Nehemia

1 Amashiwi ya kwa Nehemia+ mwana Hakalia: Nomba mu mweshi wa Kislebu,+ mu mwaka walenga amakumi yabili (20),+ ine nali mu Shushani+ mwi sano. 2 E lyo Hanani,+ umo pali bamunyinane, alingile, ninshi ali na bantu bambi abafumine ku citungu ca Yuda, kabili nabepwishe+ pa baYuda,+ abapuswike,+ abashelepo pali bankole,+ nabepwishe na pali Yerusalemu. 3 Na bo batile kuli ine: “Abashelepo pali bankole, mulya mu citungu ca bulashi,+ bali mu bucushi ubukalamba+ na mu museebanya;+ ne linga+ lya Yerusalemu lyaliwa, ne mpongolo+ sha liko shalipya ku mulilo.”

4 Kabili ilyo fye naumfwile aya mashiwi, naikele pa nshi no kutendeka ukulila no kuloosha pa nshiku ishingi, kabili nshalelya+ kabili nalepepa ku cinso ca kwa Lesa wa mu muulu.+ 5 Kabili natile: “Mwe Yehova Lesa wa mu muulu, Lesa mukulu kabili uwa kutiinya,+ mwe basunga icipangano+ no kuba ne cikuuku ku bamutemwa+ kabili abakonka amafunde yenu,+ 6 shi lekeni amatwi yenu yakutike+ kabili shibuleni amenso yenu, pa kuti mumfwe ipepo lya mubomfi wenu,+ ilyo ndepepela ku cinso cenu buno bushiku, akasuba no bushiku,+ pa bana ba kwa Israele ababomfi benu, pa nshita ndesokolola+ imembu+ sha bana ba kwa Israele isho twabembukila imwe. Natubembuka, ine na ba mu ng’anda ya kwa tata.+ 7 Cine cine natucita ububi kuli imwe+ kabili tatwakonka amafunde+ ne fipope+ no bupingushi+ ifyo mwaebele Mose umubomfi wenu.+

8 “Shi ibukisheni,+ amashiwi ayo mwaebele Mose umubomfi wenu, amuti, ‘Nga mwabembuka, nkamupashila mu bantu na bantu.+ 9 Ilyo mukabwelela kuli ine+ no kukonka amafunde yandi+ no kuyacita,+ nelyo abantu benu abapaswa bengaba ukwapela imyulu, nkabalonganika+ ukufuma kulya no kubaleta+ ku cifulo ico nasala ukuti e ko ishina lyandi likabe.’+ 10 Kabili aba babomfi benu+ kabili bantu benu,+ abo mwalubwile ku maka yenu ayakalamba+ na ku kuboko kwenu ukwakosa.+ 11 Iye, mwe Yehova, kutikeni kwi pepo lya mubomfi wenu na kwi pepo+ lya babomfi benu ababekelwa mu kutiina ishina lyenu;+ kabili, shi lekeni umubomfi wenu atunguluke buno bushiku+ kabili lekeni uyu muntu amumfwileko uluse.”+

Nomba ine nalebomba umulimo wa kupeela imfumu ifya kunwa.+

2 Na mu mweshi wa Nisani,+ mu mwaka walenga amakumi yabili (20)+ ukutula apo Artakishashete+ imfumu atendekele ukuteka, umwangashi wali pa ntanshi yakwe, na ine nabuulile umwangashi no ku-upeela ku mfumu nge fyo nalecita lyonse.+ Lelo nshatalile mba uwa bulanda ku cinso ca iko.+ 2 E ico imfumu yatile kuli ine: “Nga cinshi ico icinso cobe cibelele ica bulanda+ ilyo taulwele? Ici te cimbi lelo bulanda bwa mu mutima.”+ E lyo natiinine icibi pali ici.

3 Kabili natile ku mfumu: “Lekeni imfumu ibe no mweo umuyayaya!+ Nga cinshi ico icinso candi cishingabela ica bulanda ilyo umusumba,+ umwaba inshiishi sha fikolwe fyandi,+ walyonaulwa, ne mpongolo sha uko shalipya ku mulilo?”+ 4 Ne mfumu yatile kuli ine: “Nga nomba cinshi ico ulefwaya?”+ Na po pene napepele+ kuli Lesa wa mu muulu.+ 5 Pa numa natile ku mfumu: “Nga cawama mu menso ya mfumu,+ kabili nga mwasangamo ubusuma mu mubomfi wenu,+ ndelomba ukuti muntume ku Yuda, ku musumba umwaba inshiishi sha fikolwe fyandi, ukuti nkaukuule cipya cipya.”+ 6 Ne mfumu yatile kuli ine, ninshi na namfumu ekele ku lubali lwa iko: “Bushe ubulendo bobe bukaba bwa nshiku shinga kabili ni lilali ukabwela?” Awe caweme+ ku cinso ca mfumu ukuti intume nje ilyo nayebele inshita ya kubwela.+

7 Kabili natile ku mfumu: “Nga cawama ku mfumu, lekeni mpeelwe bakalata+ aba kutwala ku balashi+ ba kwi shilya lya Mumana,+ pa kuti bakampishe nkasuke nkafike ku Yuda; 8 na kalata uwa kutwala kuli Asafi kalinda wa mutengo wa mfumu, ukuti ampeele imiti ya kufumyako imbao sha kukuulila impongolo sha kwi Sano+ lya ku ng’anda iyi,+ ne mbao sha kwi linga+ lya musumba ne sha ku ng’anda iyo nkekalamo.” Awe imfumu yalimpeele, ukulingana no kuboko kwa kwa Lesa wandi ukwali pali ine.+

9 E fyo nafikile ku balashi+ ba kwi shilya lya Mumana no kubapeela bakalata ba mfumu. Na kabili, imfumu yantumine pamo na bakalamba ba mabumba ya bashilika na ba pali bakabalwe. 10 Ilyo Sanbalati+ umwina Horone+ na Tobia+ umubomfi, umwina Amone,+ baumfwile ukuti nakwisa umuntu uwalefwaila abana ba kwa Israele ubusuma,+ calibabipile nga nshi.

11 Pa numa, nafikile ku Yerusalemu, kabili nali kulya inshiku shitatu. 12 E lyo naimine ubushiku, ine pamo na baume abanono, kabili nshaebele umuntu+ ico Lesa wandi abikile mu mutima wandi ukuti ncitile Yerusalemu,+ kabili nshakwate icitekwa nangu cimo kano fye icitekwa ico nanininepo. 13 E lyo nafumiine ku Mpongolo ya ku Mupokapoka+ ubushiku pa ntanshi ya Kamfukumfuku ka Cisoka na ku Mpongolo ya Cishala ca mito,+ kabili lyonse naleceeceeta amalinga+ ya Yerusalemu, ukumona ifyo yabongolwelwe ne fyo impongolo+ sha musumba shapile ku mulilo. 14 Kabili napitile ukulola ku Mpongolo ya Kamfukumfuku+ na ku Cishiba ca Mfumu, kabili takwali incende apa kuti icitekwa nanininepo cipite. 15 Lelo naile ndekonka umupokapoka+ ubushiku, no kulaceeceeta ilinga; e lyo nabwelele no kwingilila ku Mpongolo ya ku Mupokapoka,+ awe e fyo nabwelele.

16 Kabili inkonkani sha balashi+ tashaishibe uko naile ne co nalecita; kabili abaYuda na bashimapepo na bashimucindikwa na balashi na bashala abalebomba umulimo, nali nshilabeba nangu cimo. 17 E lyo nabebele ati: “Namumona ububi ubo twabamo, ifyo Yerusalemu aonaulwa ne fyo impongolo sha uko shapya ku mulilo. Iseni tukuule cipya cipya ilinga lya Yerusalemu, pa kuti tufume mu kuseebana.”+ 18 Kabili nabashimikiile ifyo ukuboko+ kwa kwa Lesa wandi kwali ukusuma pali ine,+ e lyo na pa mashiwi+ ayo imfumu yasosele kuli ine. Na bo batile: “Natwime, no kukuula.” E ico bakoseshe amaboko yabo pa kuti babombe umulimo usuma.+

19 Lelo Sanbalati+ umwina Horone na Tobia+ umubomfi,+ umwina Amone,+ na Geshemu+ umwina Arabia+ ilyo baumfwile ici, batendeke ukutuseka+ no kutusuula kabili batile: “Cinshi ici mulecita? Bushe mulefwaya ukupondokela imfumu?”+ 20 Lelo nabaswike ati: “Lesa wa mu muulu+ e ukatulenga ukutunguluka,+ na ifwe, fwe babomfi bakwe, tukema, kabili tukakuula; lelo imwe tamukwetemo impanga+ mu Yerusalemu, nangu ni nsambu, nangu icibukisho.”+

3 E lyo Eliashibu+ shimapepo mukalamba na bamunyina, bashimapepo, baimine no kukuula Impongolo ya Mpaanga.+ Basangulwile+ impongolo kabili baimike ne fiibi fya iko; kabili baisangulwile ukufika pa Lupungu lwa Mea,+ ukufika na pa lupungu lwa Hananele.+ 2 Abaume ba ku Yeriko+ bakuulile pamo na bo. Kabili Sakuri mwana Imri akuulile pamo na bo.

3 Kabili abana ba kwa Hasenaa bakuulile Impongolo ye Sabi;+ baikuulile ne fimuti+ no kubikako ifiibi,+ na maingwe ne mipindo.+ 4 Kabili Mereemote+ mwana Uriya+ umwana wa kwa Hakose abombele pamo na bo umulimo wa kuwamya, na Meshulamu+ mwana Berekia mwana Meshesabele abombele pamo na bo umulimo wa kuwamya; na Sadoke mwana Baana abombele pamo na bo umulimo wa kuwamya. 5 Na bena Tekoa+ babombele pamo na bo umulimo wa kuwamya; lelo bashimucindikwa+ babo tabanakiile ku kubombela bashikulwibo.

6 Kabili Yoyada mwana Pasea na Meshulamu mwana Besodia bawemye Impongolo ya Musumba+ wa Kale; babomfeshe ifimuti no kubikako ifiibi na maingwe ne mipindo.+ 7 Kabili ababombele pamo na bo umulimo wa kuwamya ni Melatia umwina Gibeone+ na Yadone umwina Meronote,+ abaume ba ku Gibeone+ na ku Mispa,+ aba ku cipuna ca mulashi+ wa kwi shilya lya Mumana.+ 8 Ababombele pamo nankwe umulimo wa kuwamya ni Usiele mwana Haraya, umo pali bakalopolola+ ba golde; kabili uwabombele pamo nankwe umulimo wa kuwamya ni Hanania umo pali bakatobenkanya+ ba mafuta ya kusuba; na bo balambatike amabwe yapapatala mu Yerusalemu ukufika na kwi Linga ilya mutika uukulu.+ 9 Kabili uwabombele pamo na bo umulimo wa kuwamya ni Refaya mwana Huri, cilolo pali hafu wa citungu ca Yerusalemu. 10 Uwabombele pamo na bo umulimo wa kuwamya apalungatana ne ng’anda+ yakwe ni Yedaya mwana Harumafu; kabili uwabombele umulimo wa kuwamya pamo nankwe ni Hatushi mwana Hashabinia.

11 Malkiya mwana Harimu+ na Hashubu mwana Pehati-moabu+ bawemye iciputulwa na cimbi icapimwa, e lyo no Lupungu lwa Fitofu.+ 12 Kabili uwabombele pamo nankwe umulimo wa kuwamya ni Shalumu mwana Haloheshe, cilolo+ pali hafu wa citungu ca Yerusalemu, ena na bana bakwe abanakashi.

13 Hanuni na bekashi ba ku Sanoa+ bawemye Impongolo ya ku Mupokapoka;+ bali-ikuulile no kubikako ifiibi,+ na maingwe+ ne mipindo,+ bawemye ne ciputulwa ica mikono ikana limo (1,000) ice linga ukufika na ku Mpongolo ya Cishala ca Mito.+ 14 Na Malkiya mwana Rekabu, cilolo wa citungu ca Bete-hakeremu+ awemye Impongolo ya Cishala ca Mito, ena ali-ikuulile no kubikako ifiibi, amaingwe ya iko ne mipindo ya iko.

15 Na Shalumu mwana Kol-hose, cilolo wa citungu ca Mispa+ awemye Impongolo ya Kamfukumfuku;+ ali-ikuulile no kuipaalika no kubikako ifiibi,+ amaingwe ne mipindo, awemye ne linga lya Cishiba+ ca mwi samba ica mwi Bala+ lya Mfumu ukufika na ku Matabo+ aya kutentemukilapo ukufuma ku Musumba wa kwa Davidi.+

16 Uwakonkele pali ena ni Nehemia mwana Asbuki, cilolo pali hafu wa citungu ca Betsuri,+ abombele umulimo wa kuwamya ukufika apalungatana ne Nshiishi+ sha kwa Davidi no kufika pa cishiba+ ico bapangile e lyo ukufika na ku Ng’anda ya Mpalume.+

17 Ukukonka pali ena abena Lebi+ babombele umulimo wa kuwamya, kabili uwalebangalila ni Rehumu mwana Bani;+ uwabombele pamo nankwe umulimo wa kuwamya mu citungu cakwe ni Hashabia, cilolo pali hafu wa citungu ca Keila.+ 18 Ukukonka pali ena bamunyinabo babombele umulimo wa kuwamya, Babai mwana Henadadi, cilolo pali hafu wa citungu ca Keila.

19 Na Esere mwana Yeshua,+ cilolo wa ku Mispa,+ abombele pamo nankwe umulimo wa kuwamya iciputulwa na cimbi icapimwa icali apalungatana na pa kuninina ukuya Umusungilwa Ifyanso pe Tungi lye Linga.+

20 Ukukonka pali ena Baruki mwana Sabai+ abombele no kucincila+ kabili awemye iciputulwa na cimbi icapimwa, ukufuma pe Tungi lye linga ukufika na pa mwinshi wa ng’anda ya kwa Eliashibu+ shimapepo mukalamba.

21 Ukukonka pali ena Mereemote mwana Uriya+ mwana Hakose awemye iciputulwa na cimbi icapimwa, ukufuma pa mwinshi wa ng’anda ya kwa Eliashibu ukufika na ku mpela ya ng’anda ya kwa Eliashibu.

22 Kabili ukukonka pali ena bashimapepo, abaume ba ku Citungu+ ca Yordani, babombele umulimo wa kuwamya. 23 Ukukonka pali bena Benjamini na Hashubu babombele umulimo wa kuwamya apalungatana ne ng’anda yabo. Ukukonka pali bena Asaria mwana Maaseya umwana wa kwa Anania abombele umulimo wa kuwamya mupepi na ku ng’anda yakwe. 24 Ukukonka pali ena Binui mwana Henadadi awemye iciputulwa na cimbi icapimwa, ukufuma pa ng’anda ya kwa Asaria ukufika na kwi Tungi lye Linga+ no kufika pa koona.

25 Ukukonka pali ena Palali mwana Usai abombele umulimo wa kuwamya apalungatana ne Tungi lye Linga no lupungu ulwafuma pa N’ganda ya Mfumu,+ iya pa muulu iya mu Lubansa lwa Balinshi.+ Ukukonka pali ena kwali Pedaya mwana Paroshe.+

26 Na bena Netinimu+ baleikala mu Ofele;+ babombele umulimo wa kuwamya ukufika apalungatana ne Mpongolo+ ya Menshi lwa ku kabanga no lupungu ulwapulilemo.

27 Ukukonka pali aba abena Tekoa+ bawemye iciputulwa na cimbi icapimwa, ukufuma apalungatana no lupungu lukalamba ulwapulilemo ukufika na kwi linga lya Ofele.

28 Pa muulu wa Mpongolo+ ya Bakabalwe bashimapepo babombele umulimo wa kuwamya, umo umo apalungatana ne ng’anda yakwe.

29 Ukukonka pali bena Sadoke+ mwana Imere abombele umulimo wa kuwamya apalungatana ne ng’anda yakwe.

No kukonka pali ena Shemaya mwana Shekania, umulinshi wa pa Mpongolo ya ku Kabanga,+ abombele umulimo wa kuwamya.

30 Ukukonka pali ena Hanania mwana Shelemia na Hanuni umwana walenga mutanda (6) uwa kwa Salafi bawemye iciputulwa na cimbi icapimwa.

Ukukonka pali ena Meshulamu+ mwana Berekia abombele umulimo wa kuwamya apalungatana ne cikuulwa cakwe.+

31 Ukukonka pali ena Malkiya, umo pali bakalopolola+ ba golde, abombele umulimo wa kuwamya ukufika pa ng’anda ya bena Netinimu+ na bashimakwebo,+ apalungatana ne Mpongolo ya Bulinshi ukufika na pa muputule wa pa muulu uwa pa koona.

32 Kabili pa kati ka muputule wa pa muulu uwa pa koona ne Mpongolo+ ya Mpaanga bakalopolola ba golde na bashimakwebo babombele umulimo wa kuwamya.

4 Nomba, ilyo fye Sanbalati+ aumfwile ukuti tulekuula ilinga cipya cipya, alikalipe+ no kubipilwa nga nshi, kabili atendeke ukulatumfya+ abaYuda. 2 Kabili atendeke ukulanda kuli bamunyina+ na kwi bumba lya bashilika ba ku Samaria, ati: “Cinshi ico abaYuda aba abanakuka balecita? Bushe aba kuti baibombela abene? Bushe kuti bapeela amalambo?+ Bushe kuti bapwisha ukukuula mu bushiku bumo? Bushe kuti balenga amabwe aya, ayali mu miina ya fisooso+ fya lukungu, ukuba ayatuntulu apo baliyoca?”

3 Nomba Tobia+ umwina Amona+ ali pamo nankwe, kabili atile: “Ne ci cine balekuula, nga mumbwe+ aninapo kuti abongolola ili ilinga lyabo ilya mabwe.”

4 Umfweni,+ mwe Lesa wesu, pantu natusuulwa;+ bwesesheni ne miponto+ yabo pa mitwe yabo, no kuleka basendwe mu calo ca bunkole. 5 Kabili mwifimbapo pa filubo+ fyabo na pa lubembu lwabo. Mwikafilaba, pantu nabakalifya abalekuula.

6 Awe tatwalekele ukukuula ilinga, kabili twasukile twakuula cipya cipya ilinga lyonse, kabili mu butali lyafikile pa kati, na bantu bali no mutima wa kubomba.+

7 Nomba, ilyo fye Sanbalati+ na Tobia+ na bena Arabia+ na bena Amone+ na bena Ashidode+ baumfwile ukuti umulimo wa kuwamya ilinga lya Yerusalemu nauya pa ntanshi, pantu ifipunda fyalicilikwe, bakalipe nga nshi. 8 E lyo bonse bapandene amano+ ya kwisalwisha Yerusalemu no kumpumfyanya. 9 Lelo twapepele+ kuli Lesa wesu no kubika umulinshi wa kubalinda akasuba no bushiku pa mulandu wabo.

10 E lyo abaYuda batile: “Nayapwa amaka ya wa kusenda ifisendo,+ kabili kuli ifisooso+ ifingi nga nshi; na ifwe natufilwa ukukuula ilinga.”

11 Kabili, abalwani besu balesosa abati: “Tabakeshibe+ kabili tabakamone tukasuke atwingila fye na mu kati kabo, kabili tukabepaya no kulesha uyu mulimo.”

12 Nomba lyonse ilyo abaYuda abaleikala mupepi na balwani baisa, balesosa kuli ifwe imiku ikumi (10) abati: “Abalwani bakesa ukufuma ku ncende shonse uko twikala ukwisatusansa, kulya kwine uko na imwe mukesa.”

13 E ico nabikile abaume ku numa ye linga pa ncende iyabelele pa nshi kabili iyali fye pa mbilibili, kabili nababikile ukulingana ne ndupwa shabo, bonse bali no lupanga,+ ifumo+ no buta. 14 Ilyo namwene ifyo baiketwe umwenso apo pene naliimine no kutila kuli bashimucindikwa+ ne nkonkani sha balashi+ na ku bantu bambi: “Mwitiina+ pa mulandu wabo. Muleibukisha Yehova umukalamba+ kabili uwa kutiinya;+ kabili mulwile bamunyinenwe,+ abana benu abaume na bana benu abanakashi, abakashi benu na mayanda yenu.”

15 Nomba ilyo fye abalwani besu baumfwile ukuti natwishiba ukuti Lesa wa cine alifulungenye amapange+ yabo no kuti ifwe bonse twalibweleele kwi linga, umo umo ku mulimo wakwe, 16 ukufuma bulya bushiku ukuya ku ntanshi hafu wa balumendo+ bandi balebomba umulimo na hafu baleikata amafumo, inkwela na mata, nabafwala ne fya kucinga umubili;+ na bacilolo+ bali ku numa ya bonse aba mu ng’anda ya kwa Yuda. 17 Kumfwa abalekuula ilinga na balesenda ifisendo, cila muntu alebomba umulimo ku kuboko kumo e lyo ku kuboko+ kumbi naikata icanso.+ 18 Kabili kakuula umo umo ali no lupanga mu musana+ ilyo alekuula;+ no wa kulisha intandala+ ninshi ali mupepi na ine.

19 E lyo natile kuli bashimucindikwa na ku nkonkani sha balashi+ na ku bantu bambi: “Umulimo ukalamba nga nshi, kabili natusalangana pe linga, no kutalukana nga nshi. 20 Uko muleumfwa ukulila kwa ntandala, e ko mwise mulongane uko tuli. Lesa wesu umwine aletulwila.”+

21 Ilyo twalebomba umulimo, bambi na bo baikete amafumo, ukutula ku maca ukufika ku kutula kwa ntanda. 22 Kabili pa nshita ilya natile ku bantu: “Lekeni abantu umo umo no mubomfi wakwe basendame mu kati ka Yerusalemu,+ na bo babe kuli ifwe aba kutulinda ubushiku no kutubombela akasuba.” 23 Lelo ine+ na bamunyinane+ na ba kumombela+ na balinshi+ abankonkele, tatwalefuula ifya kufwala fyesu, cila muntu ali ne canso+ cakwe mu kuboko kwakwe ukwa kulyo.

5 Lelo, abantu na bakashi babo batendeke ukuilishanya+ nga nshi pali bamunyinabo abaYuda.+ 2 Kabili kwali abalesosa abati: “Twalapeela abana besu abaume na bana besu abanakashi pa kuti babe iciikatilo pa kuti tupoke ingano, tulye no kuba no mweo.”+ 3 Kwali na balesosa abati: “Twalapeela amabala yesu na mabala ya myangashi na mayanda yesu pa kuti yabe iciikatilo+ pa kuti tupoke ingano mu nshita ya cipowe.” 4 E lyo kwali na balesosa abati: “Natukongola indalama pa mabala yesu na pa mabala yesu aya myangashi+ pa kuti tutuule umutulo wa mfumu.+ 5 Lelo nomba imibili yesu ili nge mibili ya bamunyinefwe;+ abana besu abaume bali nga bana babo abaume, lelo moneni twasangula abana besu abaume na bana besu abanakashi ukuba abasha,+ kabili kuli bamo pa bana besu abanakashi abo bacita ubusha kale; kabili tatukwete na maka pantu amabala yesu na mabala yesu aya myangashi yali ku bantu bambi.”

6 Nomba nakalipe sana ilyo fye naumfwile ukuilishanya kwabo na mashiwi aya. 7 E ico ilyo natontonkenye pali ifi mu mutima wandi, nasangile ukuti abali no mulandu+ ni bashimucindikwa ne nkonkani sha balashi, kabili nabebele ukuti: “Ilyo mwakongwesha bamunyinenwe, mufwaya ukuti balundepo pa kubwesha.”+

Kabili napekenye ukulongana ukukalamba pa mulandu wabo.+ 8 E lyo nabebele ati: “Ifwe ukulingana na papelele amaka yesu natulubula+ bamunyinefwe abaYuda abo bashitishe ku bena fyalo; bushe kabili imwe mushitishe bamunyinenwe,+ kabili bushe mubashitishe kuli ifwe mwa?” Pali ici balitalele, kabili tabakwete na mashiwi.+ 9 Kabili natile: “Ico mulecita te cisuma iyo.+ Bushe te mu katiina+ ka kuli Lesa wesu+ mufwile ukwendela pa mulandu wa miponto+ ya nko ishi, abalwani besu?+ 10 Kabili ine na bamunyinane na babomfi bandi tulakongwesha abantu indalama ne ngano. Natuleke ukukongwesha no kufwaya isha kulundapo.+ 11 Babwesesheni lelo line amabala yabo,+ amabala yabo aya myangashi, amabala yabo aya miolife na mayanda yabo, ne ca pa mwanda umo ica ndalama ne ngano, no mwangashi upya na mafuta ifyo mulepoka kuli bena ku kuba ica kulundapo.”

12 Na bo bayaswike abati: “Twalabwesha,+ kabili tatwafwaye akantu nangu kamo kuli bena.+ Twalacita ifyo fine fye ulesosa.”+ E ico naitile bashimapepo no kubalenga ukulapa ukuti bakacita ukulingana na aya mashiwi.+ 13 Kabili, nakuntile ica kufwala candi pa cifuba no kutila: “Ifi fine e fyo Lesa wa cine akakunte umuntu onse uushakacite ukulingana na ya amashiwi, ukumufumya ku ng’anda yakwe na ku bupyani bwakwe; kabili ifi fine e fyo akakuntwe no kukanabamo akantu.” No lukuta lonse lwatile: “Ameni!”+ Kabili lwatendeke ukulalumbanya Yehova.+ Na bantu bacitile ukulingana na aya mashiwi.+

14 Na cimbi ca kuti: Ukutula pa bushiku ansontele ukuba umulashi+ wabo mu calo ca Yuda, ukutula pa mwaka walenga amakumi yabili (20)+ ukufika ku mwaka walenga amakumi yatatu na ibili (32)+ ukutula apo Artakishashete+ imfumu atendekele ukuteka, imyaka ikumi na ibili (12), ine na bamunyinane tatwaliile ifya kulya fya mulashi.+ 15 Lelo abalashi ba ntanshi abantangilile, balecusha abantu, kabili balepoka kuli bena indalama sha silfere amashekele amakumi yane (40) isha kushitamo ifya kulya no mwangashi cila bushiku. Na babomfi babo batekele abantu buluku buluku.+ Lelo ine, nshacitile ifyo+ pa mulandu wa kutiina Lesa.+

16 Na kabili, nalibombeleko+ umulimo wa kukuula ilinga, kabili tatwapokele ibala nangu limo;+ na babomfi bandi bonse balelongana palya pa kuti babombe umulimo. 17 Kabili abaYuda ne nkonkani sha balashi, abaume umwanda umo na makumi yasano (150), na baleisa kuli ifwe ukufuma mu nko ishatushingulwike balelya pe tebulo lyandi.+ 18 Ne fyo balempekanishisha cila bushiku ni fi, ing’ombe imo iilume, impaanga ishisuma mutanda (6) ne fyuni, kabili lyonse ilyo papita inshiku ikumi (10) balempekanishisha umwangashi+ wa misango yonse uwingi. Kabili nshalepatikisha abantu ukumpeela ifi pamo ne fya kulya fya mulashi, pantu imilimo aba bantu balebomba yalikosele. 19 Njibukishisheni+ pa fisuma,+ mwe Lesa wandi, na pali fyonse ifyo nacitila aba bantu.+

6 Nomba ilyo fye Sanbalati+ na Tobia+ na Geshemu+ umwina Arabia+ na balwani besu bambi baebelwe ukuti ninkuula ilinga+ cipya cipya kabili mwi linga tamuli icipunda icishele (nangu ca kuti ukufika pali ilya nshita nali nshilabika ifiibi+ pa mpongolo),+ 2 Sanbalati na Geshemu bantumine amashiwi, abati: “Wise, no kuleka tukumanine+ mu mishi ya mu mpanga iyabatama iya Ono.”+ Kanshi bena balepangana ukuncita ububi.+ 3 E ico natumine inkombe kuli bena,+ nati: “Umulimo ndebomba ukalamba,+ e ico nafilwa ukwisa. Cinshi ico nalalekela umulimo ukuti ulaale pa kwisa kuli imwe?”+ 4 Lelo, batumine kuli ine amashiwi yamo yene imiku ine, na ine nalebaasuka fye fimo fine.

5 Asukile Sanbalati+ atuma umubomfi wakwe kuli ine na mashiwi yamo yene umuku walenga busano, na kalata uwaisulwa mu minwe yakwe. 6 Mwalembelwe ifi: “Nacumfwika mu nko, kabili Geshemu+ alesosa ici, ukuti iwe na baYuda mulepanga ukupondoka.+ E mulandu wine ulekuulila ilinga; kabili ulefwaya ukuba imfumu pali bena,+ ukulingana na ya mashiwi. 7 Kabili kuli na bakasesema abo wasonta aba kukulandilako mu Yerusalemu monse, abati, ‘Mu Yuda muli imfumu!’ Nomba ifya musango yu fikasoswa ku mfumu. E ico nomba isa, no kuleka tumfwane.”+

8 Lelo, namutumiine amashiwi, nati: “Ifintu ifyo ulesosa tafyacitika,+ lelo ni mu mutima obe fye ulefyelenganya.”+ 9 Pantu bonse fye bale-esha ukututiinya, abati: “Amaboko yabo+ yakatompoka ica kuti umulimo tawakabombwe.” Lelo nomba shi kosheni amaboko yandi.+

10 Kabili naingile mu ng’anda ya kwa Shemaya mwana Delaya mwana Mehetabele ninshi naisalila.+ E lyo atile: “Natukumanine+ pa ng’anda ya kwa Lesa wa cine, mu kati ke tempele,+ no kwisalako ifiibi fye tempele; pantu baleisa ku kukwipaya, nangu fye bwaila+ baleisa ku kukwipaya.” 11 Lelo natile: “Bushe ine nine ningabutuka?+ Kabili nani uwaba nga ine uwingengila mwi tempele no kukanaipaiwa?+ Nshaingilemo!” 12 E ico nalifwailishe, kabili moneni te Lesa+ wamutumine, lelo asosele+ uku kusesema pali ine pantu Tobia na Sanbalati+ balimutumine ukucita ici.+ 13 Ni pali ici bamutumiine+ pa kuti ntiine+ no kucita ifyo fine, ukuti membuke+ kabili pa kuti balelanda ifibi pali ine,+ pa kuti banseebanye.+

14 Mwe Lesa wandi, shi ibukisheni+ Tobia+ na Sanbalati, ukulingana ne micitile yabo umo umo, e lyo na Noadia kasesema mwanakashi+ na bakasesema bambi abale-esha ukuntiinya libili libili.

15 Lyasukile ilinga+ lyapwa pa bushiku ubwalenga amakumi yabili na shisano (25) ubwa mweshi wa Eluli, mu nshiku amakumi yasano na shibili (52).

16 Nomba, ilyo fye abalwani+ besu bonse baumfwile pali ici ne nko shonse ishatushingulwike shamwene ici, bonse fye baceefiwe nga nshi mu menso yabo, kabili baishibe ukuti ni Lesa+ wesu uwalengele ukuti uyu mulimo ubombwe. 17 Mu nshiku shilya na bakankaala+ ba mu Yuda baletuma bakalata abengi kuli Tobia+ na bakalata abalefuma kuli Tobia baleisa kuli bena. 18 Pantu abengi mu Yuda balapile kuli ena, pa mulandu wa kuti ali ni shifyala wa kwa Shekania mwana Ara;+ kabili Yehohanani umwana wakwe aupile umwana mwanakashi wa kwa Meshulamu+ mwana Berekia. 19 Kabili lyonse balemusosela ifisuma ku cinso candi.+ Na mashiwi yandi baleyatwala kuli ena. Kwali bakalata abo Tobia aletuma ku kuntiinya.+

7 Nomba ilyo fye ilinga lyakuulilwe cipya cipya,+ apo pene naimike ifiibi.+ E lyo bakalinda ba mpongolo+ na bakemba+ na bena Lebi+ basontelwe. 2 Kabili nasontele Hanani+ munyinane na Hanania cilolo wa kwi Sano+ ukwangalila Yerusalemu, pantu aali uwacetekelwa+ icine cine kabili aletiina+ Lesa wa cine ukucila abengi. 3 E ico nabebele ukuti: “Impongolo+ sha Yerusalemu tashifwile ukwisulwa kano ilyo akasuba katampa ukukaba; kabili ilyo abalinshi ba mpongolo bacili nabeminina mupepi bafwile ukwisala ifiibi no kufiikasha+ ku maingwe. Kabili mukabike bakalinda ba bekashi ba mu Yerusalemu, umo umo apa kulindila pakwe kabili umo umo apalungatana ne ng’anda yakwe.”+ 4 Nomba umusumba wali uwapabuka kabili uukalamba, lelo mu kati ka uko+ mwali abantu abanono, kabili tamwakuulilwe na mayanda.

5 Lelo Lesa wandi abikile mu mutima+ wandi ukuti nonganye abakankaala ne nkonkani sha balashi na bantu pa kuti balembeshe intuntuko shabo.+ E lyo nasangile ibuuku umwalembelwe+ intuntuko sha babalilepo ukwisa, kabili nasangile mwalembwa ifi:

6 Aba e bana ba mu fitungu fya bulashi+ abafumine muli bunkole+ abo Nebukadnesari,+ imfumu ya Babiloni, asendele bunkole,+ kabili pa numa ababweleele ku Yerusalemu na ku calo ca Yuda, cila muntu ku musumba wakwe;+ 7 abaishile na Serubabele,+ ni Yeshua,+ Nehemia, Asaria, Raamia, Nahamani, Mordekai,+ Bilishani, Misperete, Bigibai, Nehumu, Baana.

Impendwa ya baume abena Israele: 8 Abana ba kwa Paroshe,+ amakana yabili no mwanda umo na makumi cinelubali na babili (2,172); 9 abana ba kwa Shefatia,+ imyanda itatu na makumi cinelubali na babili (372); 10 abana ba kwa Ara,+ imyanda mutanda na makumi yasano na babili (652); 11 abana ba kwa Pehati-moabu,+ abafumine mu bana ba kwa Yeshua na Yoabu,+ amakana yabili ne myanda cinekonsekonse ne kumi na cinekonsekonse (2,818); 12 abana ba kwa Elamu,+ ikana limo ne myanda ibili na makumi yasano na bane (1,254); 13 abana ba kwa Satu,+ imyanda cinekonsekonse na makumi yane na basano (845); 14 abana ba kwa Sakai,+ imyanda cinelubali na makumi mutanda (760); 15 abana ba kwa Binui,+ imyanda mutanda na makumi yane na cinekonsekonse (648); 16 abana ba kwa Bebai,+ imyanda mutanda na makumi yabili na cinekonsekonse (628); 17 abana ba kwa Asigadi,+ amakana yabili ne myanda itatu na makumi yabili na babili (2,322); 18 abana ba kwa Adonikamu,+ imyanda mutanda na makumi mutanda na cinelubali (667); 19 abana ba kwa Bigibai,+ amakana yabili na makumi mutanda na cinelubali (2,067); 20 abana ba kwa Adini,+ imyanda mutanda na makumi yasano na basano (655); 21 abana ba kwa Atere,+ aba muli Hisekia, amakumi pabula na cinekonsekonse (98); 22 abana ba kwa Hashumu,+ imyanda itatu na makumi yabili na cinekonsekonse (328); 23 abana ba kwa Besai,+ imyanda itatu na makumi yabili na bane (324); 24 abana ba kwa Harifu,+ umwanda umo ne kumi na babili (112); 25 abana ba kwa Gibeone,+ amakumi pabula na basano (95); 26 abaume ba ku Betelehemu+ na Netofa,+ umwanda umo na makumi cinekonsekonse na cinekonsekonse (188); 27 abaume ba ku Anatote,+ umwanda umo na makumi yabili na cinekonsekonse (128); 28 abaume ba ku Betasimabete,+ amakumi yane na babili (42); 29 abaume ba ku Kiriati-yearimu,+ Kefira+ na Beerote,+ imyanda cinelubali na makumi yane na batatu (743); 30 abaume ba ku Rama+ na Geba,+ imyanda mutanda na makumi yabili na umo (621); 31 abaume ba ku Mikimasi,+ umwanda umo na makumi yabili na babili (122); 32 abaume ba ku Betele+ na Ai,+ umwanda umo na makumi yabili na batatu (123); 33 abaume ba ku Nebo umbi,+ amakumi yasano na babili (52); 34 abana ba kwa Elamu umbi,+ ikana limo ne myanda ibili na makumi yasano na bane (1,254); 35 abana ba kwa Harimu,+ imyanda itatu na makumi yabili (320); 36 abana ba ku Yeriko,+ imyanda itatu na makumi yane na basano (345); 37 abana ba ku Lode,+ Hadidi+ na Ono,+ imyanda cinelubali na makumi yabili na umo (721); 38 abana ba ku Senaa,+ amakana yatatu ne myanda pabula na makumi yatatu (3,930).

39 Bashimapepo: Abana ba kwa Yedaya+ aba mu ng’anda ya kwa Yeshua, imyanda pabula na makumi cinelubali na batatu (973); 40 abana ba kwa Imere,+ ikana limo na makumi yasano na babili (1,052); 41 abana ba kwa Pashihuri,+ ikana limo ne myanda ibili na makumi yane na cinelubali (1,247); 42 abana ba kwa Harimu,+ ikana limo ne kumi na cinelubali (1,017).

43 Abena Lebi: Abana ba kwa Yeshua, e kutila abana ba kwa Kadmiele,+ abafyelwe mu bana ba kwa Hodeba,+ bali amakumi cinelubali na bane (74). 44 Bakemba,+ abana ba kwa Asafi,+ bali umwanda umo na makumi yane na cinekonsekonse (148). 45 Abalinshi ba pa mpongolo,+ abana ba kwa Shalumu,+ abana ba kwa Atere, abana ba kwa Talmone,+ abana ba kwa Akubu,+ abana ba kwa Hatita, abana ba kwa Shobai,+ umwanda umo na makumi yatatu na cinekonsekonse (138).

46 Abena Netinimu:+ Abana ba kwa Siha, abana ba kwa Hasufa, abana ba kwa Tabaote,+ 47 abana ba kwa Kerose, abana ba kwa Sia, abana ba kwa Padone,+ 48 abana ba kwa Lebana, abana ba kwa Hagaba,+ abana ba kwa Salmai, 49 abana ba kwa Hanani,+ abana ba kwa Gidele, abana ba kwa Gahari, 50 abana ba kwa Reaya,+ abana ba kwa Resini,+ abana ba kwa Nekoda, 51 abana ba kwa Gasamu, abana ba kwa Usa, abana ba kwa Pasea, 52 abana ba kwa Besai,+ abana ba kwa Meunimu, abana ba kwa Nefushesimu,*+ 53 abana ba kwa Bakibuki, abana ba kwa Hakufa, abana ba kwa Harihuri,+ 54 abana ba kwa Basiliti, abana ba kwa Mehida, abana ba kwa Harsha,+ 55 abana ba kwa Barikose, abana ba kwa Sisera, abana ba kwa Tema,+ 56 abana ba kwa Nesiya, na bana ba kwa Hatifa.+

57 Abana ba babomfi ba kwa Solomone:+ Abana ba kwa Sotai, abana ba kwa Soferete, abana ba kwa Perida,*+ 58 abana ba kwa Yaala, abana ba kwa Darkone, abana ba kwa Gidele,+ 59 abana ba kwa Shefatia, abana ba kwa Hatili, abana ba kwa Pokerete-hasebaimu, abana ba kwa Amone.*+ 60 Abena Netinimu+ bonse na bana ba babomfi ba kwa Solomone bali imyanda itatu na makumi pabula na babili (392).

61 Kabili aba e bafumine ku Tele-mela, Tele-harisha, Kerubi, Adone na Imere,+ kabili bafililwe ukwishiba amayanda ya bashibo ne ntuntuko shabo, nga ca kuti ba mu bena Israele: 62 abana ba kwa Delaya, abana ba kwa Tobia, abana ba kwa Nekoda,+ imyanda mutanda na makumi yane na babili (642). 63 Na ba muli bashimapepo:+ abana ba kwa Habaya, abana ba kwa Hakose,+ abana ba kwa Barsilai,+ uwaupile umwanakashi wa mu bana banakashi ba kwa Barsilai+ umwina Gileadi no kwinikwa ishina lyabo. 64 Aba e bafwaile ibuuku lyabo ilya mashina pa kuti beshibe intuntuko shabo, lelo tabalisangile,+ e ico babafumishe pali bushimapepo ukuti balikowela.+ 65 E ico Kateka wa Citungu+ abebele ukuti te kuti balyeko+ ifya mushilo nga nshi akasuke shimapepo akeminine na Urimu+ na Tumimu.+

66 Ulukuta lonse pamo lwali amakana amakumi yane na yabili ne myanda itatu na makumi mutanda (42,360),+ 67 ukufumyako abasha+ babo abaume na basha babo abanakashi, abali amakana cinelubali ne myanda itatu na makumi yatatu na cinelubali (7,337);+ kabili bali na bakemba abaume+ na banakashi+ imyanda ibili na makumi yane na basano (245). 68 Bakabalwe babo bali imyanda cinelubali na makumi yatatu na mutanda (736), ne mfalashi shabo shali imyanda ibili na makumi yane na shisano (245).]+ 69 Ingamila shali imyanda ine na makumi yatatu na shisano (435). Impunda+ shali amakana mutanda ne myanda cinelubali na makumi yabili (6,720).+

70 Kabili kwali abakalamba+ bamo aba mu mayanda ya bashibo+ abapeele fimo ku mulimo.+ Kateka wa Citungu+ apeele ku cipao indalama sha golde badrakima* ikana limo (1,000), imbale shafonka amakumi yasano (50), ifya kufwala fya bashimapepo imyanda isano na makumi yatatu (530).+ 71 Kwali na bakalamba bamo aba mu mayanda ya bashibo abapeele ku cipao ca mulimo indalama sha golde badrakima amakana amakumi yabili (20,000), ne ndalama sha silfere bamaina* amakana yabili ne myanda ibili (2,200).+ 72 Ne fyo abantu abashala bapeele fyali indalama sha golde badrakima amakana amakumi yabili (20,000) ne ndalama sha silfere bamaina amakana yabili (2,000) ne fya kufwala fya bashimapepo amakumi mutanda na cinelubali (67).

73 E lyo bashimapepo+ na bena Lebi na balinshi ba pa mpongolo na bakemba+ na bantu bamo na bena Netinimu+ na bena Israele bonse baikele mu misumba yabo.+ Ilyo umweshi walenga cinelubali (7) wafikile,+ abana ba kwa Israele bali mu misumba yabo.+

8 Na bantu bonse balongene pamo no mutima umo+ mu lubansa+ ulwali pa ntanshi ya Mpongolo ya Menshi.+ E lyo baebele Esra,+ uwalekopolola amafunde, ukuleta ibuuku+ lya mafunde ya kwa Mose,+ ayo Yehova aebele Israele ukulakonka.+ 2 Na o Esra shimapepo+ aletele amafunde pa ntanshi ya lukuta+ lwa baume na banakashi na bonse abali na mano ya kuumfwa,+ pa bushiku bwa ntanshi ubwa mweshi uwalenga cinelubali (7).+ 3 Kabili akonkenyepo ukubelenga+ amafunde mwi shiwi ilikalamba pa ntanshi ya lubansa ulwa pa ntanshi ya Mpongolo ya Menshi, ukufuma ku macaca+ ukufika akasuba pa kati, pa ntanshi ya baume na banakashi na bali na mano ya kuumfwa; na matwi+ ya bantu bonse yalekutikisha+ ku fyali mwi buuku lya mafunde. 4 Na Esra uwalekopolola amafunde aiminine ifyo fine pa cintamba+ ca fimuti, ico bakuulile pa mulandu wine uyu; kabili ku kwa kulyo kwakwe mupepi nankwe kwaiminine Matitia na Shema na Anaya na Uria na Hilkia na Maaseya, na ku kwa kuso kwakwe Pedaya na Mishaele na Malkiya+ na Hashumu+ na Hashibadana, Sekaria na Meshulamu.

5 E lyo Esra akupukwile+ ibuuku pa ntanshi ya bantu bonse, pantu aali pa muulu wa bantu bonse; kabili ilyo alikupukwile abantu bonse baliimine.+ 6 E lyo Esra acindike Yehova+ Lesa wa cine, Lesa mukulu, na bantu bonse ba-aswike no kutila, “Ameni! Ameni!”+ no kwimya amaboko yabo.+ E lyo nomba bakonteme,+ kabili bawile ubukupeme kuli Yehova ne finso fyabo pa nshi.+ 7 Kabili Yeshua na Bani na Sherebia,+ Yamini, Akubu, Shabetai, Hodia, Maaseya, Kelita, Asaria, Yosabadi,+ Hanani, Pelaya,+ na bena Lebi, balondolwele amafunde ku bantu,+ ninshi abantu nabeminina.+ 8 Kabili bakonkenyepo ukubelenga+ mwi buuku ili mwi shiwi ilikalamba, babelengele amafunde ya kwa Lesa wa cine, baleyalondolola, no kubeba umo yalola; kabili balelenga abantu ukumfwikisha ifyalebelengwa.+

9 Kabili Nehemia,+ uwali Kateka wa Citungu,+ na Esra+ shimapepo, kabili uwalekopolola amafunde, na bena Lebi abalefunda abantu batile ku bantu bonse: “Buno bushiku bwa mushilo kuli Yehova Lesa wenu.+ Mwiloosha nelyo ukulila.”+ Pantu abantu bonse balelila ilyo baleumfwa amashiwi yali muli aya mafunde.+ 10 Kabili atile kuli bena: “Kabiyeni, kalyeni ifya mafuta no kunwa ifyalowa, no kupeelako ifya kulya+ ku ushikwete nangu kamo; pantu buno bushiku bwa mushilo kuli Shikulu wesu, kabili mwiba no bulanda, pantu ukusekelela muli Yehova e bucingo bwenu.” 11 Kabili abena Lebi bale-eba abantu bonse ukuba tondolo, abati: “Talaleni! pantu buno bushiku bwa mushilo; kabili mwiba no bulanda.” 12 E ico abantu bonse baile ku kulya no kunwa no kupeelako ifya kulya+ bambi kabili basekelele ukusekelela ukukalamba,+ pantu balyumfwile amashiwi babashimikile.+

13 Na pa bushiku bwa cibili abakalamba ba mu ndupwa sha bantu bonse, bashimapepo na bena Lebi, balongene pamo kuli Esra uwalekopolola amafunde, ukuti beluke amashiwi yali mu mafunde.+ 14 E lyo basangile ukuti mu mafunde Yehova alandiile muli Mose+ mwalembwa ukuti abana ba kwa Israele bafwile ukwikala mu nsakwe+ pa nshita ya mutebeto mu mweshi wa cinelubali (7),+ 15 kabili bafwile ukwita abantu+ no kulenga ubwite bumfwike mu misumba yabo yonse na mu Yerusalemu monse,+ baleti: “Kabiyeni ku citungu ca mpili+ no kuyaleta amabula ya miolife+ na mabula ya miti ya mafuta na mabula ya muhadasi na mabula ya tuncindu na mabula ya ku miti iya misambo no kupangamo insakwe, ukulingana ne fyalembwa.”

16 Awe abantu balifumine no kuyaleta ifi no kuipangila insakwe, umo umo pa mutenge wakwe+ na mu mansa shabo na mu mansa+ sha ng’anda ya kwa Lesa wa cine na mu lubansa+ lwa ku Mpongolo ya Menshi+ na mu lubansa lwa ku Mpongolo ya kwa Efraimu.+ 17 E fyo ulukuta lonse ulwa babwelele ukufuma muli bunkole lwapangile insakwe no kwikala mu nsakwe; pantu abana ba kwa Israele tabacitile ica musango uyo ukutula mu nshiku sha kwa Yoshua mwana Nuni+ ukufika na pali bulya bushiku, ica kuti kwaishileba ukusekelela ukukalamba nga nshi.+ 18 Kabili kwali no kubelenga ibuuku lya mafunde ya kwa Lesa wa cine mwi shiwi ilikalamba ubushiku no bushiku,+ ukutula pa bushiku bwa ntanshi ukufika pa bushiku bwa kulekelesha; kabili basefeshe umutebeto inshiku cinelubali (7) na pa bushiku bwa cinekonsekonse (8) kwali ukulongana kwacindamisha, ukulingana ne funde.+

9 Kabili pa bushiku bwalenga amakumi yabili na shine (24) muli uyu mweshi,+ abana ba kwa Israele balongene pamo no kuleka ukulya+ kabili bafwele insamu*+ no kuikuba ulukungu+ pa mitwe yabo. 2 Na bana ba kwa Israele baipaatwile+ ku bena fyalo+ bonse, kabili balimine pa kuti bayebelele+ imembu+ shabo ne filubo fya bashibo.+ 3 E lyo baimine apo bali+ kabili baikatishe amashiwi pa kubelenga mwi buuku lya mafunde+ ya kwa Yehova Lesa wabo pa ma-awala nalimo yatatu aya kasuba;+ na pa ma-awala yambi yatatu bayebelele+ imembu no kukontamina Yehova Lesa wabo.+

4 E lyo Yeshua na Bani, Kadmiele, Shebania, Buni, Sherebia,+ Bani na Kenani baninine pa cintamba+ ca bena Lebi no kubilikisha ne shiwi likalamba+ kuli Yehova Lesa wabo. 5 E lyo abena Lebi, Yeshua na Kadmiele, Bani, Hashabinia, Sherebia, Hodia, Shebania na Petahia batile: “Imeni, cindikeni+ Yehova Lesa wenu ukufuma umuyayaya no kuya umuyayaya.+ Kabili shi nabacindike ishina lyenu ilya bukata,+ ilyacila pa kucindika no kulumbanya konse.

6 “Imwe ni mwe Yehova mweka;+ ni mwe mwapangile imyulu,+ no muulu wa myulu, na fyonse+ ifyabamo, icalo+ na fyonse ifyabapo,+ babemba+ na fyonse ifyabamo;+ kabili mubaka fyonse ukuba ifya mweo; na fyonse+ ifya mu myulu fikontamina imwe. 7 Ni mwe Yehova Lesa wa cine, uwasalile Abramu+ no kumufumya mu Uri umusumba wa bena Kaldi+ kabili mwayalwile ishina lyakwe ukuba Abrahamu.+ 8 Kabili mwasangile umutima wakwe ukuti wa cishinka kuli imwe;+ e ico mwapangene nankwe icipangano+ ca kumupeela icalo ca bena Kanaani, abena Hiti, abena Amore na bena Perisi na bena Yebusi na bena Gegashi, ukucipeela ku bana bakwe;+ kabili mwacitile ukulingana ne fyo mwasosele, pantu mwalilungama.+

9 “Mwamwene+ ukucula kwa fikolwe fyesu mu Egupti, no kulila kwabo pali Bemba Wakashika mwalyumfwile.+ 10 Kabili mwacitile ifishibilo ne fipesha amano kuli Farao na ku babomfi bakwe bonse na ku bantu bonse aba mu calo cakwe,+ pantu mwalishibe ukuti baleituntumba+ pali bena; na imwe mwaipangile ishina+ nge fyo mucitile lelo. 11 Kabili mwa-akenye+ bemba ku cinso cabo, ica kuti bayabwike pa kati ka bemba pa mushili uwauma;+ na balebakonka mwabapoosele umwashika+ nge libwe+ mu menshi aya maka.+ 12 Kabili mwabatungulwilile ku ntumba ye kumbi akasuba,+ na ku ntumba ya mulilo ubushiku,+ pa kuti mubasanikile+ mu nshila iyo bafwile ukuyamo. 13 Na pa lupili lwa Sinai e po mwatentemukile+ no kulanda na bo ukufuma mu muulu+ no kubapeela ubupingushi bwatambalala+ na malango ya cine,+ ifipope ifisuma+ na mafunde.+ 14 Mwalengele ne sabata+ lyenu ilya mushilo ukwishibikwa kuli bena, kabili mwabapeelele amafunde ne fipope na malango muli Mose umubomfi wenu.+ 15 Mwabapeele ne fya kulya ukufuma ku muulu ilyo baali ne nsala,+ mwabafumiishe na menshi mu cilibwe icasansuka ilyo baali ne cilaka,+ kabili mwabebele ukwingila+ no kuyapoka icalo ico mwaimiishepo ukuboko kwenu ilyo mwalapile ukucipeela kuli bena.+

16 “Kabili ifikolwe fyesu, fyaleituntumba+ no kutalamika imikoshi,+ kabili tabaumfwile ku mafunde yenu. 17 E ico bakeene ukuumfwa,+ kabili tabaibukishe+ ifipesha amano fyenu ifyo mwabacitiile, lelo batalamike imikoshi+ yabo no kusonta uwa kubatungulula+ pa kuti babwelele ku busha bwabo mu Egupti. Lelo imwe muli Lesa uwelela,+ uwa mutembo+ kabili uwa nkumbu,+ uukokola ukukalipa+ kabili uwafulisha+ icikuuku, kabili tamwabalekeleshe.+ 18 Ilyo baipangile icimpashanya ca kwenga ica mwana wa ng’ombe+ kabili ilyo batendeke ukusosa abati, ‘Uyu e Lesa wenu uwamufumishe mu Egupti,’+ kabili bacitile ifya musaalula ifikalamba, 19 e lyo imwe, pa mulandu wa nkumbu shenu ishingi tamwabalekeleshe+ mu matololo. Intumba ye kumbi na yo tayafumine pali bena akasuba ku kubatungulula mu nshila,+ nangu ni ntumba ya mulilo ubushiku iya kubasanikila mu nshila iyo baali no kuyamo.+ 20 Kabili mwabapeele umupashi wenu usuma+ pa kuti mubashilimune, kabili tamwabatanine mana wenu uwa kuti balye,+ mwabapeele na menshi ilyo baali ne cilaka.+ 21 Kabili pa myaka amakumi yane (40)+ mwalebapeela ifya kulya mu mpanga. Tababulilwe akantu.+ Ne fya kufwala fyabo tafyaonaike,+ na makasa yabo tayafimbile.+

22 “E lyo mwabapeele amabufumu+ na bantu na bantu, mwayakenye ne mpanga mu fiputusha fiputusha;+ na bo bakwete icalo ca Sihone,+ ne calo ca mfumu ya Heshebone,+ ne calo ca kwa Oge+ imfumu ya Bashani.+ 23 Na bana babo mwabafushishe nge ntanda sha mu muulu.+ Kabili mwabaletele mu calo+ ico mwalaile kuli bashibo+ ukuti bakengilemo pa kuti cibe icabo. 24 E ico abana babo baume+ balingile no kupoka icalo,+ na imwe mwalengele abekashi ba mu calo ico, abena Kanaani,+ ukucimfiwa+ pa ntanshi yabo, no kubapeela mu minwe yabo, kumo ne shamfumu+ shabo na bantu na bantu aba mu calo ico,+ pa kuti bacite kuli bena ukulingana ne fyo balefwaya.+ 25 Bapokele ne misumba ya malinga+ ne mpanga ya mufundo+ no kupoka amayanda ayaisulamo ifisuma fyonse,+ ifishima ifyafukulwa,+ amabala ya myangashi na ya miolife+ ne miti ya fya kulya ifingi, awe balelya no kwikuta+ no kwina+ no kuilemena ku busuma bwenu ubukalamba.+

26 “Lelo, tabali na cumfwila+ kabili balimupondokele+ na mafunde yenu bayapoosele ku numa,+ baipeye na bakasesema benu,+ abalebasoka pa kuti bababweseshe kuli imwe;+ kabili bacitile ne fya misuula ifikalamba.+ 27 Na pali ici mwabapeele mu minwe ya balwani babo,+ abalebacululusha;+ lelo mu nshita ya kucula kwabo balelilila kuli imwe,+ na imwe mwaleumfwa ukufuma mu myulu;+ kabili ukulingana no bwingi bwa nkumbu+ shenu mwalebapeela aba kubapususha+ abaali no kubapokolola mu minwe ya balwani babo.+

28 “Nomba baleti nga baikala umutelelwe, balebwekeshapo ukucita ifyabipa ku cinso cenu,+ na imwe mwalebaleka baponena mu minwe ya balwani babo, abalebanyantaula.+ Lelo balebwela no kukuuta kuli imwe ukuti mubaafwe,+ na imwe mwaleumfwa ukufuma mu myulu+ kabili imiku iingi mwalebapokolola ukulingana no bwingi bwa nkumbu shenu.+ 29 Nangu ca kuti mwalebasoka+ pa kuti mubabweseshe ku mafunde yenu,+ abene baleituntumba+ no kukanaumfwila amafunde yenu; kabili bapulile+ mu bupingushi bwenu,+ ubwa kuti, umuntu nga abukonka, kuti aba no mweo.+ Kabili bali abomankonso,+ batalamike ne mikoshi yabo,+ kabili tabaumfwile.+ 30 Lelo mwalibatekanishiishe pa myaka iingi+ kabili ukubomfya umupashi wenu mwalebasokela+ muli bakasesema benu, lelo tabaumfwile.+ Mwasukile mwabapeela mu minwe ya bantu na bantu aba mu fyalo.+ 31 Na mu bwingi bwa nkumbu shenu tamwabalofeshe+ nelyo ukubalekelesha;+ pantu muli Lesa wa mutembo+ kabili uwa nkumbu.+

32 “E ico nomba, mwe Lesa wesu, Lesa mukulu,+ uwa maka+ kabili uwa kutiinya,+ uufikilisha icipangano+ kabili uulanga icikuuku,+ mwileka bumoneke ubunono kuli imwe,+ ubucushi bonse ubwatuponena,+ ne shamfumu shesu,+ na bacilolo besu+ na bashimapepo besu+ na bakasesema besu+ na bashifwe+ na bantu benu bonse ukufuma mu nshiku sha shamfumu sha Asiria ukufika na kuli buno bushiku.+ 33 Kabili imwe muli balungami+ muli fyonse ifyatuponena, pantu ni mu cishinka+ mucitila ifi, lelo ifwe ni fwe twabifya.+ 34 Kumfwa ishamfumu shesu, bacilolo besu, bashimapepo besu ne fikolwe fyesu,+ tabakonkele amafunde+ yenu, nangu ukubika amano ku malango+ yenu atemwa ku fya kucinkulako fyenu ifyo mwalebasokelamo.+ 35 Lelo bena mu nshita ya bufumu+ bwabo na mu nshita mwabapeele ifisuma ifingi+ na lintu bali mu calo icapabuka kabili ica mufundo+ ico mwabapeele, tabamubombeele+ kabili tabalekele imicitile yabo iyabipa.+ 36 Moneni! Ifwe lelo tuli basha;+ ne calo ico mwapeele ifikolwe fyesu ukuti filelyamo ifisabo ne fisuma ifyabamo, moneni! e mo twaba abasha,+ 37 kabili mulefuma ifingi+ ifiya ku shamfumu+ isho mwabika pali ifwe pa mulandu wa membu shesu,+ kabili baleteka pali ifwe na pa fitekwa fyesu, ukulingana ne fyo balefwaya, na ifwe tuli mu kucula ukukalamba.+

38 “E ico pa mulandu wa ifi fyonse, tulepangana icipangano ca cishinka,+ kabili cilelembwa no kufwatikapo icifwati+ ca bacilolo besu, na bena Lebi besu, na bashimapepo besu.”+

10 Na bafwatikepo icifwati+ ni aba:

9 Abena Lebi na bo ni aba: Yeshua+ mwana Asania, Binui uwa mu bana ba kwa Henadadi,+ Kadmiele 10 na bamunyinabo Shebania,+ Hodia, Kelita, Pelaya, Hanani, 11 Mika, Rehobu, Hashabia, 12 Sakuri, Sherebia,+ Shebania, 13 Hodia, Bani na Beninu.

14 Abakalamba ba bantu ni aba: Paroshe, Pehati-moabu,+ Elamu, Satu, Bani, 15 Buni, Asigadi, Bebai, 16 Adoniya, Bigibai, Adini, 17 Atere, Hisekia, Asuri, 18 Hodia, Hashumu, Besai, 19 Harifu, Anatote, Nebai, 20 Magipiashi, Meshulamu, Hesiri, 21 Meshesabele, Sadoke, Yadua, 22 Pelatia, Hanani, Anaya, 23 Hoshea, Hanania, Hashubu, 24 Haloheshe, Pilha, Shobeke, 25 Rehumu, Hashabina, Maaseya, 26 na Ahiya, Hanani, Anani, 27 Maluki, Harimu, Baana.

28 E lyo abantu bonse abashala, bashimapepo,+ abena Lebi,+ abalinshi ba pa mpongolo,+ bakemba,+ abaNetinimu,+ na bonse abaipaatwile ku bantu na bantu aba mu fyalo+ pa kuti balekonka amafunde+ ya kwa Lesa wa cine, abakashi babo, abana babo abaume na bana babo abanakashi, bonse abali na mano ya kwishiba ifintu kabili abengeluka,+ 29 baikatene na bamunyinabo,+ abakankaala babo,+ kabili balapile no mulapo wa citiipu+ kabili balapile ukuti,+ bali no kukonka amafunde ya kwa Lesa wa cine, ayapeelelwe muli Mose umubomfi wa kwa Lesa wa cine,+ ukulakonka+ no kulacita fyonse ifyaba mu mafunde ya kwa Yehova Shikulwifwe+ e lyo no kulakonka ubupingushi bwakwe ne fipope fyakwe.+ 30 no kuti tatufwile ukupeela abana besu abanakashi ku bantu ba mu fyalo ifi, nangu ukuufya abana besu abaume ku bana babo abanakashi.+

31 Kumfwa abantu ba mu fyalo ifi+ abaleleta ifya bukwebo no musango onse uwa mbuto pa bushiku bwe sabata ku kushitisha, twikasendako nangu cimo kuli bena pa bushiku bwe sabata+ nelyo pa bushiku bwa mushilo,+ kabili tukaipusule ifya mu mwaka wa cinelubali (7)+ e lyo ne misha umuntu onse atukwatila.+

32 Kabili fwe bene twaibikiile amafunde ya kuti, cila muntu afwile ukupeela cimo pali fitatu ice shekele cila mwaka ica kubomfya ku mulimo wa ng’anda ya kwa Lesa wesu,+ 33 ku mukate wa kutuntikanya+ no mutuulo wa ngano+ uwa lyonse no mutuulo wa koca uwa lyonse ifya pa masabata,+ ne myeshi iipya,+ pa nshita ya mitebeto+ pa fya mushilo+ na pa mituulo ya pa lubembu+ iya kufutilako Israele na pa mulimo onse uwa ng’anda ya kwa Lesa wesu.+

34 Kabili twapendwile+ pa kuleta inkuni+ isho bashimapepo na bena Lebi na bantu bafwile ukuleta ku ng’anda ya kwa Lesa wesu, ukulingana na mayanda ya bashifwe, inshita nga yafika, cila mwaka, isha kocela pa ciipailo ca kwa Yehova Lesa wesu+ ukulingana ne fyalembwa mu mafunde;+ 35 no kuleta ifisabo ifyabalilapo ukupya ifya mu mushili wesu+ ne fisabo ifyabalilapo ukupya pa fisabo fyonse ifya ku muti wa musango onse+ ku ng’anda ya kwa Yehova umwaka no mwaka; 36 na mabeli+ ya bana besu abaume na ya fitekwa+ fyesu, nge fyo calembwa mu mafunde,+ na mabeli ya ng’ombe shesu na ya mpaanga+ shesu, ku kuyatwala ku ng’anda ya kwa Lesa wesu, kuli bashimapepo abalebombela mu ng’anda ya kwa Lesa wesu.+ 37 No buunga bwesu ubwa kubalilapo ubwa nsembe+ ne misangulo+ yesu ne fisabo fya ku muti uwa musango onse,+ umwangashi uupya+ na mafuta,+ tukalaleta kuli bashimapepo mu miputule ya kuliilamo+ iya ng’anda ya kwa Lesa wesu, ne ca pe kumi icafuma mu mushili wesu ukupeela ku bena Lebi,+ apo abena Lebi, e bapoka ica pe kumi mu misumba yonse iya bulimi.

38 Na shimapepo, umwana wa kwa Aarone, akabe na bena Lebi ilyo abena Lebi bapoka ica pe kumi (10); kabili abena Lebi bakapeele ica pe kumi ica mu fya pe kumi ku ng’anda ya kwa Lesa wesu+ mu miputule ya kuliilamo+ iya ng’anda ya kututilamo. 39 Pantu ni mu miputule ya kuliilamo e mo abana ba kwa Israele na bana ba bena Lebi bali no kuleta umusangulo+ wa ngano, umwangashi upya+ na mafuta, kabili e muli ne fipe fya mu ncende ya mushilo na bashimapepo abalebombelamo,+ na balinshi ba pa mpongolo+ na bakemba;+ kabili tatufwile ukulekelesha ing’anda ya kwa Lesa wesu.+

11 Nomba bacilolo+ ba bantu baleikala mu Yerusalemu;+ lelo abantu abashala, balipendwile+ pa kuti basale umo pa bantu ikumi (10) uwa kwikala mu Yerusalemu umusumba wa mushilo,+ na bashala pabula (9) ukwikala mu misumba imbi. 2 Kabili abantu bapaalile+ abaume bonse abaitemenwe+ ukwikala mu Yerusalemu.

3 Na ba e bakalamba ba mu fitungu fya bulashi+ abaikele mu Yerusalemu;+ lelo mu misumba ya kwa Yuda mwaikele umo umo mu ncende yakwe mu misumba yabo,+ abena Israele,+ bashimapepo+ na bena Lebi,+ na bena Netinimu+ na bana ba babomfi ba kwa Solomone.+

4 Na mu Yerusalemu mwaikele abana aba kwa Yuda bamo e lyo na bana ba kwa Benjamini bamo.+ Pa bana ba kwa Yuda paali Ataya mwana Usia mwana Sekaria mwana Amaria mwana Shefatia mwana Mahalalele uwafyelwe ku bana ba kwa Perese;+ 5 na Maaseya mwana Baruki mwana Kol-hose mwana Hasaya mwana Adaya mwana Yoyaribu mwana Sekaria umwana wa mwina Shela. 6 Abana bonse aba kwa Perese abaleikala mu Yerusalemu bali imyanda ine na makumi mutanda na cinekonsekonse (468), abaume abafikapo.

7 Na ba e bana ba kwa Benjamini:+ Salu mwana Meshulamu+ mwana Yoede mwana Pedaya mwana Kolaya mwana Maaseya mwana Itiele mwana Yeshaya; 8 e lyo pakonka Gabai na Salai, imyanda pabula na makumi yabili na cinekonsekonse (928); 9 na Yoele mwana Sikri, uwalebangalila, na Yuda mwana Hasenua uwali uwa cibili kuli ena aleangalila umusumba.

10 Pali bashimapepo pali: Yedaya mwana Yoyaribu,+ Yakini,+ 11 Seraya mwana Hilkia mwana Meshulamu+ mwana Sadoke+ mwana Merayote mwana Ahitubu,+ intungulushi ya ng’anda ya kwa Lesa wa cine; 12 na bamunyinabo abalebomba imilimo ya mu ng’anda,+ bali imyanda cinekonsekonse na makumi yabili na babili (822); na Adaya mwana Yerohamu+ mwana Pelalia mwana Amsi mwana Sekaria mwana Pashihuri+ mwana Malkiya,+ 13 na bamunyina, abakalamba ba mu mayanda ya bashibo,+ bali imyanda ibili na makumi yane na babili (242), na Amashisai mwana Asarele mwana Ahisai mwana Meshileemote mwana Imere, 14 na bamunyinabo, abaume impalume abashipa,+ bali umwanda umo na makumi yabili na cinekonsekonse (128), kabili kwali no walebangalila,+ Sabdiele umwana wa bantu abacindama.

15 Kabili bamo mu bena Lebi+ ni aba: Shemaya mwana Hashubu mwana Asrikamu mwana Hashabia+ mwana Buni, 16 na Shabetai+ na Yosabadi,+ uwa mu bakalamba ba bena Lebi, abaleangalila umulimo wa ku nse ya ng’anda ya kwa Lesa wa cine; 17 na Matania+ mwana Mika mwana Sabdi mwana Asafi,+ uwaleangalila abaleimba isha malumbo,+ kabili pa kupepa e walepepa ipepo lya kulumbanya,+ na Bakibukia ali uwa cibili kuli bamunyina, na Abda mwana Shamua mwana Galali+ mwana Yedutuni.+ 18 Abena Lebi bonse mu musumba wa mushilo+ bali imyanda ibili na makumi cinekonsekonse na bane (284).

19 Kabili abalinshi ba pa mpongolo+ Akubu, Talmone+ na bamunyinabo abalelinda impongolo,+ bali umwanda umo na makumi cinelubali na babili (172).

20 Na bashala pa bena Israele, na pali bashimapepo na pa bena Lebi, baikele mu misumba yonse imbi iya kwa Yuda, cila muntu mu ncende yakwe iya bupyani.+ 21 Abena Netinimu+ bena baleikala mu Ofele,+ kabili Siha na Gishpa e baleangalila abena Netinimu.

22 No waleangalila+ abena Lebi mu Yerusalemu ni Usi mwana Bani mwana Hashabia mwana Matania+ mwana Mika+ uwa mu bana ba kwa Asafi,+ bakemba,+ e waleangalila umulimo wa ng’anda ya kwa Lesa wa cine. 23 Pantu imfumu yalibapangiile ifunde,+ kabili kwali ukupekanishisha bakemba ifyo balekabila cila bushiku.+ 24 Na Petahia mwana Meshesabele uwa mu bana ba kwa Sera mwana Yuda e wali mupepi ku kwafwa imfumu pa milandu yonse iya bantu.

25 Kumfwa mu mishi+ ne mpanga sha iko, mwali bamo aba mu bana ba kwa Yuda abaikele mu musumba wa Kiriat-arba+ ne mishi ya uko na mu Dibone ne mishi ya uko na mu Yekabiseele+ ne mishi ya uko, 26 na mu Yeshua na mu Molada+ na mu Bete-pelete+ 27 na mu Hasari-shauli+ na mu Beere-sheba+ ne mishi ya uko 28 na mu Siklagi+ na Mekona ne mishi ya uko 29 na mu En-rimone+ na mu Sora+ na mu Yarimuti,+ 30 Sanoa,+ Adulamu+ ne mishi ya iyi misumba, Lakishi+ ne mpanga ya uko, Aseka+ ne mishi ya uko. Na bo baikele mu Beere-sheba ukufika fye na ku mupokapoka wa Hinomu.+

31 Na bana ba kwa Benjamini baikele mu Geba,+ Mikmashi+ na Aiya+ na Betele+ ne mishi ya uko, 32 Anatote,+ Nobu,+ Anania, 33 Hasore, Rama,+ Gitaimu,+ 34 Hadidi, Seboimu, Nebalati, 35 Lode+ na Ono,+ umupokapoka wa bacenjela mu fya kupangapanga. 36 Kabili mu bena Lebi mwali bamo abaikele mu musumba wa kwa Yuda abaishileikala mu musumba wa kwa Benjamini.

12 Na ba e bashimapepo na bena Lebi abaile pamo na Serubabele+ mwana Shealtiele+ na Yeshua:+ Seraya, Yeremia, Esra, 2 Amaria,+ Maluki, Hatushi, 3 Shekania, Rehumu, Mereemote, 4 Ido, Ginetoi, Abiya, 5 Miyamini, Maadia, Bilgai, 6 Shemaya,+ na Yoyaribu, Yedaya,+ 7 Salu, Amoke,+ Hilkia, Yedaya.+ Aba e bali abakalamba ba bashimapepo na bamunyinabo mu nshiku sha kwa Yeshua.+

8 Na bena Lebi bali ni Yeshua,+ Binui,+ Kadmiele,+ Sherebia, Yuda, na Matania,+ abaleangalila abaleimba isha malumbo, ena na bamunyina. 9 Kabili Bakibukia na Uni, bamunyinabo bali apalungatana na bo uko balebombela imilimo ya bulinshi. 10 Yeshua afyele Yoyakimu,+ Yoyakimu na o afyele Eliashibu,+ na Eliashibu afyele Yoyada.+ 11 Yoyada na o afyele Yonatani, Yonatani na o afyele Yadua.+

12 Na mu nshiku sha kwa Yoyakimu kwali bashimapepo, abakalamba ba mu mayanda ya bashibo,+ ni aba: muli Seraya+ mwali Meraya, muli Yeremia mwali Hanania; 13 muli Esra+ mwali Meshulamu; muli Amaria mwali Yehohanani; 14 muli Maluki mwali Yonatani; muli Shebania+ mwali Yosefe; 15 muli Harimu+ mwali Adina; muli Merayote mwali Helekai; 16 muli Ido mwali Sekaria; muli Ginetone mwali Meshulamu; 17 muli Abiya+ mwali Sikri; muli Minyamini, ——; muli Moadia mwali Piltai; 18 muli Bilgai+ mwali Shamua; muli Shemaya mwali Yehonatani; 19 na muli Yoyaribu, Matenai; muli Yedaya+ mwali Usi; 20 muli Salai mwali Kalai; muli Amoke mwali Ebere; 21 muli Hilkia mwali Hashabia; muli Yedaya+ mwali Netanele.

22 Abena Lebi mu nshiku sha kwa Eliashibu,+ Yoyada+ na Yohanani na Yadua+ e balembelwe ukuti e bakalamba ba mu ndupwa shabo, kabili e bashimapepo, ukufika na ku bufumu bwa kwa Dariusi umwina Persia.

23 Abana ba kwa Lebi abali abakalamba ba mu mayanda ya bashibo+ balembelwe mwi buuku lya fyalecitika mu nshiku shilya, ukufika fye na ku nshiku sha kwa Yohanani mwana Eliashibu. 24 Na bakalamba ba bena Lebi baali ni Hashabia, Sherebia+ na Yeshua mwana Kadmiele+ na bamunyinabo abalungatene na bo ku kulumbanya no kutootela ukulingana ne funde lya kwa Davidi+ umuntu wa kwa Lesa wa cine, ibumba lya balinshi ukulungatana ne bumba lya balinshi. 25 Matania+ na Bakibukia, Obadia, Meshulamu, Talmone, Akubu,+ e balinshi abalelinda pa mpongolo,+ abali mwi bumba lya balinshi ilyali lwa ku mayanda ya kututilamo aya ku mpongolo. 26 Aba baali mu nshiku sha kwa Yoyakimu+ mwana Yeshua+ mwana Yosadaki+ na mu nshiku sha kwa Nehemia+ umulashi na Esra+ shimapepo kabili uwalekopolola amalembo.+

27 Kabili pa kusefya kwa kupeela+ ilinga lya Yerusalemu kuli Lesa bafwaile abena Lebi, pa kuti babafumye mu ncende shabo shonse no kubaleta ku Yerusalemu ku kusefya no kusekelela kabili ku kutootela+ na ku kwimba,+ ku malimba ya nyenjele ne filimba fya nsale+ na bansango.+ 28 Na bana ba bakemba balongene ukufuma ku Citungu+ ca Yordani na mu ncende shashinguluka Yerusalemu na mu mishi ya Netofa,+ 29 na ku Bete-gilgali+ na ku mpanga sha Geba+ na Asimabete,+ pantu kwali imishi+ iyo bakemba baikuuliile ukushinguluka Yerusalemu. 30 E lyo bashimapepo na bena Lebi baisangulwile+ kabili basangulwile na bantu+ ne mpongolo+ ne linga.+

31 E lyo naninike bacilolo+ ba kwa Yuda pe linga. Kabili, nasontele amabumba yabili ayakalamba aya bakemba ba nyimbo sha kutootela+ na ba kusefya, limo lyaleya ku kwa kulyo pa muulu we linga ukulola ku mpongolo ya Cishala ca mito.+ 32 Na Hoshaya na bacilolo bamo aba kwa Yuda balebakonka pa numa, 33 na Asaria, Esra na Meshulamu, 34 Yuda na Benjamini na Shemaya na Yeremia; 35 na ba mu bana ba bashimapepo abali na mapenga+ ni Sekaria mwana Yonatani mwana Shemaya mwana Matania mwana Mikaya mwana Sakuri+ mwana Asafi,+ 36 na bamunyina Shemaya na Asarele, Milalai, Gilalai, Maai, Netanele na Yuda, Hanani, bali ne filimba+ fya kulishishapo ulwimbo lwa kwa Davidi umuntu wa kwa Lesa wa cine; na Esra+ uwalekopolola amalembo ali pa ntanshi yabo. 37 Ilyo baile ku Mpongolo ya Kamfukumfuku+ baninine pa Matabo+ aya Musumba wa kwa Davidi,+ apalungatene na bo, apa kuninina ilinga pa muulu wa Ng’anda ya kwa Davidi ukufika na ku Mpongolo ya Menshi+ ku kabanga.

38 Ne bumba limbi ilya bakemba ba nyimbo sha kutootela+ lyaleya pa ntanshi, na ine nali pa numa, na bantu bamo, pa muulu we linga pa Lupungu lwa Mabuku+ ukufika na kwi Linga ilya mutika uukulu,+ 39 no kunina pa Mpongolo ya kwa Efraimu+ na pa Mpongolo ya Musumba wa Kale,+ ukufika na pa Mpongolo ye Sabi+ no Lupungu lwa kwa Hananele+ no Lupungu ulwitwa Mea,+ ukufika na pa Mpongolo ya Mpaanga;+ kabili baishileiminina pa Mpongolo ya Mulinshi.

40 Yasukile amabumba yabili aya baleimba inyimbo sha kutootela+ yaisaiminina pa ng’anda+ ya kwa Lesa wa cine, e fyo na ine na bamo mu balashi abali na ine twaiminine,+ 41 na bashimapepo, Eliakimu, Maaseya, Minyamini, Mikaya, Elioenai, Sekaria, Hanania abali na mapenga,+ 42 na Maaseya na Shemaya, na Eleasari na Usi na Yehohanani na Malkiya na Elamu na Esere. Na baleimba abali na Israhia kangalila baleimba nga nshi.+

43 Kabili batuulile amalambo ayengi nga nshi+ pali bulya bushiku no kusekelela,+ pantu Lesa wa cine abalengele ukusekelela apakalamba.+ Abanakashi+ na bo na bana+ balisekelele, ica kuti ukusekelela kwa Yerusalemu kwaleumfwika no kutali.+

44 Kabili, pali bulya bushiku kwali abaume abasontelwe ukwangalila amayanda+ ya kututilamo,+ aya misangulo,+ aya fisabo ifyabalilapo ukupya+ na ya fya pe kumi (10),+ pa kuti balebikamo ifyafuma mu mabala ya mu misumba ifyali no kupeelwa kuli bashimapepo na bena Lebi+ ukulingana ne funde;+ pantu ukusekelela kwa kwa Yuda kwali pa mulandu wa bashimapepo na bena Lebi+ abalebomba. 45 Na bo balebomba imilimo+ ya kwa Lesa wabo ne milimo ya kusangulula,+ bakemba+ na bo na balinshi ba pa mpongolo+ babombele ukulingana ne funde lya kwa Davidi na Solomone umwana wakwe. 46 Pantu mu nshiku sha ku kale isha kwa Davidi na Asafi kwali intungulushi sha bakemba+ kabili kwali ne nyimbo sha kulumbanya ne sha kutootela Lesa.+ 47 Abena Israele bonse mu nshiku sha kwa Serubabele+ na mu nshiku sha kwa Nehemia+ baleleta ifyali no kupeelwa kuli bakemba+ na ku balinshi ba pa mpongolo+ ifyalekabilwa cila bushiku na bo balefipeela ku bena Lebi;+ na bena Lebi na bo balefipeela ku bana ba kwa Aarone.

13 Pali bulya bushiku kwali ukubelengela+ abantu mwi buuku+ lya kwa Mose; kabili basangile apalembwa ukuti abena Amone+ na bena Moabu+ tabafwile ukwingila mu lukuta lwa kwa Lesa wa cine umuyayaya,+ 2 pantu tabapeele abana ba kwa Israele ifya kulya+ na menshi,+ lelo balipiile Balaamu+ pa kuti abalapishe.+ Lelo, Lesa wesu alengele icitiipu ukusanguka ipaalo.+ 3 E ico, ilyo fye baumfwile ifunde ili,+ batendeke ukupaatula+ abena fyalo bonse ukubafumya muli Israele.

4 Nomba ilyo ici cishilacitika, Eliashibu+ shimapepo uwaleangalila umuputule wa kuliilamo+ uwa ng’anda ya kwa Lesa wesu ali muntu wa kwa Tobia;+ 5 kabili amupekanishishe umuputule ukalamba uwa kuliilamo,+ umo kale balebika lyonse umutuulo wa ngano,+ ifyanunkila ne fipe ne ca pe kumi ica ngano, umwangashi upya+ na mafuta,+ ifyo abena Lebi+ na baleimba na balinshi ba pa mpongolo balepeelwa, ne fya misangulo ya bashimapepo.

6 Kabili inshita yonse iyi nshali mu Yerusalemu, pantu mu mwaka walenga amakumi yatatu na ibili (32)+ uwa kwa Artakishashete+ imfumu ya Babiloni naile ku mfumu, kabili pa nshita imbi nalombele ku mfumu ukuti insuminishe ukuya.+ 7 E lyo naishile ku Yerusalemu no kumona ububi ubo Eliashibu+ acitiile Tobia+ pa kumupekanishisha umuputule mu lubansa lwa ng’anda+ ya kwa Lesa wa cine. 8 Kabili ici cabipile nga nshi kuli ine.+ E ico napoosele+ pa nse ifipe fyonse ifya mu ng’anda ya kwa Tobia ukufuma mu muputule wa kuliilamo. 9 Pa numa naebele bamo na bo basangulwile+ imiputule ya kuliilamo;+ kabili nabweseshemo ifipe+ fya mu ng’anda ya kwa Lesa wa cine, no mutuulo wa ngano ne fyanunkila.+

10 Kabili naishileishiba ukuti ne fyali no kupeelwa+ ku bena Lebi tafyalepeelwa kuli bena, ica kuti abena Lebi na bakemba abalebomba umulimo balibutwike, umo umo abweleele kwi bala lyakwe.+ 11 Kabili nasangile ifilubo+ mu balashi+ kabili nasosele nati: “Cinshi ico ing’anda ya kwa Lesa wa cine yalekeleshiwilwa?”+ E ico nabalongenye pamo no kubabwesesha mu fifulo fyabo. 12 Na baYuda bonse baletele ica pe kumi+ ukufumya pa ngano+ na pa mwangashi upya+ na pa mafuta+ bafibikile umo baletutila.+ 13 E lyo nasontele Shelemia shimapepo na Sadoke kalemba na Pedaya uwa mu bena Lebi ukwangalila amayanda ya kututilamo; kabili baleangalila Hanani mwana Sakuri mwana Matania,+ pantu aba balemonwa aba cishinka;+ kabili e bapeelwe umulimo wa kwakanya+ ifya pe kumi kuli bamunyinabo.

14 Mwe Lesa wandi, njibukisheni+ pali ici, kabili mwilaba+ imilimo ya cikuuku iyo nabombele ku ng’anda+ ya kwa Lesa wandi ne fyo yasungwa.

15 Muli shilya nshiku namwene mu baYuda abantu balenyantaula umwa kukamina imyangashi+ pe sabata no kuleta imiina ya ngano no kuininika+ pa mpunda,+ kumo no mwangashi, ne fisabo fya myangashi na makunyu+ ne misango yonse iya fipe, balefileta mu Yerusalemu pa bushiku bwe sabata;+ e lyo nabashinine pa bushiku baleshitisha ifya kulya. 16 Na bena Turi+ baikele muli uyu musumba, kabili baleleta isabi ne misango yonse iya fya kushitisha+ kabili baleshitisha pe sabata ku bana ba kwa Yuda mu Yerusalemu. 17 E ico nasangile ifilubo muli bashimucindikwa+ ba mu baYuda no kubeba ukuti: “Mulandu nshi mulecitila icintu icabipa ifi, ica kuti mulesaalula no bushiku bwe sabata? 18 Bushe ifi te fyo ne fikolwe fyenu fyacitile,+ ica kuti Lesa wesu aletele ububi+ bonse ubu pali ifwe na pa musumba uno? Lelo mucili mulelundapo ubukali ubupya ngo mulilo pali Israele pa kusaalula isabata.”+

19 Nomba, ilyo fye ku mpongolo sha Yerusalemu kwatendeke ukufiita ilyo isabata talilafika, ilyo line fye naebele bamo ukwisala ifiibi kabili balifiseele.+ Kabili natile befiisula mpaka ukupwa kwe sabata; na bamo abalemombela nababikile ku mpongolo pa kuti kwi-ingila icipe nangu cimo pa bushiku bwe sabata.+ 20 E ico bashimakwebo na bashitisha imisango yonse iya fya kushitisha basendeme ku nse ya Yerusalemu umuku umo no walenga bubili. 21 Pa numa nalibashinine,+ ati: “Cinshi ico mulesendamina pa ntanshi ye linga? Nga mwabwekeshapo, nshakamupanye.”+ Ukutula pa nshita ilya ukuya na ku ntanshi tabaishileko pe sabata.

22 Kabili nasosele ku bena Lebi+ ukuti bafwile lyonse ukulaisangulula+ e lyo no kulaingila, no kulalinda impongolo+ pa kuti balenge ubushiku bwe sabata ukuba ubwa mushilo.+ Pali ici na co munjibukishishepo,+ mwe Lesa no kumbelela uluse, ukulingana ne cikuuku cenu icikalamba.+

23 Kabili mu nshiku shilya namwene abaYuda abaupile+ abanakashi abena Ashidode,+ abena Amone na bena Moabu.+ 24 Kumfwa abana babo, bamo balelanda iciAshidode, kabili tapaali nangu umo uwaishibe ukulanda iciYuda,+ kano mu lulimi lwa bantu bambi. 25 Kabili nabasangile ne filubo no kubalapisha+ no kuumapo bamo+ no kubanukaula umushishi no kubalenga ukulapila mwi shina lya kwa Lesa nati:+ “Mwikoofya abana benu abanakashi ku bana babo abaume, kabili mwikaleka abana benu abaume ukuupa abana babo abanakashi, e lyo na imwe bene mwikoopa abo banakashi.+ 26 Bushe te pali ici Solomone imfumu ya kwa Israele abembukiile?+ Kabili mu nko ishingi tamwali imfumu iyali nga ena;+ kabili ali uwatemwikwa kuli Lesa,+ ica kuti Lesa amusontele ukuba imfumu pali Israele onse. Lelo na o abanakashi bambi bambi bamulengele ukubembuka.+ 27 Kabili bushe twalitala atuumfwa icintu icabipa nge fyo ica kuti imwe mucite ububi ubu bonse ubukalamba ubwa kupondokela Lesa wesu pa kuupa abanakashi bambi bambi?”+

28 Kabili umo pa bana ba kwa Yoyada+ mwana Eliashibu+ shimapepo mukalamba aupile mwana Sanbalati+ umwina Horone.+ E ico nalimufulumwine.+

29 Mwe Lesa wandi, ibukisheni ifyo aba bantu bakowesha+ bushimapepo ne cipangano+ ca bushimapepo ne ca bena Lebi.+

30 Kabili nabasangulwile+ ku fintu fyonse ifyo abena fyalo balecita, nayakenye ne milimo kuli bashimapepo na ku bena Lebi, umo umo umulimo wakwe,+ 31 ukuleta inkuni+ pa nshita yalinga, no kuleta ifisabo fyabalilapo ukupya.

Munjibukishe,+ mwe Lesa wandi, no kuncitila ubusuma.+