Estere

1 Nomba mu nshiku sha kwa Ahasuerusi,+ e kutila, Ahasuerusi uwali imfumu ukufuma ku India ukufika ku Etiopia, mu fitungu fya bulashi ukucila pa mwanda umo na makumi yabili na cinelubali (127),+ 2 muli shilya nshiku ilyo Imfumu Ahasuerusi yaikele pa cipuna ca iko ica bufumu,+ icali mwi sano+ lya Shushani,+ 3 mu mwaka wa butatu ukufuma apo yatampile ukuteka, yapekanishishe bacilolo ba iko bonse umutebeto+ na babomfi ba iko, na bashilika ba ku Persia+ na ku Madai,+ na bashimucindikwa+ na bacilolo ba mu fitungu fya bulashi ku cinso ca iko,+ 4 ilyo yalangile ifyuma+ fya bufumu bwa iko ubwa bukata no mucinshi+ no kupuulama kwa bucindami bwakwe pa nshiku ishingi, inshiku umwanda umo na makumi cinekonsekonse (180). 5 Kabili ilyo ishi nshiku shakumene, imfumu yapekenye umutebeto wa nshiku cinelubali (7) uwa bantu bonse abasangilwe mwi sano lya Shushani, abacindami pamo na balanda, mu lubansa lwe bala lya kwi sano lya mfumu. 6 Kwali insalu, iya tonge iisuma kabili iya bluu+ iyakakiilwe mu myando ya nsalu isuma, ne nsalu yakashikila+ iya masako ya mpaanga mu mipeto ya silfere ne nceshi sha marbele, ifya kwikalapo+ ifya golde ne fya silfere ifyali apalambatikwa amabwe ya porfri na ya marbele na ya margariti na ya marbele wafiita.

7 Kabili balepishamo umwangashi wa kunwa mu fipe fya golde;+ kabili ifipe fyali ifyalekanalekana, no mwangashi wa ku bufumu+ wali uwingi nga nshi, ukulingana ne cuma ca mfumu. 8 Pali ilya nshita, takwali uwale-eba abantu ukunwa ukulingana ne fyo ifunde lyalanda, pantu e fyo imfumu yateyanishishe shimucindikwa onse uwa mu ng’anda ya iko, ukucita ico onse alefwaya.

9 Na o, Bashti+ namfumu apekenye umutebeto wa banakashi pa ng’anda ya Mfumu Ahasuerusi.

10 Pa bushiku bwalenga cinelubali (7), ilyo umutima wa mfumu wasansamwike pa mulandu wa mwangashi,+ yaebele Mehumani, Bista, Haribona,+ Bigta, Abagta, Setari, na Karikasi, abalashi ba kwi sano cinelubali (7) abalebombela+ Imfumu Ahasuerusi, 11 ukuleta Bashti namfumu ku mfumu ninshi nafwala ica kufimba ku mutwe ica bufumu, ukuti abantu na bantu na bacilolo bamone ukuyemba kwakwe; pantu alemoneka bwino.+ 12 Lelo Namfumu Bashti akaaninine+ fye ukwisa ilyo aumfwile amashiwi imfumu yatumine abalashi ba kwi sano ukwisamweba. E lyo imfumu yakalipe icibi kabili yali ne cipyu icikalamba.+

13 Kabili imfumu yaipwishe aba mano+ abaishiba inshita+ (pantu e fyo imfumu yalecita, nga kwaba umulandu uukumine imfumu, yaleipusha bonse abaishibisha amafunde ne milandu ya bupingushi, 14 ne mpanda mano shapalamishe kuli yena ni Karishena, Shetari, Adimata, Tarshishi, Merese, Marsena, na Memukani, bacilolo cinelubali (7)+ aba ku Persia na ku Madai, abaleingila ku mfumu,+ kabili abaleikala mu fifulo fya ntanshi mu bufumu) aiti: 15 “Ukulingana ne funde, cinshi cingacitwa kuli Namfumu Bashti ifi akaana ukukonka ifyo Imfumu Ahasuerusi isoseele mu balashi ba kwi sano?”

16 E lyo Memukani+ atile pa cinso ca mfumu na bacilolo: “Te ku mfumu fye yeka Namfumu Bashti alufyenye,+ lelo na kuli bacilolo bonse na ku bantu bonse aba mu fitungu fya bulashi fyonse ifya Mfumu Ahasuerusi. 17 Pantu umulandu wa kwa namfumu ukafika ku banakashi bonse abaupwa ica kuti bakasuula+ abalume babo,+ ilyo bakatila, ‘Imfumu Ahasuerusi yatumine aba kuyaleta namfumu Bashti, na o alikene.’ 18 Kabili buno bushiku bacilolo ba ku Persia na ku Madai, nga baumfwa umulandu wa kwa namfumu, bakashimikilako bacilolo bonse aba mfumu, kabili kuli no kuba imisuula no bukali mu calo.+ 19 Nga cawama ku mfumu,+ mukwai imfumu ibike icipope, kabili cilembwe mu mafunde+ ya mu Persia na ya mu Madai, pa kuti cikabe ica muyayaya,+ icipope ca kuti Bashti ekatala esa ku cinso ca Mfumu Ahasuerusi; kabili umucinshi wakwe uwa bunafumu, imfumu ipeele ku munankwe, umwanakashi uwamucila ubusuma. 20 Kabili icipope ico imfumu ikacita, cikomfwike mu bufumu bwa iko bonse (pantu bwena bukulu), kabili abanakashi bonse abaupwa bakacindika+ abalume babo,+ abacindami na balanda.”

21 Awe imfumu+ na bacilolo batemenwe aya mashiwi, kabili imfumu yacitile ifyo Memukani asosele. 22 E ico yatumine bakalata+ ku fitungu fya bulashi+ fyonse ifya mfumu, ku citungu ca bulashi cimo na cimo mu musango wa ciko uwa milembele kabili ku bantu na bantu mu lulimi lwabo, ukuti umwaume onse uwaupa atwalilile ukuba cilolo mu ng’anda+ yakwe ine no kusosa mu lulimi lwa bantu bakwe.

2 Pa numa ya ifi fintu, ilyo ubukali bwa Mfumu Ahasuerusi+ bwacepele, yaibukishe Bashti+ ne fyo acitile+ ne fyo apingwilwe.+ 2 E lyo ababomfi ba mfumu, abaleibombela,+ batile: “Lekeni bafwaile+ imfumu, abakashana banacisungu,+ abasuma mu kumoneka, 3 kabili imfumu isonte bacilolo mu fitungu fya bulashi+ fyonse ifya bufumu bwa iko, na bo balonganike abakashana banacisungu, abasuma mu kumoneka, pe sano lya Shushani,+ pa ng’anda ya banakashi ababa mu minwe ya kwa Hegee+ mutungwi wa mfumu,+ uusunga abanakashi; no kuleka bapeelwe ifya kubayemfya. 4 Kabili umukashana uukawama mu menso ya mfumu e ukaba namfumu ukupyana pali Bashti.”+ Awe imfumu yatemenwe nga nshi aya mashiwi, na yo yacitile ifyo fine.

5 Umwaume umo, umuYuda, aali mu Shushani+ mwi sano, ne shina lyakwe ni Mordekai+ mwana Yairi mwana Shimei mwana Kishi umwina Benjamini,+ 6 uwasendelwe muli bunkole+ ukufuma ku Yerusalemu pamo na bankole abasendelwe pamo na Yekonia+ imfumu ya Yuda uo Nebukadnesari+ imfumu ya Babiloni yasendele muli bunkole. 7 Kabili e wakushishe+ Hadasa, e kutila, Estere, umwana mwanakashi wa kwa munyina wa kwa wishi,+ pantu takwete wishi nelyo nyina; kabili umukashana aali uwayemba kabili umusuma mu kumoneka,+ kabili ilyo bawishi na banyina bafwile, Mordekai alimubuulile ukuti abe umwana wakwe. 8 Nomba, ilyo amashiwi ya mfumu ne funde lya iko fyaumfwikike, kabili ilyo abakashana abengi balonganikwe pe sano lya Shushani+ ilyali mu minwe ya kwa Hegee,+ Estere atwelwe ku ng’anda ya mfumu iyali mu minwe ya kwa Hegee uwalesunga abanakashi.

9 Awe umukashana aweme mu menso yakwe, ica kuti aishileba ne cikuuku+ ku mukashana, e pa kulayangufyanya ukumupeela ifya kumuyemfya,+ ifya kulya ifisuma, kabili amupeela na bakashana cinelubali (7) abasalilwe mu ng’anda ya mfumu, no kumukuushisha pamo na bakashana bakwe ku ncende yawamisha iya mu ng’anda ya banakashi. 10 Estere talandilepo nangu cimo pa bantu bakwe+ nelyo pali balupwa lwakwe, pantu Mordekai amukonkomeshe ukukanalanda.+ 11 Kabili cila bushiku Mordekai alepitila ku ntanshi ya lubansa lwa ng’anda ya banakashi pa kuti eshibe ifyo Estere ali ne cilecitwa kuli ena.

12 Kabili nga yafika inshita ya kuti umukashana umo na umo aye ku Mfumu Ahasuerusi pa numa ya kupita muli fyonse ifyalecitwa ku banakashi ukulingana na mafunde ya banakashi pa myeshi ikumi na ibili (12), pantu e myeshi balebayemfeshamo, imyeshi mutanda (6) balebasuba amafuta ya muri*+ ne myeshi mutanda amafuta ya balsamu;+ 13 ifi nga fyacitwa e lyo umukashana aleya ku mfumu. Conse ico alomba balemupeela, alesenda ukufuma mu ng’anda ya banakashi ukuya ku ng’anda ya mfumu.+ 14 Icungulo e lyo aleya, no lucelo alebwelela ku ng’anda ya cibili iya banakashi iyaleangalilwa na Shaashgasi mutungwi+ wa mfumu, uwalesunga bakanakashi. Tali no kuya ku mfumu na kabili, kano imfumu naimutemwa kabili yamwita mwi shina.+

15 Kabili ilyo inshita ya kwa Estere mwana Abihaili munyina wa kwa wishi Mordekai, uo abuulile ngo mwana wakwe,+ yafikile ukuti aye ku mfumu, taipwishe nangu cimo+ kano fye ico Hegee+ mutungwi wa mfumu, uwalesunga abanakashi, amwebele (awe abantu bonse abalemona Estere balemutemwa).+ 16 Estere nomba bamutwele ku Mfumu Ahasuerusi ku ng’anda ya iko iya bufumu mu mweshi we kumi (10), e kutila, umweshi wa Tebete, mu mwaka walenga cinelubali (7)+ ukufuma apo yatendekele ukuteka. 17 Kabili imfumu yatemenwe Estere ukucila abanakashi bambi, ica kuti e o yalatembatemba no kuba ne cikuuku kuli ena ukucila banacisungu bambi.+ Na yo yamufwikile ica kufimba ku mutwe ica bufumu no kumucita namfumu+ ukupyana pali Bashti. 18 Awe imfumu yacitile no mutebeto ukalamba kuli bacilolo ba iko bonse na ku babomfi ba iko, umutebeto wa kwa Estere; kabili yaebele ukuti bakakule abafungwa+ abali mu fitungu fya bulashi, kabili yakonkenyepo ukupeela ifya bupe ukulingana ne cuma ca mfumu.

19 Nomba ilyo banacisungu+ balonganikwe umuku wa bubili, Mordekai ali naikala mu mpongolo ya mfumu.+ 20 Estere tale-ebako nangu umo pali balupwa lwakwe na pa bantu bakwe,+ ukulingana ne fyo Mordekai+ amukonkomeshe;+ kabili Estere alecita ukulingana ne fyo Mordekai amwebele, nga filya fine alecita ilyo alemusunga.+

21 Muli shilya nshiku ilyo Mordekai aleikala mu mpongolo ya mfumu, abalashi babili pa balashi ba kwi sano aba mfumu, e kutila Bigtani na Tereshe, abali abalinshi ba pa fiibi, balikalipe kabili balefwaya ukwipaya+ Imfumu Ahasuerusi. 22 Awe ici cintu caishibikwe kuli Mordekai, na o apo pene aebele+ Estere namfumu. Estere na o aebele imfumu mwi shina lya kwa Mordekai.+ 23 Awe bafwailishe uyu mulandu no kusanga ukuti ca cine, kabili bonse babili babakulike+ pa fimuti;+ kabili calilembelwe pa ntanshi ya mfumu mwi buuku lya milandu+ ya shilya nshiku.

3 Pa numa ya ifi fintu Imfumu Ahasuerusi yacindamike Hamani+ mwana Hamedata umwina Agagi+ kabili yamupeele icifulo ca pa muulu+ no kubika icipuna cakwe pa muulu wa bacilolo bonse abali nankwe.+ 2 Awe ababomfi ba mfumu bonse abali ku mpongolo ya mfumu+ balekontama no kuwa ubukupeme kuli Hamani, pantu imfumu yabebele ukuti balecita ifi fine kuli ena. Lelo Mordekai talekontama nelyo ukuwa ubukupeme.+ 3 E lyo ababomfi ba mfumu abali mu mpongolo ya mfumu balatila kuli Mordekai: “Nga cinshi ulepulila mwi funde lya mfumu?”+ 4 Nomba balemwebapo fye cila bushiku, na o alekaana ukumfwa kuli bena, na bo e pa kweba Hamani pa kuti bamone nga Mordekai akatwalilila ukukaana;+ pantu alibebele ukuti muYuda.+

5 Awe Hamani alemona ukuti Mordekai talekontama no kuwa ubukupeme kuli ena,+ kabili Hamani e pa kukalipa nga nshi.+ 6 Lelo talefwaya fye ukwipaya Mordekai eka, pantu balimwebele pa lwa bantu ba kwa Mordekai; kabili Hamani atampile ukupanga ifyo akalofya+ abaYuda bonse abali mu bufumu bonse ubwa kwa Ahasuerusi, abantu ba kwa Mordekai.+

7 Mu mweshi wa ntanshi,+ e kutila, umweshi wa Nisani, mu mwaka we kumi na ibili (12)+ ukutula apo Imfumu Ahasuerusi yatendekele ukuteka, umuntu umo alepoosa Puri,+ e kutila, Ica kupendwilako,+ ku cinso ca kwa Hamani ubushiku no bushiku kabili umweshi no mweshi, ukufika ku mweshi we kumi na ibili, e kutila, umweshi wa Adari.+ 8 Kabili Hamani atile ku Mfumu Ahasuerusi: “Kuli ibumba lya bantu bamo ilyasalanganina+ mu bantu na bantu mu fitungu fyonse ifya bulashi ifya bufumu bwenu,+ lelo lyali-ibela; kabili amafunde yabo yalipusana na ya bantu bonse, tabakonka na mafunde ya mfumu,+ kabili tacilingile ukuti imfumu ibaleke fye. 9 Nga cawama ku mfumu, lekeni cilembwe ukuti balofiwe; kabili nkapeela amatalanti ya silfere amakana ikumi (10,000)+ ku bakabomba uyu umulimo+ pa kuti bakayabike mu cipao ca mfumu.”

10 Awe imfumu yafuulile inindaminwe ya iko iya kufwatikilako+ no kuipeela kuli Hamani+ mwana Hamedata umwina Agagi,+ uwafimbiile abaYuda.+ 11 Kabili imfumu yatile kuli Hamani: “Silfere+ yapeelwa kuli iwe, na ku bantu, pa kuti ukacite kuli abo bantu ifyo ulefwaya.”+ 12 Awe bakalemba+ ba mfumu balitilwe mu mweshi wa ntanshi pa bushiku bwe kumi na shitatu (13), kabili balembele+ ukulingana na fyonse ifyo Hamani aebele aba kucingilila ubufumu aba mfumu na balashi abalashiikwe mu fitungu fya bulashi ifyalekanalekana,+ na bacilolo ba mabumba yalekanalekana aya bantu, aya muli cila citungu ca bulashi, ukulingana no musango wa milembele yabo,+ kabili ukulingana no lulimi ulo cila mutundu ulanda; mwi shina+ lya Mfumu Ahasuerusi e mo balembeele kabili pa fyalembelwe pafwatikwe inindaminwe ya kufwatikilako iya mfumu.+

13 Awe batumine bakalata ukupitila mu nkombe+ ku fitungu fya bulashi fyonse ifya mfumu, ukuti bakufye, bepaye kabili balofye abaYuda bonse, umulumendo e lyo no mukote, abana na banakashi, mu bushiku bumo,+ mu bushiku bwe kumi na shitatu (13) ubwa mweshi we kumi na ibili (12), e kutila, umweshi wa Adari,+ no kusenda ifipe fyabo.+ 14 Icayambulwa ca fyalembelwe icali no kupeelwa nge funde+ mu fitungu fya bulashi ifyalekanalekana+ casabankanishiwe ku bantu na bantu bonse, pa kuti baiteyanishishe kuli ubu bushiku. 15 Inkombe shalifumine, ukuya shilebutukisha+ pa mulandu wa cipope ca mfumu, kabili ifunde lyalipeelwe mu Shushani+ mwi sano. Kumfwa imfumu na Hamani, balikele balanwa;+ lelo umusumba wa Shushani+ wena, wali mu cimfulumfulu.+

4 Awe Mordekai+ aishibe conse icacitilwe;+ kabili Mordekai alepwile ifya kufwala fyakwe no kufwala insamu*+ no kuikuba imito+ no kuya mu kati ka musumba no kulila umusowa uukalamba kabili uwa bulanda.+ 2 Awe asukile afika na pa mpongolo ya mfumu,+ pantu takwali nangu umo uwali no kupita pa mpongolo ya mfumu nafwala insamu. 3 Kabili mu fyalo fyonse ifya bulashi,+ konse uko icipope ca mfumu ne funde lya iko fyalefika, kwali ukuloosha kukalamba+ ku baYuda, no kuleka ukulya+ no kulila no kupumapo imisowa. Abengi bayanshile insamu+ no kukuba imito+ e po baikala. 4 Kabili abakashana ba kwa Estere na bamutungwi+ bakwe batendeke ukwingila no kumweba ifyalecitika. Kabili namfumu calimukalipe nga nshi. E lyo atumine ifya kufwala fya kufwika Mordekai no kumufuula insamu. Na o tafipokele.+ 5 E ico Estere aitile Hataki,+ uwa muli bamutungwi ba mfumu, uo imfumu yapeele umulimo wa kulamubombela, kabili amwebele ukuya kuli Mordekai, pa kuti eshibe ico alecitila ifi.

6 Awe Hataki alifumine aya kuli Mordekai mu lubansa lwa musumba ulwali pa ntanshi ya mpongolo ya mfumu. 7 E lyo Mordekai amwebele fyonse ifyamuponene+ ne cipendo cakumanina ica ndalama isho Hamani atile akabika mu cipao ca mfumu+ ku kulwisha abaYuda, pa kuti abalofye.+ 8 Kabili icayambulwa+ ce lembo lye funde icapeelwe mu Shushani+ ukuti bepaiwe, alimupeele pa kuti akalange Estere no kumweba kabili ukumukonkomesha+ ukuya ku mfumu no kupapaata yena ukuti imumfwe+ no kulombelako abantu bakwe ku mfumu.+

9 Awe Hataki+ aliishile no kweba Estere amashiwi ya kwa Mordekai. 10 E lyo Estere asosele kuli Hataki no kumweba ifya kusosa kuli Mordekai ati:+ 11 “Ababomfi bonse aba mfumu na bantu ba mu fyalo fya bulashi ifya mfumu balishiba ukuti, umwaume onse napamo umwanakashi uwaisa ku mfumu mu lubansa+ lwa mu kati uo bashiitile, ifunde+ lya mfumu litila uyo muntu afwile ukwipaiwa; kano fye nga ca kuti imfumu yamutambika inkonto ya golde, e lyo engaba no mweo.+ Lelo ine, nshaitwa ukuya ku mfumu pa nshiku amakumi yatatu (30) nomba.”

12 Kabili baebele Mordekai ifyo Estere asosele. 13 E lyo Mordekai pa kwasuka Estere atile: “Witontonkanya ukuti aba mu ng’anda ya mfumu bena bakapusuka ukucila abaYuda bonse.+ 14 Pantu nga ca kutila watalala tondolo pali ino nshita, ukutuusha no kupususha fikesa ku baYuda ukufuma kumbi;+ lelo iwe na ba mu ng’anda ya kwa wiso, mukafwa. Kabili nani eshibe nga ca kuti ico wafikila kuli bunamfumu mulandu wa kutupususha?”+

15 Na o Estere ayaswike Mordekai ati: 16 “Kabiye, ulonganye abaYuda bonse abasangwa mu Shushani+ kabili undekeleko ukulya+ kabili wilya nangu kunwa pa nshiku shitatu,+ ubushiku na kasuba. Na ine na bakashana bandi,+ nalaleka ukulya ifyo fine, na pa numa nkaya ku mfumu, nangu ca kuti ifunde talisose fyo; kabili nga nafwa,+ ni fyo fine.” 17 E lyo Mordekai aile no kuyacita fyonse ifyo Estere amwebele.

5 Kabili pa bushiku bwalenga shitatu+ Estere afwele ifya kufwala fya bufumu,+ no kuyaiminina mu lubansa+ lwa mu kati ka ng’anda ya mfumu, apalungatene ne ng’anda ya mfumu, ninshi imfumu ikele pa cipuna ca bufumu mu ng’anda ya iko ukulungatana no mwinshi wa mu ng’anda. 2 Kabili ilyo fye imfumu yamwene Estere namfumu eminine mu lubansa, yalimupokelele,+ ica kuti imfumu yatambike Estere inkonto ya golde+ iyo yaikete. Na o Estere alipaleme no kukumya pa muulu wa nkonto.

3 E lyo imfumu yamwipwishe aiti: “Cinshi, we Estere namfumu, cinshi ulefwaya?+ Njeba nangu fye ni hafu wa bufumu+— kuti nakupeela!” 4 Na o Estere atile: “Nga ca kutila imfumu yamona ukuti cili fye bwino, lekeni imfumu ise pamo na Hamani+ lelo ku mutebeto+ uo imupekanishishe.” 5 Na yo imfumu yatile: “Ebeni Hamani angufyanye+ ukucita ukulingana ne fyasosa Estere.” Pa numa imfumu na Hamani baile ku mutebeto uo Estere apekenye.

6 Awe imfumu yasosele kuli Estere pa mutebeto wa mwangashi aiti: “Cinshi ulelomba?+ Nalakupeela! Njeba, cinshi ulefwaya? Nangu fye ni hafu wa bufumu—ndekupeela!” 7 E lyo Estere ayaswike no kutila: “Ico ndelomba ne co ndefwaya ni ci, 8 Nga cili fye bwino+ ku mfumu kabili imfumu nga yatemwa ukusuminisha ukulomba kwandi no kubombela pa co ndefwaya, imfumu na Hamani bakese ku mutebeto uo nkabapekanisha mailo, kabili mailo e lyo nkacita ukulingana ne fyo imfumu yasosa.”+

9 Awe Hamani afumine nasamwa+ bulya bushiku no kusansamuka nga nshi; lelo ilyo Hamani amwene Mordekai ali mu mpongolo ya mfumu+ na o no kwima iyo+ nangu ukumutiina,+ apo pene fye Hamani aishileba no bukali nga nshi+ pali Mordekai. 10 Lelo, ubukali bwa kwa Hamani bwapelele fye mu mutima wakwe, awe aingila na mu ng’anda yakwe. E lyo atumine abakuyaita abanankwe na Sereshe+ umukashi wakwe na bo balishile; 11 kabili Hamani aitakishe kuli bena pa mulandu ne fyuma ubwingi ifyo akwete+ na pa bana abengi abo akwete+ na pali fyonse ifyo imfumu yamucindikileko na pa fyo yamusumbula pali bacilolo na pa babomfi ba mfumu.+

12 Kabili Hamani akonkenyepo ukusosa ati: “Icacilanapo, Estere namfumu tacingisha umuntu nangu umo pamo ne mfumu ku mutebeto uo acipekanya kano ine neka,+ kabili na mailo+ nandaalika pamo ne mfumu. 13 Lelo ifi fyonse—tafilewama kuli ine ilyo lyonse ndemona Mordekai umuYuda naikala pa mpongolo ya mfumu.” 14 E lyo Sereshe umukashi wakwe na banankwe bonse bamwebele ati: “Uleke bapekanye icimuti+ icalepa imikono amakumi yasano (50). E lyo mu lucelo+ ukasose ku mfumu auti Mordekai akobekwepo.+ E lyo ukengile ne mfumu ku mutebeto ulesekelela.” Awe ici cintu caweme+ kuli Hamani, na o aebele aba kupekanya icimuti.+

6 Mu bushiku bulya bwine imfumu yafililwe ukumona utulo.+ E ico yasosele ukuti balete ibuuku umo balelemba+ imilandu ya muli shilya nshiku. Awe babelengeele imfumu imilandu yali muli ilyo ibuuku. 2 Basukile bafika apalembelwe ifyo Mordekai asoseleele+ Bigtani na Tereshe, abalashi babili pa balashi ba kwi sano+ aba mfumu, abalinshi ba pa mwinshi, abafwaile ukwipaya Imfumu Ahasuerusi. 3 Ne mfumu yaipwishe ati: “Bushe Mordekai acindikwa shani pali ici acitile kabili cilambu nshi apeelwa?” E lyo ababomfi abalebombela imfumu, bayaswike ati: “Takuli nangu cimo icacitwa kuli ena.”+

4 Pa numa imfumu yatile: “Nani ali mu lubansa?” Awe Hamani ninshi aliingile mu lubansa+ lwa ku nse ulwa ng’anda ya mfumu ukuti ebe imfumu ati bakobeke Mordekai pa cimuti+ ico amuteyanishishe. 5 Na babomfi ba mfumu bayaswike ati: “Ni Hamani+ eminine mu lubansa.” E lyo imfumu yatile: “Lekeni engile.”

6 Ilyo Hamani aingile, imfumu yamwipwishe ati: “Cinshi cingacitwa ku muntu uo imfumu ilefwaya ukucindika?”+ Pa kumfwa ifi Hamani atile mu mutima wakwe: “Nani imfumu ingafwaya ukucindika ukucila ine?”+ 7 E lyo Hamani atile ku mfumu: “Umuntu uo imfumu ilefwaya ukucindika, 8 lekeni bamuletele ica kufwala ca bufumu+ ico imfumu ifwala, bamuletele na kabalwe uo imfumu ininapo,+ uukwete ku mutwe icifimbo ca bufumu. 9 Kabili ica kufwala na kabalwe fipeelwe mu minwe ya kwa cilolo wa muli bacilolo abakata aba mfumu;+ e lyo bafwike umuntu uo imfumu ilefwaya ukucindika, kabili bamuninike pali kabalwe bamupishe na mu lubansa lwa cintubwingi+ ulwa mu musumba,+ e lyo balebilisha ku ntanshi yakwe abati, ‘Ifi e ficitwa ku muntu uo imfumu yacindika.’”+ 10 Apo pene fye imfumu yaebele Hamani aiti: “Ale angufyanya, buula ica kufwala na kabalwe, nge fyo wasosa, kabili e fyo ucite kuli Mordekai umuYuda uwikala mu mpongolo ya mfumu. Wishapo nangu cimo pa fyo wasosa.”+

11 Awe Hamani abuulile ica kufwala+ na kabalwe no kufwika Mordekai+ no kumuninika pali kabalwe alamupisha na mu lubansa lwa cintubwingi+ ulwa mu musumba no kulabilikisha pa ntanshi yakwe ati:+ “Ifi e ficitwa ku muntu uo imfumu yacindika.”+ 12 Pa numa Mordekai abweleele ku mpongolo ya mfumu.+ Lelo Hamani, ayangufyenye ukuya ku ng’anda yakwe aleloosha nafimba na ku mutwe.+ 13 Kabili ashimike kuli Sereshe+ umukashi wakwe na ku banankwe bonse fyonse ifyamuponene. E lyo aba mano bakwe+ na Sereshe umukashi wakwe bamwebele ati: “Nga ca kuti Mordekai uwatendeka ukukucimfya muYuda, ninshi tawakamucimfye, lelo ni we ukacimfiwa.”+

14 Ilyo bacili balelanda nankwe, abalashi ba kwi sano lya mfumu balifikile no kwangufyanya+ ukusenda Hamani ku mutebeto+ uo Estere apekenye.

7 E lyo imfumu na Hamani+ baingile mu kulya umutebeto pamo na Estere namfumu. 2 Imfumu na kabili yatile kuli Estere pa bushiku bwa cibili pa mutebeto wa mwangashi:+ “Cinshi ulefwaya ukulomba,+ we Estere namfumu? Calapeelwa kuli iwe.+ Kabili cinshi ulefwaya? Njeba nangu fye ni hafu wa bufumu+—kuti nakupeela!” 3 Na o Estere namfumu ayaswike no kutila: “Nga cili fye bwino kuli imwe, mwe mfumu, kabili nga mwatemwa, ndelomba ukuti mundeke mbe no mweo+ no kuleka abantu bandi+ na bo babe no mweo. 4 Pantu nabatushitisha,+ ine na bantu bandi, ukuti batukufye, batwipaye no kutulofya.+ Abatushitisha ku kuba fye abasha baume+ na basha banakashi, nga natalelepo fye. Lelo ubu bucushi tabuweme pantu buli no kubipila imfumu.”

5 Imfumu Ahasuerusi nomba yaipwishe Estere namfumu ati: “Nani uyu wine,+ kabili ali kwi uwapama+ ukucite ci?” 6 E lyo Estere ayaswike ati: “Umuntu uulecita ici, uuletulwisha+ kabili umulwani,+ ni uyu Hamani umuntu umubi.”

Awe Hamani alitiinine+ pa mulandu wa mfumu na namfumu. 7 Ne mfumu yaimine ne cipyu+ ca iko ukufuma pa mutebeto wa mwangashi ukuya kwi bala lya pe sano; na Hamani aiminine ku kupapaatila umweo wakwe kuli Estere namfumu,+ pantu alimwene ukuti imfumu naipanga+ ukumucita icabipa.+ 8 Awe imfumu yafumine kwi bala lya pe sano no kwingila mu ng’anda ya mutebeto wa mwangashi;+ kabili Hamani akupamine pa ca kwikalapo+ apali Estere. E lyo imfumu yatile: “Bushe kabili ucende na namfumu, ilyo na ine e mo ndi mu ng’anda?” Ilyo imfumu yasosele ifi,+ bafimbile Hamani ku mutwe. 9 Harbona,+ uwa mu balashi ba kwi sano+ abali pa cinso ca mfumu, atile: “Kuli ne cimuti+ ico Hamani apekanishishe Mordekai, uwasosele icisuma pa mfumu,+ ciiminine mu ng’anda ya kwa Hamani—icalepa imikono amakumi yasano (50).” Ne mfumu yatile: “Mukulikenipo.”+ 10 Awe bakulike Hamani pa cimuti+ ico apekanishishe Mordekai;+ e fyo ne cipyu ca mfumu capwile.

8 Ubo bwine bushiku Imfumu Ahasuerusi yapeele Estere namfumu ing’anda ya kwa Hamani,+ uwapatile abaYuda;+ kabili Mordekai aishile ku mfumu, pantu Estere ali nasosa ifyo baba nankwe.+ 2 E lyo imfumu yafuulile inindaminwe ya iko iya kufwatikilako+ iyo yapokele kuli Hamani no kuipeela kuli Mordekai; na Estere asontele Mordekai ukula-angalila ing’anda ya kwa Hamani.+

3 Kabili, Estere abwekeshepo ukusosa ku mfumu kabili awile ku makasa ya iko no kulila no kuipapaata+ ukuti imumfwe pa kuti ifumyepo ububi+ bwa kwa Hamani umwina Agagi ne pange+ ilyo apangiile abaYuda.+ 4 Awe imfumu yatambike kuli Estere inkonto+ ya golde, Estere na o e pa kwima no kwiminina ku cinso ca mfumu. 5 E lyo nomba atile: “Nga cawama ku mfumu, kabili nga nimpokelelwa+ ku cinso ca iko, kabili nga calinga ku mfumu, kabili nga naba umusuma mu menso ya iko, lekeni cilembwe ica kulesha ifyalembelwe,+ umwali ipange lya kwa Hamani mwana Hamedata umwina Agagi,+ ifyo alembele ku kulofya abaYuda+ ababa mu fitungu fya bulashi fyonse ifya mfumu.+ 6 Pantu kuti nashipikisha shani ilyo namona ububi bwaponena abantu bandi, kabili kuti nashipikisha shani ilyo namona ukonaulwa kwa lupwa lwandi?”

7 E lyo Imfumu Ahasuerusi yatile kuli namfumu Estere na kuli Mordekai umuYuda: “Moneni! Ing’anda ya kwa Hamani nimpeela Estere,+ kabili Hamani nabamukobeka pa cimuti,+ pa mulandu wa kufwaya ukwipaya abaYuda. 8 Kabili lembeleni abaYuda ukulingana ne fyo mulefwaya mwi shina lya mfumu no kufwatikapo inindaminwe ya mfumu; pantu icalembwa mwi shina+ lya mfumu no kufwatikwapo inindaminwe ya mfumu te kuti caalulwe.”+

9 Awe bakalemba+ ba mfumu balitilwe pali ilya nshita mu mweshi wa butatu, e kutila, umweshi wa Sibani, pa bushiku bwalenga amakumi yabili na shitatu (23) ubwa uyu mweshi; kabili calembelwe ukulingana na fyonse ifyo Mordekai aebele abaYuda na ba kucingilila+ ubufumu na balashi na bacilolo aba mu fitungu fya bulashi ukutula ku India ukuyafika ku Etiopia, ifitungu fya bulashi+ umwanda umo na makumi yabili na cinelubali (127), ku citungu ca bulashi cimo na cimo mu musango wa ciko uwa milembele+ kabili ku bantu na bantu mu lulimi lwabo,+ na ku baYuda mu musango wabo uwa milembele na mu lulimi lwabo.+

10 Kabili alembele ifyalembwa mwi shina lya Mfumu+ Ahasuerusi no kufwatikapo+ icifwati ca nindaminwe ya mfumu+ no kufituma mu minwe ya nkombe sha pali bakabalwe,+ bakabalwe abasenda amakalata kabili ababomfiwa mu mulimo wa ku bufumu, abafyelwe kuli bakabalwe ababutukisha. 11 Muli ifi fyalembwa e mo imfumu yasuminishe abaYuda abali mu misumba yalekanalekana ukuilonganya+ no kupokolola imyeo yabo, ukuti bakufye, bepaye kabili balofye abantu bonse+ pamo na bana na banakashi ne calo ca bulashi umwali ababapatile, no kusampa ifipe fyabo,+ 12 pa bushiku bumo+ mu fyalo fya bulashi fyonse ifya Mfumu Ahasuerusi, ubushiku bwe kumi na shitatu (13)+ mu mweshi we kumi na ibili (12), e kutila, umweshi wa Adari.+ 13 Ifyayambwilwe+ ifye lembo fyali no kupeelwa nge funde mu fitungu fyonse ifya bulashi, ukusabankanya ku bantu na bantu bonse, ukuti abaYuda baiteyanishe ubu bushiku ukuilandwila+ abalwani babo. 14 Inkombe+ sha pali bakabalwe basenda bakalata, ishibomfiwa ku mulimo wa bufumu, shalifumine, ilyo shakonkomeshiwe ku mfumu ukuya ku ntanshi no kubutukisha;+ kabili ifunde lyalipeelwe mu Shushani+ mwi sano.

15 Mordekai ena, afumine pa cinso ca mfumu mu ca kufwala+ ca bufumu ica bluu kabili ica nsalu ya kolokondwe, ne cilongwe cikalamba ica golde, ne ca kufwala+ ca nsalu iisuma, iyakashikila.+ Kabili aba mu musumba wa Shushani balyawile no kusekelela.+ 16 Ku baYuda nomba kwali ulubuuto no kusekelela+ no kwanga no kucindikwa. 17 Kabili mu fyalo fya bulashi fyonse na mu misumba yonse, konse uko amashiwi ya mfumu ne funde lya iko fyafikile kwali ukusekelela no kwaanga ku baYuda, kwali umutebeto+ kabili bwali bushiku bwa nsansa; na bantu abengi+ aba mu calo bayalwike abaYuda,+ pantu baiketwe umwenso+ wa kutiina abaYuda.

9 Kabili mu mweshi we kumi na ibili (12), e kutila, umweshi wa Adari,+ pa bushiku bwe kumi na shitatu (13) muli uyu mweshi, ilyo amashiwi ya mfumu ne funde lya iko fyali no kucitika,+ pa bushiku ubo abalwani ba baYuda balelolela ukuti babacushe, ifintu tafyali nge fyo fyateyanishiwe, pantu abaYuda e bacushishe ababapatile.+ 2 AbaYuda balongene+ mu misumba yabo mu fyalo fyonse ifya bulashi ifya Mfumu Ahasuerusi+ ku kwipaya abalebafwaila ububi,+ kabili tapaiminine umuntu nangu umo ku menso yabo, pantu abantu na bantu bonse baiketwe umwenso+ wa kubatiina. 3 Kabili bacilolo+ bonse aba mu fyalo fya bulashi na bacingilila+ ubufumu na balashi na babomba umulimo+ wa mfumu baleafwa abaYuda, pantu umwenso+ wa kutiina Mordekai walibekete. 4 Pantu Mordekai ali shimucindikwa+ mu ng’anda ya mfumu kabili ululumbi+ lwakwe lwafikile mu fyalo fyonse ifya bulashi, pantu ulya muntu Mordekai aile alekwatilako fye amaka.+

5 Kabili abaYuda baile baleipayaula abalwani babo ku lupanga,+ ukubepaya no kubalofya, awe bacitile ku babapatile ukulingana no kufwaya kwabo.+ 6 Na mu Shushani+ mwi sano abaYuda baipeye no kulofya abaume imyanda isano (500). 7 Kabili Parishandata na Dalfone na Aspata 8 na Porata na Adalia na Aridata 9 na Parmashita na Arisai na Aridai na Baisata, 10 abana baume ikumi (10)+ aba kwa Hamani+ mwana Hamedata, umulwani wa baYuda,+ balibepeye; lelo pa fipe fya kupokolola+ tabatambalikepo iminwe yabo.

11 Muli ubo bushiku e mo imfumu yaebelwe impendwa ya baipaiwe mu Shushani mwi sano.

12 Ne mfumu yatile kuli Estere namfumu:+ “Mu Shushani mwi sano+ abaYuda baipaya no kulofya abaume imyanda isano (500) na bana baume ikumi (10) aba kwa Hamani. Nga mu fyalo fya bulashi+ ifyashala ifya mfumu, mwena cinshi bacitile?+ Kabili cinshi ulelomba? Cilepeelwa kuli iwe.+ Kabili cinshi cimbi ulefwaya?+ Na co cine cilecitwa.” 13 Na o Estere atile: “Nga cawama ku mfumu,+ lekeni cisuminishiwe mailo na ku baYuda abali mu Shushani ukucita ukulingana ne funde lya lelo;+ no kuleka abana baume ikumi (10) aba kwa Hamani bakobekwe pa fimuti.”+ 14 Awe imfumu yasosele ukuti cicitwe ifyo fine.+ E lyo ifunde lyapeelwe mu Shushani, na bana baume ikumi (10) aba kwa Hamani balikobekwe.

15 Kabili abaYuda abali mu Shushani na bo balongene pa bushiku bwe kumi na shine (14)+ ubwa mweshi wa Adari, kabili baipeye abaume imyanda itatu (300) mu Shushani; lelo pa fipe fya kupokolola tabatambalikepo iminwe yabo.+

16 Kumfwa abaYuda bambi abali mu fyalo fya bulashi+ ifya mfumu, balilongene, kabili balwilile imyeo yabo,+ kabili bailandwilile+ abalwani babo no kwipaya aba mu babapatile amakana amakumi cinelubali na yasano (75,000); lelo pa fipe fya kupokolola tabatambalikepo iminwe yabo, 17 pa bushiku bwalenga ikumi na shitatu (13) mu mweshi wa Adari; kabili kwali ukutuusha pa bushiku bwalenga ikumi na shine (14) ubwa uyo mweshi, kabili balengele ubo bushiku ukuba ubushiku bwa mutebeto+ kabili ubwa kusekelela.+

18 Kumfwa abaYuda abali mu Shushani, balongene pa bushiku bwe kumi na shitatu (13)+ ubwa mweshi wine uyu na pa bwe kumi na shine (14) ubwa uyu wine mweshi, kabili kwali ukutuusha pa bushiku bwe kumi na shisano (15) ubwa uyu wine mweshi, kabili balengele ubo bushiku ukuba ubushiku bwa mutebeto kabili ubwa kusekelela.+ 19 E mulandu wine abaYuda, abaikele mu mishi ya mu fitungu ifyali ku nse ya musumba uukalamba, balemwena ubushiku bwe kumi na shine (14) ubwa mweshi wa Adari+ ukuti bushiku bwa kusekelela+ kabili ubwa mutebeto kabili ubushiku bwa nsansa+ kabili ubwa kupeeleshanya ifya kulya.+

20 Kabili Mordekai+ alembele ifi fintu no kutuma ifyalembwa ku baYuda bonse abali mu fyalo fyonse ifya bulashi+ ifya Mfumu Ahasuerusi, ifya mupepi ne fya kutali, 21 ukubakonkomesha ukuti bafwile lyonse baleibukisha+ ubushiku bwe kumi na shine (14) ubwa mweshi wa Adari no bushiku bwe kumi na shisano (15) ubwa uyu wine mweshi cila mwaka, 22 ukulingana ne nshiku shilya shine abaYuda batushishemo ku balwani+ babo na mu mweshi umo ubulanda bwabo bwayalwike ukusekelela kabili umo ukuloosha+ kwayalwike insansa, ukulashibukisha ukuti ni nshiku sha mutebeto kabili isha kusekelela ne sha kupeeleshanya+ ifya kulya ne fya bupe ku bapiina.+

23 Kabili abaYuda basumiine ukulacita ico batendeke ne co Mordekai abalembeele. 24 Pantu Hamani+ mwana Hamedata,+ umwina Agagi,+ umulwani+ wa baYuda bonse, apangiile abaYuda ukubalofya,+ kabili apoosele Puri,+ e kutila, Ica kupendwilako,+ ku kubafulunganya no kubalofya. 25 Lelo ilyo Estere aile ku kumonekela ku cinso ca mfumu yasosele mu calembwa aiti:+ “Lekeni ububi apangiile+ abaYuda bubwelele pa mutwe wakwe”;+ awe bamukulike na bana bakwe pa fimuti.+ 26 Ni pali ici bainikile inshiku ishi Purimu, ukufuma kwi shina lya Puri.+ E mulandu wine, ukulingana na mashiwi yonse aya muli uyu kalata+ ne fyo bamwene pa mulandu uyu ne cabaponene, 27 abaYuda baicitiile no kuisuminina abene na bana babo, na bonse abaleilundako,+ ukuti ici cintu ciikapwa iyo, ica kutila lyonse baleibukisha ishi nshiku shibili ukulingana ne calembelwe pali shena kabili ukulingana ne nshita ya shiko cila mwaka. 28 Kabili bali no kulaibukisha ishi nshiku no kushisunga mu nkulo shonse, mu lupwa lonse, mu citungu ca bulashi conse na mu musumba onse, kabili ishi nshiku sha Purimu tashali no kupwa mu kati ka baYuda kabili ukusefya+ kwa shiko takwali no kupwa mu bana babo.

29 Kabili Estere namfumu, mwana Abihaili,+ na Mordekai umuYuda balembele kalata wa maka ku kukomenena uyu kalata wa cibili pali Purimu. 30 Kabili atumine ifyalembwa ku baYuda bonse mu fyalo fya bulashi umwanda umo na makumi yabili na cinelubali (127),+ ifya mu bufumu bwa kwa Ahasuerusi,+ amashiwi ya mutende kabili aya cishinka,+ 31 ku kupampamika ishi nshiku isha Purimu pa nshita isha shiko, nga filya fine Mordekai umuYuda na Estere namfumu babebele,+ kabili nge fyo abene na bana+ babo bapingwilepo ukuleka ukulya+ no kutendeka ukukuuta.+ 32 Kabili amashiwi ya kwa Estere yapampamike iyi milandu ya Purimu,+ kabili yalembelwe mwi buuku.

10 Kabili Imfumu Ahasuerusi yasendele aba mu calo na ba pa fishi+ fya pali bemba ukuti balebomba umulimo wa kupatikisha.+

2 Kabili pa lwa milimo ya iko yonse iya bulamba na bumpalume bwa iko na filya fine fyalandilwe pa bucindami bwa kwa Mordekai+ ubo imfumu yamucindamikilemo,+ bushe tafyalembwa mwi Buuku lya milandu+ ya shamfumu sha ku Madai na Persia?+ 3 Pantu Mordekai umuYuda ali uwa cibili+ ku Mfumu Ahasuerusi kabili ali shimucindikwa mu baYuda kabili bamunyina bonse balimutemenwe, abombeele abantu bakwe ifisuma no kusosa ifya mutende+ ku bana babo bonse.