Yoele

1 Ici e cebo ca kwa Yehova icaishile+ kuli Yoele mwana Petuele:

2 “Umfweni ici, mwe bakalamba, kabili kutikeni, mwe bekala calo bonse.+ Bushe mwalitala amumonapo ica musango uyu mu nshiku shenu, nelyo mu nshiku sha fikolwe fyenu?+ 3 Shimikileniko abana benu ici cintu, pa kuti abana benu na bo bakashimikileko abana babo, na bana babo na bo bakashimikileko aba mu nkulo iikakonkapo.+ 4 Ifilimwa ifyo ifishimu fyashako, makanta alya;+ kabili ifyo makanta ashako, abana ba makanta bakalya; kabili ifyo abana ba makanta bashako, impemfu shalya.+

5 “Buukeni, mwe bacakolwa,+ kabili lileni; pumenipo imisowa,+ bonse mwe banwa umwangashi, pa mulandu wa mwangashi walowa,+ pantu baufumyako ku tunwa twenu.+ 6 Pantu kuli uluko ulwishile mu calo candi, ulwa maka kabili ulushingapendwa.+ Ameno ya luko meno ya nkalamo,+ kabili lwakwata incendwa sha nkalamo. 7 Lwalenga umwangashi wandi ukushala ica kupapa,+ no mukunyu wandi ukushala icishiki.+ Lwapulula fye onse no ku-upoosa.+ Ne misambo ya uko yabuuta na tuutu. 8 Lileni, nga filya filila nacisungu mu nsamu*+ pali nkobekela wa ku bukashana bwakwe.

9 “Ukutuula umutuulo wa ngano+ no mutuulo wa mwangashi+ kwapwa mu ng’anda ya kwa Yehova; bashimapepo, ababomfi+ ba kwa Yehova, baloosha.+ 10 Nabonaula ibala,+ umushili uleloosha;+ pantu nabonaula ingano, nabomika umwangashi uupya,+ amafuta nayakama.+ 11 Abalimi baikatwa insoni;+ abalimi ba myangashi bapumapo imisowa, pa mulandu wa ngano na pa mulandu wa barle; pantu takuli na kabili ukulobolola mu mabala.+ 12 Umwangashi wauma, umukunyu na o wabonsa. Lelo umupomegranate, na kancindu no muapele, imiti fye yonse iya mwi bala, nayuma;+ pantu ukusekelela kwaikatwa insoni no kufuma pa bana ba bantu.+

13 “Fwaleni insamu sha kulooseshamo, no kukunkunsha pa fifuba fyenu,+ mwe bashimapepo. Pumenipo imisowa, mwe babombela pa ciipailo.+ Ingileni, laaleni mu nsamu sha kulooseshamo ubushiku bonse, mwe babombela Lesa wandi; pantu nakwiminina ukutuula umutuulo wa ngano+ no mutuulo wa mwangashi mu ng’anda ya kwa Lesa wenu.+ 14 Bilisheni inshita ya kuleka ukulya.+ Longanyeni abantu ku kulongana kwacindamisha.+ Longanyeni abakalamba, abekashi bonse aba mu calo, ku ng’anda ya kwa Yehova Lesa wenu,+ no kulilila kuli Yehova.+

15 “Ala ubushiku bulya buleisa!+ Ubushiku bwa kwa Yehova buli mupepi,+ kabili bukeshila ubonaushi ukufuma ku Wa Maka Yonse!16 Bushe tatwaimwena na menso yesu ukuti balitupoka ifya kulya; no kuti mu ng’anda ya kwa Lesa wesu balifumyamo ukusekelela no kwanga?+ 17 Amakunyu ayauma yaonaikila pe samba lya bafosholo babo. Mu mayanda ya kututilamo tamuli nangu fimo. Nababongolola amatala, pantu ingano nashuma. 18 Iye ifyo ifitekwa filetuusaila! Moneni ing’ombe ubwingi ishilelulumba mu cimfulumfulu! Pantu takuli umulemfwe uwa kuti shilye.+ Kabili, impaanga ishingi e shaculilamo.

19 “Nalilila kuli imwe, mwe Yehova;+ pantu umulilo naoca umulemfwe wa mu matololo, kabili ulubingu nalubilimya imiti yonse iya mu mpanga.+ 20 Inama sha mu mpanga na sho shilefuluka imwe,+ pantu umupita amenshi namuuma,+ no mulilo naoca umulemfwe wa mu matololo.”

2 “Lisheni ipenga mu Sione,+ kabili welesheni ukuwelesha kwa bulwi+ mu lupili lwandi ulwa mushilo.+ Lekeni batutume abekashi ba mu calo bonse;+ pantu ubushiku bwa kwa Yehova buleisa,+ pantu nabupalama! 2 Bushiku bwa mfifi kabili ubwafiita fititi,+ ubushiku bwa makumbi kabili ubwafiitisha. Buli kwati lubuuto lwa ku maca ulwasalanganina pa mpili.+

“Kuli cinkupiti wa bantu kabili uwa maka;+ takwatala akuba uwaba ngo yu ukufuma umuyayaya,+ kabili takwakabe uukaba nga ena ku nkulo ne nkulo. 3 Ku ntanshi yakwe umulilo uleoca,+ na ku numa yakwe ulubingu lulepwishishisha.+ Icalo icili ku ntanshi yakwe cili nge bala lya Edeni;+ lelo ilyo apitapo ku numa kushala amatololo umushaba kantu, kabili takuli nangu fye cimo icipusuka kuli ena.

4 “Imimonekele yakwe ili nge mimonekele ya bakabalwe, kabili abutuka nga bakabalwe ba bulwi.+ 5 Atolauka+ pa muulu wa mpili no kupanga icongo nge ca maceleta, nge ca lubingu lwa mulilo ululeoca icani.+ Ali nga bantu aba maka, abaipekanya ukuya ku bulwi.+ 6 Pa mulandu wakwe abantu bakashikitika.+ Ne finso fyonse fikalamoneka fye ifyasakamikwa.+

7 “Abutuka nge mpalume.+ Anina ifibumba nga baume ba bulwi. Kabili umo umo aya mu nshila yakwe, kabili tafumamo mu nshila yakwe.+ 8 Kabili tabasunkana no munankwe. Enda ngo mwaume wine wine mu nshila yakwe; kabili ilyo bamo bawa ku fyanso, abashala tabeminina.

9 “Mu musumba e mo abutukila. Abutauka pa cibumba. Anina pa mayanda. Engilila pa mawindo kwati mupuupu. 10 Icalo icili pa ntanshi yakwe catenkana, imyulu yasunkaana. Akasuba no mweshi fyafiita,+ ne ntanda shaleka ukubalika.+ 11 Awe Yehova akasansula ishiwi+ lyakwe kwi bumba lyakwe ilya bashilika,+ pantu inkambi yakwe yalikulisha.+ Pantu wa maka uulesosa ishiwi lyakwe; pantu ubushiku bwa kwa Yehova bukalamba+ kabili bwa kutiinya icine cine, kabili nani engabushipikisha?”+

12 “Kabili na nomba line,” Yehova aletila, “bweleleni kuli ine ne mitima+ yenu yonse, pamo no kuleka ukulya+ no kulila no kupumapo imisowa.+ 13 Kabili lepuleni imitima yenu,+ mwilepula ifya kufwala iyo;+ bweleleni kuli Yehova Lesa wenu, pantu wa mutembo kabili wa nkumbu,+ alakokola ukukalipa+ kabili alifulisha icikuuku,+ kabili akabipilwa pa mulandu wa bucushi ubukaponena abantu bakwe.+ 14 Nani eshibe nga akapilibuka no kulanguluka+ no kuleka ilyo apita pashala ipaalo,+ umutuulo wa ngano no mutuulo wa mwangashi uwa kutuula kuli Yehova Lesa wenu?

15 “Lisheni ipenga mu Sione.+ Bilisheni inshita ya kuleka ukulya.+ Longanyeni abantu ku kulongana kwacindamisha.+ 16 Longanyeni abantu. Pekanyeni ulukuta.+ Kunganyeni abaume abakalamba. Longanyeni abana na baleonka.+ Lekeni shibwinga afume mu muputule wakwe, na nabwinga na o afume mu muputule wakwe uwa bwinga.

17 “Pa kati ka muputule wa kwingililapo ne ciipailo+ e po bashimapepo, ababomfi ba kwa Yehova, balilile no kutila, ‘Umfwileni ubulanda abantu benu, mwe Yehova, kabili mwilenga abantu benu ukuseebana,+ pa kuleka inko shibateke. Cinshi ico abantu na bantu bengalasosela abati: “Ali kwi Lesa wabo?”’+ 18 Kabili Yehova akaba no bufuba pa calo+ cakwe no kubelela uluse abantu bakwe.+ 19 Kabili Yehova akaasuka no kusosa ku bantu bakwe ati, ‘Moneni nkamutumina ingano no mwangashi uupya na mafuta, kabili mukekuta;+ kabili nshakamuseebanye na kabili ku nko.+ 20 No wa ku kapinda ka ku kuso+ nkamutalusha ukutali pali imwe, awe nkamutamfisha ku calo icabula amenshi kabili icashala icibolya, akalosha icinso cakwe kuli bemba+ wa ku kabanga ne numa yakwe kuli bemba+ wa ku masamba. Kabili ukununka kwakwe kukanina, no kupimpinuka kwakwe kukalanina fye;+ pantu akacita ifintu ifikalamba.’

21 “Witiina, we calo. Samwa no kusekelela; pantu Yehova akacita ifintu ifikalamba.+ 22 Mwitiina, mwe nama sha mu mpanga,+ pantu mu mpanga iya mulemfwe iya mu matololo mukamena icani iciteku.+ Pantu umuti ukatwala ifisabo fya uko.+ Umukunyu no mwangashi fikafumya amaka ya fiko.+ 23 Na imwe mwe bana ba kwa Sione, samweni no kusekelela muli Yehova Lesa wenu;+ pantu akamupeela imfula ya kubangilila iyalinga,+ kabili akamupongolwela imfula iifubauka, imfula ya kubangilila ne mfula ya kulekelesha, nga pa kubala.+ 24 Na apa kupumina ingano pakesula ingano ishisuma, ne fya kukaminamo imyangashi fikalapalamo umwangashi uupya na mafuta.+ 25 Kabili nkamubwesesha ifyo makanta aliile, ifyo abana ba makanta baliile, ne fyo impemfu ne fishimu fyaliile muli ilya myaka, e kutila ibumba lyandi ilya maka ilyo natumine muli imwe.+ 26 Kabili mukalya ica kuti mukekuta,+ e lyo mukatasha ne shina lya kwa Yehova Lesa wenu,+ uwamucitila ifipesha amano;+ kabili abantu bandi tabakekatwe insoni umuyayaya.+ 27 E lyo mukeshiba ukuti ndi muli Israele,+ no kuti nine Yehova Lesa wenu kabili takwaba umbi.+ Na bantu bandi tabakekatwe insoni umuyayaya.

28 “Kabili pa numa ya ifi nkapongolwela umupashi+ wandi pa bantunse+ bonse, kabili abana benu abaume na bana benu abanakashi+ bakasesema. Na bakalamba, bakalota ifiloto. Na balumendo, bakamona ifimonwa. 29 Kabili muli isho nshiku nkapongolwela umupashi wandi na pa babomfi abaume na pa babomfi abanakashi.+

30 “Kabili nkacita ifipesha amano mu muulu+ na pe sonde, umulopa no mulilo ne ntumba ya cushi.+ 31 Akasuba kakaaluka imfifi,+ no mweshi ukaaluka umulopa,+ ku kutangilila ubushiku bwa kwa Yehova ubukalamba kabili ubwa kutiinya.+ 32 Lelo onse uwalilila kwi shina lya kwa Yehova akapusuka;+ pantu mu lupili lwa Sione na mu Yerusalemu e mukaba abakapusuka,+ ukulingana ne fyo Yehova asosele, kabili bakaba pa bakapusuka, abo Yehova aleita.”+

3 “Pantu, moneni! mu nshiku shilya na mu nshita+ ilya, ilyo nkabwesha bankole ba mu Yuda na ba mu Yerusalemu,+ 2 e lyo nkalonganya ne nko+ shonse no kushitentemushisha mwi lungu lya kwa Yehoshafati;+ kabili e mo nkashipingwila pa mulandu wa bantu bandi kabili ubupyani bwandi abena Israele,+ abo basalangenye mu nko; no kwakana icalo candi.+ 3 Kabili balependwila ifipendwilo+ pa bantu bandi; kabili balepeela umwana umwaume ku kukabushamo cilende,+ no mwana umwanakashi balemushitisha ku kushitamo umwangashi, uwa kuti banwe.

4 “Na kabili, bushe iwe we Turi na Sidone+ na imwe mwe fitungu fyonse ifya baPelishiti+ ni mwe mwingapama ukucita ifi kuli ine? Bushe ifi mulencita e cilambu? Kabili ifi nga e fyo mulencita, nkangufyanya ukulandula pa micitile yenu.+ 5 Pantu mwasenda silfere wandi na golde wandi,+ kabili mwaingisha ne fisuma fyandi mu matempele yenu;+ 6 kabili mwashitisha+ abana ba kwa Yuda na bana ba mu Yerusalemu ku baGriki,+ pa kuti mubatalushe ku mupaka wabo;+ 7 moneni ndelenga bafume kulya kuntu mwabashitishe,+ kabili nkalandula pa micitile yenu.+ 8 Kabili nkapeela* abana benu abaume na bana benu abanakashi ku bana ba kwa Yuda,+ na bo bakabashitisha ku bena Sheba,+ ku luko ulwa kutali;+ pantu Yehova umwine nasosa.

9 “Bilisheni ici mu nko,+ ‘Ipekanishisheni ubulwi! Cincisheni impalume!+ Lekeni bapalame! Bese abaume ba bulwi bonse!+ 10 Fuleni amaplao yenu yabe impanga, ne fya kutungwilako+ imiti fyenu fibe amafumo. No watembuka, asose ati: “Ndi mpalume.”+ 11 Iseni ku kwafwilisha, mwe nko shonse ishashingulukako,+ no kuilonganya.’”+

Mwe Yehova, tentemushisheni impalume shenu kuli cilya cifulo.+

12 “Lekeni inko shiime, shinine shise na mwi lungu lya kwa Yehoshafati;+ pantu mulya e mo nkekala ku kupingula inko shonse ishashingulukako.+

13 “Pishenimo icikwakwa,+ pantu nafipya ifya kuseepa.+ Iseni, tentemukeni, pantu ica kukaminamo imyangashi naciisula.+ Ifya kukaminamo filepala; pantu ububi bwabo nabufula.+ 14 Bacinkupiti, kabili bacinkupiti bali mu mpanga yabatama iya kupingwilamo,+ pantu ubushiku bwa kwa Yehova buli mupepi, mu mpanga yabatama iya kupingwilamo.+ 15 Akasuba no mweshi fikaaluka imfifi, ne ntanda tashakabalike.+ 16 Kabili mu Sione e mo Yehova akabulumina, na mu Yerusalemu e mo akasanswila ishiwi lyakwe.+ Kabili fikatenta umuulu ne sonde;+ lelo Yehova akaba ubucingo ku bantu bakwe,+ kabili icubo ca bana ba kwa Israele.+ 17 E lyo mukeshiba ukuti nine Yehova Lesa wenu,+ uwikala mu Sione ulupili lwandi ulwa mushilo.+ Kabili Yerusalemu akaba icifulo ca mushilo;+ na bambi bambi, tabakapitemo na kabili.+

18 “Kabili mu bushiku bwine ubo, impili shikatonya umwangashi uwalowa,+ no tupili tukakonkolokamo umukaka, ne milonga yonse iya mu Yuda ikalapitamo amenshi. Kabili mu ng’anda ya kwa Yehova e mukafuma akamfukumfuku,+ kabili kakalatapilila umupokapoka uwa Miti ya Mushita.+ 19 Egupti akaba icibolya;+ na Edomu akashala amatololo umushaba abantu,+ pa mulandu wa bunkalwe ku bana ba kwa Yuda, uo mu calo cakwe basuumishe umulopa wa kaele.+ 20 Lelo Yuda, akekalwamo+ umuyayaya, na Yerusalemu akekalwamo ku nkulo ne nkulo.+ 21 Kabili nkalamona umulopa wabo ukuti wa kaele, umulopa uo nshalemona ukuti wa kaele;+ na Yehova akalaikala mu Sione.”+