilimo balitendeke ukubomba,+ kabili umulimo walebombeka ku minwe yabo, kabili balengele ing’anda ya kwa Lesa wa cine ukuba ifyo ifwile ukuba no kuikosha. 14 Kabili ilyo bapwile, baletele ku mfumu na kuli Yehoyada indalama shasheleko, kabili bapangile ifipe fya mu ng’anda ya kwa Yehova, ifipe fya kubomfya+ ne fya kubomfya pa kutuulila imituulo na makapu+ ne fipe fya golde+ ne fya silfere; kabili kwali abaletuula amalambo+ ya koca mu ng’anda ya kwa Yehova lyonse inshiku shonse isha kwa Yehoyada.

15 Awe Yehoyada alikotele no kwikala imyaka iingi+ kabili asukile afwa, kabili ilyo afwile ali ne myaka umwanda umo na makumi yatatu (130). 16 E ico bamushiikile mu Musumba wa kwa Davidi ukwashiikwa ishamfumu,+ pantu alicitile ifisuma mu Israele+ na kuli Lesa wa cine na ku ng’anda Yakwe.

17 Kabili ilyo Yehoyada afwile, bacilolo+ ba bena Yuda balishile no kukontama ku mfumu. Pali ilya nshita imfumu yalibomfwile.+ 18 Kabili umuya inshiku bashile ing’anda ya kwa Yehova Lesa wa fikolwe fyabo no kutendeka ukubombela ifimuti ifyo baimike+ ne filubi,+ kabili paishile ubukali pali Yuda na Yerusalemu pa mulandu wa uku kulufyanya kwabo.+ 19 Kabili alebatumina bakasesema+ pa kuti bababweseshe kuli Yehova; kabili balebashinina, lelo tabaleumfwa.+

20 Kabili umupashi+ wa kwa Yehova waishile+ pali Sekaria+ mwana Yehoyada+ shimapepo, kabili aiminine pa ntanshi ya bantu no kubeba ati: “E fyo Lesa wa cine asosa, ‘Cinshi mulepulila mu mafunde ya kwa Yehova, no kuiletelela?+ Apo namusha Yehova, na o akamusha.’”+ 21 Awe balimupangiile+ no kumutoba amabwe+ ifyo imfumu yabebele mu lubansa lwa ng’anda ya kwa Yehova. 22 Kabili Yehoashi imfumu taibukishe icikuuku ico Yehoyada wishi amulangile,+ kabili aipeye umwana wakwe, uo pa kufwa, atile: “Shi Yehova amone no kulandula.”+

23 Nomba pa kutendeka+ kwa mwaka upya, ibumba lya bashilika ilya bena Siria+ lyaishile mu kumulwisha,+ kabili basanshile Yuda na Yerusalemu. Kabili baipeye bacilolo+ bonse abali pa bantu, kabili ifyuma fyabo fyonse batumine ku mfumu ya ku Damaseke.+ 24 Pantu abena Siria basanshile fye na bashilika abanono,+ kabili Yehova apeele mu minwe yabo ibumba lya bashilika abengi nga nshi,+ pa mulandu wa kuti balishile Yehova Lesa wa fikolwe fyabo; kabili bapingwile Yehoashi.+ 25 Kabili ilyo bafumine kuli ena (pantu bamushile na malwele ayengi),+ ababomfi bakwe balimupangiile+ pa mulandu wa mulopa+ wa bana ba kwa Yehoyada+ shimapepo; kabili bamwipaile pa busanshi bwakwe.+ Kabili bamushiikile mu Musumba wa kwa Davidi,+ lelo tabamushiikile mu nshiishi ya shamfumu.+

26 Kabili aba e bamupangiile: Sabadi+ mwana Shimeati umwina Amone na Yehosabadi mwana Shimriti umwina Moabu. 27 Kumfwa abana bakwe na mashiwi ayengi ayo bamusokele+ ne fyasangilwe+ mu ng’anda ya kwa Lesa wa cine, fyalilembwa mwi Buuku+ lya Shamfumu. Kabili Amasia+ umwana wakwe alimupyene no kutendeka ukuteka.

25 Amasia+ ali ne myaka amakumi yabili na isano (25) ilyo atendeke ukuteka, kabili atekele imyaka amakumi yabili na pabula (29) mu Yerusalemu. Kabili ishina lya kwa nyina ni Yehoadani+ uwa ku Yerusalemu. 2 Kabili alecita ifisuma mu menso ya kwa Yehova,+ lelo talecita ifi no mutima onse.+ 3 Nomba, ilyo ubufumu bwakosele, aipeye+ ababomfi+ bakwe abaipeye imfumu wishi.+ 4 Abana babo bena tabepeye, lelo akonkele ifyalembwa mu mafunde, mwi buuku lya kwa Mose,+ ifyo Yehova asosele, ukutila: “Bashibo tabafwile ukufwila pa mulandu wa bana babo,+ na bana tabafwile ukufwila pa mulandu wa bashibo;+ lelo onse afwile ukufwila pa lubembu lwakwe.”+

5 Awe Amasia alonganike abena Yuda kabili abemike ukulingana na mayanda ya fikolwe fyabo,+ ukwangalilwa na bacilolo ba pa bantu amakana,+ na bacilolo ba pa bantu imyanda+ aba muli Yuda bonse na muli Benjamini; kabili abalembele ukutula pa wali ne myaka amakumi yabili (20)+ ukuya na pa muulu, kabili asangile ukuti bali amakana imyanda itatu (300,000) abaume ba maka, abalelwa ubulwi, abalebomfya amafumo+ ne nkwela ishikalamba.+ 6 Kabili alembele aba kubomba aba mu Israele amakana umwanda umo (100,000), abaume ba maka kabili impalume no kubalipila indalama sha silfere umwanda umo (100). 7 Kabili umuntu umo uwa kwa Lesa+ wa cine aishile kuli ena, no kutila: “Mwe mfumu, mwileka abashilika ba bena Israele bamukonke, pantu Yehova tali na bena Israele,+ e kuti abana bonse aba kwa Efraimu. 8 Lelo iseni imwe bene, citenipo fimo, shipeni ilyo muleya mu kulwa.+ Lesa wa cine kuti amulenga ukucimfiwa ku balwani; pantu Lesa alikwata amaka ya kwafwa+ na maka ya kulenga umuntu ukucimfiwa.”+ 9 E lyo Amasia+ asosele ku muntu wa kwa Lesa wa cine ati: “Lelo cinshi calacitika ku ndalama sha silfere umwanda umo (100) isho mpeele ibumba lya bashilika ilya bena Israele?”+ Umuntu wa kwa Lesa wa cine atile: “Yehova nakwata amaka ya kumupeela ishingi ukucila pali ishi.”+ 10 Awe Amasia alibapaatukenye, e kuti abali mwi bumba lya bashilika ilyaishile kuli ena ukufuma ku Efraimu, pa kuti baye ku mwabo. Lelo, bafuliilwe Yuda nga nshi, kabili babweleele ku mwabo ne cipyu icine cine.+

11 Kabili Amasia ena alishipile no kutungulula abantu bakwe no kuya ku Mupokapoka wa Mucele;+ kabili aipeye abana ba kwa Seiri,+ abantu amakana ikumi (10,000).+ 12 Kabili kwali abantu amakana ikumi (10,000) abo abana ba kwa Yuda baikete aba mweo. E ico babatwele pa muulu wa cilibwe icasansuka, no kubapoosa ukufuma pa muulu wa cilibwe; kabili bonse balilepawike.+ 13 E lyo abali mwi bumba lya bashilika ilyo Amasia abweseshe ukuti bemukonka ku nkondo,+ basanshile imisumba ya bena Yuda, ukufuma ku Samaria+ ukufika ku Bete-horone,+ kabili baipeyepo abantu amakana yatatu (3,000) no kupokolola ifintu ifingi.

14 Nomba ilyo Amasia afumine mu kusansa abena Edomu, aletele tulesa+ twa bana ba kwa Seiri no kutucita tulesa twakwe,+ kabili atendeke ukutukontamina,+ no kutufutumwina icushi ce lambo.+ 15 Awe ubukali bwa kwa Yehova bwaishile pali Amasia, kabili amutumiine kasesema no kumwipusha ati: “Cinshi wafwaila+ tulesa+ twa bantu utushapuswishe abantu ba tuko ku minwe yobe?”+ 16 Nomba ilyo alandile na yo, imfumu ilyo line fye yamwipwishe aiti: “Bushe twakubikile ukuba impanda mano ya mfumu?+ Talala, nga taulefwaya cikubipile.+ Nga cinshi balekwipaila?” Awe kasesema alitalele, lelo atile: “Ninjishiba ukuti Lesa alefwaya ukukonaula,+ pantu wacita ici cintu+ kabili taumfwile ku fyo nkwebele.”+

17 E lyo Amasia imfumu ya baYuda apandilwe amano no kutuma amashiwi kuli Yehoashi mwana Yehoahasi mwana Yehu imfumu ya bena Israele,+ ukutila: “Isa! Tulwe inkondo.”+ 18 Awe Yehoashi imfumu ya bena Israele atumine amashiwi kuli Amasia imfumu ya ku Yuda, ukutila:+ “Icimenwa ca myunga ica mu Lebanone catumine amashiwi ku mukedari wali mu Lebanone,+ aciti, ‘Peela umwana obe umwanakashi abe umukashi wa mwana wandi umwaume.’+ Lelo, icinama ca mpanga+ icali mu Lebanone calipitile no kunyantaula icimenwa ca myunga. 19 Iwe watila auti, Nincimfya Edomu.+ Kabili umutima+ obe naukutuumika pa kuti ucindikwe.+ Nomba ikala mu ng’anda yobe.+ Nga cinshi uleila mu bulwi ilyo taukwete amaka+ e lyo no kuyacimfiwa, iwe pamo na baYuda?”+

20 Lelo Amasia taumfwile iyo; pantu ni Lesa+ wa cine e walengele pa kuti abapeele mu minwe ya kwa Yehoashi, pantu balefwaya tulesa twa bena Edomu.+ 21 E ico Yehoashi imfumu ya bena Israele aliileko,+ kabili balilwile inkondo,+ ena na Amasia imfumu ya baYuda, ku Bete-shemeshe,+ umusumba uwaba mu Yuda. 22 Kabili Israele acimfishe Yuda,+ ica kuti cila muntu afulumukile kwi tenti lyakwe.+ 23 Kabili Yehoashi imfumu ya bena Israele aikete+ Amasia imfumu ya baYuda, umwana wa kwa Yehoashi mwana Yehoahasi, ku Bet-shemeshe, e lyo amuletele ku Yerusalemu+ no kutula icipunda mu cibumba ca Yerusalemu, ukutula pa Mpongolo ya kwa Efraimu+ ukufika na ku Mpongolo ya pa Cifutu,+ kabili cali imikono imyanda ine (400). 24 Kabili abuulile golde yonse na silfere yonse ne fipe fyonse ifyasangilwe mu ng’anda ya kwa Lesa wa cine na Obedi-edomu+ na mu cipao ca ng’anda ya mfumu+ na bantu abo baikete, no kubwelela ku Samaria.+

25 Kabili Amasia+ mwana Yehoashi imfumu ya baYuda aikele imyaka ikumi na isano (15)+ pa numa ya mfwa ya kwa Yehoashi+ mwana Yehoahasi imfumu ya Yuda. 26 Kabili imilandu yashalako iya kwa Amasia, iya kubalilapo ne ya kulekelesha,+ moneni! bushe tayalembwa mwi Buuku+ lya Shamfumu sha baYuda na bena Israele?+ 27 Kabili ukutula pa nshita Amasia alekele ukukonka Yehova, balimupangiile+ mu Yerusalemu. Asukile afulumukila ku Lakishi;+ lelo batumine aba kumukonka ku Lakishi, kabili bamwipaile kulya kwine.+ 28 E ico bamusendeele pali bakabalwe+ no kumushiika ukwashiikwa ifikolwe fyakwe mu musumba wa Yuda.+

26 Kabili abantu+ bonse aba mu Yuda babuulile Usia,+ uwali ne myaka ikumi na mutanda (16), no kumubika+ pa bufumu ukumupyanika pali wishi Amasia.+ 2 E wakuulile cipya cipya Elote+ no kuibwesesha ku Yuda ilyo imfumu yaleele ukwalaala ifikolwe fya iko.+ 3 Usia+ ali ne myaka ikumi na mutanda (16) ilyo atendeke ukuteka, kabili atekele imyaka amakumi yasano na ibili (52) mu Yerusalemu. Kabili ishina lya kwa nyina ni Yekolia+ uwa mu Yerusalemu. 4 Kabili alecita ifisuma mu menso ya kwa Yehova,+ ukulingana na fyonse ifyo Amasia wishi acitile.+ 5 Kabili lyonse alefwaya+ Lesa mu nshiku sha kwa Sekaria, uwamusambilishe ukutiina Lesa wa cine;+ kabili, mu nshiku alefwaya Yehova, Lesa wa cine amulengele ukutunguluka.+

6 Kabili aile ku kulwa na baPelishiti+ no kupongola icibumba ca Gati+ ne cibumba ca Yabne+ ne cibumba ca Ashidode,+ e lyo akuulile imisumba mu calo ca Ashidode+ na mu calo ca baPelishiti. 7 Kabili Lesa wa cine alemwafwa+ ukulwisha abaPelishiti na bena Arabia+ abaleikala mu Guri-baali na baMeunimu.+ 8 Kabili abena Amone+ batendeke ukutuula umutuulo+ kuli Usia. Awe ululumbi+ lwakwe lwasukile lwafika na ku Egupti, pantu alikwatishe amaka. 9 Kabili, Usia akuulile impungu+ mu Yerusalemu mupepi ne Mpongolo ya pa Koona+ na mupepi ne Mpongolo ya ku Mupokapoka+ na mupepi ne Tungi lye linga, no kushikosha. 10 Kabili akuulile impungu+ mu matololo, no kwimba ifishima ifingi (pantu alikwete ifitekwa ifingi nga nshi), na mu Shefela+ na pa calo cabatama. Mwali abalimi na balimi ba myangashi mu mpili na mu Karmele, pantu alitemenwe ubulimi.

11 Kabili, Usia akwete abashilika abalelwa inkondo, abaleya mu kulwa mu mabumba ya bashilika,+ ukulingana no kulembwa+ kwabo ku minwe ya kwa Yeiele kalemba+ na Maaseya, cilolo uwaletungululwa+ na Hanania uwa muli bacilolo+ ba mfumu. 12 Abakalamba ba mu ndupwa shabo,+ isha baume ba maka+ kabili impalume,+ shonse pamo shali amakana yabili ne myanda mutanda (2,600). 13 Baleangalila amabumba ya bashilika umwali abantu amakana imyanda itatu na makana cinelubali ne myanda isano (307,500) abalelwa abali mwi bumba lya bashilika ilya maka ilya kwafwa imfumu ukulwisha abalwani.+ 14 Kabili Usia ena alepekanishisha abali mwi bumba lya nkondo bonse inkwela+ na mafumo+ ne fya kucinga umutwe+ ne fya kucinga icifuba+ na mata+ na mabwe ya mu fisukushilo.+ 15 Kabili, apangile ifyanso fya bulwi mu Yerusalemu, ifyo abaishiba ifya kupangapanga baelengenye, ukuti fibe pa mpungu+ na pa makoona, kabili balepooselako imifwi na mabwe ayakalamba. Awe ululumbi+ lwakwe lwafikile ukutali sana, pantu alyafwilishiwe nga nshi mpaka akosa.

16 Nomba ilyo akosele, e lyo umutima wakwe watuumikwe+ mpaka ailetelela,+ kabili tali ne cishinka kuli Yehova Lesa wakwe kabili aile kwi tempele lya kwa Yehova pa kuti oce ifyanunkila pa ciipailo ca kocelapo ifyanunkila.+ 17 Ilyo line fye Asaria shimapepo na bashimapepo ba kwa Yehova, abaume aba maka amakumi cinekonsekonse (80), balimukonkele. 18 Kabili baleseshe imfumu+ Usia no kuyeba ati: “Te mulimo wenu,+ mwe mfumu Usia, ukoca ifyanunkila kuli Yehova, lelo mulimo wa bashimapepo abana ba kwa Aarone,+ e bo bapeela ukoca ifyanunkila. Fumeni mu ncende ya mushilo; pantu namulufyanya, kabili Yehova Lesa tamucindikilepo+ iyo.”

19 Lelo Usia alikalipe+ ninshi naikata ica kufutumwinapo+ ifyanunkila, kabili ilyo afuliilwe bashimapepo, ifibashi+ fyalimufulwime+ pa mpumi, pa ntanshi ya bashimapepo mu ng’anda ya kwa Yehova mupepi ne ciipailo ca fyanunkila. 20 Ilyo Asaria shimapepo mukalamba na bashimapepo bonse bamuloleshe, moneni, ali ne fibashi pa mpumi!+ E ico balyangufyenye ukumufumyamo, na o alyangufyenye ukufuma, pantu Yehova alimukandile.+

21 Kabili Usia+ imfumu ali ne fibashi mpaka no bushiku afwile, kabili aleikala mu ng’anda imbi ukwabula ukubomba, ico alilwele ifibashi;+ pantu tali na kwingila mu ng’anda ya kwa Yehova, kabili Yotamu umwana wakwe e waleangalila ing’anda ya mfumu, alepingula abantu ba mu calo.

22 Kabili imilandu yashalako iya kwa Usia,+ iya kubalilapo ne ya kulekelesha, Esaya+ mwana Amose+ kasesema ali-ilemba. 23 Awe Usia asukile alaala ukwalaala ifikolwe fyakwe; kabili bamushiikile ukwashiikwa ifikolwe fyakwe, lelo bamushiikile ku nse ya nshiishi ya shamfumu,+ pantu batile: “Wa fibashi.” Kabili Yotamu+ umwana wakwe alimupyene no kutendeka ukuteka.

27 Yotamu+ ali ne myaka amakumi yabili na isano (25) ilyo atendeke ukuteka, kabili atekele imyaka ikumi na mutanda (16) mu Yerusalemu. Kabili ishina lya kwa nyina ni Yerusha+ mwana Sadoke. 2 Kabili alecita ifisuma mu menso ya kwa Yehova,+ ukulingana na fyonse ifyo Usia wishi acitile.+ Ni co fye ena taingile mwi tempele lya kwa Yehova.+ Lelo, abantu bena na pali iyi nshita balebifya.+ 3 E wapangile impongolo yali pa muulu+ wa ng’anda ya kwa Yehova, kabili na pa cibumba ca mu Ofele+ akuuliilepo ifingi. 4 Kabili akuulile imisumba+ mu calo ca mpili ica Yuda,+ na mu mitengo+ akuulilemo imisumba ya malinga+ ne mpungu.+ 5 Kabili alwile na bana ba kwa Amone+ mpaka abacimfya, ica kuti abana ba kwa Amone bamupeele muli ulya mwaka amatalanti umwanda umo (100) aya silfere na madalamu amakana ikumi (10,000)+ aya ngano+ na makana ikumi aya barle.+ Ifi e fyo abana ba kwa Amone bamulipile, kabili e fyo bacitile na mu mwaka walenga bubili no walenga butatu.+ 6 E ico Yotamu aleikosha, pantu ateyenye inshila shakwe pa ntanshi ya kwa Yehova Lesa wakwe.+

7 Kabili imilandu yashalako iya kwa Yotamu+ ne nkondo shakwe shonse ne mibele yakwe, fyalilembwa mwi Buuku+ lya Shamfumu sha bena Israele na bena Yuda. 8 Aali ne myaka amakumi yabili na isano (25) ilyo atendeke ukuteka, kabili atekele imyaka ikumi na mutanda (16) mu Yerusalemu.+ 9 Awe Yotamu aleele ukwalaala ifikolwe fyakwe,+ kabili bamushiikile mu Musumba wa kwa Davidi.+ Kabili Ahasi+ umwana wakwe alimupyene no kutendeka ukuteka.

28 Ahasi+ ali ne myaka amakumi yabili (20) ilyo atendeke ukuteka, kabili atekele imyaka ikumi na mutanda (16) mu Yerusalemu,+ kabili tacitile ifisuma mu menso ya kwa Yehova nge fyo Davidi icikolwe cakwe acitile.+ 2 Lelo aendele mu nshila ya shamfumu sha kwa Israele,+ kabili apangile ifimpashanya fya kwenga+ ifya baBaali.+ 3 Kabili alefutumwina icushi ce lambo+ mu mupokapoka wa mwana wa kwa Hinomu+ kabili aocele abana+ bakwe mu mulilo, ukulingana ne fya bunani+ fya nko isho Yehova atamfishe pa ntanshi ya bana ba kwa Israele.+ 4 Kabili lyonse alepeela amalambo+ no kufutumuna icushi ce lambo pa fifulo fya kupepelapo+ na pa tupili+ na mwi samba lya musango onse uwa muti uwalelema.+

5 E ico Yehova Lesa wakwe amupeele mu minwe+ ya mfumu ya ku Siria,+ kabili balimucimfishe no kusenda bankole abengi no kubaleta ku Damaseke.+ Kabili apeelwe na mu minwe ya mfumu ya ku Israele,+ na yo yaipeye abantu bakwe abengi. 6 Awe Peka+ mwana Remalia+ aipeye mu Yuda abantu amakana umwanda umo na makana amakumi yabili (120,000) ubushiku bumo, bonse aba maka, pantu balishile Yehova+ Lesa wa fikolwe fyabo. 7 Kabili, Sikri, impalume ya mu Efraimu,+ aipeye Maaseya umwana wa mfumu na Asrikamu intungulushi ya ba mu ng’anda na Elkana uwali uwa cibili ku mfumu. 8 Kabili, abana ba kwa Israele basendele bamunyinabo amakana imyanda ibili (200,000) bunkole, abanakashi, abana baume na bana banakashi; kabili bapokolwele ifipe fyabo ifingi, e lyo batwele ifipe ifyo bapokolwele ku Samaria.+

9 Kabili kwali kasesema wa kwa Yehova ishina lyakwe ni Odedi. E ico aile pa ntanshi ya bashilika abaleya ku Samaria no kubeba ati: “Moneni! Ni co Yehova Lesa wa fikolwe fyenu afuliilwe+ Yuda e co amupeelele mu minwe yenu, kabili mwalipeyepo abantu babo no bukali+ ubwa kuti bwafika na ku muulu.+ 10 Kabili nomba mulefwaya ukucita abana ba kwa Yuda na Yerusalemu ukuba abasha benu abaume+ na basha benu abanakashi. Lelo, bushe na imwe tamwalufyanya kuli Yehova Lesa wenu? 11 E ico nomba kutikeni kuli ine no kubwesha bankole abo mwasendele kuli bamunyinenwe,+ pantu ubukali bwa kwa Yehova Lesa wenu bulemwishila.”+

12 E ico abaume bamo pa ntungulushi+ sha bana ba kwa Efraimu,+ e kutila Asaria mwana Yehohanani, Berekia mwana Meshileemote na Yehiskia mwana Shalumu na Amasa mwana Hadlai, baimiine abalefuma ku bulwi, 13 kabili babebele abati: “Mwileta bankole kuno, pantu tukaba no mulandu kuli Yehova. Mulefwaya ukulunda ku membu shesu na ku milandu yesu, pantu twaba ne milandu iingi,+ kabili pali ubukali+ ubulepya ngo mulilo pali Israele.” 14 Awe abantu abali ne fyanso+ balekele bankole+ ne fipe bapokolwele kuli bacilolo+ na ku lukuta lonse. 15 E lyo abaume abalumbwilwe amashina+ balimine no kubuula bankole, kabili bafwikile abantu babo bonse abasapwile ifya kufwala fyali mu fyo bapokolwele. Awe balibafwikile+ no kubapeela indyato no kubaliisha+ no kubapeela ifya kunwa+ no kubasuba amafuta. Nomba abanakile sana bena, babaninike+ pa mpunda no kubatwala ku Yeriko,+ umusumba wa tuncindu,+ pamo na bamunyinabo. Pa numa babweleele ku Samaria.+

16 E lyo Imfumu Ahasi+ yatumine amashiwi ku shamfumu sha ku Asiria+ ku kulomba ukuti bayafwe. 17 Kabili abena Edomu+ balishile na kabili no kusansa abaYuda no kusenda bankole. 18 Kumfwa abaPelishiti,+ basanshile imishi ya mu Shefela+ na mu Negebu+ iyaba mu Yuda no kupoka Bete-shemeshe+ na Ayalone+ na Gederote+ na Soko+ ne mishi ya uko na Timuna+ ne mishi ya uko na Gimso ne mishi ya uko; kabili e mo batendeke no kwikala. 19 Pantu Yehova alicefeshe+ Yuda pa mulandu wa kwa Ahasi imfumu ya ku Israele, pantu alekele abaYuda+ ukucilamo ukuilekelesha, kabili abantu balecita ifintu ifyabipa nga nshi kuli Yehova.

20 Umuya inshiku, Tilgati-pilnesere+ imfumu ya ku Asiria yalimwimiine no kumulenga ukucula,+ kabili tamukoseleshe. 21 Pantu Ahasi abuulile ifipe fyonse ifya mu ng’anda ya kwa Yehova+ ne fya mu ng’anda ya mfumu+ ne ya bacilolo+ no kupeela ubupe ku mfumu ya ku Asiria;+ lelo tacamwafwile nakalya. 22 Nomba pa nshita alemulenga ukucula, Imfumu Ahasi na kabili yabwekeshepo ukulufyanya kuli Yehova.+ 23 Kabili yatendeke ukutuula amalambo kuli tulesa+ twa mu Damaseke+ utwaleicimfya, kabili yatile: “Apo tulesa twa bena Siria tulebafwa,+ e to ndepeela amalambo, pa kuti tulengafwa+ na ine.” Kabili twalengele ena na bena Israele bonse ukulufyanya.+ 24 Kabili, Ahasi alonganike ifipe+ fya mu ng’anda ya kwa Lesa wa cine no kuputaula ifipe fya mu ng’anda ya kwa Lesa wa cine,+ kabili aisele ifiibi+ fya ku ng’anda ya kwa Yehova, no kuipangila ifiipailo pa makoona yonse aya mu Yerusalemu.+ 25 Kabili mu misumba yonse, mu misumba ya kwa Yuda, apangiilemo ififulo fya kupepelapo+ ifyo balefutumwinapo icushi ca malambo kuli tulesa tumbi,+ kabili alikalifye+ Yehova Lesa wa fikolwe fyakwe.

26 Imilandu yakwe iyashalako+ ne mibele yakwe yonse, iya pa kubalilapo ne ya pa kulekelesha, yalilembwa mwi Buuku+ lya Shamfumu sha mu Yuda na mu Israele. 27 Awe Ahasi aleele ukwalaala ifikolwe fyakwe, kabili bamushiikile mu musumba, mu Yerusalemu, pantu tabamutwele ku nshiishi ya shamfumu sha mu Israele.+ Kabili Hisekia umwana wakwe alimupyene no kutendeka ukuteka.

29 Hisekia+ atendeke ukuteka ilyo ali ne myaka amakumi yabili na isano (25), kabili atekele imyaka amakumi yabili na pabula (29) mu Yerusalemu. Kabili ishina lya kwa nyina ni Abiya umwana mwanakashi wa kwa Sekaria.+ 2 Kabili alecita ifisuma mu menso ya kwa Yehova,+ ukulingana na fyonse ifyo Davidi icikolwe cakwe acitile.+ 3 Mu mwaka wa kubalilapo uwa kuteka kwakwe, mu mweshi wa kubalilapo, aiswile ifiibi fya ku ng’anda ya kwa Yehova no kutendeka ukufiwamya.+ 4 E lyo aitile bashimapepo na bena Lebi no kubalonganika mu lubansa+ lwa ku kabanga. 5 Kabili abebele ati: “Umfweni kuli ine, mwe bena Lebi. Nomba isangululeni+ no kusangulula ing’anda ya kwa Yehova Lesa wa fikolwe fyenu, kabili fumyeni ifyakowela mu ncende ya mushilo.+ 6 Pantu bashifwe balibembwike+ no kucita ifyabipa mu menso ya kwa Yehova Lesa wesu,+ kabili balimushile+ no kwalula ifinso fyabo ukufuma ku cikuulwa ca mushilo ica kwa Yehova+ no kucifutatila. 7 Baisele ne fiibi+ fya ku muputule wa kwingililapo no kushimya inyali,+ kabili tabaocele ifyanunkila,+ tabatuulile na malambo ya koca mu ncende ya mushilo kuli Lesa wa bena Israele.+ 8 Kabili ubukali+ bwa kwa Yehova bwaishile pa baYuda na pa ba mu Yerusalemu, kabili abalengele babe ica kutiinya,+ ica kupapa+ kabili ica kulishishapo umunsoli,+ nge fyo muleimwena na menso yenu. 9 Kabili ifikolwe fyesu bafipaile ku lupanga,+ kabili abana besu abaume na bana besu abanakashi na bakashi besu basendelwe bunkole pali uyu wine mulandu.+ 10 Nomba ndefwaisha ukupangana icipangano+ na Yehova Lesa wa bena Israele, pa kuti ubukali bwakwe bufume pali ifwe. 11 Nomba, mwe bana bandi, mwituusha,+ pantu ni mwe Yehova asalile ukwiminina pa ntanshi yakwe ku kumubombela+ no kuba ababomfi+ bakwe kabili aba kufutumuna icushi ce lambo.”+

12 E lyo abena Lebi+ baimine, Mahati mwana Amasai na Yoele mwana Asaria aba mu bana ba bena Kohati;+ na mu bana ba kwa Merari,+ Kishi mwana Abdi na Asaria mwana Yehalele; na mu bana ba kwa Gershone,+ Yoashi mwana Sima na Edene mwana Yoa;13 kabili mu bana ba kwa Elisafani,+ Shimri na Yeuele; e lyo mu bana ba kwa Asafi,+ Sekaria na Matania;14 kabili mu bana ba kwa Hemani,+ Yehiele na Shimei; e lyo mu bana ba kwa Yedutuni,+ Shemaya na Usiele. 15 Kabili balonganike bamunyinabo pamo no kuisangulula+ no kwisa ukulingana ne funde lya mfumu ilyalandile pa mashiwi+ ya kwa Yehova, pa kuti basangulule+ ing’anda ya kwa Yehova. 16 Bashimapepo nomba balingile mu ng’anda ya kwa Yehova pa kuti bawamyemo kabili balifumishemo ifiko fyonse ifyo basangile mwi tempele lya kwa Yehova no kufitwala mu lubansa+ lwa ng’anda ya kwa Yehova. Abena Lebi na bo babuulile ifi fiko no kufitwala ku mupokapoka wa Kidrone+ ku nse. 17 E fyo batendeke ukusangulula pa bushiku bwa kubalilapo mu mweshi wa kubalilapo, kabili pa bushiku bwalenga cinekonsekonse (8) baishile ku muputule wa kwingililapo+ uwali wa kwa Yehova; ica kuti basangulwile ing’anda ya kwa Yehova mu nshiku cinekonsekonse, kabili pa bushiku bwalenga ikumi na mutanda (16) ubwa mweshi wa kubalilapo+ balipwile.

18 E lyo nomba baishile kuli Hisekia imfumu no kutila: “Natusangulula ing’anda yonse iya kwa Yehova, iciipailo+ ca mituulo ya koca ne fipe+ fya ciko fyonse, ne tebulo+ lya mukate wa mutuulo ne fipe fya liko fyonse.+ 19 Kabili natupekanya ne fipe+ fyonse ifyo Imfumu Ahasi+ alekele ukubomfya pa nshita aleteka ilyo apondweke,+ kabili natufisangulula;+ kabili fili pa ntanshi ya ciipailo ca kwa Yehova.”

20 Kabili Hisekia+ imfumu aimine lucelocelo+ no kulonganika pamo bacilolo+ aba mu musumba no kuya ku ng’anda ya kwa Yehova. 21 Kabili baletele ing’ombe ishilume cinelubali (7)+ na basukusuku cinelubali na bana ba mpaanga cinelubali na basawe cinelubali ukuba umutuulo wa pa lubembu+ uwa bufumu kabili uwa mu ncende ya mushilo kabili uwa kwa Yuda. E ico aebele abana ba kwa Aarone bashimapepo+ ukuti batuule ishi nama pa ciipailo ca kwa Yehova. 22 Awe baipeye+ ing’ombe kabili bashimapepo bapokelele umulopa+ no kusansa+ pa ciipailo; e lyo baipeye na basukusuku+ no kusansa umulopa+ pa ciipailo, kabili baipeye abana ba mpaanga no kusansa umulopa pa ciipailo. 23 Kabili baletele basawe+ ba mutuulo wa kufuta pa lubembu mupepi na ku mfumu na ku lukuta kabili babikilepo iminwe yabo.+ 24 Bashimapepo nomba baipeye aba basawe no kutuula umutuulo wa pa lubembu no mulopa wabo pa ciipailo, aba kuba icifuta mulandu pa bena Israele bonse;+ pantu imfumu yatile umutuulo wa koca no mutuulo wa pa lubembu wali wa+ bena Israele bonse.+

25 Nomba, yabikile abena Lebi+ pa ng’anda ya kwa Yehova, na malimba+ ne filimba fya nsale+ na bansango,+ ukulingana ne funde lya kwa Davidi+ ne lya kwa Gadi+ uwalemwena imfumu ifimonwa na Natani+ kasesema, pantu ifunde lyafumine ku kuboko kwa kwa Yehova muli bakasesema bakwe.+ 26 E ico abena Lebi baiminine ne filimba+ fya kwa Davidi, e lyo na bashimapepo bali na mapenga.+

27 E lyo Hisekia asosele ukuti batuule ilambo lya koca pa ciipailo; kabili ilyo umutuulo wa koca watendeke, ulwimbo+ lwa kwa Yehova lwalitendeke pamo ne ntandala, ukutungululwa ku filimba fya kwa Davidi imfumu ya bena Israele. 28 Kabili ulukuta lonse lwalekontama+ ilyo ulwimbo lwalelila+ kabili amapenga yalelila, mpaka umutuulo wa koca onse wapwa. 29 Kabili ilyo bapwishishe ukutuula umutuulo, imfumu na bantu bonse abali na yo balikonteme no kupepa.+ 30 Imfumu Hisekia na bacilolo+ nomba basosele ku bena Lebi ukuti balumbanye Yehova mu mashiwi ya kwa Davidi+ na ya kwa Asafi+ uwalemona ifimonwa. Awe batendeke ukumulumbanya no kusekelela,+ kabili bakonteme fye ifyo fine no kushiba ifinso fyabo pa nshi.+

31 E lyo Hisekia ayaswike no kutila: “Nomba namulinga+ ukubombela Yehova. Palameni no kuleta amalambo+ na malambo ya kutootela+ ku ng’anda ya kwa Yehova.” Kabili ulukuta lwatendeke ukuleta amalambo na malambo ya kutootela, na onse uwaitemenwe mu mutima aliletele imituulo ya koca.+ 32 Kabili imituulo ya koca iyo ulukuta lwaletele yali ing’ombe amakumi cinelubali (70), basukusuku umwanda umo (100), abana ba mpaanga imyanda ibili (200), fyonse ifi fyali mituulo ya koca kuli Yehova;+ 33 ne mituulo ya mushilo, ing’ombe imyanda mutanda (600) ne mpaanga amakana yatatu (3,000). 34 Bashimapepo+ fye e bacepele, kabili balifililwe ukufunda inama shonse isha mituulo ya koca.+ E ico bamunyinabo+ abena Lebi balibafwile mpaka umulimo wapwa+ kabili mpaka bashimapepo baisangulula,+ pantu abena Lebi balibikile sana amano+ ku kuisangulula ukucila bashimapepo. 35 Kabili ne mituulo ya koca+ yali iingi nga nshi na mafuta+ ya pa malambo ya mutende+ ne mituulo ya mwangashi+ iituulilwa pamo ne mituulo ya koca. E fyo umulimo wa ng’anda ya kwa Yehova wateyanishiwe.+ 36 E ico Hisekia na bantu bonse balisekelele pantu Lesa wa cine alyafwile abantu,+ pantu ici cintu capumikishe fye.+

30 Kabili Hisekia atumine amashiwi ku bena Israele+ bonse na bena Yuda, kabili alembele na makalata ku bena Efraimu+ na bena Manase,+ ukuti bese ku ng’anda ya kwa Yehova+ mu Yerusalemu ku kusefya ica kucilila+ kuli Yehova Lesa wa kwa Israele. 2 Lelo, imfumu na bacilolo+ ba iko no lukuta+ lonse mu Yerusalemu baumfwene ukuti bali no kusefya ica kucilila mu mweshi wa bubili;+ 3 pantu balifililwe ukusefya ilya nshita,+ pa mulandu wa kuti bashimapepo abaisangulwile tabafulile+ kabili abantu na bo tabalongene ku Yerusalemu. 4 Kabili ici caliweme mu menso ya mfumu na mu menso ya lukuta lonse.+ 5 E ico baumfwene ukuti kube ukubila imbila+ mu Israele monse, ukufuma ku Beere-sheba+ ukufika ku Dani,+ ukuti bese no kusefya ica kucilila kuli Yehova Lesa wa kwa Israele mu Yerusalemu; pantu te bengi bacitile ifi+ ukulingana ne fyalembwa.+

6 Awe inkombe+ ishakwete amakalata ukufuma ku mfumu na kuli bacilolo+ ba iko shaile mu Israele monse na mu Yuda, ukulingana ne funde lya mfumu, kabili inkombe shatile: “Mwe bana ba kwa Israele, bweleni+ kuli Yehova Lesa+ wa kwa Abrahamu, Isaki na Israele, pa kuti abwelele ku bashalapo+ pali imwe abapusuka ku minwe ya shamfumu sha ku Asiria.+ 7 Kabili mwiba nge fikolwe+ fyenu kabili nga bamunyinenwe abasangukile Yehova Lesa wa fikolwe fyabo, kabili abalengele baba ica kupapa,+ nge fyo mulemona. 8 Nomba mwitalamika imikoshi+ yenu nge fyo ifikolwe fyenu fyacitile. Nakileni Yehova+ no kwisa umwa mushilo+ mwakwe umo asangulula+ umuyayaya no kubombela+ Yehova Lesa wenu, pa kuti ubukali+ bwakwe bufume pali imwe. 9 Pantu nga mwabwelela+ kuli Yehova, bamunyinenwe na bana benu bakababelela uluse+ ku babasenda bunkole, no kubasuminisha ukubwelela kuli cino calo;+ pantu Yehova Lesa wenu wa mutembo+ kabili wa luse,+ takafumye icinso kuli imwe nga mwabwelela kuli ena.”+

10 E ico inkombe+ shaliile, shapitile mu musumba no musumba mu calo conse ica bena Efraimu+ na Manase, ukufika na ku Sebuluni; lelo abantu balebatumfya no kubaseka.+ 11 Bamo bamo+ fye aba muli Ashere na Manase na Sebuluni e baicefeshe+ fye kabili e baishile ku Yerusalemu. 12 Ukuboko kwa kwa Lesa wa cine kwali na mu bena Yuda pa kuti abapeele umutima umo+ uwa kumfwila ifunde+ lya mfumu ne lya bacilolo ilyalelanda pa fya kwa Yehova.+

13 Kabili abantu abengi, ulukuta ulukalamba nga nshi, lwalilongene mu Yerusalemu,+ ku kusefya umutebeto+ wa mukate ushatutumuka mu mweshi wa bubili.+ 14 Kabili balimine no kufumya ifiipailo+ ifyali mu Yerusalemu, kabili ifiipailo fyonse apo balefutumwina ifyanunkila+ balififumishe no kufipoosa mu mupokapoka wa Kidrone.+ 15 E lyo baipeye ilambo lya pa ca kucilila+ pa bushiku bwalenga ikumi na shine (14) ubwa mweshi wa bubili; kabili bashimapepo na bena Lebi bena bali ne nsoni, kabili bali-isangulwile+ no kuleta imituulo ya koca ku ng’anda ya kwa Yehova. 16 Kabili baiminine+ pa ncende yabo ukulingana ne fyo babebele, ukulingana ne funde lya kwa Mose umuntu wa kwa Lesa wa cine, bashimapepo+ balesansa umulopa uo balepeelwa ku bena Lebi. 17 Pantu kwali abengi mu lukuta abashaisangulwile; kabili abena Lebi+ e baleangalila ukwipaya inama+ sha pa ca kucilila isha bonse abashasangulwike, pa kuti babasangulule kuli Yehova. 18 Pantu kwali abantu abengi nga nshi, abengi aba mu bena Efraimu+ na Manase,+ Isakari na Sebuluni,+ abashaisangulwile,+ pantu baliile ica kucilila ukwabula ukukonka ifyalembwa;+ lelo Hisekia alibapepeleko,+ ukutila: “Yehova umusuma+ asuminishe 19 onse uuteyenye umutima+ wakwe ukufwaya Lesa wa cine, Yehova, Lesa wa fikolwe fyesu, nangu ca kuti tabali abasanguluka ku kubomba ifya mushilo.”+ 20 Awe Yehova alyumfwile kuli Hisekia no kuundapa abantu.+

21 E ico abana ba bena Israele abasangilwe mu Yerusalemu balisefeshe umutebeto+ wa mukate ushatutumuka inshiku cinelubali (7) no kusekelela+ kukalamba; kabili abena Lebi+ na bashimapepo+ balelumbanya Yehova cila bushiku ne filimba, balelumbanya Yehova.+ 22 Kabili, Hisekia akoseleshe+ abena Lebi bonse abali abacenjela mu kubombela Yehova.+ Kabili basefeshe umutebeto inshiku cinelubali (7),+ baletuula amalambo ya mutende+ no kuyebelela imembu+ kuli Yehova Lesa wa fikolwe fyabo.

23 E lyo ulukuta lonse lwaumfwene+ ukuti lusefye umutebeto inshiku cinelubali (7)+ na shimbi, e ico basefeshe inshiku cinelubali no kusekelela. 24 Pantu Hisekia imfumu ya mu Yuda apeele+ ulukuta ing’ombe ikana limo (1,000) ne mpaanga amakana cinelubali (7,000), na bacilolo+ na bo bapeele ulukuta ing’ombe ikana limo ne mpaanga amakana ikumi (10,000); kabili bashimapepo+ abengi nga nshi batwalilile ukuisangulula. 25 Kabili ulukuta lonse ulwa mu Yuda+ na bashimapepo na bena Lebi+ no lukuta lonse ulwafumine mu Israele+ na balebeshi+ abafumine mu Israele+ na baleikala mu Yuda balesekelela.+ 26 Kabili kwali ukusekelela nga nshi mu Yerusalemu, pantu ukufuma mu nshiku sha kwa Solomone+ mwana Davidi imfumu ya Israele takwali ukusefya ngo ku mu Yerusalemu.+ 27 Awe bashimapepo, abena Lebi, baliminine no kupaala+ abantu; ne shiwi lyabo lyalyumfwikike, kabili ipepo lyabo lyafikile ku bwikalo bwakwe ubwa mushilo, mu muulu.+

31 Kabili ilyo fye bapwile fyonse ifi, abena Israele+ bonse abasangilwe kulya baile mu misumba ya mu Yuda,+ kabili batobawile ifimabwe ifyo baimike+ no kuputaula ifimuti ifyo baimike+ no kubongolola ififulo fya kupepelapo+ ne fiipailo+ mu Yuda+ monse na muli Benjamini na muli Efraimu+ na muli Manase+ mpaka bafipwisha; e lyo abana ba kwa Israele bonse babweleele ku misumba yabo, cila umuntu ku cifulo cakwe.

2 Kabili Hisekia abikile bashimapepo na bena Lebi+ mu mabumba+ yabo, ibumba limo limo no mulimo wa liko uwa kubombela bashimapepo+ na bena Lebi+ uwa kutuula imituulo ya koca+ na malambo ya mutende+ pa kuti balebomba + no kutasha+ no kulumbanya+ mu mpongolo sha nkambi sha kwa Yehova. 3 Kabili kwali fimo ifyafumine pa fintu+ fya mfumu ifya kutuula imituulo ya koca,+ imituulo ya koca iya lucelo+ ne ya cungulo, e lyo ne mituulo ya koca iya pa masabata+ ne ya pa myeshi ipya+ ne ya pa nshita ya mitebeto,+ ukulingana ne fyalembwa mu mafunde ya kwa Yehova.+

4 Kabili, asosele ku bantu, abekashi ba mu Yerusalemu, ukuti bapeele ifyo bayakenye bashimapepo+ ne fyo bayakenye abena Lebi,+ pa kuti bakonke+ sana amafunde ya kwa Yehova.+ 5 Kabili ilyo fye amashiwi yaumfwikike, abana ba kwa Israele+ balifushishe ifisabo fya kubalilapo ukupya ifya ngano,+ umwangashi upya,+ na mafuta+ no buci+ na fyonse ifyo balimine,+ kabili baletele ifya pe kumi ifingi ifya muli fyonse.+ 6 Kabili abana ba kwa Israele na Yuda abaleikala mu misumba ya mu Yuda,+ bena baletele ica pe kumi ca ng’ombe ne mpaanga ne ca pe kumi ica fya mushilo,+ ifintu ifyapeelwe kuli Yehova Lesa wabo. Balifiletele no kufituulika imiina ne miina. 7 Mu mweshi wa butatu+ batendeke ukutuulika imiina, kabili mu mweshi walenga cinelubali (7)+ balipwishishe. 8 Ilyo Hisekia na bacilolo+ baishile no kumona imiina, balicindike+ Yehova no kupaala abantu bakwe abena Israele.+

9 Awe Hisekia aipwishe bashimapepo na bena Lebi pali iyi miina.+ 10 E lyo Asaria+ shimapepo mukalamba uwa mu ng’anda ya kwa Sadoke+ amwebele ati: “Ukutula apo batendekela ukuleta imisangulo+ mu ng’anda ya kwa Yehova, kulaba ukulya no kwikuta+ no kushapo ifingi;+ pantu Yehova umwine alipaala abantu bakwe,+ kabili ifi ifingi e fyashalapo.”

11 E lyo Hisekia asosele ukuti bapekanye imiputule+ ya kuliilamo mu ng’anda ya kwa Yehova. Na bo balipekenye. 12 Kabili baleleta mu cishinka+ imisangulo+ ne ca pe kumi+ ne fya mushilo; kabili Konania umwina Lebi e wali intungulushi yabo, kabili Shimei munyina e wali inkonkani yakwe. 13 Kabili Yehiele na Asasia na Nahati na Asaele na Yerimote na Yosabadi na Eliele na Isimakia na Mahati na Benaya bali balashi abalebomba na Konania na Shimei munyina, ukulingana na mashiwi ya mfumu Hisekia, kabili Asaria+ e waletungulula pa ng’anda ya kwa Lesa wa cine. 14 Kabili Kore mwana Imna umwina Lebi e walelinda impongolo+ ku kabanga,+ no kwangalila ne mituulo ya kuitemenwa+ iyo balepeela kuli Lesa wa cine, pa kuti bapeele umusangulo+ wa kwa Yehova ne fya mushilo sana.+ 15 Kabili aleangalila Edene na Minyamini na Yeshua na Shemaya, Amaria na Shekania, mu misumba ya bashimapepo,+ abo bapeele umulimo pantu bali aba cishinka,+ ukuti balepeela bamunyinabo mu mabumba,+ ukupeela fimo fine ku bacindami na balanda;+ 16 ukufumyako abaume abalembelwe intuntuko+ sha fikolwe fyabo abali ne myaka ukutula pali itatu ukuya na pa muulu,+ bonse abaleisa ku ng’anda ya kwa Yehova cila bushiku, ku kubomba umulimo wabo ukulingana na mabumba yabo.

17 Uku e kulembwa kwa ntuntuko sha bashimapepo ukulingana na mayanda ya bashibo+ e lyo no kulembwa kwa bena Lebi,+ ukutula pa bali ne myaka amakumi yabili (20)+ ukuya na pa muulu, ukulingana ne milimo yabo mu mabumba yabo;+ 18 pa kuti kube ukulemba abanono babo bonse, abakashi babo na bana babo abaume na bana babo abanakashi, ulukuta lonse, pantu mu mulimo balebomba ne cishinka+ bali-isangulwile+ pa kuti babombe umulimo wabo uwakumine ifya mushilo; 19 na bana ba kwa Aarone,+ bashimapepo, mu mpanga+ ya mulemfwe iya mu misumba yabo. Mu misumba yonse iyalekanalekana mwali abaume abalumbwilwe amashina, pa kuti bakanyeko umwaume onse pali bashimapepo ba bena Lebi abo balembele intuntuko shabo ifyo afwile ukupeelwa.

20 Kabili Hisekia acitile ifi fine mu Yuda monse, kabili atwalilile ukucita ifisuma+ kabili ifyalungama+ kabili ifya cishinka+ mu menso ya kwa Yehova Lesa wakwe. 21 Kabili umulimo+ onse uo atendeke uwa kuwamya ing’anda ya kwa Lesa wa cine kabili uwakumine amafunde+ ne fipope pa kuti afwaye+ Lesa wakwe, aubombele no mutima wakwe onse,+ kabili alitungulwike.+

32 Pa numa ya ifi fintu na pa numa ya kuba ne cishinka,+ Sankeribu+ imfumu ya ku Asiria+ alishile no kwingilila icalo ca Yuda no kupangila inkambi imishi ya malinga,+ kabili alefwaya ukuti ibe yakwe pa kuicimfya.

2 Ilyo Hisekia amwene ukuti Sankeribu naisa kabili apampamine+ pa kulwisha Yerusalemu, 3 ena na bacilolo+ na baume bakwe impalume baumfwene ukuti bali no kucilika amenshi yalefuma mu tumfukumfuku ayali ku nse ya musumba;+ kabili balimwafwile. 4 Awe abantu abengi balilongene pamo, kabili bacilike utumfukumfuku tonse no mumana+ uwapitile pa kati ka calo, abati: “Nga cinshi ishamfumu sha bena Asiria shalaishila no kusanga amenshi ayengi?”

5 Kabili alishipile no kukuula icibumba cabongolweke+ conse no kukuulapo impungu,+ kabili ku nse akuulileko icibumba+ na cimbi no kuwamya apalundumana+ mu Musumba wa kwa Davidi, no kupanga ifyanso+ ifingi ne nkwela.+ 6 Kabili asontele abakalamba+ ba bashilika aba kwangalila abantu no kubalonganika uko ali pa lubansa+ lwa pa mpongolo ya musumba no kubakoselesha,+ ati: 7 “Shipeni kabili koseni.+ Mwitiina+ nelyo ukututuma+ pa mulandu wa mfumu ya ku Asiria+ na pa mulandu we bumba ikwete;+ pantu ifwe tuli na bengi ukucila abo ikwete. 8 Yena ili no kuboko kwa buntunse,+ lelo ifwe tuli na Yehova Lesa wesu uwa kutwafwa+ no kutulwila inkondo.”+ Awe abantu balikoseleshiwe ku mashiwi ya kwa Hisekia imfumu ya Yuda.+

9 Pa numa ya ici, Sankeribu+ imfumu ya ku Asiria atumine ababomfi bakwe ku Yerusalemu, ninshi ena ali mu Lakishi+ na ba maka bakwe bonse abo ali na bo,+ atumine ababomfi bakwe kuli Hisekia imfumu ya Yuda na ku bantu bonse abali mu Yerusalemu, ati:

10 “Sankeribu imfumu ya bena Asiria asosa+ ati, ‘Nani mucetekele apo mwikele tondolo ilyo Yerusalemu nashingulukwa?+ 11 Bushe Hisekia+ talemubepa+ fye pa kuti mufwe ku cipowe na ku cilaka, pa kumweba ati: “Yehova Lesa wesu akatupokolola mu minwe ya mfumu ya ku Asiria”?+ 12 Bushe te Hisekia aonawile ififulo fya kupepelapo+ ne fiipailo+ fyakwe no kusosa ku baYuda na ba mu Yerusalemu ati: “Mulekontamina+ fye ku ciipailo+ cimo kabili pali cena e po mulefutumwina ne cushi ce lambo”?+ 13 Bushe tamwaishiba ico ine ne fikolwe fyandi twacitile ku bantu bonse aba mu nko?+ Bushe balesa+ ba nko sha fyalo balipokolwele ifyalo fyabo mu minwe yandi? 14 Nani pali balesa bonse aba ishi inko isho ifikolwe fyandi fyaonawile uwapokolwele abantu bakwe mu minwe yandi, pa kuti Lesa wenu amupokolole mu minwe yandi?+ 15 E ico mwileka Hisekia amubepe+ nelyo ukumutumpika+ kabili mwimucetekela, pantu takwali lesa wa mu luko lonse nelyo ubufumu uwapokolwele abantu bakwe mu minwe yandi na mu minwe ya fikolwe fyandi. Na Lesa wenu takamupokolole mu minwe yandi nakalya!’”+

16 Awe ababomfi bakwe na kabili balandile ifibi pali Yehova Lesa wa cine+ na pali Hisekia umubomfi wakwe. 17 Alembele na bakalata+ ba kuseebanya Yehova Lesa wa bena Israele+ no kulanda ifibi pali ena, ati: “Filya fine balesa+ ba mu nko sha mu fyalo bafililwe ukupokolola abantu babo mu minwe yandi,+ e fyo na Lesa wa kwa Hisekia ashakapokolole abantu bakwe mu minwe yandi.” 18 Kabili balebilikisha+ ishiwi likalamba+ mu ciYuda+ ku bantu ba mu Yerusalemu abali pa muulu wa cibumba, pa kuti babatiinye+ no kubasakamika, pa kuti bapoke umusumba. 19 Kabili balelanda ifibi+ pali Lesa wa mu Yerusalemu+ nge fyo balelanda na pali balesa ba bantu ba pe sonde, abo bapanga ku minwe ya bantunse.+ 20 Lelo Hisekia+ imfumu na Esaya+ mwana Amose,+ kasesema,+ balepepela uyu mulandu+ no kulilila ku muulu ukuti babafweko.+

21 Kabili Yehova atumine malaika+ no kulofya umwaume onse uwa kosa kabili impalume+ ne ntungulushi na bakalamba ba bashilika mu nkambi ya mfumu ya bena Asiria,+ kabili yabweleele ku calo ca iko ninshi ili ne nsoni. E lyo yaingile mu ng’anda ya kwa lesa wa iko kabili abana ba iko bamo baipeye ku lupanga.+ 22 E fyo Yehova apuswishe Hisekia na bekashi ba mu Yerusalemu mu minwe ya kwa Sankeribu imfumu ya bena Asiria+ na mu minwe ya bonse bambi no kubalenga ukutuusha mu calo conse.+ 23 Kabili kwali abengi abaleleta ubupe+ kuli Yehova mu Yerusalemu ne fipe ifisuma kuli Hisekia imfumu ya baYuda,+ kabili alisansabikwe+ mu menso ya nko shonse pa numa ya ici.

24 Awe mu nshiku shilya Hisekia alilwele ubwa kufwa,+ kabili alipepele+ kuli Yehova. E ico alandile nankwe,+ no kumupeela icishibilo.+ 25 Lelo Hisekia tacitile ukulingana no busuma bamucitiile,+ pantu icilumba+ calikulile mu mutima wakwe kabili ubukali+ bwaishile pali ena na pa bena Yuda na ba mu Yerusalemu. 26 Lelo Hisekia ali-icefeshe+ pa cilumba ca mu mutima wakwe, ena na bekashi ba mu Yerusalemu, no bukali bwa kwa Yehova tabwaishile pali bena mu nshiku sha kwa Hisekia.+

27 Kabili Hisekia alikwete ifyuma ifingi nga nshi e lyo alicindeme nga nshi;+ kabili alipangile na matala ya silfere na golde+ na ya mabwe yaumo mutengo+ na ya mafuta ya balsamu+ na ya nkwela+ na ya fipe ifisuma fyonse;+ 28 na matala+ ya ngano no mwangashi+ uupya na mafuta, e lyo na matanga+ ya nama shalekanalekana na macinka ya mpaanga. 29 Kabili alikwete imisumba, ne fitekwa+ ne ng’ombe+ ishingi; pantu Lesa alimupeele ifyuma ifingi.+ 30 Kabili Hisekia e wacilike+ intulo ya menshi+ ya Gihone+ no kuyalwila ku masamba ya Musumba wa kwa Davidi,+ kabili Hisekia aletunguluka mu milimo yakwe yonse.+ 31 Nomba ilyo inkombe sha bacilolo ba mu Babiloni+ shatuminwe kuli ena+ pa kuti shipushe pa cishibilo+ cacitike mu calo, Lesa wa cine alimulekele+ ukuti amweshe,+ pa kuti eshibe fyonse ifyali mu mutima wakwe.+

32 Kabili imilandu yashalako+ iya kwa Hisekia ne cikuuku cakwe,+ fyalilembwa mu cimonwa ca kwa Esaya kasesema, mwana Amose,+ mwi Buuku+ lya Shamfumu sha bena Yuda na bena Israele. 33 Awe Hisekia aleele ukwalaala ifikolwe fyakwe,+ kabili bamushiikile apa kuninina ukuya ku nshiishi sha bana ba kwa Davidi;+ kabili abaYuda bonse na bekashi ba mu Yerusalemu balimucindike ilyo afwile.+ Kabili Manase+ umwana wakwe alimupyene no kutendeka ukuteka.

33 Manase+ ali ne myaka ikumi na ibili (12) ilyo atendeke ukuteka, kabili atekele imyaka amakumi yasano na isano (55) mu Yerusalemu.+

2 Kabili acitile ifyabipa mu menso ya kwa Yehova,+ ukulingana ne fya bunani+ ifyacitile inko isho Yehova atamfishe ku cinso ca bana ba kwa Israele.+ 3 E ico akuulile cipya cipya ififulo fya kupepelapo+ ifyo Hisekia wishi abongolwele,+ no kukuulila baBaali+ ifiipailo+ no kwimika ifimuti,+ kabili atendeke ukukontamina+ ifya mu muulu+ fyonse no kufibombela.+ 4 Akuulile ne fiipailo+ mu ng’anda ya kwa Yehova, iyo Yehova alandilepo ati: “Mu Yerusalemu e mukaba ishina lyandi umuyayaya.”+ 5 Kabili akuuliile ifya mu muulu+ fyonse ifiipailo mu mansa+ shibili isha ng’anda ya kwa Yehova.+ 6 Aocele na bana bakwe mu mulilo+ mu mupokapoka wa mwana wa kwa Hinomu,+ kabili alecita ifinjelengwe+ no kubuka+ no kucita ubuloshi+ kabili asontele abaishiba ukwipusha ku mipashi+ na baishiba ukusobela ifintu.+ Acitile ifyabipa ifingi nga nshi mu menso ya kwa Yehova, pa kuti amukalifye.+

7 Kabili, abikile icimpashanya+ icabaswa ico apangile mu ng’anda ya kwa Lesa wa cine,+ iyo Lesa alandilepo kuli Davidi na kuli Solomone umwana wakwe ati: “Muli ino ng’anda na mu Yerusalemu, umusumba uo nasala+ mu mikowa yonse iya kwa Israele, e mo nkabika ishina+ lyandi umuyayaya.+ 8 Kabili nshakabwekeshepo ukufumya ulukasa lwa bena Israele mu calo ico napeele+ ifikolwe fyabo,+ cikulu fye babika amano ku kucita fyonse ifyo nabebele+ ukukuma ku mafunde+ yonse ne fipope+ no bupingushi+ ifyaishiile muli Mose.”+ 9 Kabili Manase+ alebeleleka abena Yuda+ na bekashi ba mu Yerusalemu+ ukucita ifyabipa ukucila inko isho Yehova alofeshe pa ntanshi ya bana ba kwa Israele.+

10 Kabili Yehova alelanda na Manase na bantu bakwe, lelo tabalebikako amano.+ 11 Awe Yehova asukile abaletela+ abakalamba ba bashilika ba mfumu ya bena Asiria,+ kabili baikete Manase mu filindi+ no kumukakila+ mu makusu yabili aya mukuba no kumusenda ku Babiloni. 12 Kabili ilyo aculile,+ anashishe umutima wa kwa Yehova Lesa+ wakwe kabili ali-icefeshe+ icine cine pa mulandu wa kwa Lesa wa fikolwe fyakwe. 13 Kabili alepepa kuli Lesa, na o alyumfwile ukupapaata kwakwe+ kabili aumfwile ukulomba kwakwe ukwa kuti amubelele uluse kabili amubweseeshe ku Yerusalemu pa bufumu bwakwe;+ kabili Manase aishibe ukuti Yehova e Lesa wa cine.+

14 Kabili pa numa ya ifi akuulile ilinga ku nse+ ya Musumba wa kwa Davidi+ ku masamba ya Gihone+ mu mupokapoka kabili ukufika na ku Mpongolo ye Sabi,+ kabili alishingulwishe ili ilinga ukufika ku Ofele+ no kulilefya nga nshi. Kabili, abikile abakalamba be bumba lya bashilika mu misumba yonse iya malinga mu Yuda.+ 15 Kabili afumishe balesa bambi bambi+ ne cilubi+ mu ng’anda ya kwa Yehova ne fiipailo+ fyonse ifyo akuulile mu lupili lwa ng’anda ya kwa Yehova na mu Yerusalemu no kufipoosa ku nse ya musumba. 16 Kabili, awemye iciipailo ca kwa Yehova+ no kutendeka ukutuulilapo amalambo ya mutende+ na malambo ya kutootela+ kabili aebele abena Yuda ukulabombela Yehova Lesa wa bena Israele.+ 17 Lelo, abantu bena tabalekele ukupeela amalambo pa fifulo fya kupepelapo;+ lelo balepeela kuli Yehova Lesa wabo epela.

18 Kabili imilandu yashalako iya kwa Manase ne pepo+ lyakwe kuli Lesa wakwe na mashiwi ya balemona ifimonwa+ abalelanda nankwe mwi shina lya kwa Yehova Lesa wa kwa Israele, fyalilembwa mu lyashi lya shamfumu sha mu Israele.+ 19 Nomba ipepo+ lyakwe, ne fyo bamupeele ifyo alombele,+ ne membu shakwe,+ ne fyo apondweke,+ no mo akuulile ififulo fya kupepelapo+ no kwimika ifimuti+ ne fimpashanya ifyabaswa+ ilyo ashilaicefya,+ fyalilembwa mu mashiwi ya balemumwena ifimonwa. 20 Awe Manase aleele ukwalaala ifikolwe fyakwe,+ kabili bamushiikile+ pa ng’anda yakwe; kabili Amone+ umwana wakwe alimupyene no kutendeka ukuteka.

21 Amone+ ali ne myaka amakumi yabili na ibili (22) ilyo atendeke ukuteka, kabili atekele imyaka ibili mu Yerusalemu.+ 22 Kabili acitile ifyabipa mu menso ya kwa Yehova,+ nga filya fine Manase wishi acitile;+ kabili Amone aletuula amalambo+ ku fimpashanya ifyabaswa+ fyonse ifyo Manase+ wishi apangile, kabili alefibombela.+ 23 Kabili taicefeshe+ pa mulandu wa kwa Yehova nga filya Manase wishi aicefeshe,+ pantu Amone alengele ububi ukufula.+ 24 Awe ababomfi bakwe balimupangiile+ kabili bamwipaile mu ng’anda yakwe.+ 25 Lelo abantu ba mu calo baipeye+ bonse abapangiile+ Imfumu Amone,+ kabili abantu+ ba mu calo bapyanikepo Yoshia+ umwana wakwe ukuba imfumu.

34 Yoshia+ ali ne myaka cinekonsekonse (8)+ ilyo atendeke ukuteka, kabili atekele mu Yerusalemu imyaka amakumi yatatu na umo (31).+ 2 Kabili acitile ifyalungama mu menso ya kwa Yehova+ no kwenda mu mibele ya kwa Davidi icikolwe cakwe;+ kabili tayalukile ku kwa kulyo nangu ku kwa kuso.+

3 Kabili mu mwaka walenga cinekonsekonse (8) uwa kuteka kwakwe, ninshi acili fye umwaice,+ atampile ukufwaya+ Lesa wa kwa Davidi icikolwe cakwe; kabili mu mwaka walenga ikumi na ibili (12) atendeke ukusangulula+ icalo ca bena Yuda na Yerusalemu, ukufumyamo ififulo fya kupepelapo+ ne fimuti ifyo baimike+ ne fimpashanya ifyabaswa+ ne fimpashanya ifyaengwa. 4 Kabili babongolwele ifiipailo+ fya baBaali+ ku cinso cakwe; kabili aputwile ifyo balefutumwinapo+ ifyanunkila ifyali pa muulu; kabili aputwile ifimuti ifyo baimike+ no kutobaula ifimpashanya ifyabaswa+ ne fimpashanya ifyaengwa no kufishonaula fyaba ubungululu,+ e lyo aulwilile ubu ubungululu pa muulu wa nshiishi sha baletuula amalambo kuli fyena.+ 5 Kabili aocelele amafupa+ ya bashimapepo pa fiipailo fyabo.+ E fyo asangulwile icalo ca Yuda no musumba wa Yerusalemu.

6 E fyo acitile na mu misumba yonse iya kwa Manase+ na Efraimu+ na Simeone ukufika na ku ya kwa Naftali, na mu fibolya fyabo ukushinguluka konse, 7 abongolwele ne fiipailo+ ne fimuti ifyo baimike,+ ne fimpashanya ifyabaswa+ alifitobawile no kufishonaula;+ kabili abongolwele ifya kufutumwinapo+ ifyanunkila mu calo ca bena Israele conse, e lyo abweleele ku Yerusalemu.

8 Kabili mu mwaka walenga ikumi na cinekonsekonse (18)+ uwa kuteka kwakwe, ilyo asangulwile icalo ne ng’anda, atumine Shafani+ mwana Asalia na Maaseya umukalamba wa musumba na Yoa mwana Yoahasi kalemba pa kuti bayewamya+ ing’anda ya kwa Yehova Lesa wakwe. 9 Kabili baile kuli Hilkia+ shimapepo mukalamba no kumupeela indalama isho abantu baleleta ku ng’anda ya kwa Lesa, isho abena Lebi abalinshi ba pa mwinshi+ balongenye ukufuma ku bena Manase+ na bena Efraimu+ no kufuma ku ncende shimbi shonse isha bena Israele+ na bena Yuda bonse na ba muli Benjamini na bekashi ba mu Yerusalemu. 10 E lyo bashipeele ku balebomba umulimo abalaashikwe pa ng’anda ya kwa Yehova.+ Kabili abalebomba umulimo abalepikintika bashibomfeshe ukuwamya ing’anda. 11 E ico bashipeele ku bacenjela mu fya kupangapanga na kuli bakakuula+ ukuti bashitemo amabwe ayabaswa+ ne mbao sha kupaalikila no kukuulila ku mbao amayanda ayo ishamfumu+ sha calo ca Yuda shaonawile.

12 Kabili aba baume bali aba cishinka+ muli uyu mulimo; kabili abasontelwe ukubangalila ni Yahati na Obadia abena Lebi, aba mu bana ba kwa Merari,+ na Sekaria na Meshulamu, aba mu bana ba kwa Kohati,+ ukuba bakangalila. Kabili abena Lebi, umo umo uwaishibe ukulisha ifilimba fya nyimbo,+ 13 baleangalila abalesenda ifipe,+ kabili baleangalila+ abalebomba umulimo, bonse abalebomba imilimo yalekanalekana; kabili pa bena Lebi+ pali bakalemba+ na balashi na balinshi ba pa mpongolo.+

14 Nomba ilyo balefumya indalama+ isho abantu baleleta ku ng’anda ya kwa Yehova, shimapepo Hilkia+ asangile ibuuku+ lya mafunde+ ya kwa Yehova ilyalembelwe na Mose.+ 15 E ico Hilkia atile kuli Shafani+ kalemba: “Ninsanga ibuuku lya mafunde mu ng’anda ya kwa Yehova.” Awe Hilkia apeele Shafani ibuuku. 16 E lyo Shafani atwele ibuuku ku mfumu no kweba imfumu ati: “Umulimo onse uo ababomfi benu bapeelwa, balebomba. 17 Kabili balebuula indalama ishilesangwa mu ng’anda ya kwa Yehova no kushipeela mu minwe ya baume basontwa na mu minwe ya balebomba umulimo.”+ 18 Kabili Shafani kalemba alondolwelele imfumu ati: “Kuli ibuuku+ ilyo Hilkia shimapepo ampeele.”+ Awe Shafani atendeke ukubelengamo pa ntanshi ya mfumu.+

19 Nomba ilyo fye imfumu yaumfwile amashiwi ayali mu mafunde, yalepwile ifya kufwala fya iko.+ 20 E lyo imfumu yaebele Hilkia+ na Ahikamu+ mwana Shafani na Abdone mwana Mika na Shafani+ kalemba+ na Asaya+ umubomfi wa mfumu, aiti:21 “Kabiyeni, kanjipushisheniko+ kuli Yehova no kwipushishako abashalamo mu Israele na mu Yuda pa mashiwi yali mwi buuku+ ilisangilwe, pantu ubukali bwa kwa Yehova ubukapongolwelwa pali ifwe bukalamba,+ pa mulandu wa kuti ifikolwe fyesu tafyakonkele icebo ca kwa Yehova pa kukanacita ukulingana na fyonse ifyalembwa muli ili buuku.”+

22 Awe Hilkia pamo na bantu imfumu yaebele baile kuli Hulda+ kasesema umwanakashi,+ umukashi wa kwa Shalumu mwana Tikba mwana Hahasi uwalesunga ifya kufwala,+ pantu aleikala mu Yerusalemu mu citungu icipya ica musumba; kabili balandile nankwe amashiwi aya. 23 Na o abebele ati:

“Yehova Lesa wa kwa Israele atila, ‘Ebeni umuntu uumutumine kuli ine amuti: 24 “Yehova atila, ‘Mona ndeleta ubucushi+ pali cino cifulo na pa baikalamo,+ ifitiipu+ fyonse ifyalembwa mwi buuku ilyo babelengeele imfumu ya Yuda,+ 25 pa mulandu wa kuti balinsha+ kabili balefutumwina icushi ca malambo kuli balesa bambi,+ pa kuti bankalifye+ ku milimo yonse iya minwe yabo+ na pa kuti ubukali+ bwandi bwise pali cino cifulo no kukanapwa.’”+ 26 Kabili imfumu ya Yuda, iimutumine ku kwipusha kuli Yehova, muyebe amuti: “Yehova Lesa wa kwa Israele atila,+ ‘Nomba ukukuma kuli yalya amashiwi+ umfwile, 27 apo umutima+ obe waciba uwanakilila ica kuti waci-icefya+ pa mulandu wa kwa Lesa ilyo wacumfwa amashiwi yakwe ayo acilanda pali cino cifulo na pa baikalamo, kabili waci-icefya kuli ine+ no kulepula+ ifya kufwala fyobe no kulila pa ntanshi yandi, ine ning’umfwa,+ e fyo Yehova asosa. 28 Mona ndekutwala ukwaba ifikolwe fyobe, kabili ukatwalwa ku nshiishi yobe mu mutende,+ na menso yobe tayakamone ubucushi+ bonse ubo ndeleta pali cino cifulo na pa baikalamo.’”’”+

E lyo baile-eba imfumu amashiwi aya. 29 Kabili imfumu yatumine aba kwita no kulonganika abakalamba bonse aba mu Yuda na ba mu Yerusalemu.+ 30 Imfumu nomba yaile ku ng’anda ya kwa Yehova+ na baume ba mu Yuda bonse na bekashi ba mu Yerusalemu na bashimapepo+ na bena Lebi na bantu bonse, abacindami na balanda; kabili yatendeke ukubabelengela+ amashiwi yonse ayali mwi buuku lya cipangano, ilyasangilwe mu ng’anda ya kwa Yehova.+ 31 Kabili yaiminine pa cifulo ca iko+ no kupangana icipangano+ pa ntanshi ya kwa Yehova ica kukonka Yehova no kukonka amafunde+ yakwe na mashiwi yakwe+ ne fipope+ fyakwe no mutima+ wa iko onse no mweo+ wa iko onse, ukulacita+ ifyaba muli ici cipangano ifyalembelwe muli ili ibuuku.+ 32 Kabili yaebele bonse abasangilwe mu Yerusalemu na muli Benjamini ukusuminishako. Kabili abekashi ba mu Yerusalemu bakonkele ifyali mu cipangano ca kwa Lesa, Lesa wa fikolwe fyabo.+ 33 Pa numa ya ifi Yoshia afumishe ifya bunani+ fyonse mu mpanga yonse iya bana ba kwa Israele,+ kabili aebele bonse abali mu Israele ukutendeka ukubomba, ukubombela Yehova Lesa wabo. Inshiku shakwe shonse tabalekele ukukonka Yehova Lesa wa fikolwe fyabo.+

35 Kabili Yoshia+ asefeshe ica kucilila+ kuli Yehova mu Yerusalemu kabili baipeye inama ya kutuula ilambo+ lya pa ca kucilila pa bushiku bwalenga ikumi na shine (14)+ mu mweshi wa kubalilapo.+ 2 E ico abikile bashimapepo pa milimo yabo+ no kubakoselesha+ mu mulimo balebomba mu ng’anda ya kwa Yehova.+ 3 Kabili asosele ku bena Lebi, abalesambilisha+ abena Israele bonse, aba mushilo kuli Yehova, ati: “Bikeni Icipao ca mushilo+ mu ng’anda+ iyo Solomone mwana Davidi imfumu ya bena Israele akuulile; tacili na kuba na kabili icipe pa mabeya yenu.+ Nomba bombeleni+ Yehova Lesa wenu na bantu bakwe abena Israele. 4 Kabili ipekanyeni ukulingana na mayanda ya bashinwe+ ukulingana na mabumba+ yenu, ukulingana ne fyalembwa+ fya kwa Davidi imfumu ya bena Israele ne fyalembwa+ fya kwa Solomone umwana wakwe. 5 Kabili iminineni+ mu ncende ya mushilo ukulingana na mabumba ya mayanda ya bashinwe pa kuti mwaafwe bamunyinenwe, abana ba bantu, ne ciputulwa ca ng’anda ya bashibo+ ica bena Lebi.+ 6 Kabili ipayeni inama ya kutuula ilambo lya pa ca kucilila+ no kuisangulula+ no kupekanishisha bamunyinenwe ukuti bacite ukulingana ne fyo Yehova asoseele mu mubomfi wakwe Mose.”+

7 E lyo Yoshia apeele ubupe ku bana ba bantu umukuni wa bana ba mpaanga na bana ba mbushi, e kutila amalambo yonse aya pa ca kucilila aya bantu bonse abasangilwepo, amakana amakumi yatatu (30,000), ne ng’ombe, amakana yatatu (3,000).+ Ifi fyafumine pa fyuma fya mfumu.+ 8 Kabili bacilolo+ bakwe bapeele ubupe umutuulo wa malambo ya kuitemenwa uwa bantu,+ uwa bashimapepo no wa bena Lebi. Hilkia+ na Sekaria na Yehiele abali intungulushi mu ng’anda ya kwa Lesa wa cine bapeele bashimapepo amalambo ya pa ca kucilila amakana yabili ne myanda mutanda (2,600), ne ng’ombe imyanda itatu (300). 9 Kabili Konania na Shemaya na Netanele bamunyina na Hashabia na Yeiele na Yosabadi, intungulushi sha bena Lebi, na sho shapeele ubupe ku bena Lebi amalambo ya pa ca kucilila amakana yasano (5,000), ne ng’ombe imyanda isano (500).

10 Kabili umulimo walipekanishiwe+ na bashimapepo baiminine+ pa fifulo fyabo,+ na bena Lebi ukulingana na mabumba+ yabo, ukulingana ne funde lya mfumu.+ 11 Kabili baipeye ilambo+ lya pa ca kucilila e lyo bashimapepo+ na bo basanshile+ umulopa uo abena Lebi babapeele, ninshi abena Lebi balefunda inama.+ 12 Kabili bapekenye amalambo pa kuti bayapeele ku mabumba+ ukulingana na mayanda ya bashibo,+ ku bana ba bantu, pa kuti batuule+ kuli Yehova ukulingana ne fyalembwa mwi buuku lya kwa Mose;+ kabili bacitile cimo cine na ku ng’ombe. 13 Kabili baipike+ inama ya mutuulo wa pa ca kucilila+ pa mulilo ukulingana no lutambi; kabili baipike ifya mushilo+ mu mpoto na mu malongo na mu mitondo ya pa mitebeto, e lyo baletele bwangu bwangu ku bana ba bantu bonse.+ 14 Kabili pa numa bali-ipekanishishe abene no kupekanishisha bashimapepo,+ pantu bashimapepo abana ba kwa Aarone baletuula amalambo ya koca+ na mafuta+ ukufika ubushiku, kabili abena Lebi bena bali-ipekanishishe+ abene no kupekanishisha bashimapepo abana ba kwa Aarone.

15 Kabili aba kwimba,+ abana ba kwa Asafi,+ bali mu mulimo wabo ukulingana ne funde lya kwa Davidi+ ne lya kwa Asafi+ ne lya kwa Hemani+ ne lya kwa Yedutuni+ uwalemwena imfumu ifimonwa;+ kabili abalinshi ba pa mpongolo+ bali pa mpongolo shalekanalekana.+ Tabalekabila ukufuma pa mulimo wabo, pantu bamunyinabo abena Lebi balibapekanishishe.+ 16 Kabili umulimo onse uwa kwa Yehova walipekanishiwe pali bulya bwine bushiku pa kuti basefye ica kucilila+ no kutuula imituulo ya koca pa ciipailo ca kwa Yehova, ukulingana ne funde lya Mfumu Yoshia.+

17 Kabili abana ba kwa Israele abasangilweko basefeshe ica kucilila+ pali ilya nshita e lyo no mutebeto wa mukate uushatutumuka inshiku cinelubali (7).+ 18 Kabili tabatalile abasefya umutebeto nga uyu mu Israele ukufuma mu nshiku sha kwa Samwele kasesema,+ nangu ni mfumu shimbi+ tashatalile ashisefya umutebeto nga uyu uo Yoshia na bashimapepo na bena Lebi na bena Yuda bonse na bena Israele abasangilweko na bekashi ba mu Yerusalemu basefeshe. 19 Mu mwaka walenga ikumi na cinekonsekonse (18) ukutula apo Yoshia atendekele ukuteka, e mo basefeshe ici ica kucilila.+

20 Pa numa ya ifi fyonse ilyo Yoshia apekenye ing’anda, Neko+ imfumu ya ku Egupti+ aishile ku kulwa pa Karikemishi+ mupepi no mumana wa Yufrate. Kabili Yoshia+ alifumine ku kulwa nankwe.+ 21 Awe atumine inkombe kuli ena ukutila: “Bushe tulomfwana na iwe, we mfumu ya baYuda? Te iwe njishile ku kulwisha buno bushiku, lelo ni ng’anda imbi njishile ku kulwisha kabili Lesa umwine atile njise mbatiinye. Bwelelamo no kuipususha pa mulandu wa kwa Lesa, uuli na ine, kabili wileka akonaule.”+ 22 Awe Yoshia tafumine kuli ena,+ lelo ali-ifungushenye+ pa kuti alwe nankwe kabili alikeene ukukutika ku mashiwi ya kwa Neko+ ayafumine kuli Lesa. E ico aishile ku kulwa mu mpanga iyabatama iya Megido.+

23 Kabili abalepoosa imifwi+ balashile Imfumu Yoshia, kabili imfumu yaebele ababomfi ba iko aiti: “Njikisheni, pantu nabancena sana.”+ 24 Awe ababomfi bakwe bamufumishe mwi celeta ali no kumwensha mwi celeta lyakwe ilya nkondo ilya cibili no kumutwala ku Yerusalemu.+ E fyo afwile+ kabili bamushiikile mu nshiishi ya fikolwe fyakwe;+ kabili abena Yuda bonse na bena Yerusalemu balooseshe+ Yoshia. 25 Kabili Yeremia+ alooseshe Yoshia mu lwimbo;+ kabili bakemba bonse abaume na bakemba abanakashi+ balalanda pali Yoshia mu nyimbo shabo ukufika na lelo; kabili ukwimba ishi nyimbo sha bulanda nomba kwaba cipope mu Israele, kabili shalilembwa pa nyimbo sha bulanda.+

26 Kumfwa imilandu yashalako+ iya kwa Yoshia ne cikuuku cakwe,+ ukulingana ne fyalembwa mu mafunde+ ya kwa Yehova, 27 ne milandu yakwe, iya kubalilapo ne ya kulekelesha,+ yalilembwa mwi Buuku+ lya Shamfumu sha Israele na Yuda.

36 Awe abantu ba mu calo babuulile Yehoahasi+ umwana wa kwa Yoshia no kumubika pa bufumu ukupyana wishi mu Yerusalemu.+ 2 Yehoahasi ali ne myaka amakumi yabili na itatu (23) ilyo atendeke ukuteka, kabili atekele imyeshi itatu mu Yerusalemu.+ 3 Lelo, imfumu ya ku Egupti yalimufumishe mu Yerusalemu+ no kulipilisha icalo amatalanti ya silfere+ umwanda umo (100) ne talanti lya golde limo. 4 Kabili, imfumu+ ya ku Egupti yabikile Eliakimu+ munyina ukuba imfumu pa bena Yuda na ba mu Yerusalemu no kwalula ishina lyakwe ukuba Yehoyakimu; lelo munyina Yehoahasi, Neko+ alimusendele no kumutwala ku Egupti.+

5 Yehoyakimu+ ali ne myaka amakumi yabili na isano (25) ilyo atendeke ukuteka, kabili atekele mu Yerusalemu pa myaka ikumi na umo (11);+ kabili alecita ifyabipa mu menso ya kwa Yehova Lesa wakwe.+ 6 Kabili Nebukadnesari+ imfumu ya bena Babiloni alimwishile+ pa kuti amukake mu makusu yabili aya mukuba no kumusenda ku Babiloni.+ 7 Kabili ifipe+ fimo ifya mu ng’anda ya kwa Yehova, Nebukadnesari+ alifisendele ku Babiloni no kufibika mwi sano lyakwe mu Babiloni.+ 8 Imilandu iyashalako+ iya kwa Yehoyakimu ne fya bunani+ ifyo acitile ne fyasangilwe pali ena, fyalilembwa mwi Buuku+ lya Shamfumu sha mu Israele na mu Yuda; kabili Yehoyakini+ umwana wakwe alimupyene no kutendeka ukuteka.

9 Yehoyakini+ ali ne myaka ikumi na cinekonsekonse (18) ilyo atendeke ukuteka, kabili atekele imyeshi itatu+ ne nshiku ikumi (10) mu Yerusalemu; kabili alecita ifyabipa mu menso ya kwa Yehova.+ 10 Kabili ku kutendeka+ kwa mwaka, Imfumu Nebukadnesari yatumine+ abantu no kumuleta ku Babiloni+ ne fipe ifisuma ifya mu ng’anda ya kwa Yehova.+ Kabili abikile Sidekia+ munyina wa kwa wishi ukuba imfumu pali Yuda na Yerusalemu.+

11 Sidekia+ ali ne myaka amakumi yabili na umo (21) ilyo atendeke ukuteka, kabili atekele mu Yerusalemu pa myaka ikumi na umo (11).+ 12 Kabili alecita ifyabipa+ mu menso ya kwa Yehova Lesa wakwe. Taicefeshe+ kuli Yeremia+ kasesema+ uo Yehova atumine. 13 Kabili apondokele ne Mfumu Nebukadnesari,+ iyamulengele ukulapa Lesa;+ kabili aletalamika+ umukoshi wakwe no kukosha+ umutima wakwe pa kuti ebwelela kuli Yehova Lesa wa kwa Israele. 14 Awe intungulushi shonse isha bashimapepo+ na bantu balibembwike icine cine, ukulingana ne fya bunani+ fyonse ifya nko, ica kuti bakoweshe ing’anda ya kwa Yehova iyo alengele ukuba iya mushilo mu Yerusalemu.+

15 Kabili Yehova Lesa wa fikolwe fyabo alebatumina inkombe shakwe,+ ukushituma libili libili, pantu alyumfwilile uluse abantu bakwe+ ne cifulo cakwe ica kwikalamo.+ 16 Lelo baletumfya+ inkombe sha kwa Lesa wa cine no kusuula+ amashiwi yakwe no kuseka+ bakasesema bakwe, mpaka ubukali+ bwa kwa Yehova bwaisa pa bantu bakwe, mpaka kwabula ukuundapa.+

17 E ico abatumiine imfumu ya bena Kaldi,+ iyaipeye abalumendo babo ku lupanga,+ yabepaile mu ng’anda yabo iya mushilo,+ tayabelele uluse umulumendo nelyo umukashana, umukalamba nelyo umukote.+ Apeele fyonse mu minwe ya iko. 18 Kabili ifipe fyonse,+ ifikalamba+ ne finono, ifya mu ng’anda ya kwa Lesa wa cine ne fyuma+ fya mu ng’anda ya kwa Yehova ne fyuma fya mfumu+ ne fya bacilolo ba iko, fyonse yatwele ku Babiloni. 19 Kabili yaocele ing’anda ya kwa Lesa+ wa cine no kubongolola icibumba+ ca Yerusalemu; kabili impungu sha uko shonse isha kwikalamo baocele ku mulilo ne fipe ifisuma fyonse,+ mpaka baonaula fyonse.+ 20 Kabili, abapuswike ku lupanga yabasendele bunkole ku Babiloni,+ kabili bali abasha+ ba iko kabili aba bana ba iko mpaka ilyo ubufumu bwa Persia+ bwatendeke ukuteka; 21 pa kuti amashiwi ya kwa Yehova ayo asoseele muli Yeremia yafikilishiwe,+ mpaka icalo cafuta amasabata ya ciko.+ Inshiku shonse ilyo cali icibolya calesunga amasabata, mpaka imyaka amakumi cinelubali (70) ikapite.+

22 Kabili mu mwaka wa kubalilapo uwa kuteka kwa kwa Sailasi+ imfumu ya ku Persia,+ pa kuti amashiwi+ Yehova asoseele muli Yeremia+ yafikilishiwe, Yehova acincishe umutima+ wa kwa Sailasi imfumu ya ku Persia, ica kuti yabilile imbila mu bufumu bwa iko bonse, no kulemba,+ ati: 23 “Ifi e fyo Sailasi imfumu ya ku Persia+ asosele, ‘Amabufumu yonse aya pe sonde Yehova Lesa wa mu muulu alimpeela,+ kabili anjebele ukumukuulila ing’anda mu Yerusalemu, umusumba uwaba mu Yuda.+ Umuntu onse uo muli nankwe uwa mu bantu bakwe bonse,+ Yehova Lesa wakwe abe nankwe.+ E ico mulekeni aye.’”+